1. Anong mga katotoohan an nanudan mo kan magpuon kang mag-adal nin Bibliya?

 NAGIGIRUMDUMAN mo kan nagpuon kang mag-adal nin Bibliya? Tibaad nangalas ka kan naaraman mong may pangaran palan an Diyos. Tibaad naranga ka kan naaraman mong dai man pinapasakitan kan Diyos an mga tawo sa nagkakalayong impiyerno. Asin tibaad naugma kang marhay sa paglaom na mahiling giraray an saimong mga nagadan na mahal sa buhay asin mamuhay kaiba ninda sa sarong paraisong daga.

2. Apuwera sa pakanuod nin mga katotoohan sa Bibliya, ano pang mga pag-uswag an ginibo mo? (Efeso 5:1, 2)

² Mantang mas pinag-adalan mo an Tataramon nin Diyos, mas nagtalubo man an pagkamuot mo ki Jehova. An pagkamuot na iyan nagpahiro sa saimo na iaplikar an saimong nanudan. Nakagibo ka nin mas marahay na mga desisyon na basado sa mga prinsipyo sa Bibliya. Nagin mas marahay an saimong ugali asin paggawi huling gusto mong paugmahon an Diyos. Kun paanong inaarog nin sarong aki an saiyang mamumuton na magurang, inaarog mo man an saimong Ama sa langit.—Basahon an Efeso 5:1, 2.

3. Ano an mga puwede tang ihapot sa satong sadiri?

³ Puwede tang ihapot sa satong sadiri: ‘Mas makusog daw an pagkamuot ko ki Jehova ngunyan kisa kan bago pa lang akong magin Kristiyano? Puon kan mabawtismuhan ako, mas nagin arog daw kan paagi ni Jehova an paagi ko nin pag-iisip asin paghiro—lalo na sa pagpahiling nin pagkamuot sa mga tugang?’ Kun an “pagkamuot na yaon sa saimo kan primero” medyo naglipot na, dai madisganar. Arog kaiyan an nangyari sa mga Kristiyano kan inot na siglo. Dai sinda sinukuan ni Jesus, asin dai niya man kita susukuan. (Kap. 2:4, 7) Aram niya na puwede tang painiton giraray an pagkamuot na namatian ta kan inot tang manudan an katotoohan.

4. Ano an pag-uulayan ta sa artikulong ini?

 ⁴ Pag-uulayan sa artikulong ini kun paano niyato padagos na mapapatalubo an pagkamuot ta ki Jehova asin sa iba. Dangan aaramon ta an pira sa mga bendisyon na aakuon ta asin kan iba pag pinakusog niyato an satong pagkamuot.

5-6. Anong mga kadipisilan an inatubang ni apostol Pablo durante kan saiyang ministeryo, pero ano an nakamotibar sa saiya na padagos na maglingkod ki Jehova?

⁵ Ikinaugma ni apostol Pablo an nakakakontentong buhay sa paglilingkod ki Jehova, pero dakul na mga kadipisilan an inatubang niya. Parating hararayo an dinudumanan ni Pablo, asin bakong pasil an pagbiyahe kan panahon na idto. Sa saiyang mga pagbiyahe, namugtak si Pablo kun minsan “sa mga peligro sa mga salog” asin sa “mga peligro sa mga tulisan.” May mga pagkakataon man na hinampak siya kan mga nagkokontra. (2 Cor. 11:23-27) Asin an Kristiyanong mga tugang ni Pablo bako pirming mapagpasalamat sa sinserong mga paghihinguwa niya na tabangan sinda.—2 Cor. 10:10; Fil. 4:15.

⁶ Ano an nakatabang ki Pablo para makapagpadagos sa paglilingkod ki Jehova? Dakul an nanudan ni Pablo sa Kasuratan asin sa mga eksperyensiya niya mismo manungod sa personalidad ni Jehova. Kumbinsido si Pablo na namumutan siya kan Diyos na Jehova. (Roma 8:38, 39; Efe. 2:4, 5) Asin namutan niya man na marhay si Jehova. Ipinahiling ni Pablo an pagkamuot niya ki Jehova “paagi sa paglilingkod asin padagos pang paglilingkod sa mga banal.”—Heb. 6:10.

7. Ano an sarong paagi para mapatalubo ta an satong pagkamuot ki Jehova?

⁷ Mapapatalubo ta an satong pagkamuot sa Diyos paagi sa maigot na pag-adal kan saiyang Tataramon. Mantang binabasa an Bibliya, hinguwahon na mahiling kun ano an itinutukdo manungod ki Jehova kan binabasa mo. Haputon an sadiri: ‘Paano ipinapahiling kan pagkasaysay na ini na namumutan ako ni Jehova? Anong mga dahilan an itinatao kaini sa sako para kamutan ko si Jehova?’

8. Paano makakatabang sa sato an pamibi para mapatalubo an satong pagkamuot sa Diyos?

⁸ An saro pang paagi para mapatalubo an satong pagkamuot ki Jehova iyo an pagpamibi saiya aroaldaw asin pagsabi saiya kan talagang namamatian ta. (Sal. 25:4, 5) Dangan, sisimbagon ni Jehova an satong mga pamibi. (1 Juan 3:21, 22) Si Khanh, sarong sister sa Asia, nagsabi: “Kan inot, an pagkamuot ko ki Jehova nakabasar sa mga nanudan ko manungod saiya, pero mas nagrarom an pagkamuot na iyan kan mahiling ko kun paano niya sinimbag an sakong mga pamibi. Huli kaiyan, gusto kong gibuhon an mga bagay na nakakapaugma sa saiya.” b

9. Paano ipinahiling ni Timoteo na nag-uuswag siya sa pagpahiling nin pagkamuot?

⁹ Mga pirang taon pagkatapos na makumbertir si Pablo, nabisto niya an sarong mahusay na hoben na si Timoteo. Namumutan ni Timoteo si Jehova, asin namumutan man niya an mga tawo. Sinabi ni Pablo sa mga taga Filipos: “Mayo na . . . akong ibang maisusugo na may kapareho [ni Timoteo na] sabuot na tunay na magmamakulog sa saindo.” (Fil. 2:20) Sa komentong ini ni Pablo, dai niya sinasabi an manungod sa kakayahan ni Timoteo bilang sarong paraorganisar o sarong tagapagtaram sa publiko, kundi an sinasabi niya digdi iyo an manungod sa hararom na pagkamuot ni Timoteo sa mga tugang. Siguradong inantisipar kan mga kongregasyon na pinaglilingkudan ni Timoteo an saiyang mga pagdalaw.—1 Cor. 4:17.

10. Paano ipinahiling ni Anna saka kan saiyang agom an pagkamuot ninda sa mga tugang?

¹⁰ Naghahanap man kita nin mga paagi para  tabangan an satong Kristiyanong mga tugang. (Heb. 13:16) Pag-isipan an eksperyensiya ni Anna na sinambit sa sinundan na artikulo. Pagkatapos nin makusog na bagyo, binisita nindang mag-agom an harong nin sarong pamilyang Saksi asin naaraman nindang buminagsak an atop kan harong kan pamilya. Kaya, mayong malinig na mga bado an pamilya. Sinabi ni Anna: “Kinua mi su mga bado ninda, linabahan iyan, dangan ibinalik sa sainda na plantsado asin nakatipig na. Para samo, sadit na bagay sana an ginibo mi, pero dahil diyan nagin dayupot kaming mag-aramigo sagkod ngunyan.” Pinahiro si Anna saka an agom niya kan pagkamuot ninda sa mga tugang para magtao nin praktikal na tabang.—1 Juan 3:17, 18.

11. (a) Ano an puwedeng magin epekto sa iba kan mga paghihinguwa tang magpahiling nin pagkamuot? (b) Sigun sa Talinhaga 19:17, paano minamansay ni Jehova an ginigibo tang pagpahiling nin pagkamuot?

¹¹ Pag tinatratar ta an iba nin may pagkamuot asin kabuutan, sa parati nahihiling ninda na hinihinguwa tang arugon an paagi nin pag-iisip asin paghiro ni Jehova. Asin tibaad pahalagahan ninda an satong kabuutan nin labi pa kisa sa iniisip ta. Si Khanh, na sinambit kasubago, maugmang ginigirumdom an mga nagtabang sa saiya. Sinabi niya: “Nagpapasalamat akong marhay sa gabos na sister na iiniba ako sa pag-service. Sinusundo ninda ako, iniimbitaran mag-isnak o mangudto, asin ihinahatod sa harong. Napag-isip-isip ko ngunyan na bakong basta-basta su ginigibo ninda. Asin ginibo ninda iyan huli sa pagkamuot.” Siyempre, bako man gabos mapasalamat sato sa ginigibo ta para sa sainda. Ini an sinabi ni Khanh manungod sa mga nagtabang sa saiya: “Gusto ko kutang balusan an mga kabuutan ninda sa sako, pero dai ko aram kun sain sinda nakairistar. Alagad, aram iyan ni Jehova, asin ipinapamibi ko na lugod balusan niya sinda para sa sako.” Tama si Khanh. Nahihiling ni Jehova dawa an pinakasimpleng pagpahiling nin kabuutan na ginigibo ta sa iba. Minamansay niya iyan bilang sarong mahalagang atang asin sarong  utang na babayadan niya.—Basahon an Talinhaga 19:17.

12. Paano maipapahiling kan mga brother an pagkamuot ninda sa kongregasyon? (Hilingon man an mga ritrato.)

¹² Kun saro kang brother, paano mo maipapahiling an pagkamuot sa iba asin hihinguwahon na tabangan sinda? Sarong hoben na brother na an pangaran Jordan an naghapot sa sarong elder kun paano siya mas makakatabang sa kongregasyon. Kinomendaran siya kan elder sa pag-uswag na nagibo na niya dangan nagtao ini nin pirang suhestiyon kun paano siya urog pang makakatabang. Halimbawa, sinabi kaini na mag-amay si Jordan sa Kingdom Hall asin tara-tarahon an iba, magpartisipar sa mga pagtiripon, regular na maghulit kaiba kan saiyang grupo sa paglilingkod sa langtad, asin maghanap nin praktikal na mga paagi para tabangan an iba. Kan sunudon ni Jordan an mga suhestiyon na ini, dai lang siya nakanuod na gibuhon an nagkapirang mga bagay kundi napatalubo niya man an saiyang pagkamuot sa mga tugang. Nanudan ni Jordan na pag nagin ministeryal na lingkod an saro, dai siya mapuon sa pagtabang sa iba; imbes, mapadagos siya sa pagtabang sa sainda.—1 Tim. 3:8-10, 13.

13. Paano napahiro nin pagkamuot an brother na si Christian para makuwalipikar giraray bilang elder?

¹³ Paano kun dati kang naglilingkod bilang sarong ministeryal na lingkod o sarong elder? Nagigirumduman ni Jehova an mga ginibo mo kaidto asin an pagkamuot na nagpahiro sa saimo na gibuhon iyan. (1 Cor. 15:58) Nahihiling niya man an pagkamuot na padagos mong ipinapahiling. Sarong brother na an pangaran Christian an nadisganar kan halion siya sa pagigin elder. Alagad, sinabi niya: “Nagdesisyon ako na gibuhon an gabos na magigibo ko para paglingkudan si Jehova huli sa pagkamuot—may pribilehiyo man ako o mayo.” Pag-abot nin panahon, nanombrahan giraray siya bilang elder. Inadmitir ni Christian:  “Medyo nag-aalangan ako na maglingkod giraray. Pero nagdesisyon ako na kun huli sa pagkahirak ni Jehova gusto niyang maglingkod giraray ako bilang elder, gigibuhon ko iyan huli sa pagkamuot ko sa saiya asin sa mga tugang.”

14. Ano an nanudan mo sa sinabi kan sarong sister na taga Georgia?

¹⁴ Ipinapahiling man kan mga lingkod ni Jehova an pagkamuot sa saindang kapwa. (Mat. 22:37-39) Halimbawa, si Elena, sarong sister na taga Georgia, nagsabi: “Kan inot, an nagpahiro lang sako na maghulit iyo an pagkamuot ko ki Jehova. Pero kan nagtalubo an pagkamuot ko sa sakuyang Ama sa langit, nagtalubo man an pagkamuot ko sa mga tawo. Inisip ko kun anong mga problema an napapaatubang sa sainda asin kun anong tema an gusto nindang pag-ulayan. Mantang mas iniisip ko sinda sa arog kaiyan na paagi, mas nagkukusog man an pagmawot ko na tabangan sinda.”—Roma 10:13-15.

15-16. Arog kan mahihiling sa mga ritrato, ano an mga bendisyon na resulta kan pagpahiling nin pagkamuot sa iba?

¹⁵ Pag nagpapahiling kita nin pagkamuot sa satong mga tugang, bako lang sinda an nakikinabang. Kan magpuon an COVID-19 na pandemya, tinabangan kan brother na si Paolo asin kan saiyang agom an dakul na may edad nang sister kun paano gagamiton an mga gadyet kaini para makapagpatotoo. Sarong sister na nasasakitan kan primero na gamiton an saiyang gadyet an tatao na ngunyan sa paggamit kaiyan. Nagamit niya iyan sa pag-imbitar sa saiyang mga paryente para sa Memoryal. Sisenta sa sainda an nakaatender  paagi sa videoconference! Nakinabang an sister asin an mga paryente kaini huli sa mga paghihinguwa ni Paolo asin kan saiyang agom. Kan huri, nagsurat an sister ki Paolo: “Salamat sa pagtukdo sa samong mga may edad na. Nungka kong malilingawan an pagmalasakit ni Jehova asin an grabeng mga paghihinguwa nindo.”

¹⁶ An mga eksperyensiyang arog kaini nagtukdo ki Paolo nin mahalagang marhay na leksiyon. Naipagirumdom kaiyan sa saiya na mas importante an pagkamuot kisa sa kaaraman o abilidad. Sinabi niya: “Paraataman nin sirkito ako kaidto. Narerealisar ko ngunyan na dawa nalingawan na kan mga tugang an mga pahayag ko kaidto, nagigirumduman pa man giraray ninda an praktikal na tabang na ginibo ko sa sainda.”

17. Siisay pa an makikinabang pag nagpapahiling kita nin pagkamuot?

¹⁷ Pag nagpapahiling kita nin pagkamuot sa iba, kita mismo nakikinabang sa mga paaging dai ta inaasahan. Napatunayan ini ni Jonathan na taga New Zealand. Sarong mainit na Sabadong hapon, nahiling niya an sarong payunir na naghuhulit sa may tinampo. Nagdesisyon si Jonathan na ibanan an payunir kan suminunod na mga Sabadong hapon. Dai pa niya kaidto naiisip kun paano siya mismo makikinabang sa arog kaining pagpahiling niya nin kabuutan. “Kan mga panahon na idto,” an sabi ni Jonathan, “dai ko gusto an pag-service. Pero kan nadangog ko an paagi nin pagtutukdo kan payunir asin nahiling kun gurano kanagin mabunga an ministeryo kaini, nagustuhan ko na man an gibuhon na ini. Nagkaigwa man ako nin dayupot na amigo na nagtabang sa sako na magtalubo sa espirituwal, ikaugma an ministeryo, asin urog na maparani ki Jehova.”

18. Ano an gusto ni Jehova na gibuhon niyato?

¹⁸ Gusto ni Jehova na gabos kita magtalubo sa satong pagkamuot sa saiya asin sa iba. Arog kan nanudan ta, mapapakusog ta an satong pagkamuot ki Jehova paagi sa pagbasa asin paghurop-hurop kan saiyang Tataramon saka paagi sa regular na pakikipag-ulay sa saiya sa pamibi. Mapapatalubo ta an satong pagkamuot sa mga tugang paagi sa pagtabang sa sainda sa praktikal na mga paagi. Mantang nagtatalubo an satong pagkamuot, mas mapaparani kita ki Jehova asin sa satong espirituwal na pamilya. Asin ikakaugma niyato sagkod lamang an siring na mga pakikiamigo!