1. Ano an naiimahinar mo pag iniisip mo si Jehova?

 NAPURBARAN mo na daw na iladawan sa isip mo si Jehova? Pag namimibi ka saiya, ano an naiimahinar mo? Dawa ngani dai nahihiling si Jehova, ilinaladawan siya kan Bibliya sa manlain-lain na paagi. Inapod si Jehova na “aldaw asin kalasag” asin “sarong kalayo na minatumtom.” (Sal. 84:11; Heb. 12:29) An presensiya niya ilinadawan na siring sa sarong gapong sapiro, sarong nagliliwanag na metal, asin sarong maliwanagon na bulalangaw. (Ezek. 1:​26-28) Huli sa arog kaiyan na mga deskripsiyon manungod ki Jehova, tibaad makamati kita nin sobrang pagngalas o tibaad ngani mamati ta na mayo kitang halaga.

2. Ano an puwedeng makaulang sa iba na magin harani ki Jehova?

² Huling dai ta nahihiling si Jehova, tibaad masakitan kitang maniwala na namumutan niya kita. Iniisip kan iba na dai lamang sinda mamumutan ni Jehova huli sa maraot na mga inagihan ninda sa buhay. Tibaad dai lamang sinda nagkaigwa nin ama na nagpahiling nin pagkamuot sa sainda. Nasasabutan ni Jehova an arog kaiyan na mga pagmati asin kun ano an epekto kaiyan sa sato. Para tabangan kita, ihinahayag niya sa sato paagi sa saiyang Tataramon an magayunon niyang personalidad.

3. Taano ta dapat tang siyasaton an manungod sa pagkamuot ni Jehova?

³ An sarong tataramon na pinakamagayon na deskripsiyon ki Jehova iyo an pagkamuot. (1 Juan 4:8) An Diyos pagkamuot. Pagkamuot an nagpapahiro saiya sa gabos niyang ginigibo. An pagkamuot nin Diyos bulaos asin mapuwersa nanggad, mala ngani ta ipinapahiling niya iyan dawa sa mga dai namumuot sa saiya. (Mat. 5:​44, 45) Sa artikulong ini, sisiyasaton niyato an manungod ki Jehova asin an saiyang pagkamuot. Mantang mas namimidbid ta an satong Diyos, mas lalo ta man siyang mamumutan.

 NAMUMUTAN KITANG MARHAY NI JEHOVA

4. Ano an namamatian mo sa pagpadangat ni Jehova? (Hilingon man an ritrato.)

⁴ “Si Jehova mamumuton na marhay.” (Sant. 5:11) Sa Bibliya, ikinumparar niya an saiyang sadiri sa sarong mamumuton na ina. (Isa. 66:​12, 13) Imahinara an sarong ina na mapagpadangat na inaaling an sadit niyang aki. Mamumuton na kinukurukulkol niya ini asin mabuot saka malumanay na kinakaulay. Pag naghihibi o nakukulgan ini, sinisigurado niyang maitao kun ano an kaipuhan kaini. Pag nakukulgan kita, makakaasa man kita sa pagkamuot ni Jehova. Isinurat kan salmista: “Kan magparadakul an ikinakahadit ko, rinanga asin pinaginhawa mo ako.”​—Sal. 94:19.

5. Paano ka nakikinabang huli sa maimbod na pagkamuot ni Jehova?

⁵ Si Jehova maimbod. (Sal. 103:8) Dai niya kita tinatalikdan pag may nagibo kitang sala. Pauruutrong pinamundo kan nasyon nin Israel si Jehova; minsan siring, inasigurar niya an nagsusulsol na banwaan kan saiyang maimbod na pagkamuot paagi sa mga tataramon na ini: “Nagin mahalagang marhay ka sa sakong mga mata, tinawan ka nin onra, asin namutan taka.” (Isa. 43:​4, 5) Dai nagbago an pagkamuot nin Diyos. Makakaasa kita pirmi diyan. Dawa kun nakagibo kita nin magabat na kasalan, dai kita binabayaan ni Jehova. Pag nagsulsol kita asin nagbalik ki Jehova, mamamati ta na bilog pa man giraray an pagkamuot niya sa sato. Nanunuga siya na “bulaos siyang magpapatawad.” (Isa. 55:7) Ilinaladawan kan Bibliya an pagpapatawad na iyan na nagdadara nin “mga panahon nin kaginhawahan . . . hali ki Jehova mismo.”​—Gibo 3:19.

6. Ano an itinutukdo sa sato kan Zacarias 2:8 manungod ki Jehova?

⁶ Basahon an Zacarias 2:8. Huling namumutan kita ni Jehova, naririsa niya tulos an mga namamati ta asin gustong-gusto niyang protektaran kita. Nakukulgan siya pag nakukulgan kita. Kaya makakasigurado kitang sisimbagon niya kita pag namibi kita: “Ingatan mo ako siring sa alinawnaw kan mata mo.” (Sal. 17:8) An mata sarong sensitibo asin mahalagang marhay na parte kan hawak. Kaya kan ikumparar kita ni Jehova sa alinawnaw kan saiyang mata, garo niya man sana sinasabing, ‘An siisay man na mangulog sa saindo, mga lingkod ko, kinukulgan an saro na mahalagang marhay sako.’

7. Taano ta dapat tang pakusugon an satong pagtitiwala sa pagkamuot ni Jehova?

⁷ Gusto ni Jehova na magin kumbinsido ka na namumutan ka niya. Pero aram niya na huli sa  maraot na mga inagihan ta, tibaad magduda kita kun baga mamumutan niya kita. O tibaad napapaatubang kita ngunyan sa mga sitwasyon na nakakabalo kan satong pagtitiwala sa pagkamuot ni Jehova. Ano an mapakusog kan satong pagtitiwala? An pag-aram sa kun paano ipinapahiling ni Jehova an saiyang pagkamuot ki Jesus, sa mga linahidan, asin sa sato gabos.

KUN PAANO IPINAPAHILING NI JEHOVA AN SAIYANG PAGKAMUOT

8. Taano ta sigurado si Jesus na namumutan siya kan saiyang Ama?

⁸ Sa laog nin dai mabilang na mga taon, padagos na pinakusog ni Jehova asin kan namumutan niyang Aki na si Jesus an saindang relasyon bilang mag-ama. Sinda an may pinakahalawig na pag-ibanan sa bilog na uniberso. Espesipikong ipinahayag ni Jehova an saiyang pagkamuot ki Jesus, arog kan mababasa ta sa Mateo 17:5. Puwede kutang sabihon lang ni Jehova, ‘Ini an saro na sakong inuuyunan.’ Pero, gusto niyang maaraman ta kun gurano niya kanamumutan si Jesus, kaya inapod niya ining “an sakuyang Aki, an namumutan.” Ipinag-orgulyo ni Jehova si Jesus asin an madali na kaining gibuhon. (Efe. 1:7) Asin dai nagdududa si Jesus sa namamatian kan saiyang Ama para sa saiya. Siguradong-sigurado siya na namumutan siya ni Jehova. Pauruutro niyang ipinahayag nin may kumpiyansa na namumutan siya kan Ama.​—Juan 3:35; 10:17; 17:24.

9. Anong tataramon an naglaladawan sa pagkamuot ni Jehova sa mga linahidan? Ipaliwanag. (Roma 5:5)

⁹ Ipinahayag man ni Jehova an saiyang pagkamuot sa mga linahidan. (Basahon an Roma 5:5.) Mangnuhon an tataramon na “ipinano.” Ilinaladawan iyan nin sarong reperensiya na “siring sa sarong makusog na bulos.” Sarong mapuwersang paglaladawan nanggad para iduon kun gurano kadakula kan pagkamuot ni Jehova para sa mga linahidan! Aram kan mga linahidan na “namumutan [sinda] kan Diyos.” (Jud. 1) Ipinahayag ni apostol Juan an namamatian ninda kan isurat niya: “Hilinga kun anong klaseng pagkamuot an ipinahiling kan Ama sa sato, mala ta inapod ngani kitang mga aki nin Diyos!” (1 Juan 3:1) Para sana daw sa mga linahidan an pagkamuot nin Diyos? Bako. Pinatunayan ni Jehova na gabos kita namumutan niya.

10. Ano an pinakanangungurog na patunay na namumutan ka ni Jehova?

¹⁰ Ano an pinakanangungurog na patunay kan pagkamuot ni Jehova? An pantubos—an pinakaekstraordinaryong pagkamuot na ipinahiling kisa kasuarin man! (Juan 3:16; Roma 5:8) Itinao ni Jehova an namumutan niyang marhay na Aki asin itinugot na magadan ini para sa gabos na tawo tangani na mapatawad an satong mga kasalan asin magin amigo Niya kita. (1 Juan 4:10) Mantang mas hinuhurop-hurop ta an sakripisyo na ginibo ni Jehova asin ni Jesus, mas lalo ta man na masasabutan kun gurano kadakula kan pagkamuot ninda sa kada saro sa sato. (Gal. 2:20) Itinao an pantubos bako sana para mabayadan kun ano an hinahagad kan hustisya. Iyan sarong regalo huli sa pagkamuot. Pinatunayan ni Jehova an pagkamuot niya sa sato kan isinakripisyo niya an saiyang pinakanamumutan—si Jesus. Itinugot ni Jehova na magsakit asin magadan an saiyang Aki alang-alang sa sato.

11. Ano an manunudan ta sa Jeremias 31:3?

¹¹ Arog kan nahiling ta, imbes na sadirihon sana an namamatian niya, maugmang ipinapahayag ni Jehova an saiyang pagkamuot sa sato. (Basahon an Jeremias 31:3.) Irinani kita ni Jehova sa saiya huling namumutan niya kita. (Ikumparar an Deuteronomio 7:​7, 8.) Mayo nin ano man o nin siisay man an makakapasuway sato sa pagkamuot na iyan. (Roma 8:​38, 39) Ano an epekto saimo kan pagkamuot na iyan? Basahon an Salmo 23, asin aramon an namati ni David huli kan pagkamuot asin pagmakulog ni Jehova asin kun ano man an puwedeng magin epekto kaiyan sa lambang saro sa sato.

 ANO AN EPEKTO SAIMO KAN PAGKAMUOT NI JEHOVA?

12. Paano mo susumaryuhon an Salmo 23?

¹² Basahon an Salmo 23:​1-6. An Salmo 23 sarong awit na nagpapahayag nin kumpiyansa sa pagkamuot asin mamumuton na pag-ataman ni Jehova. Ilinaladawan digdi ni David, an kagsurat kan salmong ini, an dayupot na relasyon ninda ni Jehova, an saiyang Pastor. Kampante si David sa paggiya saiya ni Jehova, asin lubos siyang nagsasarig Saiya. Aram ni David na papahilingan siya ni Jehova nin pagkamuot sa bilog niyang buhay. Taano ta arog kaiyan kakusog an saiyang kumpiyansa?

13. Taano ta sigurado si David na aatamanon siya ni Jehova?

¹³ “Dai ako kukulangon nin ano man.” Namati ni David na inaataman siyang marhay huling pirming itinatao ni Jehova an mga pangangaipo niya. Igwa man si David nin dayupot na pakikiamigo ki Jehova asin kan pag-uyon Niya. Kaya sigurado siya na ano man an mangyari sa maabot, padagos na itatao ni Jehova an saiyang mga pangangaipo. An pagtitiwala ni David sa pagkamuot ni Jehova mas makusog nanggad kisa sa saiyang mga ikinakahadit asin tinatawan siya kaiyan nin dakulang kaugmahan asin pagkakontento.​—Sal. 16:11.

14. Paano ni Jehova puwedeng ipamati sato an saiyang mamumuton na pag-ataman?

¹⁴ Mamumuton na inaataman kita ni Jehova, lalo na pag may maraot na pangyayari sa buhay ta. Si Claire, a na naglingkod sa Bethel nin labing 20 taon, dai aram kun ano an gigibuhon kan an saiyang pamilya makaeksperyensiya nin sunod-sunod na magabat na problema. Naistrok an ama niya, natiwalag an saro sa tugang niyang babayi, asin nabangkarote an sadit na negosyo  kan saiyang pamilya saka nawaran sinda nin harong. Paano ipinahiling ni Jehova an saiyang mamumuton na pag-ataman sa sainda? Sinabi ni Claire: “Sinigurado ni Jehova na an sakuyang pamilya igwa pirmi kan kaipuhan ninda sa kada aldaw. Dakul na beses na tinawan kami ni Jehova nin labi pa sa kaipuhan mi! Pirmi kong ginigirumdom an mga pagkakataon na namati ko an pagpadangat ni Jehova, asin pinapahalagahan kong marhay an mga iyan. An paggirumdom sa mga iyan nakakatabang sa sako na magpadagos lang sa ibong nin mga kasakitan.”

15. Ano an nakapaginhawa ki David? (Hilingon man an ritrato.)

¹⁵ “Pinapaginhawa niya ako.” May mga pagkakataon na nahadit na marhay si David huli sa gabos na problema asin pagbalo na inaagihan niya. (Sal. 18:​4-6) Minsan siring, an pagpadangat asin pag-ataman ni Jehova nagpaginhawa sa saiya. Giniyahan ni Jehova an saiyang pinangluluyahan na amigo pasiring sa “maduot na mga pasabsaban” asin sa “mga pahingaluan na bastante sa tubig.” Huli kaiyan, kuminusog giraray si David asin nakapagpadagos.​—Sal. 18:​28-32.

16. Paano nakapaginhawa saimo an pagkamuot ni Jehova?

¹⁶ Arog man kaiyan sa ngunyan. “Huli sa maimbod na pagkamuot ni Jehova kun kaya dai kita nagkagaradan” kan mapaatubang kita sa mga pagbalo asin kadipisilan sa buhay. (Lam. 3:22; Col. 1:11) Pag-isipan an halimbawa ni Rachel. Grabe an kamunduan niya kan an agom niya bayaan siya saka si Jehova kan panahon kan COVID-19 na pandemya. Ano an ginibo ni Jehova para sa saiya? Sinabi niya: “Sinigurado ni Jehova na mamati kong namumutan ako. Pinalibutan niya ako nin dakul na amigo na nagtao sa sako nin panahon, mga pagkakan, nagpadara nin nakakapakusog na mga mensahe asin teksto, nag-asigurar sako paagi sa mabuot na ngirit, asin padagos na nagpagirumdom sa sako na inaataman ako ni Jehova. Pirmi kong pinapasalamatan si Jehova huli sa pagtao sa sako nin dakulang pamilya na namumuot sako.”

17. Taano ta dai natatakot si David “sa ano man na kapahamakan”?

¹⁷ “Dai ako natatakot sa ano man na kapahamakan, ta ika sakuyang kaibanan.” Si David parating napaatubang sa peligro, asin kadakul siyang makusog na mga kalaban. Pero huli sa pagkamuot ni Jehova, namati niyang ligtas siya saka protektado. Namatian ni David na si Jehova nasa kampi niya sa ano man na sitwasyon, asin nagtao iyan sa saiya nin kumpiyansa. Kaya masasabi niya sa sarong kanta: “Ilinigtas [ako ni Jehova] sa gabos na kinakatakutan ko.” (Sal. 34:4) Talagang natakot si David, pero an pagkamuot niya ki Jehova mas makusog kisa sa takot na namamatian niya.

18. Pag aram tang namumutan kita ni Jehova, paano iyan puwedeng magpakusog sa sato pag natatakot kita?

 ¹⁸ Pag aram tang namumutan kita ni Jehova, paano iyan nagpapakusog sa sato pag napapaatubang kita sa nakakatakot o masakit na mga sitwasyon? Ilinadawan kan payunir na si Susi an namati nindang mag-agom kan maghugot an saindang aking lalaki: “Nakaka-trauma talaga an biglaan na trahedya saka pagmati mo mayo kang kalaban-laban saka dai mo aram an gigibuhon. Pero huli sa pagpadangat ni Jehova, namati ming ligtas kami saka protektado.” Nagirumduman ni Rachel na sinambit kasubago: “Sarong banggi kan makamati ako nin grabeng kulog nin buot, kahaditan, saka takot, namibi ako ki Jehova na may grabeng pagtangis. Kan mismong oras na idto, namati ko na pinaginhawa niya an puso ko asin pinakalma ako, arog kan ginigibo kan sarong ina sa saiyang umboy, dangan napaturog ako. Dai ko talaga malilingawan an pangyayaring idto.” An elder na si Tasos napreso nin apat na taon huli sa pagsayumang magmilitar. Paano niya naeksperyensiyahan an pagkamuot asin pag-ataman ni Jehova? Sinabi niya: “Itinao ni Jehova an gabos kong pangangaipo asin dakul pang iba. Pinakusog kaini an kumpiyansa ko na lubos akong makakapagtiwala sa saiya. Paagi man sa saiyang espiritu, tinawan ako ni Jehova nin kaugmahan dawa nasa nakakamundong marhay na sitwasyon. Pinakusog ako kaini na mantang mas nagtitiwala ako ki Jehova, mas lalo ko man na mamamati an pagkamuot niya sa sako. Kaya pinunan kong maglingkod saiya bilang regular payunir mantang nasa presuhan.”

MAGIN DAYUPOT SA SAIMONG MAPAGPADANGAT NA AMA

19. (a) Ano an epekto sa satong mga pamibi pag aram tang namumutan kita nin Diyos? (b) Anong deskripsiyon manungod sa pagkamuot ni Jehova an personal na nakapahiro sa saimo? (Hilingon an kahon na “ Mga Tataramon na Makakatabang sa Sato na Mamati an Mainit na Pagkamuot ni Jehova.”)

¹⁹ An mga eksperyensiyang pinag-ulayan ta nagpapatunay na si Jehova, “an Diyos nin pagkamuot,” nasa kaibanan ta! (2 Cor. 13:11) Interesado siya sa kada saro sa sato. Kumbinsido kita na “napapalibutan [kita] kan Saiyang maimbod na pagkamuot.” (Sal. 32:10) Mantang mas hinuhurop-hurop ta kun paano niya ipinapahiling sa sato an saiyang pagkamuot, mas nagigin totoong-totoo man siya sa sato asin mas lalo kitang napaparani sa saiya. Makakadulok kita sa saiya na mayong pag-alangan asin makakapagsabi na kaipuhan tang marhay an pagkamuot niya. Puwede tang sabihon saiya an gabos na ikinakahadit ta, na nagtitiwalang nasasabutan niya kita asin gustong-gusto kitang tabangan.​—Sal. 145:​18, 19.

20. Paano kita mas napaparani ki Jehova huli sa pagkamuot niya?

²⁰ Kun paanong napaparani kita sa mainit na kalayo pag malipot an panahon, napaparani man kita sa mainit na pagkamuot ni Jehova. Maski ngani mapuwersa an pagkamuot ni Jehova, mapagpadangat man iyan. Kaya akuon an mainit na pagkamuot ni Jehova. Asin lugod na pahiruon kita gabos kan saiyang pagkamuot asin masabi tang: “Namumutan ko si Jehova”!—Sal. 116:1.