1. Sa ano nakapokus an dakul ngunyan?

 NARISA mo daw na dakul ngunyan an garo baga sa sadiri sana ninda nakapokus? Halimbawa, may mga indibidwal na ginigibo an gabos sa social media tanganing ibida an saindang sadiri saka an mga naisagibo ninda para makua an atensiyon kan iba. Sa ibong na lado, pipira lang an nagtatao nin kamurawayan sa Diyos na Jehova. Sa artikulong ini, pag-uulayan niyato kun ano an buot sabihon kan pagtao nin kamurawayan ki Jehova asin kun ano an dapat na makapahiro sa sato na gibuhon iyan. Aaramon ta man kun paano ta matatawan an Diyos kan kamurawayan na maninigo sa saiya asin kun paano niya mismo papamurawayon an saiyang pangaran sa dai na mahahaloy.

ANO AN BUOT SABIHON KAN TAWAN NIN KAMURAWAYAN SI JEHOVA?

2. Paano ipinahiling ni Jehova an saiyang kamurawayan sa Bukid nin Sinai? (Hilingon man an ritrato.)

² Ano an kamurawayan? Sa Bibliya, an tataramon na “kamurawayan” puwedeng magpanungod sa ano man na nagpapangyari sa saro na magin kahanga-hanga. Naggibo si Jehova nin pambihirang pagpahiling kan saiyang kamurawayan dai nahaloy pagkatapos na an nasyon nin Israel patalingkason sa pagkauripon sa Ehipto. Imahinara an eksena: Minilyon na Israelita an nagkatiripon sa may pamitisan kan Bukid nin Sinai para umatubang sa saindang Diyos. Dangan sarong mahibog na panganuron an tuminahob sa bukid. Bigla na sanang nagkaigwa nin sarong makusugon na linog—na minalataw na may kaibang aktibidad nin bulkan—kaya nagyugo-yugo an dagang pigtutungtungan ninda mantang nagkikikilat, nagdadaguldol, asin nadadangog an makusugon na tanog nin hamudyong. (Exo. 19:16-18; 24:17; Sal. 68:8) Isip-isipa na sana an labi-labing paghanga kan mga Israelita sa pagpahiling na ini ni Jehova kan saiyang kamurawayan sa pambihirang paagi.

3. Ano an buot sabihon kan tawan nin kamurawayan si Jehova?

³ Kitang mga tawo, kaya ta daw na tawan nin kamurawayan si  Jehova? Iyo. An sarong paagi na matatawan ta nin kamurawayan si Jehova iyo an pagsabi sa iba kan saiyang makangangalas na kapangyarihan asin kan saiyang marahayon na mga kuwalidad. Natatawan ta man nin kamurawayan an Diyos pag itinatao ta sa saiya an kredito sa mga bagay na naisasagibo ta paagi sa kusog na itinatao niya. (Isa. 26:12) Si Hading David sarong marahayon na halimbawa nin saro na nagtao nin kamurawayan ki Jehova. Sa sarong pamibi na itinao niya sa atubangan kan katiripunan kan Israel, sinabi ni David sa Diyos: “Saimo, O Jehova, an kadakulaan, an kakusugan, an kagayunan, an kamurawayan, pati an kamahalan, huling saimo an gabos na bagay sa kalangitan asin sa daga.” Kan matapos na an pamibi ni David, “inumaw kan bilog na katiripunan si Jehova.”—1 Cron. 29:11, 20.

4. Paano ni Jesus tinawan nin kamurawayan si Jehova?

⁴ Kan si Jesus yaon digdi sa daga, pinamuraway niya an saiyang Ama paagi sa pagsabi sa mga tawo na Siya an Gikanan kan saiyang mga milagro. (Mar. 5:18-20) Nagtao man si Jesus nin kamurawayan ki Jehova paagi sa pagpapatotoo niya manungod sa saiyang Ama asin sa paagi niya nin pagtratar sa iba. Sa sarong pagkakataon, nagtutukdo kaidto si Jesus sa sinagoga. Kaiba sa mga nagdadangog an sarong babaying 18 taon nang sinasaniban nin demonyo. Dahil sa demonyo nagin buktot siya kaya dai siya makatindog nin tanos. Masakiton an saiyang sitwasyon! Huli sa pagkahirak ni Jesus, dinulok niya an babayi asin mamumuton ining kinaulay, na sinasabi: “Babayi, pinaumayan ka na sa saimong pangluluya.” Dangan ipinatong niya sa saiya an saiyang mga kamot, asin nagtindog tulos ini nin tanos asin “nagpuon na magpamuraway sa Diyos.” Makusog na giraray an saiyang salud asin lubos na naibalik an saiyang dignidad! (Luc. 13:10-13) May marahayon nanggad na dahilan an babaying iyan para tawan nin kamurawayan si Jehova, asin iyo man kita.

ANO AN NAGPAPAHIRO SA SATO PARA TAWAN NIN KAMURAWAYAN SI JEHOVA?

5. Ano an mga dahilan niyato para igalang si Jehova?

⁵ Pinapamuraway ta si Jehova huli sa hararom na paggalang ta sa saiya. Dakulon kita nin dahilan para igalang siya. Si Jehova makakamhan sa gabos; daing limite an saiyang kapangyarihan. (Sal. 96:4-7) An saiyang dakulang kadunungan malinaw na nahihiling sa mga bagay na ginibo niya. Siya an Gikanan kan satong buhay asin an Parasustenir kaiyan. (Kap. 4:11) Siya maimbod. (Kap. 15:4) Nagigin mapanggana an gabos niyang ginigibo, asin pirmi niyang inuutob an saiyang mga panuga. (Jos. 23:14) Bakong makangangalas na sinabi ni propeta Jeremias manungod ki Jehova: “Sa gabos na mga madunong sa mga nasyon asin sa gabos nindang kahadian, mayo nanggad nin siisay man na arog mo”! (Jer. 10:6, 7) Iyo, may marahay na mga dahilan kita na igalang an satong Ama sa langit. Pero bako lang paggalang an maninigo tang itao ki Jehova kundi pati man an satong pagkamuot.

6. Taano ta namumutan ta si Jehova?

⁶ Pinapamuraway ta si Jehova huling namumutan ta siyang marhay. Pag-isipan an nagkapirang magagayon na kuwalidad ni Jehova kaya namumutan ta siya. Siya mahihirakon. (Sal. 103:13; Isa. 49:15) May empatiya siya; pag nakukulgan kita, nakukulgan man siya. (Zac. 2:8) Tinatabangan niya kitang magin harani sa saiya bilang satong Amigo. (Sal. 25:14; Gibo 17:27) Asin mapakumbaba siya; “minaduko siya tanganing hilingon an langit asin daga, na ibinabangon an hamak hali sa alpog.” (Sal. 113:6, 7) Kaya siisay man an dai magugustong pamurawayon an satong makapangyarihan na Diyos?—Sal. 86:12.

7. Anong espesyal na oportunidad an igwa kita?

⁷ Pinapamuraway ta si Jehova huling gusto tang mamidbid siya kan iba. Dakul an dai nakakaaram kan katotoohan manungod ki Jehova. Taano? Huling binuta ni Satanas an saindang isip paagi sa pagpalakop nin marauton na  mga kaputikan manungod sa Saiya. (2 Cor. 4:4) Pinatubod ni Satanas an mga tawo na si Jehova mabinalos, daing pagmalasakit, asin na Siya daa an dahilan kan dakul na pagsakit sa kinaban. Alagad aram ta an katotoohan manungod sa satong Diyos! Igwa kita kan oportunidad na pahimutikan an mga kaputikan na iyan asin sa siring matawan Siya nin kamurawayan. (Isa. 43:10) An Salmo 96 nakapokus sa pagtao nin kamurawayan ki Jehova. Mantang pinag-uulayan ta an pira sa ipinasabong na mga tataramon sa salmong ini, mag-isip nin mga paagi na puwede mong matawan si Jehova kan kamurawayan na maninigo nanggad sa saiya.

PAANO TA MATATAWAN SI JEHOVA KAN KAMURAWAYAN NA MANINIGO SA SAIYA?

8. Ano an sarong paagi na mapapamuraway ta si Jehova? (Salmo 96:1-3)

⁸ Basahon an Salmo 96:1-3. Mapapamuraway ta si Jehova paagi kan mga sinasabi ta manungod sa saiya. Sa mga bersikulong ini, iniimbitaran an mga lingkod ni Jehova na “magkanta ki Jehova,” na “umawon an pangaran niya,” na “ibalangibog . . . an maugmang bareta manungod sa pagliligtas niya,” asin na “ipahayag sa mga nasyon an saiyang kamurawayan.” An gabos na ini mga paagi na mapapamuraway ta an satong Ama sa langit. An maimbod na mga Judio asin inot na siglong mga Kristiyano dai nag-alangan na sabihon sa iba an manungod sa gabos na marahay na bagay na ginibo ni Jehova para sa sainda. Dai man sinda nag-alangan na idepensa an saiyang reputasyon. (Dan. 3:16-18; Gibo 4:29) Paano ta man iyan magigibo?

9-10. Ano an nanudan mo sa eksperyensiya ni Angelena? (Hilingon man an ritrato.)

⁹ Pag-isipan an eksperyensiya ni Angelena, a sarong sister na nakaistar sa Estados Unidos. Kusog-buot niyang idinepensa an reputasyon ni Jehova sa kompanyang pigtatrabahuhan niya. Bilang bagong empleyado, inimbitaran si Angelena sa sarong miting na diyan tinatawan nin oportunidad an mga baguhan sa kompanya na iintrodusir an saindang sadiri. Nagpreparar si Angelena nin sarong slide show na ipinapahiling an kaugmahan na igwa siya bilang saro sa mga Saksi ni Jehova. Alagad, bago pa man si Angelena magpabisto, inintrodusir na kan sarong katrabaho niyang lalaki an saiyang sadiri asin sinabing pinadakula siya nin mga magurang na Saksi ni Jehova. Pero pinunan kaining tuya-tuyaon an mga tinutubod ta. Inistorya ni Angelena: “Grabe su kurab-kutab kan puso ko. Pero naisip ko: ‘Tutugutan ko na lang daw na may magsabi nin kaputikan manungod ki Jehova? O idedepensa ko Siya?’”

 ¹⁰ Kan tapos na su katrabaho niya, marikas na namibi nin silensiyo si Angelena. Dangan mabuot niyang sinabi sa katrabaho niyang lalaki: “May pagkakapareho palan kita. Nagdakula man ako sa pamilyang Saksi, asin sagkod ngunyan Saksi ni Jehova ako.” Mamamati talaga an tensiyon; pero, nagdanay na kalmado si Angelena mantang ipinapahiling niya an nakakaugmang mga ritrato sa espirituwal na mga okasyon na inatenderan niya asin mantang mataktika niyang idinedepensa an saiyang mga tinutubod. (1 Ped. 3:15) Ano an resulta? Kan matapos na si Angelena sa presentasyon niya, medyo nagbago na an sabuot kan katrabaho niya. Sinabi pa ngani niyang may maugma siyang mga eksperyensiya kan siya hoben pa asin nakakaiba-iba an mga Saksi ni Jehova. Sinabi ni Angelena: “Maninigo si Jehova na idepensa ta. Sarong pribilehiyo na sabihon an katotoohan manungod sa saiya.” Igwa man kita kan pribilehiyo na umawon si Jehova asin pamurawayon siya dawa pag daing galang sa saiya an iba.

11. Sa bilog na kasaysayan, paano sinusunod kan tunay na mga parasamba an prinsipyo na nasa Salmo 96:8?

¹¹ Basahon an Salmo 96:8. Mapapamuraway ta si Jehova paagi kan satong mahalagang mga pagsadiri. Puon pa kaidto, an tunay na mga parasamba tinatawan na nin onra si Jehova sa arog kaiyan na paagi. (Tal. 3:9) Halimbawa, an mga Israelita nagtao nin mga kontribusyon para sa pagtugdok asin pagmentenar kan templo. (2 Ha. 12:4, 5; 1 Cron. 29:3-9) Ginamit kan mapagmakulog na mga disipulo ni Cristo an “saindang mga pagsadiri” sa pagtabang sa saiya saka sa saiyang mga apostol. (Luc. 8:1-3) An inot na siglong mga Kristiyano nagtao man nin ayuda para sa saindang mga tugang sa espirituwal. (Gibo 11:27-29) Sa ngunyan mapapamuraway ta man si Jehova paagi kan satong boluntaryong mga donasyon.

12. Paano nakakatao nin kamurawayan ki Jehova an satong mga donasyon? (Hilingon man an ritrato.)

¹² Pag-isipan an saro sana sa mga eksperyensiya na nagpapahiling kun paano nakakatao nin kamurawayan ki Jehova an satong mga donasyon. Ilinadawan sa sarong report kan 2020 an mga epekto kan nangyaring halawig na tigmara sa Zimbabwe. Minilyon an haros magadan na sa grabeng gutom, kaiba na an sister na si Prisca. Sa ibong kan masakiton na sitwasyon na iyan, nagpadagos si Prisca sa saiyang rutina nin paghuhulit kada Miyerkules asin Biyernes, dawa kan panahon na nin pag-arado. Pigparatuya siya kan mga pagtaraid niya dahil imbes daang magtrabaho siya sa uma nasa ministeryo siya. Sinasabi ninda: “Magagadan ka sa gutom.” May kumpiyansang nagsisimbag sa sainda si Prisca, “Dai lamang pinapabayaan ni Jehova an mga lingkod niya.” Dai nahaloy pagkatapos kaiyan,  nakaresibi siya nin ayuda hali sa satong organisasyon. Nagin posible an mga ayudang iyan huli sa satong mga donasyon. Napahanga an mga pagtaraid ni Prisca, kaya sinabi ninda sa saiya, “Dai ka lamang talaga pinabayaan kan Diyos mo; gusto mi siyang mas mabisto pa.” Pito sa mga pagtaraid niya an nagpuon na mag-atender sa mga pagtiripon kan kongregasyon.

13. Paano makakatao nin kamurawayan ki Jehova an satong paggawi? (Salmo 96:9)

¹³ Basahon an Salmo 96:9. Makakatao kita nin kamurawayan ki Jehova paagi kan satong paggawi. An mga saserdote na naglilingkod kaidto sa templo ni Jehova kaipuhan na magin malinig sa pisikal. (Exo. 40:30-32) Alagad, igwa nin urog pang mas mahalaga kisa sa pisikal na kalinigan—an malinig na paggawi. (Sal. 24:3, 4; 1 Ped. 1:15, 16) Kaipuhan tang pagmaigutan na hubaon “an lumang personalidad”—maating kaisipan asin paggawi—asin isulot “an bagong personalidad”—kaisipan asin paggawi na nagpapabanaag kan magayunon na mga kuwalidad ni Jehova. (Col. 3:9, 10) Paagi sa tabang ni Jehova, dawa an pinakaimoral asin pinakabayolenteng mga indibidwal puwedeng magbago asin makapagsulot kan bagong personalidad.

14. Ano an nanudan mo sa eksperyensiya ni Jack? (Hilingon man an ritrato.)

¹⁴ Pag-isipan an eksperyensiya ni Jack, sarong bayolente asin peligrosong lalaki na binansagan na An Demonyo. Huli sa mga krimen na ginibo ni Jack, sinentensiyahan siya nin kagadanan. Alagad, mantang hinahalat ni Jack na isagibo an sentensiya sa saiya, nag-uyon siyang makipag-adal nin Bibliya sa sarong brother na nagdalaw sa presuhan kun sain siya nakapreso. Sa ibong kan maraot niyang mga ginibo kaidto, hinuba ni Jack an saiyang lumang personalidad asin pag-abot nin panahon nakuwalipikar para sa bawtismo. Dakulaon an ipinagbago ni Jack kaya kan aldaw na gagadanon na siya, napaluha an nagkapira sa mga guwardiya sa presuhan mantang nagpapaaram sinda ki Jack. An sarong sarhento na nagtatrabaho sa presuhan nagsabi: “Kaidto, si Jack an pinakamaraot na preso digdi. Ngunyan, saro na siya sa pinakamarahay.” Kan sunod na semana pagkatapos kan paggadan ki Jack, an mga brother na nagbalik sa presuhan para magkondukta nin pagtiripon kada semana may nakaulay na sarong preso na primerong beses pa sana kaidtong nag-atender sa pagtiripon. Ano an nakapahiro saiya na mag-atender? Napahanga siya sa nagin pagbabago sa paggawi ni Jack asin gusto niyang maaraman kun ano an kaipuhan niyang gibuhon para masamba niya si Jehova. Malinaw na an satong paggawi puwede nanggad na magdara nin kamurawayan sa satong Ama sa langit!—1 Ped. 2:12.

 PAANO PAPAMURAWAYON NI JEHOVA AN SAIYANG PANGARAN SA DAI NA MAHAHALOY?

15. Paano lubos na papamurawayon ni Jehova an saiyang pangaran sa dai na mahahaloy? (Salmo 96:10-13)

¹⁵ Basahon an Salmo 96:10-13. Sa huring mga bersikulong ini kan Salmo 96 ilinaladawan si Jehova bilang sarong matanos na Hukom asin Hadi. Paano papamurawayon ni Jehova an saiyang pangaran sa dai na mahahaloy? Paagi sa saiyang mga paghukom. Madali niya nang laglagon an Dakulang Babilonya huli sa pagdara kaini nin katuyawan sa saiyang banal na pangaran. (Kap. 17:5, 16; 19:1, 2) An nagkapirang makakahiling sa paglaglag sa Dakulang Babilonya tibaad mag-iba sa sato sa tunay na pagsamba. Sa katapos-tapusi, sa Armagedon, lalaglagon ni Jehova an enterong sistema ni Satanas. Paparaon niya an gabos na nagtutumang sa saiya asin naglalanghad sa saiyang pangaran pero ililigtas niya an gabos na namumuot saka nagkukuyog sa saiya, mga tawong buot na pamurawayon siya. (Mar. 8:38; 2 Tes. 1:6-10) Pagkatapos kan pangultimong paghukom kasunod kan Sangribong Taon na Paghadi ni Cristo, lubos nang mapapakangbanal ni Jehova an saiyang pangaran. (Kap. 20:7-10) Sa panahon na iyan, “an daga mapapano kan kaaraman manungod sa kamurawayan ni Jehova kun paanong tinatakluban nin tubig an dagat.”—Hab. 2:14.

16. Ano an determinado mong gibuhon? (Hilingon man an ritrato.)

¹⁶ Magigin nakakaugma nanggad pag an gabos na tawong nabubuhay tinatawan na si Jehova kan kamurawayan na maninigo sa saiyang pangaran! Pero sagkod na dai pa iyan nangyayari, puwede tang gibuhon an satong kabtang paagi sa pagpamuraway sa satong Diyos sa lambang oportunidad. Para tabangan kitang makapokus sa mahalagang paninimbagan na ini, pinili kan Namamahalang Grupo an Salmo 96:8 bilang teksto niyato para sa taon 2025: “Itao nindo ki Jehova an kamurawayan na maninigo sa pangaran niya.”