1-2. Siisay si Zadok? (1 Cronica 12:​22, 26-28)

 IMAHINARA an eksena. Sarong dakulang grupo nin labing 340,000 na lalaki an nagtiripon tanganing gibuhon na hadi si David sa bilog na Israel. Sa laog nin tulong aldaw, dangog-dangog sa bilog na magapong kabubuldan harani sa Hebron an buhay na buhay na mga pag-urulay, maugmang pagkanta nin mga kanta nin pag-umaw, asin an mga tanog nin maugmang ngiriritan. (1 Cron. 12:39) An hoben na lalaki na an pangaran Zadok posibleng marhay na dai maririsa sa kadakul na tawong iyan. Pero, sinigurado ni Jehova na maaaraman niyato na yaon kaidto duman si Zadok. (Basahon an 1 Cronica 12:​22, 26-28.) Siisay si Zadok?

² Si Zadok sarong saserdote na parating kaibanan sa paglilingkod kan Halangkaw na Saserdoteng si Abiatar. Saro man siyang tagasabot na kayang maaraman an kabutan nin Diyos asin tinawan nin ekstraordinaryong pakasabot. (2 Sam. 15:27) Minadulok ki Zadok an mga tawo pag kaipuhan ninda nin madunong na sadol. Saro man siyang lalaking makusog an buot. Sa artikulong ini, mapokus kita sa aspektong iyan kan saiyang personalidad.

3. (a) Taano ta kaipuhan kan mga parasamba ni Jehova na magin makusog an buot? (b) Ano an pag-uulayan ta sa artikulong ini?

³ Sa huring mga aldaw na ini, pinapagrabe ni Satanas an mga pag-atake niya sa mga lingkod nin Diyos. (1 Ped. 5:8) Kaipuhan tang magin makusog an buot mantang hinahalat tang laglagon ni Jehova si Satanas asin tapuson an saiyang maraot na sistema. (Sal. 31:24) Pag-ulayan ta an tulong paagi na maaarog ta an kusog nin buot ni Zadok.

SUPORTARAN AN KAHADIAN NIN DIYOS

4. Taano ta kaipuhan kan mga lingkod nin Diyos nin kusog nin buot para suportaran an Kahadian nin Diyos? (Hilingon man an ritrato.)

⁴ Bilang mga lingkod ni Jehova, bilog na puso tang sinusuportaran an Kahadian nin Diyos, pero sa parati kaipuhan ta nin kusog nin buot para magibo iyan. (Mat. 6:33) Halimbawa, sa maraot na kinaban  na ini, kaipuhan ta nin kusog nin buot tanganing mamuhay kauyon kan mga pamantayan ni Jehova asin na ihulit an maugmang bareta kan Kahadian. (1 Tes. 2:2) Asin sa parati, kaipuhan ta nin kusog nin buot tanganing magdanay na neutral sa pulitika sa sistemang ini nin mga bagay na lalong nagkakabaranga. (Juan 18:36) Dakul sa mga lingkod ni Jehova an nakakaeksperyensiya nin problema sa pinansiyal, pisikal na pag-abuso, o iprineso huli sa pagsayumang makikabtang sa mga aktibidad sa pulitika o sa militar.

5. Taano ta kinaipuhan ni Zadok nin kusog nin buot para suportaran si David?

⁵ Nagduman si Zadok sa Hebron bako sana tanganing iselebrar an pagigin hadi ni David. Armado siyang nagduman, andam na makilaban. (1 Cron. 12:38) Andam siyang magsunod ki David sa ralaban asin na idepensa an Israel sa mga kaiwal kaiyan. Posibleng kulang an eksperyensiya ni Zadok bilang parapakilaban, pero makusog an saiyang buot.

6. Paano nagin marahay na halimbawa si David ki Zadok sa pagpahiling nin kusog nin buot? (Salmo 138:3)

⁶ Paanong an sarong saserdote arog ni Zadok nakanuod na magin makusog an buot? An mga nakaibanan niya mga lalaking matitibay asin makusog an buot. Mayong duda na nakinabang siya sa halimbawa ninda. Halimbawa, an ipinahiling na kusog nin buot ni David kan ‘panginutan niya an Israel sa mga pakikipaglaban’ nakapahiro sa bilog na Israel na suportaran siya nin bilog na puso. (1 Cron. 11:​1, 2) Pirming nagsarig si David ki Jehova para sa tabang laban sa mga kaiwal niya. (Sal. 28:7; basahon an Salmo 138:3.) May iba pang mga nakaibanan si Zadok na nagin nakakamotibar na halimbawa sa saiya—mga lalaking arog ni Jehoiada asin kan saiyang parapakilaban na aking lalaking si Benaias pati man an 22 na iba pang mga pamayo nin mga tribo na kuminampi ki David. (1 Cron. 11:​22-25; 12:​26-28) An mga lalaking ini maigot na nagsuportar sa pagigin hadi ni David.

7. (a) Magtao nin mga halimbawa nin mga nagpahiling nin kusog nin buot sa presenteng panahon. (b) Ano an nanudan mo sa halimbawa ni Brother Nsilu, arog kan ipinahiling sa video?

⁷ Nagigin mas makusog an satong buot pag pinag-aadalan ta an mga halimbawa kan mga  kusog-buot na nagsuportar sa pamamahala ni Jehova. An satong Hadi, si Cristo Jesus, marigon na linabanan an panggigipit na magin kalabot sa pulitikal na sistema nin mga bagay ni Satanas. (Mat. 4:​8-11; Juan 6:​14, 15) Pirmi siyang nagsarig ki Jehova para sa kusog. Igwa man kita nin dakulon na halimbawa nin hoben na mga lalaki sa presenteng panahon na nagsayumang magsuldados huli sa saindang konsiyensiya o na nagsayumang magpartisipar sa pulitikal na mga aktibidad. Puwede mong basahon an nagkapira sa mga eksperyensiya ninda sa jw.org. a

TABANGAN AN SAIMONG MGA TUGANG

8. Nuarin tibaad kaipuhanon kan mga elder an kusog nin buot tanganing makatao nin praktikal na tabang sa saindang mga tugang?

⁸ Gustong-gusto kan mga lingkod ni Jehova na tabangan an lambang saro. (2 Cor. 8:4) Pero, kun minsan, nangangaipo iyan nin kusog nin buot. Halimbawa, pag nagkaigwa nin giyera, aram kan lokal na mga elder na kaipuhan kan saindang mga tugang nin pampakusog nin buot, suporta, asin tibaad espirituwal o materyal na mga probisyon. Huli sa pagkamuot ninda para sa mga karnero, isinasapeligro kan mga elder an sadiri mismo nindang kaligtasan tanganing maitao an kaipuhan. (Juan 15:​12, 13) Sa bagay na ini, inaarog ninda an kusog nin buot na ipinahiling ni Zadok.

9. Arog kan mababasa sa 2 Samuel 15:​27-29, anong instruksiyon an itinao ni David ki Zadok? (Hilingon man an ritrato.)

⁹ Namemeligro an buhay ni David. Determinado kaya an aki niyang si Absalom na agawon sa saiya an kahadian. (2 Sam. 15:​12, 13) Kaipuhan ni David na maghali ora mismo sa Jerusalem! Ipinagbuot niya sa mga lingkod niya: “Maghidali kamo! Magdurulag na kita, ta mayo nin makakaligtas sa sato ki Absalom.” (2 Sam. 15:14) Mantang naghaharali an mga lingkod, narealisar ni David na kaipuhan na may magpawalat tanganing padagos siyang maimpormaran kan mga plano ni Absalom. Kaya isinugo niya si Zadok  asin an iba pang mga saserdote pabalik sa siyudad tanganing magin mga espiya. (Basahon an 2 Samuel 15:​27-29.) Kaipuhan nindang magin maingat na marhay. An ipinapagibo ni David sa mga saserdoteng idto peligroso asin buhay pa ngani an nakataya. Si Absalom sarong lalaking sadiri sana an iniisip, mabinalos, asin traydor. Kaya imahinara na sana an puwede niyang gibuhon ki Zadok asin sa iba pang mga saserdote kun maaraman niyang nag-eespiya sa saiya an mga ini tanganing protektaran si David!

10. Paano si David prinotektaran ni Zadok asin kan mga kairiba kaini?

¹⁰ May ginibong sarong plano si David na diyan kalabot si Zadok asin Husai, na saro pang maimbod na amigo ni David. (2 Sam. 15:​32-37) Sinunod ni Husai an plano kaya nakua niya an tiwala ni Absalom, asin nagsuhestiyon siya nin sarong estratehiya na makakatao ki David nin panahon na mag-andam para sa sarong pag-atake. Dangan, inimpormaran ni Husai si Zadok asin Abiatar manungod diyan. (2 Sam. 17:​8-16) Tapos sinigurado kan duwang lalaking ini na mapapadarahan nin mensahe si David. (2 Sam. 17:17) Sa tabang ni Jehova, si Zadok saka an mga kapwa niya saserdote nagkaigwa nin mahalagang papel sa pagprotektar sa buhay ni David.​—2 Sam. 17:​21, 22.

11. Paano ta maaarog an kusog nin buot ni Zadok pag nagtatabang kita sa mga tugang?

¹¹ Pag nasa peligrosong sitwasyon an satong mga tugang asin kaipuhan ninda an satong tabang, paano ta maipapahiling an kusog nin buot na arog kan ki Zadok? (1) Magsunod sa instruksiyon. Sa arog kaiyan na mga kamugtakan, mahalaga na magdanay kitang nagkakasararo. Makikooperar sa paggiya kan saindong sangang opisina. (Heb. 13:17) Dapat na regular na repasuhon kan mga elder an lokal na mga areglo para sa pag-andam sa mga kalamidad pati na an mga paggiya kan organisasyon sa kun ano an gigibuhon pag may kalamidad na madali nang umabot. (1 Cor. 14:​33, 40) (2) Magin makusog an buot alagad maingat. (Tal. 22:3) Magin madunong. Mag-isip nguna bago humiro. Isaisip an kaligtasan sagkod na posible. (3) Magsarig ki Jehova.  Tandaan na interesadong marhay si Jehova sa kapakanan mo asin kan saimong mga tugang. Matatabangan ka niya na ligtas sindang maalalayan.

12-13. Ano an manunudan mo sa eksperyensiya ni Viktor asin ni Vitalii? (Hilingon man an ritrato.)

¹² Pag-isipan an eksperyensiya kan magtugang sa espirituwal na si Viktor asin Vitalii, na nagtrabaho sa paghatod nin mga kakanon asin tubig sa saindang mga kapagtubod sa Ukraine. “Naghanap kami nin mga kakanon maski sain,” an sabi ni Viktor. “Sa parati may mga nagbabaradilan sa palibot mi. May sarong brother na nagdonar nin mga kakanon hali sa tindahan niya. An donasyon na iyan nakasustenir sa dakul na parahayag sa laog nin pirang panahon. Mantang pigkakarga mi sa trak an mga ayuda, may buminagsak na sarong bomba mga 20 metros an rayo sa samo. Kan bilog na aldaw na idto, nagparapamibi ako ki Jehova na tawan ako kan kusog na kaipuhan ko para padagos na matabangan an mga parahayag.”

¹³ “Nangaipo iyan nin dakulang kusog nin buot,” an sabi ni Vitalii. “Inabot nin 12 oras an inot na pagbiyahe ko. Nagparapamibi ako ki Jehova sa bilog na pagbiyaheng iyan.” Makusog an buot ni Vitalii, pero maingat man siya. Sinabi niya pa: “Sige kong hagad ki Jehova na tawan niya ako nin kadunungan saka tabangan akong magin mapakumbaba. Duman lang ako nag-agi sa mga tinampong aprubado kan mga awtoridad. Napakusog an pagtubod ko kan mahiling ko mismo kun paano nagtinarabangan an mga tugang. Hinali ninda an mga ulang sa tinampo, nagkolekta saka nagkarga nin mga ayuda, asin tinawan kami nin mga kakanon asin hinanapan nin mapapahingaluan mantang nasa dalan.”

MAGDANAY NA MAIMBOD KI JEHOVA

14. Paano kita puwedeng maapektaran kun nagin bako nang maimbod ki Jehova an sarong mahal niyato sa buhay?

¹⁴ An saro sa pinakadipisil na mga pagbalo na tibaad mapaatubang sa sato iyo an pagbaya ki Jehova kan sarong kapamilya o dayupot na amigo niyato. (Sal. 78:40; Tal. 24:10) Mantang mas dayupot kita sa saro, mas dipisil man na akuon an sitwasyon. Kun nagkaigwa ka nin arog kaiyan kakulog na eksperyensiya, puwede kang mapakusog kan halimbawa ni Zadok nin kaimbudan.

15. Taano ta kaipuhan ni Zadok nin kusog nin buot tanganing magdanay na maimbod ki Jehova? (1 Hadi 1:​5-8)

¹⁵ Nagdanay na maimbod si Zadok ki Jehova kan pilion kan dayupot niyang amigong sa Abiatar na magin bakong maimbod ki Jehova. Nangyari ini sa pagtatapos kan pamamahala ni David bilang hadi. Kan si David gurang na asin madali nang magadan, pinurbaran kan aki niyang lalaking si Adonias na agawon an trono na ipinanuga ni Jehova ki Solomon. (1 Cron. 22:​9, 10) Pinili ni Abiatar na suportaran si Adonias. (Basahon an 1 Hadi 1:​5-8.) Sa paggibo kaiyan, bako lang ki David nagin bakong maimbod si Abiatar kundi pati man ki Jehova! Naiimahinar mo daw kun gurano kamundo asin kadisganado si Zadok? Sa laog nin mga apat na dekada, parati sindang magkaibanan ni Abiatar sa paglilingkod bilang mga saserdote. (2 Sam. 8:17) Magkaibanan ninda kaidtong iningatan asin binantayan an “Kaban kan tunay na Diyos.” (2 Sam. 15:29) Kan primero, pareho nindang sinuportaran an pagigin hadi ni David—asin kadakul pang iba.​—2 Sam. 19:​11-14.

16. Ano an posibleng nakatabang ki Zadok na magdanay na maimbod?

¹⁶ Si Zadok nagdanay na maimbod ki Jehova dawa pinili ni Abiatar na trayduron si David. Nungkang pinagdudahan ni David an kaimbudan ni Zadok sa saiya. Kan mabuyagyag an pakana ni Adonias, pinili ni David si Zadok, Natan, asin Benaias na iyo an maglahid ki Solomon bilang hadi. (1 Ha. 1:​32-34) Dahil an mga kaibanan ni Zadok maimbod na mga parasamba ni Jehova, arog ni Natan asin kan iba pang mga  nagsusuportar ki Hading David, siguradong napakusog an buot niya. (1 Ha. 1:​38, 39) Kan magin hadi na si Solomon, “ninombrahan [niya] si Zadok na saserdote bilang kasalida ni Abiatar.”​—1 Ha. 2:35.

17. Paano mo maaarog si Zadok kun an sarong mahal mo sa buhay magin bako nang maimbod ki Jehova?

¹⁷ Paano mo maaarog si Zadok? Kun pilion kan sarong mahal mo sa buhay na bayaan si Jehova, malinaw na ipahiling na pipilion mong magin maimbod ki Jehova. (Jos. 24:15) Tatawan ka ni Jehova kan kusog nin buot na kaipuhan mo. Magsarig sa saiya paagi sa pagpamibi asin pagdanay na dayupot sa mga kapwa mo maimbod na parasamba. Pinapahalagahan na marhay ni Jehova an saimong kaimbudan, asin babalusan ka niya huli kaiyan.​—2 Sam. 22:26.

18. Ano an manunudan mo sa eksperyensiya ni Marco asin Sidse?

¹⁸ Pag-isipan an halimbawa ni Marco asin kan agom niyang si Sidse, na an duwang adultong aking babayi binayaan an katotoohan. Sinabi ni Marco: “Puon pa kan aldaw na mamundag an mga aki mo, namumutan mo na sindang marhay. Gabos gigibuhon mo tanganing maprotektaran sinda. Kaya pag pinili nindang bayaan si Jehova, makulugon iyan na marhay.” Sinabi niya pa: “Pero pirming nasa kaibanan mi si Jehova. Sinigurado niya na pag ako an maluya, si agom an makusog, asin pag si agom an maluya, ako an makusog.” Sinabi ni Sidse: “Dai mi magigibong makatagal kun dai kami tinawan ni Jehova kan kusog na kaipuhan mi. Munduon ako ta pagmati ko kasalan ko idto, kaya sinabi ko ki Jehova an namamatian ko. Pakalihis nin pirang aldaw, sarong sister na haloy ko nang dai nahihiling an nagdulok sako. Ipinatong niya an mga kamot niya sa mga abaga ko, pighiling niya ako sa mata, asin sinabi niya: ‘Tandaan mo Sidse, bako mo idtong kasalan!’ Sa tabang ni Jehova, nagibo kong mapagdanay an sakong kaugmahan sa paglilingkod sa saiya.”

19. Ano an determinado mong gibuhon?

¹⁹ Gusto ni Jehova na an gabos niyang parasamba magin makusog an buot arog ni Zadok. (2 Tim. 1:7) Alagad, habo niya na magsarig kita sa sadiri tang kusog. Gusto niya na magsarig kita sa saiya. Kaya pag napaatubang ka sa sitwasyon na kaipuhan mo nin kusog nin buot, hagadon iyan ki Jehova. Makakasigurado ka na papakusugon niya an buot mo arog ki Zadok!—1 Ped. 5:10.