Dakul na parahayag an naggagamit nin JW Library^® tanganing mag-andam para sa mga pagtiripon, asin inaapresyar ninda an pagigin pasil na makua kan kada pag-aadalan na artikulo sa Torrengbantayan. Pero an pag-aadalan na edisyon kan An Torrengbantayan parating may kaibang sekondaryong mga artikulo na may espirituwal na kakanon. Paano mo mahahanap an mga artikulong ini para makinabang diyan, gamit an JW Library?

• Sa katapusan kan kada pag-aadalan na artikulo sa Torrengbantayan, igwa nin subtema na “Iba Pang Mababasa.” Sa irarom kan subtemang iyan, i-tap an link na “Iba pang artikulo sa isyung ini.” Hilingon an mga laog (table of contents), asin malinaw mong mahihiling diyan an mga artikulong pag-aadalan asin an mga numero kaiyan. I-tap an titulo kan sekondaryong artikulo na gusto mong basahon.

• Sa Home tab kan JW Library sa seksiyon na “What’s New,” i-download an kada bagong isyu kan An Torrengbantayan pag nagluwas iyan. Buksan an na-download na magasin asin hilingon an mga laog (table of contents) para masigurado na makikinabang ka sa gabos na artikulo.