1. Uyon sa 1 Pedro 5:2, anong pribilehiyo igwa an mga elder?

 AN KRISTIYANONG mga elder pinagkatiwalaan na mangataman sa mahalagang marhay na mga karnero ni Jehova. Pinapahalagahan na marhay kan maimbod na mga lalaking ini an saindang pribilehiyo na paglingkudan an saindang mga tugang, asin hinihinguwa nindang marhay na magin “mga pastor na talagang [nagpapastor].” (Jer. 23:4; basahon an 1 Pedro 5:2.) Nagpapasalamat nanggad kita na magkaigwa nin arog kaiyan na mga lalaki sa satong mga kongregasyon!

2. Anong mga kadipisilan an puwedeng mapaatubang sa nagkapirang elder?

² Sa pag-asikaso sa saindang mga paninimbagan, napapaatubang an mga elder sa dakul na kadipisilan. Halimbawa, para maasikaso an sarong kongregasyon, dakul na trabaho an kaipuhan gibuhon. Si Tony, sarong elder sa Estados Unidos, kinaipuhan na makanuod na magin mas hababa an buot pag-abot sa kun gurano kadakul na trabaho an aakuon niya. Ipinaliwanag niya: “Sa pagpupuon kan COVID-19 na pandemya, nag-ako ako nin nag-ako nin dagdag na gibuhon sa pag-organisar nin mga pagtiripon asin ministeryo. Pero gurano man kadakul kan hinihinguwa kong magibo, pirming dakul pa man giraray an kaipuhan pang gibuhon. Dai nahaloy, mayo na akong panahon para sa pagbasa nin Bibliya, personal na pag-adal, asin pagpamibi.” Si Ilir, sarong elder sa Kosovo, napaatubang man sa ibang kadipisilan. Kan yaon siya sa lugar na may giyera, nasakitan siyang sunudon an mga instruksiyon kan organisasyon. Sinabi niya: “Nabalo an sakuyang kusog nin buot kan alukan ako kan sangang opisina nin asignasyon na tabangan an mga tugang sa sarong delikadong lugar. Natakot ako, saka garo baga bako iyan praktikal.” Si Tim, sarong misyonero sa Asia, nasakitan na gibuhon dawa an mga rutina niya sa aroaldaw. Sinabi niya: “Kun minsan, pagmati ko pagalon na ako.” Ano an makakatabang sa mga elder na napapaatubang sa arog kaiyan na mga kadipisilan?

3. Paano makikinabang an gabos sa pagkonsiderar sa halimbawa ni Hukom Gideon?

 ³ An mga elder puwedeng makanuod sa halimbawa ni Hukom Gideon. (Heb. 6:12; 11:32) Saro siyang paraprotektar saka pastor kan banwaan nin Diyos. (Huk. 2:16; 1 Cron. 17:6) Arog ni Gideon, ninombrahan an mga elder para mangataman sa banwaan nin Diyos sa masakiton na panahon na ini. (Gibo 20:28; 2 Tim. 3:1) Puwede kitang makanuod ki Gideon sa saiyang kababaan nin buot, kapakumbabaan, asin pagigin masinunod. Nabalo an saiyang pakatagal mantang ginigibo niya an saiyang mga asignasyon. Elder man kita o bako, mapapatalubo ta an satong pag-apresyar sa paglilingkod kan satong mga elder. Puwede tang suportaran an mahihigos na espirituwal na mga lalaking ini.—Heb. 13:17.

4. Paano si Gideon nagpahiling nin kababaan nin buot asin kapakumbabaan?

⁴ Si Gideon sarong tawong hababa an buot saka mapakumbaba. b Kan sabihon kan anghel ki Gideon na pinili siya para iligtas an Israel sa makapangyarihan na mga Midianita, nagsimbag an mapakumbabang lalaking iyan: “An angkan ko an pinakamaluya sa tribo ni Manases, asin ako an pinakahamak sa pamilya kan sakuyang ama.” (Huk. 6:15) Pagmati niya bako siyang kuwalipikado para sa asignasyon na iyan, pero mas bisto siya ni Jehova. Sa tabang ni Jehova, mapangganang nagibo ni Gideon an saiyang asignasyon.

5. Paano puwedeng mabalo an kababaan nin buot asin kapakumbabaan nin sarong tawo?

⁵ Hinihinguwang marhay kan mga elder na maipahiling an kababaan nin buot asin kapakumbabaan sa gabos na bagay. (Mik. 6:8; Gibo 20:18, 19) Dai ninda ipinaghahambog an saindang mga abilidad o mga naginibuhan; ni iniisip man na mayo sindang halaga huli sa saindang mga pagkukulang o mga kaluyahan. Minsan siring, puwedeng mabalo sa bagay na iyan an sarong elder. Halimbawa, puwedeng mag-ako siya nin dakul na asignasyon pero sa huri nasasakitan na siya na magibo iyan gabos. O tibaad kritikaron siya sa pagkagibo niya kan sarong asignasyon o umawon siya sa kun paano niya ginibo an saro pang asignasyon. Ano an manunudan kan mga elder ki Gideon na makakatabang sa sainda sa arog kaiyan na mga sitwasyon?

6. Ano an manunudan kan mga elder ki Gideon manungod sa kababaan nin buot? (Hilingon man an ritrato.)

⁶ Maghagad nin tabang. Aram kan sarong tawong hababa an buot an saiyang mga limitasyon.  Hababa an buot ni Gideon, andam siyang magpatabang sa iba. (Huk. 6:27, 35; 7:24) Arog man kaiyan an ginigibo nin madunong na mga elder. Si Tony, na sinambit kasubago, nagpaliwanag: “Huli sa nagin pagpatuod sa sako kan aki pa ako, nasanay akong magparaako nin trabaho na labi kisa sa kaya kong gibuhon. Kaya nagdesisyon akong iiba an temang kababaan nin buot sa samong pampamilyang pagsamba asin hinapot ko si agom kun ano an obserbasyon niya sa sako sa bagay na iyan. Rinepaso ko man sa jw.org an videong Sanayon, Pagkatiwalaan, Asin Gamiton an Iba, Arog kan Ginibo ni Jesus.” Pinunan ni Tony na pakiulayan an iba para tabangan siya sa saiyang mga gibuhon. An resulta? Sinabi ni Tony: “Naaasikaso an gibuhon sa kongregasyon, saka igwa ako nin mas dakul na panahon para pakusugon an espirituwalidad ko.”

7. Pag kinikritika, paano maaarog kan mga elder si Gideon? (Santiago 3:13)

⁷ Hinguwahon na magin kalmado pag kinikritika. Puwede man na mabalo an mga elder pag kinikritika sinda. Sa giraray, makakatabang an halimbawa ni Gideon. Siguradong aram niya an saiyang mga kaluyahan, kaya nagdanay siyang kalmado kan kritikaron siya kan mga Efraimita. (Huk. 8:1-3) Bakong anggot na suminimbag si Gideon. Nagpahiling siya nin kababaan nin pag-iisip paagi sa pagdangog sa saindang mga reklamo, asin mataktika niyang pinakalma an mainit na sitwasyon. Inaarog si Gideon kan madunong na mga elder paagi sa pagdangog na marhay asin pagigin kalmado pag kinikritika. (Basahon an Santiago 3:13.) Kaya nakakakontribwir sinda sa katuninungan kan kongregasyon.

8. Ano an dapat gibuhon kan nombradong mga lalaki pag inumaw sinda? Magtao nin halimbawa.

⁸ Itao ki Jehova an pag-umaw. Kan umawon si Gideon huli sa kapangganahan niya sa Midian, itinao niya an onra ki Jehova. (Huk. 8:22, 23) Paano puwedeng arugon si Gideon kan ninombrahan na mga lalaki? Dapat nindang itao ki Jehova an kaumawan sa mga nagibo ninda. (1 Cor. 4:6, 7) Halimbawa, kun komendaran an sarong elder huli sa abilidad niya sa pagtutukdo, puwede niyang darahon an atensiyon sa gikanan kan instruksiyon, an Tataramon nin Diyos, o sa pagsasanay na inaako ta hali sa organisasyon ni Jehova. Puwede man na pag-isipan kan mga elder kun baga an saindang paagi nin pagtutukdo nakakakua nin sobrang atensiyon sa saindang sadiri. Pag-isipan an eksperyensiya nin sarong elder na an pangaran Timothy. Kan bagong manombrahan, gustong-gusto ni Timothy na magtao nin pampublikong pahayag. Sinabi niya: “Nakakagibo ako nin detalyadong marhay na mga introduksiyon saka mga ilustrasyon. Sa parati, nauumaw ako huli kaiyan. Kaya dahil diyan, napapasakuya an atensiyon imbes na sa Bibliya o ki Jehova.” Sa huri, nahiling ni Timothy na kaipuhan niyang baguhon an paagi niya nin pagtutukdo tanganing malikayan niya na makakua nin sobrang atensiyon. (Tal. 27:21) Ano an nagin resulta? Ipinaliwanag niya: “Sinasabi sako kan mga tugang kun paano an pahayag ko nakatabang sainda na makayanan an sarong problema, matagalan an sarong pagbalo, o mas magin dayupot ki Jehova. Mas nauugma ako sa mga komentong iyan kisa sa mga pag-umaw na naaako ko dati.”

9. Paano nabalo an pagigin masinunod asin kusog nin buot ni Gideon? (Hilingon an ritrato sa cover.)

⁹ Pagkatapos na nombrahan si Gideon bilang hukom, nabalo an saiyang pagigin masinunod asin kusog nin buot. Tinawan siya nin delikadong asignasyon na gabaon an altar ni Baal na sadiri kan saiyang ama. (Huk. 6:25, 26) Paghaloy-haloy, pagkatapos na magtipon nin sarong hukbo, duwang beses na ininstruksiyunan si Gideon na bawasan an bilang kaiyan. (Huk. 7:2-7) Panghuri, sinabihan siya na atakihon an kampo kan kalaban sa kamatangaan nin banggi.—Huk. 7:9-11.

10. Paano puwedeng mabalo an pagigin masinunod kan sarong elder?

¹⁰ An mga elder dapat na magin “andam na  magsunod.” (Sant. 3:17) An masinunod na elder nagsusunod tulos sa sinasabi kan Kasuratan asin sa instruksiyon kan organisasyon nin Diyos. Paagi kaini, nagpapahiling siya nin marahay na halimbawa sa iba. Pero, puwede pa man giraray mabalo an saiyang pagigin masinunod. Halimbawa, huli sa kadakul na instruksiyon o sa biglang mga pagbabago kaiyan, tibaad masakitan siya na sunudon o iaplikar iyan. Sa nagkapirang kamugtakan, tibaad maisip niya kun baga praktikal o madunong an sarong instruksiyon. O tibaad pakiulayan siya na gibuhon an sarong asignasyon na puwedeng magsapeligro kan saiyang katalingkasan. Paano maaarog kan mga elder an pagigin masinunod ni Gideon sa arog kaiyan na mga kamugtakan?

11. Ano an makakatabang sa mga elder para magin masinunod?

¹¹ Magdangog na marhay sa instruksiyon asin sunudon iyan. Sinabi nin Diyos ki Gideon kun paano gagabaon an altar kan saiyang ama, kun sain itutugdok an bagong altar ni Jehova, asin kun anong hayop an iaatang. Dai ni Gideon pigkuwestiyon an instruksiyon—sinunod niya tulos iyan. Sa ngunyan, nakakaresibi an mga elder nin mga instruksiyon hali sa organisasyon ni Jehova paagi sa mga surat, mga paisi, asin mga giya may koneksiyon sa satong espirituwal asin pisikal na kapakanan. Namumutan ta an satong mga elder huling maimbod nindang sinusunod an teokratikong mga instruksiyon. Huli kaiyan, nakikinabang an bilog na kongregasyon.—Sal. 119:112.

12. Paano maiaaplikar kan mga elder an Hebreo 13:17 kun may pagliliwat sa teokratikong mga instruksiyon?

¹² Magin andam na sumunod sa mga pagliliwat. Girumdumon na sa pagbuot ni Jehova, binawasan ni Gideon an saiyang hukbo nin labi sa 99 porsiyento. (Huk. 7:8) Tibaad naisip niya: ‘Kaipuhan daw talaga an pagliliwat na ini? Maaser daw ini?’ Minsan siring, nagsunod pa man giraray si Gideon. An mga elder ngunyan inaarog si Gideon paagi sa pag-implementar kan irinerekomendar na mga pagliliwat sa teokratikong mga instruksiyon. (Basahon an Hebreo 13:17.) Bilang halimbawa, kan 2014 binago kan Namamahalang Grupo an paagi nin pagkua nin pondo para sa mga proyekto nin pagtugdok nin mga Kingdom Hall asin Assembly Hall. (2 Cor. 8:12-14) Dai na kaipuhan kan mga kongregasyon na magbayad nin loan. Imbes, pinagsasararo an mga kontribusyon kan mga kongregasyon sa bilog na kinaban para magamit sa pagtugdok nin teokratikong mga pasilidad sain man iyan kaipuhan, ano man an kakayahan nin sarong kongregasyon na magtao nin kontribusyon. Kan maaraman ni Jose an pagliliwat, nagduda siya kun baga magigin epektibo ini kaya naisip niya: ‘Mayong maitutugdok kaiyan ni sarong Kingdom Hall. Dai iyan maaser sa lugar mi.’ Ano an nakatabang ki Jose para suportaran an instruksiyon? Sinabi niya: “An mga tataramon sa Talinhaga 3:5, 6 nagpagirumdom sako na magtiwala ki Jehova. Asin marahayon an mga nagin resulta! Dai lang kita nakapagtugdok nin mas dakul na Kingdom Hall kundi nanudan ta man kun paano magkontribwir sa manlain-lain na paagi tanganing magkaigwa nin pagpapantay-pantay.”

13. (a) Sa ano kumbinsido si Gideon? (b) Paano si Gideon maaarog kan mga elder? (Hilingon man an ritrato.)

 ¹³ Kusog nin buot na gibuhon an kabutan ni Jehova. Sinunod ni Gideon si Jehova dawa natatakot siya asin delikado an saiyang asignasyon. (Huk. 9:17) Pagkatapos na asiguraron ni Jehova, kumbinsidong marhay si Gideon na tatabangan siya nin Diyos mantang pinoprotektaran niya an banwaan nin Diyos. Inaarog si Gideon kan mga elder na nakaistar sa mga lugar na ipinagbabawal an satong gibuhon. Kusog-buot sindang nanginginot sa mga pagtiripon asin sa ministeryo sa ibong kan huma na arestaron, interogaron, mawaran nin trabaho, o na magkaigwa nin kadahasan. c Sa panahon nin dakulang kasakitan, kakaipuhanon kan mga elder nin kusog nin buot para sumunod sa mga instruksiyon na mareresibi ninda—dawa may peligro man iyan na kaiba. An mga instruksiyon puwedeng may koneksiyon sa pagpaabot nin arog granisong mensahe asin kun paano makakaligtas sa pag-atake kan Gog nin Magog.—Ezek. 38:18; Kap. 16:21.

14. Paano nabalo an pakatagal ni Gideon?

¹⁴ An asignasyon ni Gideon bilang hukom nangangaipo nin grabeng pisikal na kusog. Kan magdulag an mga Midianita sa ralaban sa kamatangaan nin banggi, linapag sinda ni Gideon puon sa Kababan nin Jezreel sagkod sa Salog nin Jordan, na posibleng napapalibutan nin mahibog na kapalungpungan. (Huk. 7:22) Puminundo na daw si Gideon sa Jordan? Dai! Dawa pagal, siya saka an 300 na lalaking kaibanan niya nagbalyo sa salog asin nagpadagos sa paglapag. Sa katapos-tapusi, inabutan ninda an mga Midianita asin dinaog an mga ini.—Huk. 8:4-12.

15. Nuarin puwedeng mabalo an pakatagal nin sarong elder?

¹⁵ An sarong elder puwedeng makamati kun minsan nin pisikal, mental, o emosyonal na kapagalan sa pag-asikaso sa kongregasyon asin sa saiyang pamilya. Sa arog kaiyan na mga kamugtakan, paano maaarog kan mga elder si Gideon?

16-17. Ano an nakatabang ki Gideon na magtagal, asin sa ano makakapagtiwala an mga elder? (Isaias 40:28-31) (Hilingon man an ritrato.)

¹⁶ Magtiwala na papakusugon ka ni Jehova. Nagtiwala si Gideon na tatawan siya ni Jehova nin  kusog, asin ginibo nanggad iyan ni Jehova. (Huk. 6:14, 34) Sarong beses, linapag ni Gideon asin kan kaibanan niyang mga lalaki an duwang Midianitang hadi; nagdadalagan lang sinda mantang an mga hadi minalataw na nakasakay sa mga kamelyo. (Huk. 8:12, 21) Alagad, sa tabang nin Diyos, nanggana an determinadong mga Israelita. Makakapagtiwala man an mga elder ki Jehova, an saro na “dai . . . nuarin man napapagal o nangluluya.” Tatawan niya sinda nin kusog pag kaipuhan ninda iyan.—Basahon an Isaias 40:28-31.

¹⁷ Pag-isipan an eksperyensiya ni Matthew, sarong miyembro kan Hospital Liaison Committee. Ano an nakatabang saiya na magtagal? Sinabi ni Matthew: “Naeksperyensiyahan ko mismo an sinasabi kan Filipos 4:13. Sa dakul na pagkakataon na napagal ako asin pagmati ko garo baga dai ko na kaya, udok akong namimibi na nakikimahirak sa Diyos na tawan niya ako nin pisikal asin mental na kusog na kaipuhan ko para matabangan ko an mga tugang. Sa mga pagkakataon na iyan, namati ko na pinapakusog ako kan espiritu ni Jehova, asin nakatabang iyan sako na magtagal.” Arog ni Gideon, an satong dedikadong mga elder puwedeng mapaatubang sa mga kadipisilan mantang daing kaimutan na pinapasturan an aripumpon. Siyempre, kaipuhan nindang akuon na igwa sinda nin pisikal asin emosyonal na mga limitasyon asin na dai ninda pirming magigibo an gabos na gusto nindang gibuhon. Minsan siring, makakapagtiwala sinda na dadangugon ni Jehova an saindang mga pakiulay para sa tabang asin na papakusugon niya sinda para makatagal.—Sal. 116:1; Fil. 2:13.

18. Bilang repaso, paano maaarog kan mga elder si Gideon?

¹⁸ Igwa nanggad nin napapanahon asin praktikal na mga leksiyon na manunudan an mga elder ki Gideon. Kaipuhan kan mga elder na magpahiling nin kababaan nin buot asin kapakumbabaan sa kun gurano kadakul na trabaho an aakuon ninda saka kun ano an dapat nindang gibuhon pag kinikritika o inuumaw sinda. Kaipuhan nindang magin masinunod asin magpahiling nin kusog nin buot lalo na mantang paparani na an katapusan kan sistemang ini nin mga bagay. Asin kaipuhan nindang magtiwala na ano man na kadipisilan an mapaatubang sa sainda, kaya sindang pakusugon nin Diyos. Tunay nanggad, inaapresyar ta an siring na mahihigos na pastor asin ‘padagos na pinapahalagahan an mga tugang na arog ninda.’—Fil. 2:29.