1. Taano ta sarong kadunungan an pag-andam para sa mga kalamidad?

 AN PAGIGIN andam nagliligtas nin buhay. Halimbawa, pag may kalamidad, an mga tawong nakapag-andam para diyan mas dakula an posibilidad na makaligtas asin makatabang sa iba. Arog kaini an sinabi kan sarong organisasyon sa Europa na nagtatabang sa mga tawo: “Dakula an nagigibo kan marahay na pag-andam.”

2. Taano ta dapat na mag-andam kita para sa dakulang kasakitan? (Mateo 24:44)

² An “dakulang kasakitan” mapuon nin biglaan. (Mat. 24:21) Pero, bakong arog kan dakul na iba pang kalamidad, bako gabos mabibigla sa pag-abot kan dakulang kasakitan. Mga 2,000 na taon na an nakaagi, pinatanidan ni Jesus an saiyang mga parasunod na magin andam para sa aldaw na iyan. (Basahon an Mateo 24:44.) Kun andam kita, magigin mas madali para sa sato na tagalan an masakit na panahon na iyan asin tabangan an iba na magtagal man.—Luc. 21:36.

3. Paano makakatabang sa sato an pakatagal, pagmalasakit, asin pagkamuot na magin andam para sa dakulang kasakitan?

³ Pag-ulayan ta an tulong kuwalidad na makakatabang sa sato na magin andam para sa dakulang kasakitan. Ano an gigibuhon ta kun sinabi sa sato na ihulit an makulog na mensahe nin paghukom tapos kinontra kita kan mga dai nagtutubod? (Kap. 16:21) Kakaipuhanon ta an pakatagal para sunudon si Jehova, na nagtitiwala na poprotektaran niya kita. Ano an gigibuhon ta kun mawara an nagkapira o an gabos na materyal na bagay kan satong mga tugang? (Hab. 3:17, 18) Papahiruon kita kan pagmalasakit na magtao sa sainda nin ayuda. Ano an gigibuhon ta kun, huli sa pag-atake kan koalisyon nin mga nasyon, kaipuhan tang temporaryong mag-istar sa sarong sadit na lugar kaibanan kan satong mga tugang? (Ezek. 38:10-12) Kakaipuhanon ta an makusog na pagkamuot para sa sainda na makakatabang sa sato na makatagal sa masakit na panahon na iyan.

4. Paano ipinaparisa kan Bibliya na dapat tang padagos na patalubuon an pakatagal, pagmalasakit, asin pagkamuot?

⁴ Dinadagka kita kan Tataramon nin Diyos na padagos na patalubuon an pakatagal, pagmalasakit, asin pagkamuot. An Lucas 21:19  nagsasabi: “Paagi sa saindong pakatagal maiingatan nindo an saindong buhay.” Sinasabi man sa Colosas 3:12: “Isulot nindo an . . . pagmalasakit.” Asin an 1 Tesalonica 4:9, 10 nagsasabi: “Tinukduan mismo kamo nin Diyos na kamutan an lambang saro. . . . Pero dinadagka mi kamo, mga tugang, na padagos nindong gibuhon iyan nin mas urog pa.” An gabos na tekstong ini isinurat para sa mga disipulong nakapahiling na nin pakatagal, pagmalasakit, asin pagkamuot. Alagad, kinaipuhan nindang padagos na patalubuon an mga kuwalidad na ini. Iyo man an dapat tang gibuhon. Para matabangan kita na magibo iyan, pag-uulayan ta kun paano ipinahiling kan inot na mga Kristiyano an lambang kuwalidad na iyan. Dangan aaramon niyato kun paano ta maaarog an mga disipulong idto asin, bilang resulta, magin andam para sa dakulang kasakitan.

5. Paano natagalan kan inot na mga Kristiyano an mga pagbalo sa sainda?

⁵ Kinaipuhan kan inot na mga Kristiyano an pakatagal. (Heb. 10:36) Apuwera sa inaatubang nindang mga problema na iyo man an inaatubang kan gabos na tawo kaidto, igwa man sindang inaagihan na mga pagbalo huli sa pagigin mga Kristiyano. Dakul sa sainda an pinersegir, bako lang kan Judiong mga lider nin relihiyon asin kan gobyerno nin Roma kundi pati man kan sainda mismong mga kapamilya. (Mat. 10:21) Asin sa laog kan kongregasyon, kaipuhan ninda kun minsan na labanan an impluwensiya kan mga apostata asin an nakakapabarangang mga katukduan kan mga ini. (Gibo 20:29, 30) Pero, nakatagal an mga Kristiyanong idto. (Kap. 2:3) Paano? Hinurop-hurop ninda an mga halimbawa nin pakatagal na nasa Kasuratan, arog ni Job. (Sant. 5:10, 11) Namibi sinda na tawan sinda nin kusog. (Gibo 4:29-31) Asin nagpokus sinda sa marahay na mga resulta kan saindang pagtagal.—Gibo 5:41.

6. Ano an manunudan mo sa ginibo ni Merita para matagalan an pagkontra?

⁶ Puwede man kitang makatagal kun regular tang pag-aadalan an mga halimbawa nin pakatagal na yaon sa Tataramon nin Diyos asin sa satong mga publikasyon saka hinuhurop-hurop an mga iyan. Sa paggibo kaiyan, natagalan ni Merita, sarong sister sa Albania, an maringis na pagkontra kan saiyang mga kapamilya. Sinabi niya: “Napakusog na marhay ako kan pinag-adalan ko an istorya ni Job sa Bibliya. Nagsakit siya nin grabe—na dai aram kun kiisay hali an mga pagbalo saiya—alagad sinabi niya: ‘Sagkod na magadan ako, papagdanayon ko an sakuyang integridad!’ (Job 27:5) Napag-isip-isip kong an mga pagbalo sa sako mayo lamang kun ikukumparar sa mga pagbalong inagihan ni Job. Bakong arog ni Job, aram ko kun siisay an nasa likod kan mga pagbalong ini.”

7. Dawa mayo kitang inaagihan na grabeng problema ngunyan, ano an kaipuhan ta nang manudan na gibuhon?

⁷ Puwede ta man na pakusugon an satong pakatagal paagi sa parati asin udok na pagsabi ki Jehova kan satong mga ikinakahadit. (Fil. 4:6; 1 Tes. 5:17) Tibaad mayo ka man nin inaagihan na grabeng mga problema sa ngunyan. Dawa arog kaiyan, naghahagad ka daw nin paggiya ki Jehova pag nakulgan an buot mo, napupurisaw ka, o dai mo aram kun ano an gigibuhon? Kun pirmi kang mahagad nin tabang sa satong Diyos sa mga problema mo sa aroaldaw ngunyan, dai ka mag-aalangan na gibuhon iyan pag napaatubang ka sa darakulang problema sa maabot. Dangan makakapagtiwala ka na aram niya nanggad kun nuarin asin kun paano ka niya tatabangan.—Sal. 27:1, 3.

8. Paano ipinahiling kan halimbawa ni Mira na an pagtagal sa mga pagbalo sa ngunyan makakatabang sa sato sa maabot na mga pagbalo? (Santiago 1:2-4) (Hilingon man an ritrato.)

⁸ Mas dakula an posibilidad na makatagal kita sa maabot na dakulang kasakitan kun tatagalan na niyato an mga pagbalo sa ngunyan. (Roma 5:3) Taano ta nasabi niyato iyan? Nahiling kan dakul na tugang na an lambang pagbalo sa pagtubod na natagalan ninda nakatabang sa sainda na makayanan an sunod na pagbalo. Dinalisay sinda kan pakatagal, na pinapakusog an pagtubod ninda  na andam saka gusto ni Jehova na magtabang. Huli kaiyan, natabangan sinda kan pagtubod na matagalan an sunod na pagbalo. (Basahon an Santiago 1:2-4.) Nahiling ni Mira, sarong payunir sa Albania, na an pagtagal niya kaidto nakatabang saiya na padagos pa na magtagal. Inadmitir niya na kun minsan pagmati niya siya sana an may kadakul na problema. Pero kan huri nagirumduman niya kun paano siya tinabangan ni Jehova sa nakaaging 20 taon, kaya nasabi niya sa sadiri niya: ‘Magdanay kang maimbod. Dai mo pagtugutan na masayang sana an gabos na taon saka an masakit na mga sitwasyon na napangganahan mo na sa tabang ni Jehova.’ Puwede mo man na pag-isipan kun paano ka na tinabangan ni Jehova na makatagal. Magtiwala na nahihiling niya an kada pagkakataon na natagalan mo an sarong pagbalo asin na babalusan ka niya. (Mat. 5:10-12) Dangan pag nagpuon na an dakulang kasakitan, aram mo na kun paano magtagal asin magigin determinado ka na padagos na magtagal.

9. Paano nagpahiling nin pagmalasakit an kongregasyon sa Antioquia nin Siria?

⁹ Pag-ulayan ta an nangyari kan mag-agi nin grabeng tiggutom an mga Kristiyano sa Judea. Kan mabaretaan kan kongregasyon sa Antioquia nin Siria an manungod sa tiggutom, daing duda na nakamati sinda nin pagmalasakit para sa mga tugang ninda sa Judea. Asin kan huri huminiro sinda para ipahiling an saindang pagmalasakit. Sinda “nagdesisyon . . . , sigun sa kakayahan kan kada saro, na magpadara nin ayuda sa mga tugang na nakaistar sa Judea.” (Gibo 11:27-30) Dawa ngani medyo harayo an istaran kan mga tugang na naapektaran kan tiggutom, desidido an mga Kristiyano sa Antioquia na tabangan sinda.—1 Juan 3:17, 18.

10. Sa anong mga paagi maipapahiling ta an pagmalasakit pag naapektaran nin kalamidad an mga kapagtubod ta? (Hilingon man an ritrato.)

¹⁰ Puwede man kitang magpahiling nin pagmalasakit sa ngunyan pag naaraman tang naapektaran nin kalamidad an satong mga kapagtubod. Tulos-tulos kitang minatabang—tibaad paagi sa paghapot sa mga elder kun puwede kitang magtabang sa sarong proyekto, paagi sa pagdonar sa pambilog na kinaban na gibuhon, o paagi sa pagpamibi para sa mga naapektaran kan kalamidad. b (Tal. 17:17) Halimbawa, kan 2020, labing 950 Disaster Relief Committee an binilog sa bilog na kinaban para mag-asikaso sa mga naapektaran kan COVID-19 na pandemya. Angay nanggad sa satong marahayon na komendasyon an mga naglingkod sa mga komite sa pag-ayuda. Huling napahiro sinda kan pagmalasakit para sa saindang mga tugang, nagdistribwir sinda nin materyal na ayuda, nagtao nin espirituwal na pampakusog asin, sa nagkapirang sitwasyon, naghirahay o nagtugdok liwat nin mga harong saka mga lugar nin pagsamba.—Ikumparar an 2 Corinto 8:1-4.

11. Paano an mga ginigibo niyato huli sa pagmalasakit nagtataong onra sa satong Ama sa langit?

¹¹ Pag nagpahiling kita nin pagmalasakit pagkatapos nin sarong kalamidad, nahihiling man kan iba an mga pagsasakripisyo na ginigibo ta. Halimbawa, kan 2019, nadestroso kan Bagyong Dorian an sarong Kingdom Hall sa Bahamas. Mantang itinutugdok giraray iyan kan satong mga tugang, pina-estimate ninda sa sarong bakong Saksing kontraktor kun gurano an magagastos kun halimbawa siya an matrabaho kaiyan. Sinabi niya sa sainda: “Gusto kong magdonar . . . ililibre ko na an equipment, an patrabaho saka an materyales. . . . Gusto kong gibuhon ini para sa organisasyon nindo. Hangang-hanga kaya ako sa ginigibo nindo sa saindong mga amigo.” An kadaklan sa mga tawo sa kinaban dai midbid si Jehova. Pero dakul sa sainda an naoobserbaran an mga Saksi ni Jehova. Sarong pribilehiyo nanggad na maaraman na an mga ginigibo niyato huli sa pagmalasakit nakakadagka sa mga tawo na urog pang midbidon an Saro na “abunda . . . sa pagkahirak”!—Efe. 2:4.

12. Paano an pagpatalubo nin pagmalasakit ngunyan nag-aandam sa sato para sa dakulang kasakitan? (Kapahayagan 13:16, 17)

 ¹² Taano ta kakaipuhanon niyato na magpahiling nin pagmalasakit sa panahon kan dakulang kasakitan? Ipinaparisa kan Bibliya na idtong mga dai masuportar sa sistema nin pulitika mapapaatubang sa mga problema—ngunyan asin sa panahon kan dakulang kasakitan. (Basahon an Kapahayagan 13:16, 17.) Puwedeng mangaipo nin tabang an mga tugang ta para sa panginot na mga pangangaipo ninda. Pag an satong Hadi, si Cristo Jesus, uminabot na para maghukom, lugod na abutan niya kita na nagpapahiling nin pagmalasakit tanganing maimbitaran niya kita na “manahon . . . an Kahadian.”—Mat. 25:34-40.

13. Arog kan ipinaparisa kan Roma 15:7, paano pinakusog kan inot na mga Kristiyano an saindang pagkamuot sa lambang saro?

¹³ An pagkamuot an midbidan kan inot na mga Kristiyano. Pero nagin madali daw sa sainda na magpahiling nin pagkamuot? Pag-isipan an pagkakalain-lain kan kongregasyon sa Roma. Kabilang sa sainda bako lang mga Judio, na nagdakula na sinusunod an Katugunan ni Moises, kundi pati man mga Hentil, na iba nanggad an kostumbre. Posibleng an pira sa mga Kristiyano kaidto mga uripon mantang an iba mga talingkas—tibaad an pira ngani sa sainda may sadiring mga uripon. Paano mapapangganahan kan mga Kristiyanong idto an siring na pagkakalain-lain asin mapapakusog an saindang pagkamuot? Dinagka sinda ni apostol Pablo na “maugmang akuon an lambang saro.” (Basahon an Roma 15:7.) Ano an buot niyang sabihon? An tataramon na trinadusir na “maugmang akuon” nangangahulugan na mabuot o mapag-istimar na akuon an saro, arog baga kan pagpadagos saiya sa harong o pag-ako saiya bilang amigo. Halimbawa, sinabihan ni Pablo si Filemon kun paano kaini dapat akuon an nagdulag na uripon na si Onesimo: “Akuon mo siya nin may kabuutan.” (Filem. 17) Asin maugmang inako ni Priscila asin Aquila si Apolos, na mas dikit an aram manungod sa Kristiyanismo kisa sa sainda, kan “iiniba ninda siya.” (Gibo 18:26) Imbes na tugutan na magkabaranga sinda huli sa pagkakalain-lain, napangganahan kan mga Kristiyanong idto an saindang pagkakaiba-iba asin maugmang inako an lambang saro.

14. Paano nagpahiling nin pagkamuot si Anna saka an saiyang agom?

¹⁴ Puwede ta man maipahiling an pagkamuot sa satong mga tugang paagi sa pag-ako sa sainda bilang mga amigo. Dangan, sa parati mapahiling man sinda nin pagkamuot sa sato. (2 Cor. 6:11-13) Pag-isipan an eksperyensiya ni Anna saka kan saiyang agom. Dai nahaloy pagkatapos nindang magbalyo sa bago nindang asignasyon bilang mga misyonero sa West Africa, saka man nagpuon an COVID-19 na pandemya. Dahil sa pandemya, dai sinda puwedeng makipagtipon nin in person sa kongregasyon ninda. Paano maipapahiling kan mag-agom an saindang pagkamuot? Kinontak ninda an mga tugang duman paagi sa videoconferencing asin sinabi ninda na gustuhon nindang mas mabisto an mga ini. Ikinaugmang marhay iyan kan mga pamilya asin puon kaidto parati na sindang nag-aapod saka nagpapadara nin mensahe sa mag-agom. Taano ta ginibo kan mag-agom an siring na paghihinguwa? Sinabi ni Anna, “Dai ko nalilingawan su pagkamuot na ipinahiling kaidto kan mga tugang sa sako saka sa pamilya ko sa marahay saka sa masakit na mga panahon asin napahiro ako kaiyan na magpahiling man nin pagkamuot.”

15. Ano an nanudan mo sa halimbawa ni Vanessa manungod sa pagpahiling nin pagkamuot sa gabos tang tugang? (Hilingon man an ritrato.)

¹⁵ Dakul sa sato an kabilang sa mga kongregasyon na kompuwesto nin mga tugang na may iba-ibang pinaghalian asin lain-lain an personalidad. Puwede tang pakusugon an satong pagkamuot sa sainda gabos paagi sa pagpokus sa marahay nindang mga kuwalidad. An sister na si Vanessa, na naglilingkod sa New Zealand, nasasakitan kaidto na magkaigwa nin marahay na pakikiiba-iba sa  ibang mga kakongregasyon niya. Pero, imbes na rayuan idtong mga tugang na dai niya nagugustuhan an personalidad, nagdesisyon siya na magtao nin panahon para mas makaiba-iba niya sinda. Paagi kaiyan, natabangan siya na mahiling kun ano an mga bagay na namumutan sa sainda ni Jehova. Sinabi niya: “Puon kan magin paraataman nin sirkito an agom ko, mas dakul na mga tugang na may iba-ibang personalidad an nakakaibanan mi, asin nagin madali na sa sako na magkaigwa nin marahay na pakikiiba-iba sa sainda. Nagugustuhan ko na ngunyan an pagkakaiba-iba. Siguradong gusto man iyan ni Jehova huling irinani niya kita sa sarong grupo nin manlain-lain na tawo.” Pag nanunudan niyato na hilingon an iba arog kan paghiling ni Jehova sa sainda, pinapatunayan ta na namumutan niyato sinda.—2 Cor. 8:24.

16. Taano ta magigin mahalagang marhay an pagkamuot sa panahon kan dakulang kasakitan? (Hilingon man an ritrato.)

¹⁶ An pagkamuot magigin mahalagang marhay sa panahon kan dakulang kasakitan. Pag nagpuon na an kasakitan na iyan, sain kita makakakua nin proteksiyon? Pag-isipan an instruksiyon ni Jehova kun ano an gigibuhon kan banwaan niya pag sinalakay an suanoy na Babilonya: “Lumaog ka, sakuyang banwaan, sa saimong tagong mga kuwarto, asin isara mo an saimong mga pinto. Magtago ka nin kadikit na panahon sagkod na makalihis an grabeng kaanggutan.” (Isa. 26:20) Minalataw na an mga tataramon na iyan aplikado man sa sato na mapapaatubang sa dakulang kasakitan. An “tagong mga kuwarto” puwedeng magpanungod sa satong mga kongregasyon. Sa panahon nin dakulang kasakitan, makukua ta an proteksiyon na ipinanuga ni Jehova kun magdadanay kitang nagkakasararo kaiba kan satong mga kapagtubod. Kaya, pagmaigutan ta nang marhay ngunyan na dai lang pagpasensiyahan an mga tugang ta kundi mamutan man sinda. Puwedeng magdepende diyan an satong kaligtasan!

17. Kun maandam na kita ngunyan, ano an magigibo ta sa panahon kan dakulang kasakitan?

¹⁷ “An dakulang aldaw ni Jehova” magdadara nin kapurisawan sa katawuhan. (Sof. 1:14, 15) An banwaan ni Jehova mapapaatubang man sa mga kasakitan. Pero kun maandam na kita ngunyan, magigibo tang magdanay na kalmado asin matatabangan ta an iba. Matatagalan niyato an ano man na mga problema na mag-abot sa sato. Pag nagsakit an mga kapagtubod niyato, gigibuhon ta an satong pinakamakakaya para tabangan sinda paagi sa pagpahiling nin pagmalasakit asin pagtao kan saindang mga pangangaipo. Asin magdadanay kitang dayupot sa satong mga tugang, na namutan na niyato. Dangan, babalusan kita ni Jehova nin buhay na daing sagkod sa sarong kinaban na an gabos na mga kalamidad asin mga kasakitan dai ta na magigirumduman.—Isa. 65:17.