ARTIKULONG PAG-AADALAN 2
KANTA 132 Saro Na Kita Ngunyan
Mga Agom na Lalaki, Tawan nin Onra an Saindong Agom
“Kamong mga agom na lalaki, . . . tawan nindo sinda nin onra.”—1 PED. 3:7.
POKUS
Kun paano matatawan nin onra kan agom na lalaki an saindang agom paagi sa tataramon asin gibo.
1. Ano an sarong dahilan kaya ginibo ni Jehova an areglo nin pag-aguman?
SI Jehova “maugmang Diyos” asin gusto niya man na magin maugma kita. (1 Tim. 1:11) Tinawan niya kita nin dakul na balaog, o mga regalo, tanganing tabangan kita na ikaugma an buhay. (Sant. 1:17) An saro sa mga regalong iyan iyo an pag-aguman. Sa kasal nin sarong lalaki asin babayi, nagsusumpaan sinda na mamumutan ninda, igagalang, asin papahalagahan na marhay an kada saro. Kun papagdanayon nindang makusog an saindang relasyon, makakatao iyan sa sainda nin tunay na kaugmahan.—Tal. 5:18.
2. Ano an kamugtakan kan relasyon kan dakul na mag-agom ngunyan?
2 Nakakamundo, dakul na mag-agom sa kinaban ngunyan an nalilingawan na an promesang ginibo ninda sa aldaw kan saindang kasal. Kaya, bako sindang maugma. Ipinaparisa sa sarong dai pa sana nahahaloy na report hali sa World Health Organization na dakul na agom na lalaki an inaabuso sa pisikal, berbal, o emosyonal an saindang agom. An agom na lalaki na naggigibo kaini tibaad may paggalang sa saiyang agom pag nasa atubangan kan iba pero tinatratar ini nin bakong marahay pag nasa harong na. Dakul na relasyon nin mag-agom an nagkakaproblema man pag an agom na lalaki naghihiling nin pornograpiya.
3. Taano ta nagigin mapang-abuso an sarong agom na lalaki?
3 Taano ta nagigin mapang-abuso an nagkapirang agom na lalaki? Tibaad pinadakula sinda nin sarong bayolenteng ama, kaya para sa sainda normal lang an pagigin mapang-abuso. An iba naiimpluwensiyahan kan kultura sa palibot ninda, na tibaad nagsusuportar sa salang ideya na an “tunay na lalaki” dapat na magin maisog tanganing ipahiling sa saiyang agom kun siisay an dapat masunod. May mga lalaki na dai natukduan na kontrulon an saindang kaanggutan pati na an iba pang mga emosyon. May mga lalaki man na nagkaigwa nin biribid na pagmansay sa mga babayi asin sa sex huli sa pagparahiling ninda nin pornograpiya. Dugang pa, ipinaparisa sa mga report na lalo pang naggrabe an mga problemang ini dahil sa epekto kan COVID-19 na pandemya. Siyempre, bakong dahilan an mga bagay na ini tanganing magin mapang-abuso an sarong agom na lalaki.
4. Sa ano kaipuhan na mag-ingat an mga Kristiyanong agom na lalaki, asin taano?
4 Kaipuhan na mag-ingat an mga Kristiyanong agom na lalaki na dai magkaigwa nin salang pagmansay sa mga babayi. a Taano? An sarong dahilan iyo na kun ano an iniisip nin saro, sa parati, iyo man iyan an gigibuhon niya. Nagpatanid si apostol Pablo sa linahidan na mga Kristiyano sa Roma na “dai na . . . magpamolde sa sistemang ini nin mga bagay.” (Roma 12:1, 2) Kan magsurat si Pablo sa mga taga Roma, minalataw na medyo haloy-haloy nang naestablisar an kongregasyon diyan. Alagad, ipinaparisa kan mga tataramon ni Pablo na may nagkapira sa kongregasyon na impluwensiyado pa man giraray kan mga kostumbre asin kaisipan kan kinaban. Iyan an dahilan kaya sinadol sinda ni Pablo na liwaton an saindang kaisipan asin paggawi. An sadol na iyan aplikado man sa mga Kristiyanong agom na lalaki ngunyan. Nakakamundo, an nagkapira sa sainda naimpluwensiyahan kan kaisipan kan kinaban asin inabuso pa ngani an saindang agom. b Ano an inaasahan ni Jehova na magigin pagtratar kan agom na lalaki sa saiyang agom? Mahihiling ta an simbag sa temang teksto kan artikulong ini.
5. Uyon sa 1 Pedro 3:7, paano dapat na trataron kan agom na lalaki an saiyang agom?
5 Basahon an 1 Pedro 3:7. Ipinagbuot ni Jehova sa mga agom na lalaki na tawan nin onra an saindang agom. An pagtao nin onra nanunungod sa kun paano ta tinatratar an saro na satong iginagalang. An agom na lalaki na tinatawan nin onra an saiyang agom tatrataron ini sa mabuot asin mamumuton na paagi. Sa artikulong ini, kokonsideraron ta kun paano matatawan nin onra kan agom na lalaki an saiyang agom. Pero pag-ulayan ta nguna an mga paggawi na nakakahali nin onra sa mga agom na babayi.
ISIKWAL AN MGA PAGGAWI NA NAKAKAHALI NIN ONRA SA SAIMONG AGOM NA BABAYI
6. Ano an namamatian ni Jehova manungod sa mga lalaki na inaabuso sa pisikal an saindang agom? (Colosas 3:19)
6 Pisikal na pang-aabuso. Ikinakaungis ni Jehova an siisay man na madahas. (Sal. 11:5) Espesipiko niyang kinokondenar an mga agom na lalaki na inaabuso an saindang agom. (Mal. 2:16; basahon an Colosas 3:19 asin nota sa ibaba.) Uyon sa satong temang teksto na 1 Pedro 3:7, kun dai tinatrato nin tama kan agom na lalaki an saiyang agom, maaapektaran kaiyan an saiyang relasyon sa Diyos. Tibaad dai na ngani dangugon ni Jehova an saiyang mga pamibi.
7. Uyon sa Efeso 4:31, 32, anong klase nin pagtaram an dapat likayan kan mga agom na lalaki? (Hilingon man an “Paliwanag Dapit sa Tataramon.”)
7 Berbal na pang-aabuso. May mga agom na lalaki na inaabuso an saindang agom paagi sa pagtaram sa sainda nin anggot saka makulog. Pero ikinakaungis ni Jehova an “kaanggutan, pagkaungis, sirilyakan, asin mapang-insultong pagtaram [o, mapang-abusong pagtaram].” c (Basahon an Efeso 4:31, 32.) Nadadangog niya an gabos. Mahalaga ki Jehova an paagi nin pagtaram kan agom na lalaki sa saiyang agom, dawa pag sinda sanang dawa. Kun an sarong agom na lalaki malanit magtaram sa agom niya, nadadanyaran bako sana an relasyon niya sa saiyang agom kundi pati man an relasyon niya sa Diyos.—Sant. 1:26.
8. Ano an namamatian ni Jehova manungod sa pornograpiya, asin taano?
8 Paghiling nin pornograpiya. Ano an namamatian ni Jehova manungod sa pornograpiya? Ikinakaungis niya iyan. Kaya pag an sarong agom na lalaki naghihiling nin pornograpiya, dinadanyaran niya an relasyon niya ki Jehova asin hinahalian niya nin onra an saiyang agom. d Inaasahan ni Jehova sa agom na lalaki na magdadanay siyang maimbod sa saiyang agom bako sana sa saiyang mga gibo kundi pati man sa saiyang kaisipan. Sinabi ni Jesus na an sarong lalaki na naghihiling sa ibang babayi asin nagkakaigwa nin imoral na pagmawot sa babaying iyan nakakakomiter na “sa puso niya” nin pagsambay. e—Mat. 5:28, 29.
9. Taano ta ikinakaungis ni Jehova pag an sarong agom na lalaki minagawi sa paaging nakakahali nin onra sa saiyang agom pag-abot sa saindang seksuwal na relasyon?
9 Paggawing nakakahali nin onra sa agom na babayi pag-abot sa seksuwal na relasyon. May mga agom na lalaki na pinipirit an saindang agom sa seksuwal na mga gibo na nakakahali nin onra asin na nakakapamati sa saiya na siya maati o dai namumutan. Ikinakaungis ni Jehova an arog kaiyan na makasadiri asin daing konsiderasyon na paggawi. Inaasahan niyang mamumutan asin papadangaton kan agom na lalaki an saiyang agom asin na igagalang niya an namamatian kaini. (Efe. 5:28, 29) Paano kun an sarong Kristiyanong agom na lalaki minagawi sa paaging nakakahali nin onra sa saiyang agom o mapang-abuso o naghihiling nin pornograpiya? Paano niya mababago an saiyang kaisipan asin paggawi?
KUN PAANO MAIPUPUNDO AN PAGGAWING NAKAKAHALI NIN ONRA
10. Paano makikinabang an mga agom na lalaki sa halimbawa ni Jesus?
10 Ano an makakatabang sa agom na lalaki na maipundo an pagigin mapang-abuso asin an paggawing nakakahali nin onra? Puwede niyang hinguwahon na arugon si Jesus. Dawa ngani dai si Jesus nag-agom, an paagi nin pagtratar niya sa saiyang mga disipulo arugan sa kun paano dapat trataron kan agom na lalaki an saiyang agom. (Efe. 5:25) Halimbawa, pag-isipan kun ano an manunudan kan mga agom na lalaki sa kun paano trinatar ni Jesus an saiyang mga apostol asin sa paagi niya nin pagtaram sa sainda.
11. Paano trinatar ni Jesus an saiyang mga apostol?
11 Trinatar ni Jesus an mga apostol niya sa mabuot asin may dignidad na paagi. Nungka siyang nagin maisog o dominante. Dawa ngani siya an saindang Kagurangnan, dai ginamit ni Jesus an kapangyarihan niya tanganing ipamati na may awtoridad siya sa sainda. Imbes, mapakumbaba niya sindang pinaglingkudan. (Juan 13:12-17) Sinabi niya sa saiyang mga disipulo: “Makanuod kamo sa sako, huli ta ako may mahuyong buot saka may mapakumbabang puso, asin magiginhawahan kamo.” (Mat. 11:28-30) Mangnuhon na mahuyo an buot ni Jesus. An sarong tawong mahuyo bakong maluya. Imbes, igwa siya kan panglaog na kusog na magpahiling nin pagpupugol sa sadiri. Pag pinoprobokar, nagdadanay siyang kalmado asin kontrolado an saiyang emosyon.
12. Paano nagtaram si Jesus sa iba?
12 Ginamit ni Jesus an saiyang mga tataramon tanganing rangahon asin paginhawahon an iba. Dai siya nagtaram nin malanit sa saiyang mga parasunod. (Luc. 8:47, 48) Dawa kan iniinsulto siya asin pinoprobokar kan mga nagkokontra, “dai siya nagbalos nin pang-iinsulto.” (1 Ped. 2:21-23) May mga pagkakataon ngani na nagdanay na lang na silensiyo si Jesus imbes na magsimbag nin malanit. (Mat. 27:12-14) Marahayon nanggad siyang halimbawa para sa mga Kristiyanong agom na lalaki!
13. Arog kan sinasabi sa Mateo 19:4-6, paano magigibo kan agom na lalaki na ‘magdanay na kaibanan kan saiyang agom’? (Hilingon man an ritrato.)
13 Ininstruksiyunan ni Jesus an mga agom na lalaki na magdanay na maimbod sa saindang agom. Kinotar niya an saiyang Ama, na nagsabi na an agom na lalaki dapat na ‘magdanay na kaibanan kan saiyang agom.’ (Basahon an Mateo 19:4-6.) An Griegong pandiwa na ginamit sa tekstong iyan para sa “magdadanay” literal na nangangahulugan na “madukot.” Kaya, an relasyon kan agom na lalaki asin kan agom na babayi dapat na magin makusugon na garo man sana pinagdukot sinda. Pag naraot an relasyon ninda, siguradong madadanyaran man sindang duwa. An sarong agom na lalaki na hinihinguwang magkaigwa nin arog kaiyan na relasyon sa saiyang agom isisikwal an gabos na klase nin pornograpiya. Tulos-tulos niyang irarayo an saiyang “paghiling sa mga bagay na daing kamanungdanan.” (Sal. 119:37) Garo man sana siya nakikipagtipan sa saiyang mga mata na dai maghiling na may malisya sa siisay man na babayi apuwera sa saiyang agom.—Job 31:1.
An sarong maimbod na agom nagsasayumang maghiling nin pornograpiya (Hilingon an parapo 13) g
14. Ano an dapat na gibuhon nin sarong mapang-abusong agom na lalaki tanganing mahirahay an saiyang relasyon ki Jehova asin sa saiyang agom?
14 An sarong agom na lalaki na inaabuso sa pisikal o sa berbal an saiyang agom kaipuhan na may gibuhon na dugang pang lakdang tanganing mahirahay an relasyon niya ki Jehova asin sa saiyang agom. Ano an mga lakdang na ini? Inot, kaipuhan niyang akuon na may seryoso siyang problema. Mayo nin ano man na maitatago ki Jehova. (Sal. 44:21; Ecl. 12:14; Heb. 4:13) Ikaduwa, kaipuhan niyang ipundo an pang-aabuso sa saiyang agom asin liwaton an saiyang paggawi. (Tal. 28:13) Ikatulo, kaipuhan niyang maghagad nin dispensa sa saiyang agom saka ki Jehova asin hinguwahon na makamtan an saindang pagpapatawad. (Gibo 3:19) Dapat man siyang makimahirak ki Jehova na tawan siya kan pagmawot na magbago asin kan tabang na kaipuhan para makontrol an saiyang kaisipan, pagtaram, asin paggawi. (Sal. 51:10-12; 2 Cor. 10:5; Fil. 2:13) Ikaapat, kaipuhan niyang humiro kauyon kan saiyang mga pamibi paagi sa pakanuod na ikaungis an gabos na klase nin kadahasan asin mapang-abusong pagtaram. (Sal. 97:10) Ikalima, kaipuhan niyang humagad tulos nin tabang sa mamumuton na mga pastor sa kongregasyon. (Sant. 5:14-16) Ikaanom, kaipuhan niyang gumibo nin plano na makakatabang sa saiya na dai na magibo an arin man sa maraot na paggawing sinambit kasubago. An mga lakdang na ini iyo man an dapat na gibuhon nin sarong agom na lalaki na naghihiling nin pornograpiya. Bebendisyunan ni Jehova an saiyang mga paghihinguwa na baguhon an saiyang paggawi. (Sal. 37:5) Pero bako lang pagsikwal sa mga paggawing nakakahali nin onra an kaipuhan na gibuhon nin sarong agom na lalaki. Kaipuhan niya man na manudan kun paano magpahiling nin onra sa saiyang agom. Paano niya iyan magigibo?
KUN PAANO PAPAHILINGAN NIN ONRA AN SAIMONG AGOM NA BABAYI
15. Paano puwedeng ipahiling kan agom na lalaki na padangat niya an saiyang agom?
15 Magpahiling nin kapadangatan. May mga brother na may maugmang pag-aguman na naghihinguwang gumibo kada aldaw nin sarong bagay para sa saindang agom tanganing ipahiling na namumutan ninda ining marhay. (1 Juan 3:18) Puwedeng ipahiling kan agom na lalaki an saiyang mamumuton na kapadangatan sa agom niya sa simpleng mga paagi, arog kan pagkapot sa saiyang kamot o mapagpadangat na pagkugos sa saiya. Puwede niya man siyang i-text nin “Miss taka na” o haputon siya “Kumusta an aldaw mo?” Paminsan-minsan, puwede siyang gumibo nin kard na diyan nakasurat kun gurano niya siya kanamumutan. Pag ginigibo ini kan agom na lalaki, tinatawan niya nin onra an saiyang agom asin napapakusog niya an saindang relasyon.
16. Taano ta dapat na umawon kan agom na lalaki an saiyang agom?
16 Magpahiling nin apresasyon. An agom na lalaki na tinatawan nin onra an saiyang agom ipinapamati na mahalaga siya sa saiya saka pinapakusog niya siya. An sarong paagi na ginigibo ini kan agom na lalaki iyo an dai paglingaw na pasalamatan an agom niya sa gabos na ginigibo kaini tanganing suportaran siya. (Col. 3:15) Pag sinserong inuumaw kan agom na lalaki an saiyang agom, napapaugma niya ini. Mamamatian kan agom niya na siya ligtas, namumutan, asin tinatawan nin onra.—Tal. 31:28.
17. Paano maipapahiling kan agom na lalaki na iginagalang niya an saiyang agom?
17 Magin mabuot asin magalang. An agom na lalaki na namumutan an saiyang agom pinapahalagahan ini asin pinapadaba. Ibinibilang niya siyang sarong regalong daing kaagid an halaga hali ki Jehova. (Tal. 18:22; 31:10) Huli kaiyan, tinatratar niya siya nin may kabuutan asin paggalang, dawa pag-abot sa saindang seksuwal na relasyon. Dai niya siya pipiriton sa seksuwal na mga gibo na bakong komportable sa saiya, na nakakahali nin onra, o nakakaribok kan saiyang konsiyensiya. f Arog kan saiyang agom na babayi, gusto man niyang mapagdanay na malinig an saiyang konsiyensiya sa atubangan ni Jehova.—Gibo 24:16.
18. Ano an dapat na magin determinadong gibuhon kan mga agom na lalaki? (Hilingon man an kahon na “ Apat na Paagi Kun Paano Magigin Magalang na Agom na Lalaki.”)
18 Mga agom na lalaki, makakasigurado kamo na nahihiling asin inaapresyar ni Jehova an saindong mga paghihinguwa na tawan nin onra an saindong agom sa gabos na aspekto kan saindong buhay. Magin determinado na tawan siya nin onra paagi sa dai paggibo nin mga bagay na nakakahali nin onra sa saiya asin paagi sa pagigin mabuot, magalang, saka mapagpadangat sa saiya. Pag ginigibo nindo iyan, ipinapahiling nindong namumutan asin pinapahalagahan nindo siya. Kun tatawan nindo nin onra an saindong agom, mapoprotektaran nindo an saindong pinakamahalagang relasyon—an saindong pakikiamigo ki Jehova.—Sal. 25:14.
KANTA 131 “An Pinagsaro nin Diyos”
a Makikinabang an mga agom na lalaki sa pagbasa kan artikulong “An Pagtratar Mo Daw sa mga Babayi Arog kan ki Jehova?” sa Enero 2024 na isyu kan An Torrengbantayan.
b Puwedeng makinabang an mga biktima nin pang-aabuso sa laog nin pamilya sa pagbasa kan artikulong “Tulong sa mga Biktima ng Pang-aabuso sa Loob ng Pamilya” sa serye nin mga artikulo na “Iba Pang Paksa” sa jw.org asin sa JW Library®.
c PALIWANAG DAPIT SA TATARAMON: Kaiba sa “mapang-abusong pagtaram” an pag-apod sa saro nin mapanghamak na mga apod asin an makulog saka daing pundong pagkritika. An ano man na pagtaram na may maraot na intensiyon, mapangmenos, nakakahali nin onra, o mapang-insulto ibinibilang na mapang-abuso.
d Hilingon sa jw.org asin sa JW Library an artikulong “Puwedeng Sirain ng Pornograpya ang Pagsasama Ninyong Mag-asawa.”
e An agom na babayi na an agom naghihiling nin pornograpiya makikinabang sa artikulong “Pag an Agom Naghihiling nin Pornograpiya” sa Agosto 2023 na isyu kan An Torrengbantayan.
f Dai nagtatao an Bibliya nin mga detalye sa kun anong seksuwal na mga gibo sa pag-ultanan nin mag-agom an dapat na ibilang na malinig o bakong malinig. An sarong Kristiyanong mag-agom dapat na gumibo nin mga desisyon na nagpapahiling kan saindang determinasyon na tawan nin onra si Jehova, paugmahon an kada saro, asin mapagdanay an malinig na konsiyensiya. Sa pangkagabsan, an sarong mag-agom dai ipapakipag-ulay sa iba an pribadong aspektong ini kan saindang relasyon.
g DESKRIPSIYON KAN RITRATO: An bakong Saksing mga katrabaho kan sarong brother inaagda siyang maghiling sa saindang pornograpikong magasin.
