Mayong sinasabi an Bibliya. Pero may sinasabi iyan na interesanteng mga detalye na posibleng nagin dahilan kaya nagdesisyon sindang dai nguna magbalik sa Nazaret.

Sinabi nin sarong anghel ki Maria na mabados si Maria asin mangangaki. Kan ipaabot kan anghel an mensaheng ini, si Maria asin Jose nakaistar sa Nazaret, an ginikanan na banwaan ni Jose sa Galilea. (Luc. 1:26-31; 2:4) Pag-abot nin panahon, kan magbalik sinda haling Ehipto, nagpuli na sinda sa Nazaret. Duman nagdakula si Jesus asin nagin sarong Nazareno. (Mat. 2:19-23) Kaya naiisip ta an Nazaret pag nasasambit an pangaran ni Jesus, Jose, asin Maria.

Igwa nin paryente si Maria na an pangaran Elizabeth, na nakaistar sa Juda. Si Elizabeth an agom kan saserdoteng si Zacarias asin an ina ni Juan Bautista. (Luc. 1:5, 9, 13, 36) Binisita ni Maria si Elizabeth asin tulong bulan ining nag-istar sa sainda sa Juda. Dangan nagbalik si Maria sa Nazaret. (Luc. 1:39, 40, 56) Kaya medyo pamilyar si Maria sa lugar kan Juda.

Pag-abot nin panahon, nagkuyog si Jose sa pagbuot na “magparehistro.” Kaya nagbaklay si Jose haling Nazaret pa-Betlehem, na iyo an “siyudad ni David” asin an iprinopesiyang lugar kun sain mamumundag an Mesiyas. (Luc. 2:3, 4; 1 Sam. 17:15; 20:6; Mik. 5:2) Kan ipangaki duman ni Maria si Jesus, dai pig-isip ni Jose na pabaklayon nin halawig si Maria pabalik sa Nazaret mantang igwa ini nin bagong mamundag na umboy. Nagdanay sinda sa Betlehem, na mga siyam na kilometro an rayo sa Jerusalem. Huli kaiyan, magigin kumbenyente sa sainda na darahon sa templo an saindang umboy asin gibuhon an pagdulot na hinahagad kan Katugunan.—Lev. 12:2, 6-8; Luc. 2:22-24.

Sinabi kaidto kan anghel nin Diyos ki Maria na aakuon kan aki niya “an trono ni David” asin ‘mamamahala ini bilang Hadi.’ Inisip daw ni Jose asin Maria na mahalaga na ipangaki si Jesus sa siyudad ni David? (Luc. 1:32, 33; 2:11, 17) Posibleng inisip ninda na sarong kadunungan kun madanay sinda duman asin halaton kun ano an sunod na ipapagibo sainda nin Diyos.

Dai ta aram kun gurano na sinda kahaloy sa Betlehem kan mag-abot an pirang astrologo. Pero kan panahon na idto, nakaistar an pamilya ninda sa sarong harong, asin an aki ninda bako nang umboy kundi saro nang “aki.” (Mat. 2:11) Minalataw na imbes na magbalik sa Nazaret, nag-istar sinda sa Betlehem sa halipot na panahon asin namuhay duman.

Ipinagbuot ni Herodes na gadanon “an gabos na aking lalaki sa Betlehem . . . puon dos anyos pababa.” (Mat. 2:16) Huling pinatanidan nin Diyos si Jose asin Maria manungod sa pagbuot na iyan, nagdulag sinda pasiring sa Ehipto kaiba si Jesus asin nagdanay duman sagkod na magadan si Herodes. Pagkatapos, dinara ni Jose an saiyang pamilya sa Nazaret. Taano ta dai sinda nagbalik sa Betlehem? Tanganing makalikay sa maringis na aki ni Herodes na si Arquelao na yaon sa Judea, asin tanganing sunudon an patanid sainda nin Diyos. Sa Nazaret, ligtas na mapapadakula ni Jose si Jesus bilang sarong tunay na parasamba nin Diyos.—Mat. 2:19-22; 13:55; Luc. 2:39, 52.

Minalataw na nagadan si Jose bago buksan ni Jesus an dalan para sa pagkamit nin buhay sa langit. Kaya si Jose bubuhayon liwat digdi sa daga. Dakul an may pagkakataon na mamidbid siya asin maaraman an dakul pang detalye kun taano ta nagdanay sinda ni Maria sa Betlehem pagkapangaki ki Jesus.