ARTIKULONG PAG-AADALAN 3
KANTA 35 ‘Siyertuhon an Mas Importanteng mga Bagay’
Gumibo nin mga Desisyon na Nakakapaugma ki Jehova
“An pagkaigwa nin pagkatakot ki Jehova iyo an kapinunan nin kadunungan, asin an kaaraman manungod sa Kabanal-banaling Diyos iyo an pakasabot.”—TAL. 9:10.
POKUS
Kun paano gagamiton an kaaraman, pakasabot, asin pakamansay tanganing makagibo nin madunong na mga desisyon.
1. Ano an kaipuhan niyatong gibuhon sa kada aldaw?
KAIPUHAN niyatong gumibo nin mga desisyon kada aldaw. May mga pasil sana, arog kan kun ano an papamahawan o kun anong oras maturog sa banggi. An iba man dipisil huling tibaad igwa iyan nin epekto sa satong salud, kaugmahan, mga mahal sa buhay, o sa satong pagsamba. Gusto niyato na makinabang kita saka an satong pamilya sa mga desisyon ta. Urog sa gabos, buot niyatong mapaugma si Jehova kan satong mga desisyon.—Roma 12:1, 2.
2. Anong mga lakdang an makakatabang sa saimo na makagibo nin madunong na mga desisyon?
2 Posibleng marhay na makakagibo ka nin madunong na desisyon kun (1) aaramon mo an kinakaipuhan na mga impormasyon, (2) kokonsideraron an kaisipan ni Jehova manungod diyan, asin (3) tuturutimbangon an mga pagpipilian. Pag-uulayan sa artikulong ini an mga lakdang na iyan, saka tatabangan man kita kaiyan na maaraman kun paano ta sasanayon an satong kakayahan na makamansay.—Tal. 2:11.
ARAMON AN KINAKAIPUHAN NA MGA IMPORMASYON
3. Iilustrar kun taano ta kaipuhan mo ngunang aramon an mga impormasyon na aplikado sa sitwasyon mo bago ka gumibo nin desisyon.
3 An inot na lakdang tanganing makagibo nin madunong na desisyon iyo na aramon an kinakaipuhan na mga impormasyon. Taano ta mahalaga iyan? Imahinara na nagkonsulta sa doktor an sarong pasyente manungod sa saiyang malalang hilang. Madesisyon daw tulos an sarong doktor kun paano siya bubulungon na dai nguna ineeksamin an pasyente o hinahapot an kondisyon kaini? Siguradong dai. Sa kaagid na paagi, makakagibo ka man nin mas marahay na mga desisyon kun aaramon mo nguna an mga impormasyon na aplikado sa saimong sitwasyon. Paano mo iyan magigibo?
4. Kauyon kan sinasabi kan Talinhaga 18:13, paano mo masisigurado na aram mo an kinakaipuhan na mga impormasyon? (Hilingon man an ritrato.)
4 Sa parati makakakua ka nin mga impormasyon paagi sa paghapot. Sabihon ta ngayang inimbitaran ka sa sarong pagturutiripon. Maatender ka daw? Kun dai ka pamilyar sa nag-areglar kan okasyon o sa areglong ginibo niya, kaipuhan mong maghapot saiya: “Sain saka nuarin gigibuhon an pagturutiripon? Pira an imbitado? Siisay an maasikaso diyan? Sairisay an maatender? Ano an mga gigibuhon diyan? Maserbi daw nin inumon na de-alkohol?” An simbag sa mga hapot na iyan makakatabang sa saimo na makagibo nin madunong na desisyon.—Basahon an Talinhaga 18:13.
Aramon an kinakaipuhan na mga impormasyon paagi sa paghapot (Hilingon an parapo 4) a
5. Ano an dapat mong gibuhon pag igwa ka na kan kinakaipuhan na mga impormasyon?
5 Dangan, pag igwa ka na kan kinakaipuhan na mga impormasyon, maingat mo nang isip-isipon an bilog na sitwasyon. Halimbawa, paano kun naaraman mo na an mga maatender diyan mayong pagpapahalaga sa mga prinsipyo sa Bibliya o na an pagserbi diyan nin inumon na de-alkohol daing kontrol? May posibilidad daw na an pagturutiripon na iyan magin sarong maribok asin daing kontrol na party? (1 Ped. 4:3) O paano kun an pagturutiripon na iyan tayming man na iskedyul sa pagtiripon o pagluwas sa langtad kan saindong kongregasyon? Pag inisip-isip mo na an bilog na sitwasyon, magigin mas madali na sa saimo na makagibo nin marahay na desisyon. Alagad may saro pang lakdang na dapat mong gibuhon. Nasasabutan mo na an sitwasyon; pero ano daw kaya an paghiling diyan ni Jehova?—Tal. 2:6.
KONSIDERARON AN KAISIPAN NI JEHOVA
6. Kauyon kan Santiago 1:5, taano ta dapat kitang mamibi na tabangan kita ni Jehova?
6 Hagadon ki Jehova na tabangan kang masabutan an saiyang kaisipan. Nanunuga si Jehova na tatawan niya kita kan kadunungan na maaraman kun baga makakapaugma sa saiya an sarong partikular na desisyon. Siya “bukas-palad na nagtatao sa gabos” kan siring na kadunungan “asin dai nanunuyaw.”—Basahon an Santiago 1:5.
7. Paano mo maaaraman an kaisipan ni Jehova manungod sa sarong bagay? Iilustrar.
7 Pagkatapos mamibi para sa paggiya ni Jehova, magtaong atensiyon sa simbag niya. Pag-isipan an ilustrasyon na ini: Kun malagalag ka sa sarong lugar, tibaad maghagad ka nin tabang sa saro na taga diyan. Mahali ka na lang daw basta bago pa siya makasimbag? Siyempre dai. Madangog kang marhay sa mga itatao niyang direksiyon. Sa kaagid na paagi, pagkatapos mong maghagad ki Jehova nin kadunungan, hinguwahon na maaraman an saiyang simbag paagi sa pagdeterminar kun anong mga pagbuot asin mga prinsipyo sa Bibliya an aplikado sa sitwasyon mo. Halimbawa, pag nagdedesisyon kun baga maatender ka sa pagturutiripon na sinambit kasubago, puwede mong konsideraron an sinasabi kan Bibliya manungod sa mariribok na kaurugmahan, maraot na mga pag-iriba, asin sa pangangaipong inuton an intereses kan Kahadian imbes na an saimong personal na mga kagustuhan.—Mat. 6:33; Roma 13:13, nota sa ibaba; 1 Cor. 15:33.
8. Ano an puwede mong gibuhon kun kaipuhan mo nin tabang para mahanap an impormasyon na kaipuhan mo? (Hilingon man an ritrato.)
8 Pero, may mga pagkakataon na tibaad mangaipo ka nin tabang para mahanap mo an impormasyon na kaipuhan mo. Puwede kang maghagad nin suhestiyon sa sarong eksperyensiyadong tugang. Makikinabang ka man kun magre-research ka mismo. Igwa nin dakulon na impormasyon sa satong mga pantabang sa pag-adal, arog kan Giya sa Pag-research Para sa Mga Saksi ni Jehova asin Mga Teksto Para sa Kristiyanong Pamumuhay. Tandaan, an saimong pasuhan iyo na makagibo nin desisyon na makakapaugma ki Jehova.
Konsideraron an kaisipan ni Jehova (Hilingon an parapo 8) b
9. Paano ta masisigurado na makakapaugma ki Jehova an satong mga desisyon? (Efeso 5:17)
9 Paano ta masisigurado na makakapaugma ki Jehova an satong mga desisyon? Inot sa gabos, kaipuhan niyatong mamidbid siyang marhay. “An kaaraman manungod sa Kabanal-banaling Diyos iyo an pakasabot,” an sabi kan Bibliya. (Tal. 9:10) Iyo, magkakaigwa kita nin tunay na pakasabot paagi sa pag-aram kan mga kuwalidad ni Jehova, kan saiyang katuyuhan, asin kun ano an ikinakaugma o ikinakaungis niya. Haputon an sadiri, ‘Base sa pakamidbid ko ki Jehova, anong desisyon an makakapaugma sa saiya?’—Basahon an Efeso 5:17.
10. Taano ta mas importante an mga prinsipyo sa Bibliya kisa sa tradisyon kan pamilya o kultura kan satong lugar?
10 Tanganing mapaugma si Jehova, mapapamundo ta kun minsan an mga tawong dayupot sato. Halimbawa, dawa marahay man an intensiyon, may mga magurang na tibaad iinsistir sa saindang adulto nang aking babayi na magpaagom sa sarong lalaking may kaya maski ngani bakong makusog an espirituwalidad kaini. Iyo, gusto nindang magkaigwa nin komportableng buhay an saindang aki, pero siisay an matabang sa saiya na magin maygurang sa espirituwal? Ano an pagmansay diyan ni Jehova? An simbag yaon sa Mateo 6:33. Dinadagka diyan an mga Kristiyano na padagos na “hanapon nguna an Kahadian.” Maski ngani tinatawan ta nin onra an satong mga magurang asin iginagalang an mga tawo sa satong komunidad, an pinakamahalaga sa sato iyo an mapaugma si Jehova.
TURUTIMBANGON AN MGA PAGPIPILIAN
11. Arog kan sinasabi sa Filipos 1:9, 10, anong kuwalidad an makakatabang sa saimo na maturutimbang an saimong mga pagpipilian?
11 Pag nadeterminaran mo na kun anong mga prinsipyo sa Bibliya an aplikado sa ginigibo mong desisyon, kaipuhan mong turutimbangon an saimong mga pagpipilian. (Basahon an Filipos 1:9, 10; hilingon an study note na “malalim na unawa.”) An kuwalidad na pakamansay makakatabang sa saimo na maaraman an posibleng magin resulta kan lambang pagpipilian. Kun minsan madali sanang makagibo nin desisyon. Pero bakong gabos na desisyon arog kaiyan. Makakatabang sa saimo an pakamansay na makagibo nin madunong na mga desisyon dawa sa komplikadong mga sitwasyon.
12-13. Paano makakatabang sa saimo an pakamansay tanganing makagibo ka nin madunong na desisyon kun manungod sa sekular na trabaho?
12 Pag-isipan an senaryong ini. Naghahanap ka ngaya nin trabaho para masuportaran an pamilya mo. Duwang trabaho an pinagpipilian mo. Pinag-isipan mo an gabos na impormasyon manungod diyan—an trabahong gigibuhon mo, an iskedyul, an lawig kan biyahe, asin iba pa. An duwang trabahong iyan pareho man bakong kontra sa mga katukduan kan Kasuratan. Tibaad mas gusto mo an saro dahil suno mo an klase nin trabaho diyan o mas halangkaw an suweldo. Alagad, may iba pang mga bagay na dapat konsideraron bago ka gumibo nin desisyon.
13 Halimbawa, an iskedyul daw kan mga trabahong iyan makakaulang sa pag-atender mo sa mga pagtiripon kan kongregasyon? Mababawasan daw kaiyan an oras na kaipuhan mo tanganing maasikaso an emosyonal asin espirituwal na mga pangangaipo kan saimong pamilya? Makakatabang sa saimo an siring na mga hapot tanganing ipriyoridad mo an “mas importanteng mga bagay”—an saimong pagsamba asin mga pangangaipo kan saimong pamilya—imbes na an paghanapbuhay. Dangan makakagibo ka nin desisyon na bebendisyunan ni Jehova.
14. Paano an pakamansay saka pagkamuot makakatabang sa sato na malikayan na makapasingkog sa iba?
14 Mapapahiro man kita kan pakamansay na pag-isipan an tibaad magin epekto sa iba kan satong desisyon tanganing malikayan tang “masingkog an iba.” (Fil. 1:10) Mahalaga ini pag naggigibo kita nin personal na mga desisyon arog kan sa pagbado asin pag-ayos sa sadiri. Halimbawa, tibaad gusto ta an sarong partikular na istilo nin bado o pag-ayos sa sadiri. Pero paano kun may mga kakongregasyon ka o ibang mga tawong masisingkog o masusuya kaiyan? Makakatabang sa sato an pakamansay na igalang an namamatian ninda. Papahiruon kita nin pagkamuot na isipon kun ano an kapaki-pakinabang sa “ibang tawo” asin na magin mabini. (1 Cor. 10:23, 24, 32; 1 Tim. 2:9, 10) Dangan makakagibo kita nin desisyon na nagpapahiling na namumutan saka iginagalang ta an iba.
15. Anong pagplano an kaipuhan bago mo isagibo an sarong dakulang desisyon?
15 Kun may ginigibo kang dakulang desisyon, isip-isipon an mga kakaipuhanon tanganing maisagibo mo an napagdesisyunan mo. Itinukdo sa sato ni Jesus na ‘kuwentahon an gastos.’ (Luc. 14:28) Kaya pag-isipan an panahon, kuwarta, asin kusog na kakaipuhanon mo. Sa nagkapirang sitwasyon, puwede mong konsultahon an saimong pamilya para maaraman kun ano an kakaipuhanon na gibuhon kan lambang miyembro para makatabang. Taano ta mahalagang marhay an arog kaining pagplano? Puwede ining makatabang na madeterminaran mo kun may mga kaipuhan kang liwaton o kun may iba pang mas praktikal na opsiyon. Dugang pa, pag iiniiba mo an saimong pamilya sa pagplano asin pag nagdadangog ka sa mga suhestiyon ninda, magigin mas andam sindang makipagtabangan sa saimo tanganing mapangganang maisagibo an desisyon.—Tal. 15:22.
GUMIBO NIN DESISYON NA MAGIGIN MAPANGGANA
16. Anong mga lakdang an makakatabang sa saimo na makagibo nin mga desisyon na magigin mapanggana? (Hilingon man an kahon na “ Kun Paano Makakagibo nin Madunong na mga Desisyon.”)
16 Kun sinunod mo an sinambit na mga lakdang, andam ka nang gumibo nin madunong na desisyon. Aram mo na an kinakaipuhan na mga impormasyon asin siniyasat an mga prinsipyong makakatabang sa saimo na makagibo nin desisyon na nakakapaugma ki Jehova. Ngunyan, puwede mo nang hagadon ki Jehova na tabangan kang magin mapanggana an saimong desisyon.
17. Ano an panginot na makakatabang sa saimo na makagibo nin marahay na mga desisyon?
17 Dawa kun nakagibo ka na kaidto nin dakul na mapangganang desisyon, tandaan na an panginot na makakatabang sa saimo tanganing makagibo nin marahay na mga desisyon iyo an magsarig, bako sa sadiri mong kaaraman o eksperyensiya, kundi sa kadunungan na hali ki Jehova. Siya sana an makakatao sa saimo nin tunay na kaaraman, pakasabot, asin pakamansay—an importanteng mga aspekto nin kadunungan. (Tal. 2:1-5) Matatabangan ka ni Jehova na makagibo nin mga desisyon na nakakapaugma sa saiya.—Sal. 23:2, 3.
KANTA 28 Pakikikatuod ki Jehova
