1-2. Anong mga kadipisilan an tibaad inaagihan kan maimbod na mga lingkod ni Jehova?

 AN MGA trahedya o teribleng mga pangyayari puwedeng biglang magpabago sa buhay ta. Halimbawa, an sarong maimbod na brother na si Luis a na-diagnose na igwa nin sarong bibihirang klase nin kanser. Sinabihan siya kan doktor na pirang bulan na sana siyang mabubuhay. Si Monika asin an saiyang agom sibot sa espirituwal na mga gibuhon. Tapos sarong aldaw, naaraman ni Monika na an saiyang agom, na sarong elder, igwa nin dobleng pamumuhay sa laog nin dakul na taon. Si Olivia, sarong sister na daing agom, napiritan na mag-ebakwar huling may papaabot na makusugon na bagyo. Pagbalik niya sa saiyang harong, garaba na iyan. Bigla na sana, an buhay kan mga indibidwal na ini biyong nabago. Arog man daw kaiyan an naeksperyensiyahan mo? Napaatubang ka na daw sa sarong pangyayari na biglang nagpabago sa buhay mo?

² Bilang maimbod na mga lingkod ni Jehova, napapaatubang kita sa mga kadipisilan asin mga hilang na naeeksperyensiyahan man kan bilog na katawuhan. Puwedeng mapaatubang man kita sa pagkontra o pagpersegir kan mga tawong nauungis sa banwaan nin Diyos. Dawa ngani dai kita ilinilikay ni Jehova sa arog kaiyan na mga kasakitan, nanunuga siya na tatabangan niya kita. (Isa. 41:10) Sa tabang niya, mapagdadanay ta an satong kaugmahan, makakagibo kita nin marahay na mga desisyon, asin makakapagdanay kitang maimbod sa saiya dawa sa pinakamasakit na mga sitwasyon sa buhay ta. Sa artikulong ini, sisiyasaton ta an apat na paagi kun paano kita tinatabangan ni Jehova sa masakit na mga panahon. Pag-uulayan ta man kun ano an dapat tang gibuhon para mag-ako kan tabang na itinatao niya.

 BABANTAYAN KA NI JEHOVA

3. Pag nasa masakit na sitwasyon kita, tibaad madipisilan kitang gibuhon an ano?

³ Mga kadipisilan. Pag nasa masakit na sitwasyon kita, tibaad madipisilan kitang makapag-isip nin malinaw asin makagibo nin mga desisyon. Taano? Huling tibaad grabe an kamunduan kan puso ta asin an isip ta tibaad pano nin mga kahaditan. Tibaad pagmati ta garo kita aking nalalagalag, na dai aram kun sain maduman. Mangnuhon an namati kan duwang sister na sinambit kasubago manungod sa mga kasakitan na inagihan ninda. Sinabi ni Olivia: “Pagkatapos na magaba an harong ko dahil sa bagyo, dai ko talaga aram kun ano an gigibuhon ko.” Manungod man sa pagtraydor kan agom ni Monika, sinabi niya: “Grabeng pagkadisganar an namatian ko. Pagmati ko garo sinaksak an puso ko. Dai ko na aram kun paano ibabalik sa normal an buhay ko. Dai ko talaga hunaon na mangyayari idto sako.” Ano an panuga sa sato ni Jehova para tabangan kita pag namamati tang dai ta na kaya?

4. Uyon sa Filipos 4:​6, 7, ano an panuga sa sato ni Jehova?

⁴ Kun paano kita tinatabangan ni Jehova. Nanunuga siya na itatao niya sa sato an inaapod kan Bibliya na “an katuninungan nin Diyos.” (Basahon an Filipos 4:​6, 7.) An katuninungan na ini nanunungod sa pagigin kalmado asin katuninungan nin isip saka puso na resulta kan pagkaigwa nin haraning relasyon sa saiya. An katuninungan na iyan “nakakalabi sa gabos na pakasabot”; marahayon nanggad iyan kisa sa ano man na maiimahinar ta. Naeksperyensiyahan mo na daw na mamibi nin udok ki Jehova dangan pagkatapos, napangalas ka huli sa grabeng katuninungan na namati mo? An namatian mo iyo “an katuninungan nin Diyos.”

5. Paano an katuninungan nin Diyos magbabantay sa satong isip asin puso?

⁵ Sinasabi man sa tekstong iyan na an katuninungan nin Diyos “magbabantay,” o maprotektar, “sa saindong puso asin kaisipan.” An orihinal na terminong ginamit para sa “magbabantay” sarong terminong pangmilitar asin ginagamit iyan para ipanungod sa mga suldados na nagbabantay sa sarong siyudad asin nagpoprotektar diyan laban sa mga pag-atake. An mga nakaistar sa nakukutaan na siyudad matuninong na nakakaturog huling aram nindang may mga suldados na nagbabantay sa mga trangkahan. Sa kaparehong paagi, pag an katuninungan nin Diyos nagbabantay sa satong puso asin isip, tiwasay kita huling aram tang ligtas kita. (Sal. 4:8) Arog kan nagin sitwasyon ni Hana, dawa dai tulos magbago an sitwasyon ta, puwede pa man giraray kitang makamati nin katuninungan. (1 Sam. 1:​16-18) Asin pag igwa kita nin katuninungan, sa parati, mas nagigin madali sa sato na makapag-isip nin malinaw asin gumibo nin madunong mga desisyon.

6. Ano an dapat tang gibuhon para makinabang sa katuninungan Diyos? (Hilingon man an ritrato.)

⁶ Kun ano an dapat tang gibuhon. Pag napupurisaw ka, mag-apod ka nin bantay, sabi ngani.  Paano? Mamibi sagkod na mamati mo an katuninungan nin Diyos. (Luc. 11:9; 1 Tes. 5:17) Si Luis, na sinambit subago, ipinaliwanag kun paano ninda nakayanan kan agom niyang si Ana kan maaraman nindang pirang bulan na sana siyang mabubuhay. Sinabi niya: “Pag nasa sitwasyon na arog kaini, masakiton talaga na makagibo nin desisyon manungod sa pagpabulong saka sa iba pang mga bagay. Pero dakulaon talagang tabang an pagpamibi para magkaigwa kami nin katuninungan sa panahon na idto.” Sinabi ni Luis saka kan saiyang agom na udok sa puso asin pauruutro sindang namimibi, na hinahagad ki Jehova na tawan sinda nin katuninungan nin isip, kalmadong puso, asin kan kadunungan na gumibo nin marahay na mga desisyon. Asin namati ninda an tabang ni Jehova. Kun napapaatubang ka sa masakit na sitwasyon, magin matiyaga sa pagpamibi, asin maeeksperyensiyahan mo an katuninungan ni Jehova mantang binabantayan kaiyan an saimong puso asin isip.​—Roma 12:12.

PAPARIGUNON KA NI JEHOVA

7. Ano an tibaad mamati ta pag nakakaeksperyensiya kita nin grabeng mga kadipisilan?

⁷ Mga kadipisilan. Pag nag-aagi nin grabeng mga kadipisilan, an satong pagmati, kaisipan, saka reaksiyon tibaad dai magin balanse. An satong emosyon tibaad magin arog nin sarong barko na pigrarapado nin makusog na alon. Sinabi ni Ana, na sinambit subago, na manlain-lain na emosyon an namati niya kan magadan si Luis. Sinabi niya: “Pag nakamati ako nin grabeng kamunduan, sunod kaiyan mahihirak na ako sa sadiri ko. Tapos naaanggot ako ta mayo na siya.” May mga pagkakataon man na napupungaw si Ana asin nadidisganar pag kaipuhan niyang magdesisyon manungod sa mga bagay na mahusay na nagigibo kaidto ni Luis. Kun minsan, pagmati niya yaon siya sa tahaw nin mabagyong dagat. Paano kita tinatabangan ni Jehova pag nalalamos na kita kan siring na mga emosyon?

8. Arog kan sinasabi sa Isaias 33:​6, ano an sinisigurado sa sato ni Jehova?

⁸ Kun paano kita tinatabangan ni Jehova. Sinisigurado niya sa sato na paparigunon niya kita o ‘tatawan nin seguridad.’ (Basahon an Isaias 33:6.) Pag an barko inabutan nin sarong bagyo sa dagat, posibleng magkiwang-kiwang iyan nin grabe. Para makontra iyan, dakul na barko an igwa nin pambalanse (stabilizer) sa mag-ibong na parte kan irarom kan barko. Huli sa mga pambalanseng ini, dai gayong nagkikiwang-kiwang an barko kaya nagigin mas ligtas an pagbiyahe asin mas komportable an mga pasahero. Pero an mga pambalanseng ini mas naggagana pag nag-aabante an barko. Sa kaparehong paagi, paparigunon man kita ni Jehova kun padagos man kitang maimbod na maglilingkod sa saiya sa panahon nin mga kasakitan.

9. Paano makakatabang an satong mga pantabang sa pag-research para makontrol an satong emosyon? (Hilingon man an ritrato.)

 ⁹ Kun ano an dapat tang gibuhon. Pag nasasakitan ka na huli sa grabeng mga emosyon, gibuhon an saimong pinakamakakaya tanganing maipadagos mo an saimong espirituwal na rutina. Iyo, tibaad dai mo na magibo an iba sa nagigibo mo kaidto, pero tandaan na rasonable si Jehova. (Ikumparar an Lucas 21:​1-4.) Bilang kabtang kan saimong espirituwal na rutina, magtao nin oras para sa personal na pag-adal asin paghurop-hurop. Taano? Paagi sa saiyang organisasyon, nagtatao si Jehova nin marahayon na mga impormasyon na basado sa Kasuratan na makakatabang sa sato na magdanay na marigon. Para makahanap nin impormasyon na angay sa sitwasyon mo, puwede mong gamiton an mga pantabang sa pag-research na igwa sa lengguwahe mo, arog kan JW Library^® app, Watch Tower Publications Index, asin Giya sa Pag-research Para sa Mga Saksi ni Jehova. Si Monika, na sinambit kasubago, nagsabi na ginagamit niya an mga pantabang sa pag-research para makakua nin mga sadol pag naggagrabe na an saiyang emosyon. Halimbawa, pigsi-search niya an tataramon na “kaanggutan”; minsan man, an tataramon na “pagtraydor” o “kaimbudan.” Dangan mabasa siya sagkod na gumian an pagmati niya. Sinabi niya: “An nakakatarantang pag-research sa puon nagigin sarong mamumuton na kugos ni Jehova pagkatapos. Mantang nagbabasa ako, narerealisar ko na nasasabutan ni Jehova an gabos kong namamatian, asin tinatabangan niya ako.” An siring na suporta hali ki Jehova makakatabang man sa saimo na makontrol an saimong emosyon sagkod na magin kalmado an pagmati mo.​—Sal. 119:​143, 144.

AALALAYAN KA NI JEHOVA

10. Ano an tibaad mamatian ta pagkatapos nin sarong nakaka-traumang pangyayari?

¹⁰ Mga kadipisilan. Pagkatapos nin nakaka-traumang pangyayari, may mga aldaw na tibaad pangluyahan kita sa pisikal asin emosyonal. Tibaad mamati ta na garo kita sarong napilay na atleta na dating marikas magdalagan pero ngunyan pakiang-kiang na. Puwedeng masakitan kitang gibuhon an mga trabaho na dati pasil ta sanang nagigibo, o tibaad mayo na kitang gana na gibuhon an mga aktibidad na dati gustong-gusto ta. Arog ni Elias, tibaad pagmati ta masakiton magbangon. An gusto ta na sana magparaturog. (1 Ha. 19:​5-7) Ano an ipinanuga ni Jehova na gigibuhon niya pag pinangluluyahan kita?

11. Ano an saro pang paagi na tinatabangan kita ni Jehova? (Salmo 94:18)

¹¹ Kun paano kita tinatabangan ni Jehova. Nanunuga siya na aalalayan niya kita. (Basahon  an Salmo 94:18.) Kun paanong an sarong napilay na atleta nangangaipo nin pag-alalay tanganing makahiro, tibaad kaipuhan ta man nin tabang tanganing magdanay na aktibo sa paglilingkod ki Jehova. Sa mga panahon na iyan, inaasigurar kita ni Jehova: “Ako, si Jehova na saimong Diyos, an nagkakapot sa tuo mong kamot, an Saro na nagsasabi sa saimo, ‘Dai ka matakot. Tatabangan taka.’” (Isa. 41:13) Naeksperyensiyahan ni Hading David an tabang na ini. Kan mapaatubang siya sa mga pagbalo asin kalaban, sinabi niya ki Jehova: “An tuo mong kamot an nagtatabang sa sako.” (Sal. 18:35) Pero paano kita tinatabangan ni Jehova?

12. Siisay an puwedeng gamiton ni Jehova para tabangan kita pag pinangluluyahan kita?

¹² Sa parati, tinatabangan kita ni Jehova paagi sa pagpahiro sa iba na tabangan kita. Halimbawa, sarong beses kan pangluyahan si David, binisita siya kan amigo niyang si Jonathan para pakusugon asin dagkahon siya. (1 Sam. 23:​16, 17) Arog man kaiyan an ginibo ni Jehova kan pilion niya si Eliseo para magtao nin praktikal na tabang ki Elias. (1 Ha. 19:​16, 21; 2 Ha. 2:2) Sa ngunyan, puwede man na gamiton ni Jehova an satong mga kapamilya, mga amigo, o an mga elder para tabangan kita. Minsan siring, pag nakulgan an satong buot, tibaad tendensiya ta na rumayo sa iba asin gusto ta lang na magsolo. Iyo, normal iyan. Pero ano an puwede tang gibuhon para mag-ako kan tabang ni Jehova?

13. Ano an dapat tang gibuhon para mag-ako kan tabang ni Jehova? (Hilingon man an ritrato.)

¹³ Kun ano dapat tang gibuhon. Labanan an tendensiyang isuway an sadiri. Pag nagparasolo-solo kita, sa parati nagigin hayakpit an kaisipan ta, dangan an pagpaparaisipon ta na lang iyo an sadiri ta saka an problemang inaagihan ta. An arog kaiyan na kaisipan puwedeng makaapektar sa mga desisyon na ginigibo ta. (Tal. 18:1) Siyempre, may mga oras na kaipuhan tang magsolo-solo nguna, lalo na pag may trahedyang uminagi sa buhay ta. Minsan siring, kun padagos tang isusuway an satong sadiri, tibaad mairayo ta man an satong sadiri sa mismong paagi na ginagamit ni Jehova para tabangan kita. Kaya dawa ngani dipisil gibuhon pag nasa masakit kitang sitwasyon, akuon an tabang kan saimong kapamilya, mga amigo, asin kan mga elder. Mansayon sinda kun ano talaga sinda—an paagi ni Jehova para tabangan ka.​—Tal. 17:17; Isa. 32:​1, 2.

RARANGAHON KA NI JEHOVA

14. Anong nakakatakot na mga sitwasyon an puwede tang maeksperyensiyahan?

¹⁴ Mga kadipisilan. Tibaad mapaatubang kita sa mga sitwasyon na diyan makamati kita nin takot. Sa Bibliya, may maimbod na mga lingkod  nin Diyos na nagsabi na may mga panahon na grabe an saindang kahaditan asin takot huli sa saindang mga kalaban o iba pang mga panggigipit. (Sal. 18:4; 55:​1, 5) Posible man na mapaatubang kita sa pagkontra sa eskuwelahan o sa trabaho, o pagkontra kan satong mga kapamilya o kan gobyerno. Tibaad mapaatubang pa ngani kita sa kagadanan huli sa sarong hilang. Sa mga panahon na iyan, tibaad mamati ta na garo kita sadit na aki na mayong maginibo. Paano kita tinatabangan ni Jehova sa arog kaiyan na mga panahon?

15. Anong asigurasyon an itinatao kan Salmo 94:19?

¹⁵ Kun paano kita tinatabangan ni Jehova. Rinaranga asin pinapaginhawa niya kita. (Basahon an Salmo 94:19.) Tibaad maisip ta sa salmong ini an sarong sadit na aking babayi na natatakot asin dai makaturog dahil sa makusugon na daguldol. Maiimahinar ta an saiyang ama na naglaog sa kuwarto kan aki, kinua ini asin kinarga sagkod na makaturog ini. Maski ngani grabe pa an bagyo, pagmati kan aki ligtas siya huli sa mapagpadangat na kugos kan saiyang ama. Pag napapaatubang kita sa nakakatakot na mga problema, posibleng kaipuhanon ta an piguratibong pagkugos kan satong Ama sa langit sagkod na magin kalmado na kita. Paano ta maaako an siring na pagranga hali ki Jehova?

16. Ano an puwede tang gibuhon para mag-ako kan pagranga ni Jehova? (Hilingon man an ritrato.)

¹⁶ Kun ano an dapat tang gibuhon. Pirming magtao nin panahon para makaibanan si Jehova paagi sa pagpamibi sa saiya asin pagbasa kan saiyang Tataramon. (Sal. 77:​1, 12-14) Dangan pag nahahadit ka, posibleng marhay na an inot mong maisip iyo na magdulok sa saimong Ama sa langit. Sabihon ki Jehova an mga ikinakatakot asin ikinakahadit mo. Tugutan siyang kaulayon ka asin rangahon paagi sa Kasuratan. (Sal. 119:28) Puwede kang maranga paagi sa pagbasa nin sarong porsiyon sa Bibliya lalo na pag natatakot ka. Halimbawa, puwedeng makaranga saimo an mga libro nin Job, Salmo, asin Talinhaga pati na an mga tataramon ni Jesus na mababasa sa Mateo kapitulo 6. Mantang namimibi ka ki Jehova asin binabasa an saiyang Tataramon, mamamati mo an pagranga niya.

17. Sa ano kita makakapagtiwala?

¹⁷ Makakapagtiwala kita na tatabangan kita ni Jehova pag nasa masakit na sitwasyon kita. Dai kita nuarin man magsosolo. (Sal. 23:4; 94:14) Nangangako si Jehova na babantayan, paparigunon, susuportaran, asin rarangahon niya kita. Mapadapit ki Jehova, sinasabi kan Isaias 26:3: “Iingatan mo an mga lubos na nananarig sa saimo; tatawan mo sinda nin dagos-dagos na katuninungan, huling sa saimo sinda nagtitiwala.” Kaya magtiwala ki Jehova, asin aprobetsaran an mga paaging ginagamit niya para tabangan ka. Kun gigibuhon mo iyan, magkakaigwa ka nin panibagong kusog dawa sa mga panahon nin kasakitan.