ARTIKULONG PAG-AADALAN 31
“Magin Marigon Kamo, Dai Natatanyog”
“Namumutan kong mga tugang, magin marigon kamo, dai natatanyog.”—1 COR. 15:58.
KANTA 122 Magin Marigon, Dai Natatanyog!
SUMARYO KAN PAG-AADALAN a
1-2. Sa anong paagi puwedeng maiagid an sarong Kristiyano sa sarong halangkawon na edipisyo? (1 Corinto 15:58)
KAN huring mga taon kan dekada nin 1970, sarong halangkawon na edipisyo na may 60 eskalon an itinugdok sa Tokyo, Japan. Inisip-isip kan mga tawo kun paano kaiyan makakayanan an parating paglinog sa siyudad na iyan. An sekreto? An edipisyo dinisenyo kan mga inhenyero na magin masarig pero kayang magsabay sa pagyugyog na kawsa nin paglinog. An mga Kristiyano nakakaagid sa halangkawon na edipisyong iyan. Sa anong paagi?
2 Dapat na papagdanayon nin sarong Kristiyano na magin timbang pag-abot sa pagigin marigon asin sa pagigin madaling makibagay. Kaipuhan niyang magin makusog asin dai natatanyog kun manungod sa pagsunod sa mga pagbuot asin mga pamantayan ni Jehova. (Basahon an 1 Corinto 15:58.) Siya “andam na magsunod” asin dai nagkokompromiso. Sa ibong na kampi, kaipuhan niyang magin “rasonable,” o madaling makibagay, pag itinutugot iyan kan kamugtakan o hinahagad pa ngani iyan. (Sant. 3:17) An sarong Kristiyano na nakanuod na magkaigwa kan arog kaini na pagigin timbang lilikayan na magin sobra kaistrikto o sobra man kaluwag. Sa artikulong ini, pag-uulayan ta kun paano kita magin dai natatanyog. Aaramon ta man an limang paagi kun paano hinihinguwa ni Satanas na paluyahon an satong determinasyon asin manunudan niyato kun paano ta malalabanan an mga iyan.
PAANO KITA MAGIGIN MARIGON?
3. Anong mga pagbuot kan Kahuruhalangkawing Paratao nin Katugunan an yaon sa Gibo 15:28, 29?
3 Bilang an Kahuruhalangkawing Paratao nin Katugunan, si Jehova pirming nagtatao nin malinaw na mga pagbuot sa saiyang banwaan. (Isa. 33:22) Halimbawa, an namamahalang grupo kan inot na siglo nagsambit nin tulong paagi para makapagdanay na marigon an mga Kristiyano: (1) paagi sa pagsikwal sa idolatriya, na an solamenteng sinasamba iyo si Jehova, (2) paagi sa paggalang sa kabanalan nin dugo, asin (3) paagi sa pagsunod sa halangkaw na mga pamantayan kan Bibliya sa moral. (Basahon an Gibo 15:28, 29.) Paano mapapagdanay kan mga Kristiyano ngunyan an marigon na paninindugan sa tulong bagay na ini?
4. Paano ta itinatao ki Jehova an eksklusibong debosyon? (Kapahayagan 4:11)
4 Isinisikwal ta an idolatriya, na an solamenteng sinasamba iyo si Jehova. Ipinagbuot niya sa mga Israelita na itao sa saiya an eksklusibong debosyon. (Deu. 5:6-10) Asin kan sinugutan si Jesus kan Diyablo, malinaw niyang sinabi na dapat na si Jehova sana an satong sambahon. (Mat. 4:8-10) Kun siring, dai kita nagsasamba sa mga idolo. Dai ta man iniidolo an mga tawo—sinda man mga lider nin relihiyon, pulitikal na mga tagapamahala, o sikat na mga parakawat o artista—na tinatratar sinda na garo mga diyos. Naninindugan kita sa kampi ni Jehova asin an pigsasamba ta sana iyo an saro na ‘naglalang kan gabos na bagay.’—Basahon an Kapahayagan 4:11.
5. Taano ta sinusunod ta an pagbuot ni Jehova manungod sa kabanalan nin buhay asin dugo?
5 Sinusunod ta an pagbuot ni Jehova manungod sa kabanalan nin buhay asin dugo. Taano? Huling sinabi ni Jehova na an dugo nagrerepresentar sa buhay, sarong mahalagang marhay na regalo hali sa saiya. (Lev. 17:14) Kan inot na itinugot ni Jehova sa mga tawo an pagkakan kan karne nin mga hayop, ipinagbuot niya sa sainda na dai pagkakanon an dugo. (Gen. 9:4) Inutro niya an pagbuot na ini kan itinao niya sa Israel an Katugunan ni Moises. (Lev. 17:10) Asin nagtao siya nin instruksiyon sa namamahalang grupo kan inot na siglo na ipagbuot sa gabos na Kristiyano na “padagos na maglikay . . . sa dugo.” (Gibo 15:28, 29) Marigon tang sinusunod an pagbuot na ini pag naggigibo nin mga desisyon dapit sa medikal na pagbulong. b
6. Anong mga paghihinguwa an ginigibo ta para makapamuhay uyon sa halangkaw na mga pamantayan ni Jehova sa moral?
6 Istrikto tang sinusunod an halangkaw na mga pamantayan ni Jehova sa moral. (Heb. 13:4) Paagi sa paggamit nin malinaw na piguratibong tataramon, sinasadol kita ni apostol Pablo na “gadanon” an satong mga kabtang nin hawak—an buot sabihon, gibuhon ta an satong pinakamakakaya para halion an salang mga pagmawot kan laman. Linilikayan tang magparahiling o gumibo nin ano man na bagay na puwedeng magresulta sa seksuwal na imoralidad. (Col. 3:5; Job 31:1) Pag napapaatubang kita sa sugot, tulos-tulos tang isinisikwal an ano man na kaisipan o paggawi na makakaraot kan satong pakikiamigo sa Diyos.
7. Ano an dapat na determinado tang gibuhon, asin taano?
7 Inaasahan sa sato ni Jehova na magigin “masinunod [kita] nin gikan sa puso.” (Roma 6:17) An paggiya niya pirming para sa pinakaikakarahay niyato, asin an mga pagbuot niya dai mababago. (Isa. 48:17, 18; 1 Cor. 6:9, 10) Nagmamaigot kitang mapaugma si Jehova asin ipahiling an sabuot na kapareho kan sa salmista na nagsabi: “Nagdesisyon na akong sumunod sa mga regulasyon mo sa gabos na panahon, sagkod sa kahuri-hurihi.” (Sal. 119:112) Minsan siring, hihinguwahon ni Satanas na paluyahon an satong determinasyon. Anong mga paagi an ginagamit niya?
PAANO HINIHINGUWA NI SATANAS NA PALUYAHON AN SATONG DETERMINASYON?
8. Paano ginagamit ni Satanas an persekusyon sa paghihinguwang paluyahon an satong determinasyon?
8 Persekusyon. Naggagamit an Diyablo nin pisikal asin emosyonal na mga pag-atake sa paghihinguwang paluyahon an satong determinasyon. An katuyuhan niya iyo na ‘sibaon’ kita, na rauton an satong relasyon ki Jehova. (1 Ped. 5:8) An mga Kristiyano kan inot na siglo tinakot, hinampak, asin ginadan huli sa determinasyon ninda na marigon na manindugan. (Gibo 5:27, 28, 40; 7:54-60) Padagos na ginagamit ngunyan ni Satanas an persekusyon. Risang-risa ini sa maringis na pagtrato sa satong mga tugang sa Russia asin iba pang mga nasyon asin sa personal na mga pag-atake kan mga parakontra.
9. Iilustrar kun taano ta kaipuhan na magin maingat sa tusong mga panggigipit.
9 Tusong mga panggigipit. Apuwera sa hayagan asin direktang mga pag-atake, naggagamit man si Satanas nin “mga tusong gibo.” (Efe. 6:11) Isip-isipa an nangyari sa brother na si Bob, na naospital para mag-agi nin mayor na operasyon. Sinabi niya sa mga doktor na ano man an magin sitwasyon dai siya mapasalin nin dugo. Nag-uyon an surgeon na irespeto an saiyang desisyon. Pero, kan banggi bago operaran si Bob, kan magpuruli nguna sa harong an pamilya niya, binisita siya kan anesthesiologist. Sinabi kaini ki Bob na posibleng marhay na dai man siya salinan nin dugo pero mapasiguro man giraray sinda nin dugo enkaso kaipuhanon ini. Tibaad pighuna kan doktor na mabago an isip ni Bob mantang mayo an pamilya kaini. Pero nagdanay na marigon si Bob, asin sinabi niya na dai siya pagsalinan nin dugo ano man an magin sitwasyon.
10. Taano ta an pangangatanusan nin tawo sarong siod? (1 Corinto 3:19, 20)
10 Pangangatanusan nin tawo. Kun mamansayon ta an mga bagay-bagay uyon sa punto de vista nin tawo, tibaad mabaliwala ta si Jehova asin an mga pamantayan niya. (Basahon an 1 Corinto 3:19, 20.) “An kadunungan kan kinaban na ini” sa parati nakakaakit sa makalaman na mga pagmawot. An pira sa mga Kristiyano sa Pergamo asin Tiatira naimpluwensiyahan nin idolatroso asin imoral na mga gibo-gibo na komun sa mga siyudad na idto. Tinawan ni Jesus nin magabat na konseho an duwang kongregasyon huli sa pagkunsinti ninda sa seksuwal na imoralidad. (Kap. 2:14, 20) Sa ngunyan, napapaatubang kita sa panggigipit na arugon an salang mga kaisipan. Tibaad sabihon kan mga kapamilya saka kamidbid ta na sobra man kita kaistrikto asin dagkahon kita na magkompromiso. Halimbawa, tibaad sabihon ninda na bako man maraot na magpadara sa satong mga pagmawot asin na an mga pamantayan kan Bibliya sa moral lihis na sa panahon.
11. Mantang marigon kitang naninindugan, ano an dapat tang likayan?
11 Kun minsan, tibaad isipon niyato na an itinataong mga instruksiyon ni Jehova bakong gayong malinaw. Tibaad matentaran kita na “maglampas sa mga bagay na nasusurat.” (1 Cor. 4:6) Kan panahon ni Jesus, nagin kasalan ini kan mga lider nin relihiyon. An Katugunan dinagdagan ninda nin mga susundon na gibo nin tawo, asin huli kaiyan tinawan ninda nin magabat na pasan an ordinaryong mga tawo. (Mat. 23:4) Nagtatao si Jehova sa sato nin malinaw na mga instruksiyon paagi sa saiyang Tataramon asin sa saiyang organisasyon. Mayo kita nin dahilan para dagdagan pa an mga instruksiyon na itinatao niya. (Tal. 3:5-7) Huli kaiyan, dai kita naglalampas sa mga bagay na nasusurat sa Bibliya o naggigibo nin mga susundon para sa satong mga kapagtubod kun manungod sa personal na mga bagay.
12. Paano ginagamit ni Satanas an “daing saysay na nakakadayang mga ideya”?
12 Mga pandadaya. Ginagamit ni Satanas an “daing saysay na nakakadayang mga ideya” asin an “pundamental na mga bagay kan kinaban” para ilagalag asin pagbarangaon an mga tawo. (Col. 2:8) Kan inot na siglo, kaiba digdi an mga pilosopiya na basado sa pangangatanusan nin tawo, bakong maka-Kasuratan na mga katukduan nin mga Judio, asin an katukduan na dapat sunudon kan mga Kristiyano an Katugunan ni Moises. Mga pandadaya iyan huling irinarayo kaiyan an atensiyon kan mga tawo sa tunay na Gikanan nin kadunungan, si Jehova. Sa ngunyan, ginagamit ni Satanas an media asin mga social network para magpalakop nin daing basehan na mga uruistorya asin bakong totoong mga bareta na pinapalakop nin mga lider sa pulitika. Nahiling ta an kadaklan sa mga ini sa panahon kan COVID-19 na pandemya. c An mga Saksi ni Jehova na nagdangog sa paggiyang itinao kan satong organisasyon nakalikay sa dai kinakaipuhan na paghadit na naeksperyensiyahan kan mga tawong nagdangog sa mapandayang mga impormasyon.—Mat. 24:45.
13. Taano ta dapat na mag-ingat kita sa mga pandisturbo?
13 Mga pandisturbo. Dai dapat mawara an satong pokus sa “mas importanteng mga bagay.” (Fil. 1:9, 10) An mga pandisturbo puwedeng makaagaw kan dakul na panahon ta asin kan atensiyon ta para sa mas kapaki-pakinabang na mga bagay. An ordinaryong mga ginigibo ta sa buhay—arog kan pagkakan, pag-inom, paglilibang, asin sekular na trabaho—puwedeng magin mga pandisturbo kun tutugutan ta an mga iyan na magin pokus kan satong buhay. (Luc. 21:34, 35) Apuwera kaiyan, aroaldaw kitang nakakadangog asin nakakabasa nin mga bareta manungod sa mga protesta asin mga isyu sa pulitika. Dapat na dai kita magpadisturbo sa mga isyung iyan. Ta kun iyo, tibaad sa satong isip asin puso may kinakampihan na kita. An gabos na paaging sinambit sa inutan ginagamit ni Satanas para paluyahon an satong determinasyon na gibuhon an tama. Pag-ulayan niyato kun paano ta malalabanan an saiyang mga paghihinguwa asin kun paano kita magdadanay na marigon.
PAANO KITA MAGDADANAY NA MARIGON?
Para magdanay na marigon, hurop-hurupon an saimong pagdusay asin bawtismo, pag-adalan an Tataramon nin Diyos asin hurop-hurupon iyan, magkaigwa nin marigon na puso, asin magtiwala ki Jehova (Hilingon an parapo 14-18)
14. Ano an sarong bagay na makakatabang sa sato na magdanay na marigon sa kampi ni Jehova?
14 Hurop-hurupon an saimong pagdusay asin bawtismo. Ginibo mo an mga lakdang na iyan huling gusto mong kumampi ki Jehova. Girumdumon kun ano an nakatabang saimo na makumbinsir na nanumpungan mo na an katotoohan. Nagkua ka nin tamang kaaraman manungod ki Jehova asin napatalubo mo an paggalang saka pagkamuot sa saiya bilang saimong Ama sa langit. Nagkaigwa ka nin pagtubod asin namotibar na magsulsol. Pinahiro ka kan saimong puso na talikdan an maraot na mga gibo asin mamuhay kauyon kan kabutan nin Diyos. Nagin maugma ka kan mamati mo an pagpapatawad nin Diyos. (Sal. 32:1, 2) Nag-atender ka sa Kristiyanong mga pagtiripon asin pinunan na sabihon sa iba an marahayon na mga bagay na nanudan mo. Bilang sarong dusay asin bawtisadong Kristiyano, naglalakaw ka na sa dalan pasiring sa buhay, asin determinado ka na padagos na maglakaw diyan.—Mat. 7:13, 14.
15. Taano ta kapaki-pakinabang an pag-adal asin paghurop-hurop?
15 Pag-adalan an Tataramon nin Diyos asin hurop-hurupon iyan. Kun paanong an sarong kahoy puwedeng magdanay na masarig na nakatindog kun hararom an pagkakagamot kaiyan, puwede man kitang magdanay na marigon kun an satong pagtubod hararom na nakagamot sa Tataramon nin Diyos. Mantang nagtatalubo an sarong kahoy, an mga gamot kaiyan lalong minararom asin minalakop. Pag kita nag-aadal asin naghuhurop-hurop, pinapakusog ta an satong pagtubod asin pinapararom an satong pagigin kumbinsido na an mga pamamaagi nin Diyos iyo an pinakamarahay. (Col. 2:6, 7) Hurop-hurupon kun paano an instruksiyon, paggiya, asin pagprotektar ni Jehova nakatabang sa saiyang mga lingkod kaidto. Halimbawa, nagtao si Ezekiel nin urog na atensiyon mantang detalyadong sinusukol kan anghel an templo sa bisyon ni Ezekiel. An bisyon na ini nagpakusog ki Ezekiel, asin nagtatao ini sa sato nin praktikal na mga leksiyon kun paano ta masusunod an mga pamantayan ni Jehova para sa dalisay na pagsamba. d (Ezek. 40:1-4; 43:10-12) Makikinabang man kita kun matao kita nin panahon para pag-adalan asin hurop-hurupon an manungod sa hararom na mga bagay kan Tataramon nin Diyos.
16. Paano an marigon na puso nagin proteksiyon ki Bob? (Salmo 112:7)
16 Magkaigwa nin marigon na puso. Ipinahayag ni Hading David an makusog na pagkamuot niya ki Jehova kan siya magkanta: “Marigon an sakuyang puso, O Diyos.” (Sal. 57:7) Puwede man kitang magkaigwa nin marigon na puso, na lubos na nagtitiwala ki Jehova. (Basahon an Salmo 112:7.) Pag-isipan kun paano ini nakatabang ki Bob, na sinambit sa inutan. Kan sabihan siya kan doktor na mapasiguro man giraray sinda nin dugo enkaso kaipuhanon iyan, insigida siyang nagsimbag na kun enkaso mangaipo talaga na salinan siya nin dugo, mahali siya tulos sa ospital. Kan huri, sinabi ni Bob, “Dai lamang ako nagduwa-duwa o nahadit.”
Kun igwa kita nin masarig na pundasyon sa espirituwal, magdadanay kitang marigon ano man na pagbalo an mapaatubang sa sato (Hilingon an parapo 17)
17. Ano an manunudan ta sa eksperyensiya ni Bob? (Hilingon man an ritrato.)
17 Nagin marigon si Bob ta haloy pa bago siya maospital nakapagdesisyon na siya na maninindugan siya nin marigon. Inot, gusto niyang paugmahon si Jehova. Ikaduwa, pinag-adalan niyang marhay kun ano an sinasabi kan Bibliya asin kan satong basado sa Bibliyang mga publikasyon manungod sa kabanalan nin buhay asin dugo. Ikatulo, kumbinsido siya na an pagsunod sa mga instruksiyon ni Jehova matao nin nagdadanay na mga pakinabang. Puwede man kitang magkaigwa nin marigon na puso ano man na mga pagbalo an mapaatubang sa sato.
Si Barak saka an mga tawuhan niya kusog-buot na linalapag an hukbo ni Sisera (Hilingon an parapo 18)
18. Paano an halimbawa ni Barak nagtutukdo sa sato na magtiwala ki Jehova? (Hilingon an ritrato sa cover.)
18 Magtiwala ki Jehova. Pag-isipan kun paano nagin mapanggana si Barak huli sa pagtitiwala sa mga instruksiyon ni Jehova. Dawa ngani mayo nin nahiling na kalasag o garod sa bilog na kadagaan, ininstruksiyunan siya ni Jehova na makipaglaban sa armadong marhay na hukbong militar kan pamayo kan hukbo nin Canaan na si Sisera. (Huk. 5:8) Sinabihan ni propetisa Debora si Barak na bumaba ini sa patag na lugar para makipaglaban ki Sisera saka sa 900 na karwahe kaini. Aram ni Barak na dehado sinda sa pakikipaglaban sa mga karwahe kan mga kalaban sa patag na lugar, pero nagsunod pa man giraray siya. Kan buminaba an mga suldados hali sa Bukid nin Tabor, nagpadara si Jehova nin makusugon na uran hali sa langit. Naguot sa laboy an mga karwahe ni Sisera, asin itinao ni Jehova an kapangganahan ki Barak. (Huk. 4:1-7, 10, 13-16) Sa kaagid na paagi, itatao man ni Jehova sa sato an kapangganahan kun magtitiwala kita sa saiya asin sa mga instruksiyon na itinatao niya paagi sa saiyang mga representante.—Deu. 31:6.
MAGIN DETERMINADO NA MAGDANAY NA MARIGON
19. Taano ta gusto mong magdanay na marigon?
19 Sagkod na nabubuhay kita sa sistemang ini nin mga bagay, magpapadagos an satong pakikipaglaban na magdanay na marigon. (1 Tim. 6:11, 12; 2 Ped. 3:17) Lugod na magin determinado kita na dai maianod-anod kan mga persekusyon, tusong mga panggigipit, pangangatanusan nin tawo, mga pandadaya, asin mga pandisturbo. (Efe. 4:14) Imbes, marigon kitang manindugan, marigon sa satong debosyon ki Jehova asin dai natatanyog sa pagsunod ta sa mga pagbuot niya. Kasabay kaiyan, kaipuhan tang magin rasonable. Sa sunod na artikulo, pag-uulayan ta kun sa anong paagi si Jehova asin si Jesus perpektong mga halimbawa kan pagigin rasonable.
KANTA 129 Padagos Kitang Magtagal
a Puon pa kan panahon ni Adan asin Eva, pinapalakop na ni Satanas an ideya na an mga tawo an dapat na magdesisyon para sa sadiri ninda sa kun ano an tama asin sala. Gusto niya na magkaigwa kita kan siring na kaisipan manungod sa mga pagbuot ni Jehova asin sa ano man na teokratikong instruksiyon na nareresibi ta. Tatabangan kita kan artikulong ini na magin mapagbantay laban sa independiyenteng kaisipan kan kinaban ni Satanas asin pakusugon an satong determinasyon na marigon na manindugan sa kampi ni Jehova.
b Para sa impormasyon manungod sa kun paano susunudon nin sarong Kristiyano an pagmansay nin Diyos sa dugo, hilingon an leksiyon 39 kan librong Mabuhay nin Maugma Sagkod Pa Man!
c Hilingon sa jw.org/tl an artikulong “Mag-ingat sa Maling Impormasyon.”
d Para sa mga detalye, hilingon an kapitulo 13 asin 14 kan librong Dalisay na Pagsamba ki Jehova—Ibinalik Na!