1. Sa anong paagi dapat na magin arog nin sarong kahoy an mga Kristiyano? (Hilingon man an ritrato.)

 “DAI nababari kan duros an kahoy na kayang magduko.” Idinuduon kan kasabihan na ini an mahalagang kuwalidad na nakakatabang sa nagkapirang kahoy na magdanay na buhay: an pagigin flexible o madaling makibagay. Tanganing umuswag sa espirituwal, dapat na madaling makibagay an mga Kristiyano, andam na magduko. Paano? Dapat na magin rasonable kita paagi sa pagigin madaling makibagay pag nagbago an satong mga kamugtakan asin paagi sa paggalang sa mga punto de vista saka mga desisyon kan iba.

2. Anong mga kuwalidad an makakatabang sa sato na magin madaling makibagay sa nagbabagong mga kamugtakan, asin ano an pag-uulayan ta sa artikulong ini?

² Bilang mga lingkod ni Jehova, gusto ta na magin rasonable. Gusto man niyato na magin mapakumbaba asin mapagmalasakit. Sa artikulong ini, aaramon ta kun paano natabangan an nagkapirang Kristiyano kan mga kuwalidad na iyan na makayanan an nagbabagong mga kamugtakan. Aaramon ta man kun paano makakatabang sa sato an mga kuwalidad na iyan. Pero, pag-ulayan ta nguna an manungod sa perpektong halimbawa ni Jehova asin ni Jesus sa pagigin rasonable.

3. Ano an ebidensiya niyato na rasonable si Jehova?

³ Inaapod si Jehova na “an Gapo” huling marigon siya, dai natatanyog. (Deu. 32:4) Minsan siring, rasonable man siya. Mantang nagbabago an mga kamugtakan sa kinaban, padagos na nakikibagay an satong Diyos tanganing mautob an saiyang katuyuhan. Ginibo ni Jehova an mga tawo uyon sa saiyang ladawan na may kakayahan na makibagay sa nagbabagong mga kamugtakan. Nagtao siya nin malinaw na mga prinsipyo sa Bibliya na makakatabang sa sato na gumibo nin madunong na mga desisyon ano man na mga kadipisilan an mapaatubang sa sato. An halimbawa mismo ni Jehova  asin an mga prinsipyo na itinao niya sa sato ebidensiya na dawa ngani siya “an Gapo,” rasonable man siya.

4. Magtao nin halimbawa kan pagigin rasonable ni Jehova. (Levitico 5:7, 11)

⁴ An mga pamamaagi ni Jehova perpekto asin rasonable. Bako siyang istriktuhon sa mga tawo. Halimbawa, pag-isipan kun paano si Jehova nagpahiling nin pagigin rasonable sa mga Israelita. Dai niya hinagad sa sainda na magtao nin pararehong atang, mayaman man o pobre. Sa nagkapirang sitwasyon, tinugutan niya an lambang saro na magdulot nin mga atang uyon sa kamugtakan kaini.—Basahon an Levitico 5:7, 11.

5. Magtao nin halimbawa kan kapakumbabaan asin pagmalasakit ni Jehova.

⁵ Pinapahiro si Jehova kan saiyang kapakumbabaan asin pagmalasakit na magin rasonable. Halimbawa, ipinahiling ni Jehova an saiyang kapakumbabaan kan madali na niyang laglagon an maraot na mga tawo sa Sodoma. Paagi sa saiyang mga anghel, sinabi ni Jehova sa matanos na si Lot na magdulag pasiring sa kabukidan. Natakot si Lot na magduman. Kaya nakimahirak siya na tugutan siya saka an pamilya niya na magpaili sa Zoar, sarong sadit na banwa na nakatagamang laglagon. Puwede kutanang iinsistir ni Jehova na sunudon ni Lot nin eksakto an Saiyang pagbuot. Imbes, itinao niya an hinahagad ni Lot, dawa ngani mangahulugan iyan na dai niya na lalaglagon an Zoar. (Gen. 19:18-22) Pakalihis nin mga siglo, nagpahiling si Jehova nin pagmalasakit sa mga nakaistar sa Nineve. Isinugo niya an propetang si Jonas para ipaisi na madali nang laglagon an siyudad asin an mga maraot na nakaistar diyan. Pero kan magsulsol an mga taga Nineve, nahirak si Jehova sa sainda asin dai na niya linaglag an siyudad.—Jon. 3:1, 10; 4:10, 11.

6. Iilustrar kun paano inarog ni Jesus an pagigin rasonable ni Jehova.

⁶ Inarog ni Jesus an pagigin rasonable ni Jehova. Isinugo siya digdi sa daga para maghulit sa “mga nawawarang karnero . . . kan nasyon nin Israel.” Pero nagpahiling siya nin pagkarasonable mantang ginigibo niya an asignasyon na iyan. Sa sarong pagkakataon, sarong bakong Israelitang babayi an nakimahirak sa saiya na paumayan an aking babayi kaini na “nagsasakit nin grabe dahil sa demonyong nagsanib sa [aki].” May pagmalasakit na ginibo ni Jesus an hinagad saiya kan babayi asin pinaumayan an aki kaini. (Mat. 15:21-28) Pag-isipan an saro pang halimbawa. Sa kapinunan kan saiyang ministeryo, sinabi ni Jesus: “An siisay man na nagninigar . . . na nagtutubod siya sa sako, ninigaran ko man . . . na disipulo ko siya.” (Mat. 10:33) Pero pignigaran niya daw si Pedro, na tulong beses siyang pignigaran? Dai. Kinonsiderar ni Jesus an pagsulsol asin pagtubod ni Pedro. Pagkatapos na buhayon liwat si Jesus, nagpahiling siya ki Pedro asin posibleng marhay na inasigurar niya na pinatawad niya na ini asin na namumutan niya pa man giraray ini.—Luc. 24:33, 34.

7. Kauyon kan Filipos 4:5, ano an gusto tang magin paghiling sa sato kan iba?

⁷ Nahiling niyato na rasonable an Diyos na Jehova asin si Jesu-Cristo. Kumusta man kita? Inaasahan ni Jehova na magigin rasonable man kita. (Basahon an Filipos 4:5.) Puwede tang  haputon an satong sadiri: ‘An paghiling daw sako nin mga tawo saro akong tawong rasonable, mapagpahunod, asin mapasensiya? O an paghiling ninda sako sarong tawong istriktuhon, maringis, o matagas an payo? Ipinipirit ko daw sa iba na gibuhon an mga bagay-bagay uyon sa pighuhuna kong pinakatamang paagi? O dinadangog ko an iba asin nagpapahunod sa mga gusto ninda kun okey man iyan?’ Mantang mas hinihinguwa niyatong magin rasonable, mas naaarog ta man si Jehova asin si Jesus. Pag-ulayan ta an duwang sitwasyon kun sain kinakaipuhan an pagigin rasonable—pag nagbago an satong mga kamugtakan saka pag an mga punto de vista asin mga desisyon kan iba lain kan sa sato.

8. Ano an makakatabang sa sato na magin rasonable pag nagbago an mga kamugtakan? (Hilingon man an nota sa ibaba.)

⁸ Kalabot sa pagigin rasonable an pagigin madaling makibagay pag nagbago an satong mga kamugtakan. An siring na mga pagbabago puwedeng magkawsa nin dai inaasahan na mga kadipisilan. Tibaad bigla kitang magkaigwa nin problema sa salud. O tibaad biglang magkaigwa nin pagbabago sa ekonomiya o sa gobyerno kun sain kita nakaistar asin dahil diyan maapektaran na marhay an satong buhay. (Ecl. 9:11; 1 Cor. 7:31) Dawa an pagbabago sa satong teokratikong asignasyon puwedeng makabalo sa sato. Ano man an kadipisilan, puwede kitang mapangganang makibagay sa bagong mga kamugtakan kun gigibuhon ta an minasunod na apat na lakdang: (1) akuon an realidad, (2) magpokus sa maabot na panahon, (3) magpokus sa mga bagay na positibo, asin (4) gumibo nin mga bagay para sa iba. b Pag-ulayan ta kun paano nakinabang an nagkapirang tugang niyato sa paggibo ninda kan mga lakdang na ini.

9. Paano nakayanan kan sarong mag-agom na misyonero an dai inaasahan na mga kadipisilan?

⁹ Akuon an realidad. Si Emanuele asin Francesca idinestino sa ibang nasyon bilang mga misyonero. Kan nagpupuon na sindang mag-adal kan lengguwahe asin makiasosyar sa bago nindang kongregasyon, saka man nagpuon an COVID-19 na pandemya asin kinaipuhan nindang isuway an sadiri ninda sa mga tawo. Dangan bigla na sanang nagadan an ina ni Francesca. Gustong-gusto ni Francesca na makaibanan an pamilya niya, pero dai siya puwedeng magbiyahe huli sa pandemya. Paano niya nakayanan an nakakapangluya sa buot na pangyayaring ini? Inot, namibi an mag-agom na si Emanuele asin Francesca para maghagad nin kadunungan na atubangon an kada aldaw asin dai mapangibabawan nin paghadit. Sinimbag ni Jehova an mga pamibi ninda paagi sa napapanahon na espirituwal na mga probisyon. Halimbawa, napakusog sinda sa sinabi nin sarong brother sa sarong video: “Pag mas madali tang naaako an bagong mga kamugtakan, mas madali man na minabalik an satong kaugmahan, kaiba an oportunidad na magamit sa marahay an bagong mga kamugtakan na iyan.” c Ikaduwa, nagdesisyon sindang pauswagon an saindang kakayahan sa pagpapatotoo paagi sa telepono asin may napunan pa ngani sinda na sarong pag-adal sa Bibliya. Ikatulo, mapagpasalamat nindang inako an mamumuton na pagpakusog asin pagsuportar kan mga tugang sa lugar na idto. Sarong maginirumdom na sister an nagpapadara sa sainda aroaldaw nin halipot na mensahe hali sa Kasuratan, asin ginibo niya iyan sa laog nin sarong taon. Pag inaako man niyato an bago tang mga kamugtakan, makakamati kita nin kaugmahan sa kun ano an kaya tang gibuhon.

10. Paano nakibagay an sarong sister sa dakulang pagbabago sa saiyang buhay?

 ¹⁰ Magpokus sa maabot na panahon, asin magpokus sa mga bagay na positibo. Si Christina, sarong Romanian na sister na nakaistar sa Japan, nadisganar kan hinali an English congregation na pig-aatenderan niya. Pero, dai niya pigparaisip an nangyari. Imbes, nagdesisyon siyang gibuhon an pinakamakakaya niya na maglingkod sa Japanese congregation asin makikabtang sa paghuhulit sa lengguwaheng iyan. Nagpatukdo siya sa dating katrabaho niya para lalo pa niyang manudan an pagtaram nin Japanese. Nagtugot an babayi na gamiton an Bibliya asin an brosyur na Mabuhay nin Maugma Sagkod Pa Man! para tukduan si Christina nin Japanese. Dai lang nakanuod na marhay si Christina sa pagtaram kan lengguwaheng iyan kundi nagkainteres man sa katotoohan an babayi. Pag nagpokus kita sa maabot na panahon asin positibo kita, an dai inaasahan na mga pagbabago puwedeng magresulta sa dai inaasahan na mga bendisyon.

11. Ano an nakatabang sa sarong mag-agom na naapektaran an pagbuhay?

¹¹ Gumibo nin mga bagay para sa iba. Sarong mag-agom na nakaistar sa sarong nasyon kun sain ipinagbabawal an satong gibuhon an naapektaran an pagbuhay kan magbagsak an ekonomiya kan nasyon. Paano sinda nakibagay? Inot, pinasimple ninda an saindang pamumuhay. Dangan, imbes na magparapokus sa mga problema ninda, nagdesisyon sindang magpokus sa pagtabang sa iba paagi sa pagigin sibot sa paghuhulit. (Gibo 20:35) An agom na lalaki nagsabi, “Dahil sibot kami sa ministeryo, mas dikit an panahon mi sa pagparaisip nin negatibong mga bagay saka mas dakul an panahon mi sa pagpokus sa paggibo kan kabutan nin Diyos.” Pag nagbago an satong mga kamugtakan, dapat tang girumdumon kun gurano kaimportante kan padagos na pagtabang sa iba, lalo na paagi sa satong Kristiyanong ministeryo.

12. Paano makakatabang sa sato an halimbawa ni apostol Pablo na makibagay sa nagbabagong mga kamugtakan sa satong ministeryo?

¹² Sa satong ministeryo, kaipuhan na madali kitang makibagay. An mga nakakaulay ta iba-iba an mga paniniwala saka ugali asin lain-lain an pinaghalian. Si apostol Pablo madaling makibagay, asin makakanuod kita sa saiyang halimbawa. Pinili ni Jesus si Pablo bilang “sarong apostol sa mga nasyon.” (Roma 11:13) Sa papel na iyan, naghulit si Pablo sa mga Judio, mga Griego, mga intelektuwal, mga pobre, mga may halangkaw na katungdan, asin mga hadi. Tanganing maabot an puso kan manlain-lain na tawong ini, si Pablo nagin “gabos na bagay sa gabos na klase nin tawo.” (1 Cor. 9:19-23) Kinonsiderar niya an kultura, pinaghalian, asin mga paniniwala kan mga nakakaulay niya dangan ibinagay diyan an paagi niya nin pakikipag-ulay sa sainda. Puwede man kitang magin mas epektibo sa satong ministeryo kun mapamaagi kita asin ibinabagay an satong paagi nin pakikipag-ulay sigun sa pangangaipo kan mga nakakaulay ta.

13. Anong peligro na sinasabi sa 1 Corinto 8:9 an malilikayan ta kun igagalang niyato an pagmansay kan iba?

¹³ An pagigin rasonable nakakatabang man sa sato na igalang an pagmansay kan iba. Halimbawa, may mga sister na gustong maggamit nin make-up, mantang an iba habo. May mga Kristiyano na nag-iinom nin arak basta katamtaman sana, mantang an iba nagdesisyon na dai talaga mag-inom. Gusto kan gabos na Kristiyano na magkaigwa nin marahay na salud pero iba-iba an pamamaagi ninda nin pag-ataman sa salud. Kun ipipirit ta sa mga tugang sa kongregasyon an pighuhuna tang pinakamarahay na pamamaagi, puwede niyatong masingkog an iba asin maresulta iyan sa pagkabaranga. Habo ta nanggad na gibuhon iyan! (Basahon an 1 Corinto 8:9; 10:23, 24) Pag-ulayan ta an duwang halimbawa na nagpapahiling kun paano an pag-aplikar kan mga prinsipyo sa  Kasuratan makakatabang sa sato na magin timbang asin mapagdanay an katuninungan.

14. Anong mga prinsipyo sa Bibliya an dapat na magin giya niyato sa pagbado asin istilo nin buhok?

¹⁴ Pagbado asin istilo nin buhok. Imbes na magtao nin istriktong mga pagbuot manungod sa paagi nin pagbado, nagtao si Jehova sa sato nin mga prinsipyo na susundon. Kaipuhan na an paagi niyato nin pagbado angay para sa mga ministro nin Diyos, na nagpapahiling nin pagigin rasonable, kabinian, asin “tultol na isip.” (1 Tim. 2:9, 10; 1 Ped. 3:3) Sa siring, dai kita nagsusulot nin bado na makakakua nin sobrang atensiyon kan iba. Makakatabang man sa mga elder an mga prinsipyo sa Bibliya na malikayan na magtao kan sadiri nindang mga susundon manungod sa pagbado asin istilo nin buhok. Halimbawa, gustong tabangan kan mga elder sa sarong kongregasyon an nagkapirang hoben na brother na inaarog an sarong usong istilo nin buhok na halipot man kuta pero gurunos na marhay. Paano sinda matatabangan kan mga elder sa paagi na dai sinda magibo nin susundon? Sinadol kan paraataman nin sirkito an mga elder na sabihon sa mga brother na idto, “Kun kamo yaon sa stage tapos su itsura nindo an mas pigtatawan nin atensiyon kan audience kisa sa sinasabi nindo, kun siring may problema sa pagbado asin sa istilo kan buhok nindo.” Paagi sa simpleng paliwanag na ini, nasabutan kan hoben na mga brother an dapat nindang gibuhon, asin dai kinaipuhan kan mga elder na maggibo nin susundon. d

15. Anong mga pagbuot asin mga prinsipyo sa Bibliya an magiya sa sato sa paggibo nin desisyon manungod sa pag-ataman sa salud? (Roma 14:5)

¹⁵ Pag-ataman sa salud. An lambang Kristiyano an dapat na magdesisyon kun manungod sa pag-ataman kan saiyang salud. (Gal. 6:5) Dikit sanang espesipikong mga pagbuot sa Bibliya, arog baga kan pagbuot na maglikay sa dugo asin sa espiritismo, an igwang epekto sa paggibo nin desisyon nin sarong Kristiyano dapit sa medikal na pagbulong. (Gibo 15:20; Gal. 5:19, 20) An ibang bagay nakadepende  na sa personal na desisyon nin saro. May mga indibidwal na nagpapabulong sana sa mga doktor, mantang an iba mas pinipili an alternatibong pamamaagi nin pagbulong. Gurano man kita kakumbinsido manungod sa sarong paagi nin pagbulong, kaipuhan tang igalang an deretso kan satong mga tugang na gumibo kan saindang desisyon manungod sa pag-ataman kan saindang salud. Kaya, dapat tang girumdumon an apat na puntong ini: (1) An Kahadian nin Diyos sana an matao nin lubos asin permanenteng pagpaumay. (Isa. 33:24) (2) An lambang Kristiyano dapat na magin “lubos na kumbinsido” kun ano an pinakamarahay para sa saiya. (Basahon an Roma 14:5.) (3) Dai ta hinuhusgaran an iba o nagbubugtak nin singkugan sa atubangan ninda. (Roma 14:13) (4) An mga Kristiyano nagpapahiling nin pagkamuot asin mas mahalaga sa sainda an pagkasararo kan kongregasyon kisa sa personal nindang mga opinyon. (Roma 14:15, 19, 20) Kun gigirumdumon ta an mga puntong ini, mapapagdanay niyato an dayupot na relasyon sa satong mga tugang asin makakakontribwir kita sa katuninungan kan kongregasyon.

16. Paano maipapahiling kan sarong elder an pagigin rasonable sa kapwa niya mga elder? (Hilingon man an ritrato.)

¹⁶ An mga elder dapat na magpahiling nin marahay na halimbawa sa pagigin rasonable. (1 Tim. 3:2, 3) Halimbawa, dai dapat asahan kan sarong elder na pirming aakuon an saiyang mga opinyon huli sana ta mas matua siya sa ibang mga elder. Aram niya na dawa siisay sa grupo nin kamagurangan puwedeng pahiruon kan espiritu ni Jehova tanganing magtao nin opinyon na makakakontribwir para makagibo nin madunong na desisyon. Asin kun mayo man nin nababalgang prinsipyo sa Bibliya, gikan sa buot na sinusuportaran kan rasonableng mga elder an desisyon kan mayoriya, dawa kun bako iyan an gusto ninda.

17. Anong mga bendisyon an inaako kan rasonableng mga Kristiyano?

¹⁷ An mga Kristiyano nag-aako nin dakul na bendisyon sa pagigin rasonable. Igwa kita nin mas marahay na relasyon sa satong mga tugang, asin nagkakaigwa nin katuninungan sa kongregasyon. Nauugma kita sa magayon na pagkakalain-lain nin personalidad asin kaugalian sa laog kan nagkakasararong mga parasamba ni Jehova. Urog sa gabos, igwa kita nin pagkakontento huling aram niyato na inaarog ta an satong rasonableng Diyos, si Jehova.