ARTIKULONG PAG-AADALAN 4
KANTA 18 Nagpapasalamat Huli sa Pantubos
Ano an Itinutukdo sa Sato kan Pantubos?
“An pagkamuot nin Diyos nahayag sa arog kaining paagi.”—1 JUAN 4:9.
POKUS
Kun ano an ihinahayag kan pantubos manungod sa magagayon na kuwalidad kan Diyos na Jehova asin ni Jesu-Cristo.
1. Paano kita nakikinabang sa pag-atender sa taunan na Memoryal kan kagadanan ni Cristo?
SIGURADONG mauyon ka na an pantubos sarong regalo na daing kaagid an halaga! (2 Cor. 9:15) Huling isinakripisyo ni Jesus an saiyang buhay bilang tawo, puwede kang magkaigwa nin haraning relasyon sa Diyos na Jehova. Puwede ka man magkaigwa kan paglaom na mabuhay nin daing katapusan. Tama sana nanggad na ipahiling ta an satong pasasalamat sa pantubos asin ki Jehova, na pinahiro nin pagkamuot tanganing itao iyan! (Roma 5:8) Tanganing matabangan kita na padagos na magibo iyan asin nungkang baliwalaon an pantubos, pinunan ni Jesus an taunan na Memoryal kan saiyang kagadanan.—Luc. 22:19, 20.
2. Ano an pag-uulayan sa artikulong ini?
2 Ngunyan na taon, gigibuhon an Memoryal sa Sabado, Abril 12, 2025. Siguradong gabos kita nagpaplanong umatender. Makikinabang kitang marhay kun huhurop-hurupon a niyato sa panahon kan Memoryal an ginibo ni Jehova asin kan saiyang Aki para sa sato. Sa artikulong ini, pag-uulayan niyato kun ano an itinutukdo sa sato kan pantubos manungod ki Jehova asin sa saiyang Aki. Sa sunod na artikulo, matatabangan kita na masabutan kun paano kita makikinabang sa pantubos asin kun paano ta ipapahiling an satong pasasalamat diyan.
KUN ANO AN ITINUTUKDO SA SATO KAN PANTUBOS MANUNGOD KI JEHOVA
3. Paano an kagadanan nin sarong tawo makakatubos sa minilyon na tawo? (Hilingon man an ritrato.)
3 An pantubos nagtutukdo sa sato manungod sa hustisya ni Jehova. (Deu. 32:4) Paano? Pag-isipan: Huli sa pagsuway ni Adan, nagmana kita nin kasalan na nagreresulta sa kagadanan. (Roma 5:12) Tanganing mapatalingkas kita sa kasalan asin kagadanan, isinugo ni Jehova si Jesus para itao an pantubos. Pero paano makakatubos sa minilyon na tawo an kagadanan nin sarong perpektong tawo? Ipinaliwanag ni apostol Pablo: “Kun paanong paagi sa pagsuway kan sarong tawo [si Adan] dakul an nagin parakasala, paagi man sa pagsunod kan sarong tawo [si Jesus] dakul an magigin matanos.” (Roma 5:19; 1 Tim. 2:6) Sa ibang pagtaram, huling sarong masinuway na perpektong tawo an nagin dahilan kaya nagin uripon kita nin kasalan asin kagadanan, kun siring, sarong masinunod na perpektong tawo an kaipuhan tanganing mapatalingkas kita diyan.
Huli sa sarong tawo nagin uripon kita nin kasalan asin kagadanan. Paagi man sa sarong tawo, mapapatalingkas kita (Hilingon an parapo 3)
4. Taano ta dai na lang tinugutan ni Jehova na mabuhay nin daing sagkod an masinunod na mga gikan ni Adan?
4 Kaipuhan daw talagang magadan si Jesus tanganing maligtas kita? Taano ta dai na lang nagdesisyon si Jehova na tugutan na mabuhay nin daing sagkod an masinunod na mga gikan ni Adan? Para sa bakong perpektong mga tawo, garo baga iyan an mabuot asin rasonableng gibuhon. Pero binabaliwala kaini an perpektong hustisya ni Jehova. Huling makatanusan si Jehova, nungka niyang tutugutan na baliwalaon an grabeng pagsuway ni Adan.
5. Taano ta makakasigurado kita na pirming gigibuhon ni Jehova kun ano an tama?
5 Alagad, paano kun dai ngaya nagtao si Jehova nin pantubos, imbes, binaliwala na lang an hustisya paagi sa pagtugot sa bakong perpektong mga aki ni Adan na mabuhay nin daing sagkod? Posibleng marhay na iisipon kan mga tawo na tibaad baliwalaon man nin Diyos an hustisya pag-abot sa iba pang mga bagay. Halimbawa, tibaad magduda na sinda kun baga uutubon niya an nagkapira sa saiyang mga panuga. Pero dai ta dapat ipaghadit an siring na posibilidad. Taano? Huling ginibo ni Jehova kun ano an makatanusan dawa ngani nangahulugan iyan nin dakulang pagsasakripisyo sa parte niya—an pagtao niya kan buhay kan saiya mismong namumutan na Aki. Nakakaasigurar iyan sa sato na pirmi niyang gigibuhon kun ano an tama.
6. Ano an sarong paagi na ihinahayag kan pantubos an pagkamuot ni Jehova? (1 Juan 4:9, 10)
6 An pantubos nakakatabang sa sato na masabutan bako lang an hustisya ni Jehova, kundi lalo na an saiyang dakulang pagkamuot. (Juan 3:16; basahon an 1 Juan 4:9, 10.) An katukduan manungod sa pantubos naghahayag na gusto ni Jehova bako lang na magkaigwa kita nin buhay na daing katapusan kundi magin parte man kan saiyang pamilya. Pag-isipan: Kan nagkasala si Adan, pinahali siya ni Jehova sa Saiyang pamilya nin mga parasamba. Bilang resulta, gabos kita ipinangaki na bakong parte kan pamilya nin Diyos. Pero base sa pantubos, pinapatawad ni Jehova an satong mga kasalan asin pag-abot nin panahon dadarahon niya sa saiyang pamilya an gabos na tawong nagpapahiling nin pagtubod asin masinunod. Dawa ngunyan, puwede kitang magkaigwa nin haraning relasyon ki Jehova asin sa satong mga kapwa parasamba. Iyo, talagang namumutan kita ni Jehova!—Roma 5:10, 11.
7. Paano an kasakitan na inagihan ni Jesus nakakatabang sa sato na masabutan kun gurano kita kanamumutan ni Jehova?
7 Mas maiintindihan ta kun gurano kita kanamumutan ni Jehova kun pag-iisipan ta kun gurano nakulgan si Jehova sa pagsakit kan saiyang Aki. Hinihingako ni Satanas na mayong lingkod nin Diyos na magdadanay na maimbod sa Saiya pag masakit iyan gibuhon. Tanganing mapatunayan na sala si Satanas, itinugot ni Jehova na magsakit si Jesus bago siya magadan. (Job 2:1-5; 1 Ped. 2:21) Nahiling ni Jehova mantang tinutuya-tuya si Jesus kan mga parakontrang lider nin relihiyon, maringis na piglalatigo kan mga suldados, asin ipinapako sa hariging pasakitan. Tapos nahiling ni Jehova mantang nagagadan sa makulugon na paagi an saiyang namumutan na Aki. (Mat. 27:28-31, 39) Kayang-kaya man kutana ni Jehova na papunduhon iyan ano man na oras. Halimbawa, kan sabihon kan mga parakontra: “Iligtas [siya nin Diyos] ngunyan kun gusto Niya siyang tabangan,” kayang-kaya kutanang gibuhon iyan ni Jehova. (Mat. 27:42, 43) Minsan siring, kun nag-interbenir an Diyos, mayo kutanang pantubos na naibayad asin mayo kutana kita nin paglaom. Kaya tinugutan ni Jehova na magsakit an saiyang Aki sagkod sa huring hinangos kaini.
8. Nakulgan daw si Jehova kan mahiling niyang nagsasakit an saiyang Aki? Ipaliwanag. (Hilingon man an ritrato.)
8 Dai ta pag-isipon na mayong pagmati an Diyos miling makakamhan siya sa gabos! An mga tawo linalang na may kakayahan na makamati. Asin huling linalang kita ni Jehova uyon sa saiyang ladawan, nangangahulugan iyan na si Jehova igwa nin pagmati. Sinasabi kan Bibliya na siya ‘nakukulgan an buot’ asin ‘namumundo.’ (Sal. 78:40, 41) Pag-isipan man an eksperyensiya ni Abraham asin Isaac. Magigirumduman mo na ipinagbuot ni Jehova ki Abraham na idulot bilang atang an saiyang kasaro-saruing aki. (Gen. 22:9-12; Heb. 11:17-19) Imahinara na sana an manlain-lain na emosyon na namatian ni Abraham mantang nag-aandam siyang gadanon si Isaac paagi sa sarong saksak lang nin kutsilyo. Kaya siguradong mas labi pa diyan an kamunduan na namatian ni Jehova mantang pinagmamasdan niya an saiyang Aki na daing hirak na pinapasakitan nin mga bakong diyosnon na tawo sagkod na ini magadan!—Hilingon sa jw.org an video na Arugon an Saindang Pagtubod—Abraham, Part 2.
Makulugon para ki Jehova na mahiling na nagsasakit an saiyang Aki (Hilingon an parapo 8)
9. Ano an itinutukdo sa sato kan Roma 8:32, 38, 39 manungod sa dakulang pagkamuot ni Jehova sa saimo asin sa saimong mga kapwa parasamba?
9 An pantubos nagtutukdo sa sato na mayo nin siisay man na makakapantay o makakalabi sa pagkamuot ni Jehova sa sato—dawa pa an satong pinakadayupot na kapamilya o amigo. (Basahon an Roma 8:32, 38, 39.) Siguradong an pagkamuot ni Jehova sa sato mas urog kisa sa pagkamuot ta sa satong sadiri. Gusto mo daw na mabuhay nin daing katapusan? Mas lalo nang gusto iyan ni Jehova para sa saimo. Gusto mo daw na mapatawad an saimong mga kasalan? Mas lalo nang gusto ni Jehova na mapatawad an mga iyan. An hinahagad niya sana iyo na akuon ta an saiyang bulaos na regalo paagi sa pagpahiling nin pagtubod asin pagigin masinunod. An pantubos saro nanggad na dakulaon na kapahayagan kan pagkamuot nin Diyos. Asin sa bagong kinaban, dakul pa an manunudan ta manungod sa pagkamuot ni Jehova.—Ecl. 3:11.
KUN ANO AN ITINUTUKDO SA SATO KAN PANTUBOS MANUNGOD KI JESUS
10. (a) Ano an partikular nang ikinapurisaw ni Jesus manungod sa saiyang kagadanan? (b) Sa anong mga paagi binindikar ni Jesus an pangaran ni Jehova? (Hilingon man an kahon na “ Ibinindikar kan Integridad ni Jesus an Pangaran ni Jehova.”)
10 Mahalagang marhay ki Jesus an reputasyon kan saiyang Ama. (Juan 14:31) Ikinapurisaw na marhay ni Jesus na an pag-akusar sa saiya nin paglanghad asin sedisyon puwedeng magdara nin katuyawan sa pangaran kan saiyang Ama. Kaya namibi siya: “Ama ko, kun posible, palihisa sako an kopang ini.” (Mat. 26:39) Paagi sa pagpadanay kan saiyang integridad sagkod sa kagadanan, lubos na ibinindikar ni Jesus an pangaran kan saiyang Ama.
11. Paano ipinahiling ni Jesus an saiyang dakulang pagkamuot sa mga tawo? (Juan 13:1)
11 An pantubos nagtutukdo man sa sato na nagmamalasakit na marhay si Jesus sa mga tawo, lalo na sa saiyang mga disipulo. (Tal. 8:31; basahon an Juan 13:1.) Halimbawa, aram ni Jesus na magigin masakit na marhay an nagkapirang aspekto kan saiyang ministeryo digdi sa daga, partikular na an saiyang makulog na kagadanan. Pero ginibo ni Jesus an saiyang asignasyon digdi sa daga bako sa paaging napipiritan o mayo sa buot. Imbes, bilog na puso siyang naghulit, nagtukdo, asin naglingkod sa iba. Dawa kan aldaw na kan saiyang kagadanan, nagtao si Jesus nin panahon para hugasan an mga bitis kan saiyang mga apostol asin para tawan sinda nin dakul na nakakarangang mga tataramon asin mga instruksiyon. (Juan 13:12-15) Dangan, dawa ngani kan nasa hariging pasakitan na si Jesus, tinawan niya nin paglaom an sarong kriminal na madali nang magadan asin itinugon niya man ki Juan an saiyang ina. (Luc. 23:42, 43; Juan 19:26, 27) Kaya an dakulang pagkamuot ni Jesus naipahiling niya bako lang paagi sa saiyang kagadanan kundi pati man sa bilog niyang buhay digdi sa daga.
12. Sa anong paagi padagos na nagsasakripisyo si Jesus para sa sato?
12 Dawa ngani nagadan si Cristo “nin saro sanang beses para sa gabos na panahon,” may ginigibo pa man giraray siyang mga pagsasakripisyo para sa sato ngunyan. (Roma 6:10) Paano? Padagos siyang nagtatao nin panahon asin naghihinguwa tanganing makamtan ta an mga pakinabang na nagin posible huli sa pantubos. Isipa an dakul na ginigibo niya. Naglilingkod siya bilang satong Hadi, Halangkaw na Saserdote, asin payo kan kongregasyon. (1 Cor. 15:25; Efe. 5:23; Heb. 2:17) Ipinagkatiwala sa saiya an pagtipon sa mga linahidan asin sa dakulang kadaklan, sarong trabaho na matatapos bago matapos an dakulang kasakitan. b (Mat. 25:32; Mar. 13:27) Sinisigurado niya man na napapakakan na marhay sa espirituwal an saiyang maimbod na mga lingkod sa huring mga aldaw na ini. (Mat. 24:45) Asin sa bilog na Sangribong Taon na Paghadi niya, padagos siyang maglilingkod para sa sato. Talagang lubos na itinao ni Jehova an saiyang Aki alang-alang sa sato!
PADAGOS NA MAKANUOD
13. Paano makakatabang sa saimo an paghurop-hurop tanganing padagos kang makakanuod manungod sa pagkamuot sa sato nin Diyos asin ni Cristo?
13 Padagos kang makakanuod manungod sa pagkamuot sa sato kan Diyos na Jehova asin ni Cristo Jesus kun padagos mo iyan na huhurop-hurupon. Sa panahon kan Memoryal sa taon na ini, puwede mong basahon na marhay an saro o nagkapira sa mga Ebanghelyo. Sa kada pagbasa mo, dai magbasa nin dakulon na kapitulo. Imbes, dai maghidali, mag-isip nin dugang pang mga dahilan kun taano ta dapat niyatong mamutan si Jehova asin si Jesus. Asin siyempre, sabihon sa iba an mga nanudan mo.
14. Kauyon kan Salmo 119:97 asin nota sa ibaba, paano makakatabang sa sato an pag-research na padagos na makanuod manungod sa pantubos asin sa iba pang mga katukduan? (Hilingon man an ritrato.)
14 Kun haloy ka na sa katotoohan, tibaad maisip mo, ‘May bago pa daw akong mga manunudan manungod sa pamilyar na mga tema arog kan hustisya nin Diyos, pagkamuot niya, asin pantubos?’ An totoo, pirmi kitang may bagong manunudan manungod sa mga temang ini asin sa iba pa. Kaya, ano an puwede mong gibuhon? Lubos na aprobetsaran an dakulon na impormasyon na yaon sa satong mga publikasyon. Kun may mabasa ka sa Bibliya na dai mo gayong nasasabutan, mag-research. Dangan sa bilog na aldaw, hurop-hurupon an mga nadiskubre mo asin kun ano an itinutukdo kaiyan manungod ki Jehova, sa saiyang Aki, asin sa pagkamuot ninda sa saimo.—Basahon an Salmo 119:97 asin nota sa ibaba.
Dawa kun haloy na kita sa katotoohan, mapapakusog ta pa an satong pagpapahalaga sa pantubos (Hilingon an parapo 14)
15. Taano ta dapat kitang padagos na maghanap nin kayamanan sa Bibliya?
15 Dai madisganar kun mayo kang mahiling na bago o interesanteng punto sa kada pagbasa o pag-research mo. Puwede mong ikumparar an sadiri mo sa sarong tawo na nagkakabod o naghahanap nin bulawan. Sa parati, dakul na oras o aldaw siyang mapasensiyang naghahanap bago makakua nin dawa saditon sanang grano nin bulawan. Dawa arog kaiyan, dai siya minasuko huling mahalagang marhay sa saiya an lambang grano nin bulawan. Siguradong mas dakula nanggad diyan an halaga kan lambang kayamanan na makukua sa Bibliya! (Sal. 119:127; Tal. 8:10) Kaya magin mapasensiya asin sunudon na marhay an saimong iskedyul sa pagbasa nin Bibliya.—Sal. 1:2.
16. Paano ta puwedeng arugon si Jehova asin si Jesus?
16 Mantang nag-aadal, maghanap nin mga paagi kun paano mo maisasabuhay an mga nanunudan mo. Halimbawa, arugon an hustisya ni Jehova paagi sa pagtratar sa iba nin daing pagpalain-lain. Arugon an pagkamuot ni Jesus sa saiyang Ama asin sa iba paagi sa pagigin andam na magsakripisyo para sa pangaran ni Jehova asin para mapaglingkudan an saimong mga kapwa Kristiyano. Siring man, arugon si Jesus paagi sa pagpatotoo sa iba tanganing magkaigwa man sinda kan oportunidad na akuon an regalo ni Jehova na daing kaagid an halaga.
17. Ano an pag-uulayan ta sa sunod na artikulo?
17 Mantang lalo tang nasasabutan asin naaapresyar an pantubos, lalo man niyatong mamumutan si Jehova asin an saiyang Aki. Dangan sinda man, lalo man ninda kitang mamumutan. (Juan 14:21; Sant. 4:8) Kaya gamiton ta an mga probisyon ni Jehova tanganing padagos kitang makanuod manungod sa pantubos. Pag-uulayan sa sunod na artikulo an nagkapirang paagi kun paano kita makikinabang sa pantubos asin kun paano ta maipapahiling an satong pag-apresyar sa pagkamuot ni Jehova.
KANTA 107 An Diyos Arugan nin Pagkamuot
a PALIWANAG DAPIT SA TATARAMON: An “paghurop-hurop” iyo an pagpokus kan saimong isip sa sarong tema asin pag-isip-isip kaiyan na marhay.
b An pagtipon kan “mga bagay sa kalangitan” na sinambit ni Pablo sa Efeso 1:10 lain man sa pagtipon kan “mga pinili” na sinambit ni Jesus sa Mateo 24:31 asin Marcos 13:27. An pinapanungdan ni Pablo iyo an panahon na pinipili ni Jehova an saiyang espiritung mga aki paagi sa paglahid sa sainda nin banal na espiritu. An pinapanungdan man ni Jesus iyo an panahon na an mga natatadang linahidan sa daga titiripunon pasiring sa langit durante kan dakulang kasakitan.
