1. Ano an namamatian mo manungod sa katotoohan?

 NAMUMUTAN kan mga lingkod ni Jehova an katotoohan na yaon sa Tataramon nin Diyos. Nakabasar diyan an satong pagtubod. (Roma 10:17) Nagin kumbinsido kita na inestablisar ni Jehova an Kristiyanong kongregasyon bilang “sarong harigi asin sulay kan katotoohan.” (1 Tim. 3:15) Asin maugma kitang nagpapasakop “sa mga nanginginot” sa sato mantang ipinapaliwanag ninda an katotoohan hali sa Bibliya asin nagtatao nin paggiya kauyon kan kabutan nin Diyos.​—Heb. 13:17.

2. Uyon sa Santiago 5:​19, ano an puwedeng mangyari sa sato pagkatapos tang manudan an katotoohan?

² Minsan siring, pagkatapos tang akuon an katotoohan asin an papel kan organisasyon nin Diyos sa pagtao nin masasarigan na giya, puwede pa man giraray kitang madara parayo. (Basahon an Santiago 5:19.) Gustong-gusto ni Satanas na mawara an pagtitiwala ta sa Bibliya o sa paggiya na itinatao sa sato kan organisasyon nin Diyos.​—Efe. 4:14.

3. Taano ta kaipuhan tang mangapot nin higot sa katotoohan? (Efeso 6:​13, 14)

³ Basahon an Efeso 6:​13, 14. Dai mahahaloy, magamit an Diyablo nin mapuwersang propaganda tanganing dayaon an bilog na mga nasyon na magkarampihan laban ki Jehova. (Kap. 16:​13, 14) Asahan man niyato na lalong magmamaigot si Satanas na dayaon an mga lingkod ni Jehova. (Kap. 12:9) Huli kaiyan, mahalaga na sanayon niyato an satong sadiri na mahiling an pagkakalain kan katotoohan asin kan kaputikan asin na magin masinunod sa katotoohan. (Roma 6:17; 1 Ped. 1:22) Mahalagang marhay iyan tanganing makaligtas kita sa dakulang kasakitan!

4. Ano an pag-uulayan ta sa artikulong ini?

 ⁴ Sa artikulong ini, aaramon ta an duwang kuwalidad na kaipuhan tanganing mamidbid ta an katotoohan hali sa Bibliya asin na akuon an paggiya hali sa organisasyon nin Diyos. Dangan pag-uulayan ta an tulong suhestiyon na kaipuhan tang sunudon tanganing padagos na makapangapot nin higot sa katotoohan.

MGA KUWALIDAD NA KAIPUHAN TANGANING MAMIDBID AN KATOTOOHAN

5. Paano an pagkatakot ki Jehova nakakatabang sato na mamidbid an katotoohan?

⁵ Pagkatakot ki Jehova. Pag igwa na kita nin tamang pagkatakot ki Jehova, namumutan ta siyang marhay kaya nungka kitang magibo nin ano man na makakapamundo sa saiya. Gustong-gusto tang maaraman an pagkakalain kan tama asin sala, kan katotoohan asin kaputikan, tanganing makamtan ta an pag-uyon ni Jehova. (Tal. 2:​3-6; Heb. 5:14) Dapat na nungka tang tugutan an pagkatakot sa tawo na magin mas labi kisa sa pagkamuot ta ki Jehova, huling an nakakapaugma sa mga tawo sa parati nakakapamundo sa saiya.

6. Paano an pagkatakot sa tawo kan sampulong mga pamayong Israelita nagin dahilan na biribidon ninda an katotoohan?

⁶ Kun an pagkatakot ta sa tawo mas labi kisa sa pagkatakot ta sa Diyos, puwedeng magin dahilan iyan na maparayo kita sa katotoohan. Pag-isipan an halimbawa kan 12 pamayo na nag-espiya sa daga na ipinanuga ni Jehova na itatao sa mga Israelita. An pagkatakot sa mga Canaanita kan sampulo sa mga espiya mas makusog kisa sa pagkamuot ninda ki Jehova. Sinabi ninda sa mga kapwa ninda Israelita: “Dai ta kakayanon na makipaglaban sa sainda, ta mas makusog sinda sa sato.” (Bil. 13:​27-31) Sa pagmansay nin tawo, mas makusog an mga Canaanita kisa sa mga Israelita—totoo man iyan. Pero sa pagsabing dai kakayanon kan mga Israelita na daugon an saindang mga kaiwal, dai ninda inisip si Jehova. An sampulong espiyang idto dapat kuta nagpokus sa kun ano an gusto ni Jehova na gibuhon kan mga Israelita. Saka dapat kuta  hinurop-hurop ninda kun ano an ginibo niya para sa sainda dai pa sana nahahaloy. Paagi kaiyan, marerealisar kuta ninda na an kusog kan mga Canaanita mayo lamang kun ikukumparar sa makakamhan na kapangyarihan ni Jehova. Bakong arog kan daing pagtubod na mga espiyang idto, si Josue asin Caleb gustong makamtan an pag-uyon ni Jehova. Sinabi ninda sa banwaan: “Kun nauuyunan kita ni Jehova, siguradong dadarahon niya kita sa dagang iyan asin itatao niya iyan sa sato.”​—Bil. 14:​6-9.

7. Paano ta mapapakusog an satong pagkatakot ki Jehova? (Hilingon man an ritrato.)

⁷ Para mas magkaigwa kita nin pagkatakot ki Jehova, kaipuhan tang magpokus sa pagpaugma sa saiya sa lambang desisyon na ginigibo ta. (Sal. 16:8) Mantang nagbabasa nin mga salaysay sa Bibliya, haputon an sadiri, ‘Kun ako an nasa sitwasyon na iyan, ano an magigin desisyon ko?’ Halimbawa, imahinara na nagdadangog ka kaidto mantang itinatao kan sampulong pamayong Israelita an saindang negatibong bareta. Maniniwala ka daw diyan asin magpapadaog sa pagkatakot sa tawo, o mas mangingibabaw an pagkamuot mo ki Jehova asin an pagmawot mo na mapaugma siya? Sarong bilog na henerasyon nin mga Israelita an dai nakamidbid kan katotoohan na sinabi ni Josue asin Caleb. Bilang resulta, naiwara ninda an oportunidad na makalaog sa Dagang Panuga.​—Bil. 14:​10, 22, 23.

8. Anong kuwalidad an dapat na pagmaigutan tang patalubuon, asin taano?

⁸ Kapakumbabaan. Ihinahayag ni Jehova an katotoohan sa mga mapakumbaba. (Mat. 11:25) Mapakumbaba kitang nag-ako nin tabang para manudan an katotoohan. (Gibo 8:​30, 31) Pero kaipuhan ta pa man giraray na mag-ingat na dai magin mapalangkaw. An pagigin mapalangkaw puwedeng magin dahilan na isipon tang an satong personal na mga opinyon arog kadunong kan mga prinsipyo sa Bibliya asin kan paggiya hali sa organisasyon ni Jehova.

9. Paano kita magdadanay na mapakumbaba?

⁹ Para magdanay na mapakumbaba, kaipuhan tang tandaan kun gurano kita kasadit kumpara sa kadakulaan ni Jehova. (Sal. 8:​3, 4) Puwede ta man ipamibi na magin mapakumbaba kita asin andam na tukduan. Tatabangan kita ni Jehova na pahalagahan ta an saiyang mga kaisipan, na itinatao niya paagi kan saiyang Tataramon asin kan saiyang organisasyon, nin urog kisa kan sa sato. Sa pagbasa mo nin Bibliya, maghanap nin mga halimbawa kun paano ni Jehova ipinapahiling na namumutan niya an kapakumbabaan asin ikinakaungis niya an pagigin orgulyoso, arogante, asin mapalangkaw. Asin lalo nang hinguwahon na magdanay na mapakumbaba pag tinawan ka nin sarong pribilehiyo nin paglilingkod na nagtatao saimo nin awtoridad o nagigin dahilan na marisa ka kan iba.

KUN PAANO KITA MAKAKAPANGAPOT NIN HIGOT SA KATOTOOHAN

10. Siisay an ginagamit ni Jehova para magtao nin instruksiyon asin paggiya sa saiyang mga lingkod?

¹⁰ Pagdanayon an pagtitiwala sa teokratikong paggiya. Kan suanoy na Israel, ginamit ni Jehova si Moises dangan si Josue para magtao nin mga instruksiyon sa Saiyang banwaan. (Jos. 1:​16, 17) Nag-aako nin mga bendisyon an mga Israelita pag minamansay ninda an mga lalaking ini bilang mga representante kan Diyos na Jehova. Pakalihis nin mga siglo, kan bago pa lang na mabilog an Kristiyanong kongregasyon, an 12 apostol an nagtatao nin paggiya. (Gibo 8:​14, 15) Dangan pag-abot nin panahon, kaiba na sa grupong iyan an iba pang kamagurangan sa Jerusalem. Paagi sa pagsunod sa paggiya hali sa maimbod na mga lalaking iyan, “padagos . . . na napapakusog an pagtubod kan mga kongregasyon asin padagos na nagdadakul an bilang kan mga tugang aroaldaw.” (Gibo 16:​4, 5) Sa presenteng panahon, nag-aako man kita nin mga bendisyon pag sinusunod ta an teokratikong  paggiya hali sa organisasyon ni Jehova. Pero ano daw an mamamatian ni Jehova kun dai ta mimidbidon an mga ninombrahan niya? Masisimbag ta an hapot na iyan paagi sa pagkonsiderar kun ano an nangyari kan an mga Israelita ginigiyahan pasiring sa Dagang Panuga.

11. Ano an nangyari sa suanoy na mga Israelita na nagkuwestiyon sa pagpili nin Diyos ki Moises para iyo an manginot? (Hilingon man an ritrato.)

¹¹ Sa sarong pagkakataon sa pagbaklay kan mga Israelita pasiring sa Dagang Panuga, may mga prominenteng lalaki na nagkuwestiyon ki Moises asin sa papel na iinasignar saiya ni Jehova. Sinabi ninda: “Banal an bilog na katiripunan, gabos sinda [bako lang si Moises], asin yaon sa tahaw ninda si Jehova.” (Bil. 16:​1-3) Totoo na sa paghiling nin Diyos banal “an bilog na katiripunan,” pero pinili ni Jehova si Moises na iyo an manginot sa Saiyang banwaan. (Bil. 16:28) Paagi sa pagkritikar ki Moises kan mga rebelde, an kinikritikar talaga ninda iyo si Jehova. Dai sinda nagpokus sa kun ano an gusto ni Jehova; nagpokus sinda sa kun ano an gusto ninda—mas urog na kapangyarihan asin pagkaprominente. Ginadan ni Jehova an mga lider kan rebelyon pati na an rinibong iba pa na nagsuportar sa sainda. (Bil. 16:​30-35, 41, 49) Sa ngunyan makakasigurado kita na dai inuuyunan ni Jehova an mga dai nagpapahiling nin paggalang sa mga areglo niya sa saiyang organisasyon.

12. Taano ta danay kitang makakapagtiwala sa organisasyon ni Jehova?

¹² Danay kitang makakapagtiwala sa organisasyon ni Jehova. Pag naaraman kan mga nanginginot na may kaipuhan na gibuhon na pagliliwat sa satong pakasabot sa sarong partikular na katotoohan sa Bibliya o sa paagi nin pag-organisar kan gibuhon na pang-Kahadian, dai sinda nagduduwa-duwa na gumibo nin kinakaipuhan na mga pagbabago. (Tal. 4:18) Ginigibo ninda iyan huling, urog sa gabos, gusto nindang mapaugma si Jehova. Ginigibo man ninda an saindang pinakamakakaya na ibasar an saindang mga desisyon sa Tataramon nin Diyos, an pamantayan na kaipuhan sunudon kan gabos na lingkod ni Jehova.

13. Ano an “pamantayan nin marahay na mga tataramon,” asin ano an dapat tang gibuhon kaiyan?

 ¹³ “Padagos mong pangaptan an pamantayan nin marahay na mga tataramon.” (2 Tim. 1:13) “An pamantayan nin marahay na mga tataramon” nanunungod sa Kristiyanong mga katukduan na mahihiling sa Bibliya. (Juan 17:17) An mga katukduan na iyan iyo an basehan kan gabos na tinutubod ta. Tinutukduan kita kan organisasyon ni Jehova na pangaptan an pamantayan na iyan. Sagkod na ginigibo ta iyan, bebendisyunan kita.

14. Paano an nagkapirang Kristiyano dai nakapangapot sa “pamantayan nin marahay na mga tataramon”?

¹⁴ Ano an puwedeng mangyari kun malihis kita sa “pamantayan nin marahay na mga tataramon”? Pag-isipan an sarong halimbawa. Kan inot na siglo, minalataw na may nagkapirang Kristiyano na nagpapalakop nin uruistorya na an aldaw ni Jehova nag-abot na. Posibleng may sarong surat—na iniisip kan mga tawo na hali ki apostol Pablo—na nagsabi kaiyan. Huling dai na nagtao nin panahon an nagkapirang Kristiyano sa Tesalonica para aramon kun ano an totoo, nagtubod sinda sa uruistoryang iyan asin ipinapalakop pa ngani. Dai kutana sinda madadaya kun ginirumdom ninda an mga bagay na itinukdo sa sainda ni Pablo kan siya kaibanan pa ninda. (2 Tes. 2:​1-5) Sinadol ni Pablo an saiyang mga tugang na dai paniwalaan an gabos na nadadangog ninda. Asin para tabangan sinda sa maabot, tinapos ni Pablo an saiyang ikaduwang surat para sa mga taga Tesalonica sa arog kaining mga tataramon: “Ako, si Pablo, nagpapaabot kan sakuyang pangungumusta. Kamot ko mismo an nagsurat kaini, sa istilong mahihiling nindo sa gabos kong surat; ini an paagi ko nin pagsurat.”​—2 Tes. 3:17.

15. Paano ta mapoprotektaran an satong sadiri sa mga kaputikan na garo baga totoo? Magtao nin halimbawa. (Hilingon man an mga ritrato.)

¹⁵ Ano an manunudan ta sa sinabi ni Pablo sa mga taga Tesalonica? Pag may nadangog kitang sarong bagay na bakong kauyon kan mga nanudan ta sa Bibliya o nakadangog kita nin sarong nakakabiglang istorya, kaipuhan tang gamiton an satong pakasabot. Sa dating Unyon Sobyet, an satong mga kaiwal nagpalakop kaidto sa satong mga tugang nin sarong surat na hali daa sa world headquarters. Dahil sa surat na iyan, nagbilog  an nagkapirang tugang nin sarong suway asin independiyenteng organisasyon. An surat garo baga totoo man. Pero dai diyan nagpadaya an maimbod na mga tugang. Narealisar ninda na an mensahe kan surat dai kauyon kan mga itinukdo sa sainda. Sa ngunyan, ginagamit kun minsan kan mga kaiwal kan katotoohan an modernong teknolohiya sa paghihinguwang magkariribaraw asin magkabaranga kita. Imbes na “tulos mawaran kan [satong] tamang pag-iisip,” mapoprotektaran ta an satong sadiri paagi sa pag-isip-isip kun baga an mga nadadangog o nababasa ta kauyon kan mga katotoohan na satuya nang nanudan.​—2 Tes. 2:2; 1 Juan 4:1.

16. Uyon sa Roma 16:​17, 18, ano an dapat tang gibuhon kun may mga minalihis sa katotoohan?

¹⁶ Magdanay na nagkakasararo kaiba kan mga maimbod ki Jehova. Gusto nin Diyos na magin sararo kita sa satong pagsamba. Magdadanay kitang nagkakasararo sagkod na nangangapot kita sa katotoohan. An siisay man na minalihis sa katotoohan nagkakawsa nin pagkabaranga sa laog kan kongregasyon, kaya pinapatanidan kita nin Diyos na “likayan . . . sinda.” Huling kun dai, puwedeng kita mismo maianod parayo sa katotoohan.​—Basahon an Roma 16:​17, 18.

17. Anong mga pakinabang an makakamtan ta sa pagmidbid sa katotoohan asin pangangapot nin higot diyan?

¹⁷ Pag minimidbid ta an katotoohan asin nangangapot nin higot diyan, magdadanay kitang ligtas asin makusog sa espirituwal. (Efe. 4:​15, 16) Mapoprotektaran kita laban sa salang mga katukduan asin propaganda ni Satanas, asin magdadanay kitang ligtas sa pangangataman ni Jehova sa panahon nin dakulang kasakitan. Padagos na mangapot nin higot sa kun ano an totoo, “asin an Diyos nin katuninungan masasakaibanan nindo.”​—Fil. 4:​8, 9.