ARTIKULONG PAG-AADALAN 5
KANTA 108 An Maimbod na Pagkamuot nin Diyos
Kun Paano Kita Nakikinabang sa Pagkamuot ni Jehova
“Si Cristo Jesus nag-abot sa kinaban tanganing iligtas an mga makasalan.”—1 TIM. 1:15.
POKUS
Kun paano kita nakikinabang sa pantubos asin kun paano niyato ipapahiling ki Jehova an satong pasasalamat.
1. Ano an puwede niyatong gibuhon para mapaugma si Jehova?
IMAHINARA na tinawan mo an sarong tawong namumutan mo nin sarong espesyal na regalo na magayon asin praktikal. Talagang mamumundo ka kun isinaray niya sana iyan tapos piglingawan na lang! Pero siguradong mauugma ka kun ginamit niya an regalo asin nagpasalamat sa saimo. Ano an punto? Itinao ni Jehova an saiyang Aki alang-alang sa sato. Kaya siguradong ugmahon si Jehova pag ipinapahiling ta an satong pasasalamat sa mahalagang marhay na regalong iyan asin sa saiyang pagkamuot, na nagpahiro sa saiya na itao an pantubos!—Juan 3:16; Roma 5:7, 8.
2. Ano an pag-uulayan ta sa artikulong ini?
2 Alagad, sa paglihis nin panahon, puwedeng mangyari na luway-luway na mawara an satong apresasyon sa pantubos, na garo baga isinasaray ta na sana an regalo nin Diyos. Maugma kita na yaon iyan sa sato, pero nasa lugar iyan na tago. Tanganing malikayan na mangyari iyan, dapat na padagos niyatong isip-isipon kun taano ta nagpapasalamat kitang marhay sa ginibo nin Diyos asin ni Cristo para sa sato. Matatabangan kita kan artikulong ini na gibuhon iyan. Tutukaron niyato kun paano kita nakikinabang ngunyan sa pantubos asin kun paano kita makikinabang diyan sa maabot na panahon. Pag-uulayan ta man kun paano niyato maipapahiling an satong pasasalamat sa pagkamuot ni Jehova, lalo na sa panahon na ini nin Memoryal.
KUN PAANO KITA NAKIKINABANG NGUNYAN
3. Ano an sarong paagi na nakikinabang kita ngunyan sa pantubos?
3 Nakikinabang na kita ngunyan sa atang na pantubos ni Cristo. Halimbawa, basado sa pantubos, pinapatawad ni Jehova an satong mga kasalan. Bako siyang obligado na patawadon kita. Pero gusto niyang gibuhon iyan. May pasasalamat na ipinahayag kan salmista: “Huli ta ika, O Jehova, marahay asin andam na magpatawad.”—Sal. 86:5; 103:3, 10-13.
4. Para kiisay itinao ni Jehova an pantubos? (Lucas 5:32; 1 Timoteo 1:15)
4 Tibaad namamatian kan iba na dai sinda angay sa pagpapatawad ni Jehova. An totoo, gabos kita bakong angay sa pagpapatawad niya. Nasabutan ni apostol Pablo na “dai [siya] angay na apudon na apostol.” Alagad, sinabi niya: “Kun ano ako ngunyan, huli iyan sa daing kapantay na kabuutan nin Diyos.” (1 Cor. 15:9, 10) Pag pinagsulsulan ta an satong mga kasalan, pinapatawad kita ni Jehova. Taano? Bako iyan dahil maninigo kita diyan, kundi dahil namumutan niya kita. Kun napupurisaw ka huling pagmati mo dai ka angay sa pagpapatawad ni Jehova, girumdumon na itinao ni Jehova an pantubos, bako para sa daing kasalan na mga tawo, kundi para sa nagsusulsol na mga nagkasala.—Basahon an Lucas 5:32; 1 Timoteo 1:15.
5. Tama daw na isipon nin siisay man sa sato na maninigo siyang patawadon ni Jehova? Ipaliwanag.
5 Dai dapat isipon nin siisay man sa sato na maninigo siyang patawadon ni Jehova miling haloy na siyang naglilingkod sa Saiya. Siyempre, ginigirumdom ni Jehova an mga ipinahiling tang kaimbudan sa saiya. (Heb. 6:10) Itinao niya sa sato an saiyang Aki bilang daing bayad na regalo, bako bilang bayad sa mga ginibo tang paglilingkod. Kun iisipon niyato na maninigo kitang patawadon o tawan nin espesyal na konsiderasyon miling haloy na kitang naglilingkod sa saiya, garo ta man sana sinasabi na nagadan si Cristo nin daing saysay.—Ikumparar an Galacia 2:21.
6. Taano ta nagmaigot na marhay si Pablo sa paglilingkod ki Jehova?
6 Aram ni Pablo na an pag-uyon ni Jehova sa saiya dai nakadepende sa kun gurano kadakul na paglilingkod an gigibuhon niya. Kun arog kaiyan, taano ta nagmaigot siyang marhay sa paglilingkod ki Jehova? Bako iyan dahil sa buot niyang patunayan na maninigo siya sa pag-uyon ni Jehova, kundi dahil buot niyang ipahiling an pasasalamat niya sa Saiyang daing kapantay na kabuutan. (Efe. 3:7) Arog ni Pablo, padagos kitang maigot na naglilingkod, bako para magin maninigo kitang mag-ako kan pagkahirak ni Jehova, kundi para ipahiling an pasasalamat niyato diyan.
7. Ano an saro pang paagi na nakikinabang kita ngunyan sa pantubos? (Roma 5:1; Santiago 2:23)
7 An saro pang paagi na nakikinabang kita ngunyan sa pantubos iyo na puwede kitang magkaigwa nin harani asin personal na relasyon ki Jehova. a Arog kan sinambit sa sinundan na artikulo, mayo pa kita nin haraning relasyon sa Diyos kan mamundag kita. Pero huli sa pantubos, puwede kitang magdanay sa “pakipagkatuninungan sa Diyos” asin sa siring puwede kitang rumani sa saiya.—Basahon an Roma 5:1; Santiago 2:23.
8. Taano ta dapat kitang magin mapagpasalamat ki Jehova huli sa pribilehiyo na mamibi?
8 Pag-isipan an saro sana sa mga aspekto kan satong relasyon ki Jehova—an pribilehiyo na mamibi. Dinadangog ni Jehova bako lang an mga pamibi sa publiko kan saiyang mga lingkod pag nagtitiripon sinda kundi pati man an personal na mga pamibi kan lambang saro sa sato. An pagpamibi nakakapakalma sa satong puso asin nakakatao nin katuninungan nin isip, pero bako lang iyan basta pampagian o pamparahay sa pagmati. Kaya kaiyan na pakusugon an satong pakikiamigo ki Jehova. (Sal. 65:2; Sant. 4:8; 1 Juan 5:14) Kan si Jesus yaon digdi sa daga, parati siyang namimibi huling aram niya na nagdadangog si Jehova asin na mapapagdanay kaiyan na makusog an relasyon niya sa saiyang Ama. (Luc. 5:16) Nagpapasalamat kitang marhay na, basado sa atang ni Jesus, puwede kitang magin mga amigo ni Jehova asin makipag-ulay pa ngani sa Saiya sa pamibi!
KUN PAANO KITA MAKIKINABANG SA MAABOT NA PANAHON
9. Paano makikinabang sa pantubos an maimbod na mga parasamba sa maabot na panahon?
9 Paano makikinabang sa pantubos an maimbod na mga parasamba ni Jehova sa maabot na panahon? Tatawan sinda nin buhay na daing katapusan. Iniisip kan dakul na imposible ini huling an mga tawo rinibong taon nang uripon nin kagadanan. Pero an orihinal na katuyuhan ni Jehova iyo na mabuhay nin daing sagkod an mga tawo. Kun dai nagkasala si Adan, mayo kuta nin siisay man na maisip na masakit paniwalaan an buhay na daing katapusan. Asin dawa ngani garo baga masakit iyan na paniwalaan sa panahon na ini, makakapagtiwala kita na mangyayari iyan, huling aram tang dakulaon na halaga an ibinayad ni Jehova—an buhay kan saiya mismong namumutan na Aki—tanganing magin posible iyan.—Roma 8:32.
10. Ano an hinahalat-halat kan mga linahidan asin kan ibang mga karnero?
10 Dawa ngani sa maabot pang panahon mangyayari an buhay na daing katapusan, gusto ni Jehova na antisiparon na niyato iyan ngunyan. Hinahalat-halat kan mga linahidan an sarong makahulugan na buhay sa langit mantang pinapamahalaan ninda an daga kaiba ni Cristo. (Kap. 20:6) An ibang mga karnero naglalaom na mabuhay sa sarong paraisong daga na diyan mayo na nin kulog asin pagmundo. (Kap. 21:3, 4) Saro ka daw sa ibang mga karnero na may paglaom na mabuhay nin daing katapusan digdi sa daga? An balos na iyan bako nanggad menos kumpara sa paglaom na mabuhay sa langit! Dinisenyo kita na mabuhay sa arog kaiyan na paagi kaya talagang magigin nakakaugmang marhay an mabuhay nin daing katapusan digdi sa daga.
11-12. Anong mga bendisyon sa Paraiso an puwede tang antisiparon? (Hilingon man an mga ritrato.)
11 Imahinara an magigin buhay mo sa Paraisong daga. Dai ka na mahahadit huli sa hilang o kagadanan. (Isa. 25:8; 33:24) Lubos na papaniguan ni Jehova an lambang marahay na bagay na minamawot mo. Gusto mo daw pag-adalan an manlain-lain na klase nin hayop saka pananom, magin mahusay magkanta o makanuod magtugtog nin mga instrumento sa musika, mag-adal mag-painting, o magpasyar sa manlain-lain na lugar? Sigurado man na mangangaipo nin mga arkitekto, paratugdok, asin mga parauma. Kaipuhan man nin mga paraluto, mga paragibo nin mga kasangkapan, asin nin mga hardinero. (Isa. 35:1; 65:21) Mabubuhay ka nin daing katapusan kaya may panahon kang pag-adalan asin manudan an ano man na kasanayan na gusto mo.
12 Maugmahon nanggad na sabaton an mga binuhay liwat! (Gibo 24:15) Imahinara man kun gurano nakaka-enjoy na urog pang makanuod manungod ki Jehova paagi sa pag-adal sa dakulon niyang mga linalang. (Sal. 104:24; Isa. 11:9) Urog sa gabos, magigin marahayon nanggad sa pagmati na sambahon si Jehova na mayo na ni kadikit na pakamati nin pagkakonsiyensiya! Iriribay mo daw an maabot na mga bendisyon na ini para sa “temporaryong kaugmahan sa kasalan”? (Heb. 11:25) Siguradong dai! Sulit nanggad an ano man na pagsasakripisyong kaipuhan tang gibuhon ngunyan para sa mga bendisyon na ini. Tandaan, an Paraisong daga dai magdadanay na paglaom na sana pirmi. Maabot an panahon na diyan na talaga kita mabubuhay sa kada aldaw. Dai magigin posible an gabos na ini kun dai kita namutan na marhay ni Jehova na huli kaiyan itinao niya an saiyang Aki alang-alang sa sato!
Anong mga bendisyon sa Paraiso an hinahalat-halat mo nang marhay? (Hilingon an parapo 11-12)
IPAHILING AN PASASALAMAT SA PAGKAMUOT NI JEHOVA
13. Paano ta maipapahiling an satong pasasalamat sa pagkamuot ni Jehova? (2 Corinto 6:1)
13 Paano ta maipapahiling an satong pasasalamat sa pantubos na itinao ni Jehova? Ipriyoridad ta sa satong buhay an saiyang gibuhon. (Mat. 6:33) Tutal, nagadan si Jesus “tanganing idtong mga nabubuhay mabuhay bako nang para sa saindang sadiri, kundi para sa saiya na nagadan alang-alang sa sainda saka ibinangon.” (2 Cor. 5:15) Siguradong habo niyatong pagsayangon an katuyuhan kan daing kapantay na kabuutan ni Jehova.—Basahon an 2 Corinto 6:1.
14. Paano ta maipapahiling na nagtitiwala asin nagsusunod kita sa paggiya ni Jehova?
14 Maipapahiling ta man an satong pasasalamat sa pagkamuot ni Jehova paagi sa pagtitiwala asin pagsunod sa saiyang paggiya. Paano? Pag may mga gigibuhon kitang desisyon, arog kan kun gurano kadakul na sekular na edukasyon an kaipuhan tang kuanon o kun anong trabaho an dapat tang akuon, dapat niyatong pag-isipan kun ano an gusto ni Jehova na gibuhon ta. (1 Cor. 10:31; 2 Cor. 5:7) Kun ipinapahiling ta sa gibo an satong pagtubod, may marahayon iyan na resulta—lalong nagkukusog an satong pagtubod asin pakikiamigo ki Jehova. Nagigin mas sigurado kita sa satong paglaom.—Roma 5:3-5; Sant. 2:21, 22.
15. Paano ta maipapahiling an satong pasasalamat sa pagkamuot ni Jehova sa panahon na ini nin Memoryal?
15 May saro pang paagi na maipapahiling ta an satong pasasalamat sa pagkamuot ni Jehova. Iyan an pag-aprobetsar sa panahon na ini nin Memoryal tanganing ipahiling ki Jehova an satong dakulang pasasalamat sa pantubos. Apuwera sa pag-andam para magin presente kita sa Memoryal, puwede man niyatong imbitaran an iba na mag-atender. (1 Tim. 2:4) Ipaliwanag sa mga iniimbitaran mo kun ano an mga ginigibo sa Memoryal. Makakatabang kun ipapahiling mo an mga video sa jw.org na Taano ta Nagadan si Jesus? asin Girumdumon an Kagadanan ni Jesus. Dapat siguraduhon kan mga elder na maiimbitaran an mga inaktibo. Imahinara an kaugmahan sa langit asin sa daga kun mapahiro an pira sa nawawarang mga karnero ni Jehova na bumalik sa saiyang aripumpon! (Luc. 15:4-7) Sa Memoryal, hinguwahon niyatong tara-tarahon bako sana an lambang saro kundi lalo na an mga primerong beses pa lang mag-atender o haloy nang dai nakaatender. Gusto tang ipamati sa sainda na welcome sinda!—Roma 12:13.
16. Taano ta dapat tang pag-isipan na urog pang makikabtang sa ministeryo sa panahon na ini nin Memoryal?
16 Puwede mo daw hinguwahon na urog na makikabtang sa espirituwal na mga aktibidad sa panahon nin Memoryal? Marahayon na paagi iyan tanganing maipahiling mo an saimong pasasalamat sa gabos na ginibo nin Diyos asin ni Cristo para sa sato. Pag urog kitang nakikikabtang sa paglilingkod ki Jehova, urog ta man na maeeksperyensiyahan an saiyang suporta asin, bilang resulta, magigin mas makusog an satong pagtitiwala sa saiya. (1 Cor. 3:9) Siguraduhon man na masusunod mo an babasahon sa Bibliya para sa Memoryal na nakalista sa Pagsiyasat sa Kasuratan Aroaldaw o sa tsart na mahihiling sa workbook para sa pagtiripon sa tahaw kan semana. Puwede ka pa nganing gumibo nin proyekto sa pag-adal na basado sa mga tekstong iyan.
17. Ano an nakakapaugma ki Jehova? (Hilingon man an kahon na “ Mga Paagi Para Maipahiling an Pasasalamat sa Pagkamuot ni Jehova.”)
17 Huli sa saimong kamugtakan, tibaad dai mo magibo an gabos na suhestiyon sa artikulong ini. Pero girumdumon na an hinihiling ni Jehova bako kun gurano kadakul kan naitatao mo kumpara sa iba kundi kun ano an nasa puso mo. Nauugma siya pag namamasdan niya an saimong udok sa pusong pasasalamat sa saiyang mahalagang marhay na regalo, an pantubos.—1 Sam. 16:7; Mar. 12:41-44.
18. Taano ta nagpapasalamat kita sa Diyos na Jehova asin ki Jesu-Cristo?
18 Solamenteng huli sa pantubos kaya nagin posible na mapatawad an satong mga kasalan, na magin amigo kita ni Jehova, asin magkaigwa kita kan paglaom na mabuhay nin daing katapusan. Lugod na pirmi niyatong ipahiling an satong pasasalamat sa pagkamuot ni Jehova, na iyo an nagpahiro sa saiya na itao sa sato an mga bendisyon na ini. (1 Juan 4:19) Lugod na ipahiling ta man an satong pasasalamat ki Jesus, na namutan kitang marhay kaya itinao niya an saiyang buhay bilang tawo alang-alang sa sato!—Juan 15:13.
KANTA 154 Pagkamuot na Dai Mawawara
a Kan panahon bago kan mga Kristiyano, pinatawad ni Jehova an saiyang mga parasamba dawa dai pa kaidto itinatao ni Cristo an pantubos. Ginibo iyan ni Jehova huling tiwala siya na magdadanay na maimbod an saiyang Aki sagkod sa kagadanan. Kaya para ki Jehova, garo man sana naibayad na an pantubos dawa dai pa iyan kaidto naitatao.—Roma 3:25.
