1-2. Uyon sa Salmo 25:14, ano an dapat tang gibuhon kun gusto tang magkaigwa nin dayupot na pakikiamigo ki Jehova?

 SA HILING mo, anong mga kuwalidad daw an kaipuhan na marhay kun gusto mong mapagdanay an dayupot na pakikiamigo sa sarong tawo? Posibleng marhay na sasabihon mo na an marahay na mga mag-amigo dapat na namumutan asin sinusuportaran an lambang saro. Tibaad dai mo ibibilang an pagkatakot na sarong mahalagang kuwalidad para sa marahay na pakikiamigo. Minsan siring, arog kan sinasabi kan temang teksto para sa artikulong ini, an mga gustong magkaigwa nin dayupot na pakikiamigo ki Jehova dapat na “may pagkatakot” sa saiya.—Basahon an Salmo 25:14.

² Dawa pa gurano na kita kahaloy na naglilingkod ki Jehova, kaipuhan na pagdanayon niyato gabos an tamang pagkatakot sa saiya. Pero ano an buot sabihon nin pagkatakot sa Diyos? Paano kita magkakaigwa nin pagkatakot ki Jehova? Asin ano an manunudan ta sa katiwalang si Obadias, sa Halangkaw na Saserdoteng si Jehoiada, asin ki Hading Jehoas manungod sa pagkatakot sa Diyos?

3. Ipaliwanag kun ano an dahilan kaya nakakamati kita nin pagkatakot asin kun paano iyan puwedeng makaapektar sa sato.

³ Tibaad makamati kita nin pagkatakot kun sa hiling ta puwede kitang mapahamak. An arog kaining pagkatakot puwedeng magin kapaki-pakinabang asin makapahiro sa sato na gumibo nin madunong na mga desisyon. An pagkatakot na mahulog nagpupugol sa sato na maglakaw haranihon sa gilid nin ampas. An pagkatakot na malugadan puwedeng magpahiro sa sato na rumayo sa sarong peligrosong sitwasyon. An pagkatakot na maraot an satong pakikiamigo sa saro na namumutan ta nagpupugol sato sa pagtaram o paggibo nin sarong bagay na makakakulog sa saiya.

4. Gusto ni Satanas na magkaigwa kita nin anong klase nin pagkatakot ki Jehova?

⁴ Gusto ni Satanas na magkaigwa an mga tawo nin bakong tamang  pagkatakot ki Jehova. Ipinapalakop ni Satanas an ideyang arog kan ipinahayag ni Elifaz—na si Jehova pirming anggot saka gustong padusahan kita, asin imposible siyang mapaugma. (Job 4:18, 19) Gusto ni Satanas na magkaigwa kita nin grabeng takot ki Jehova sagkod na magpundo na kita sa paglilingkod sa Saiya. Tanganing malikayan an siod na iyan, kaipuhan niyatong magkaigwa nin tamang pagkatakot sa Diyos.

5. Ano an buot sabihon nin pagkatakot sa Diyos?

⁵ An saro na may tamang pagkatakot sa Diyos namumutan Siya asin habong gumibo nin ano man na puwedeng makaraot sa relasyon niya sa Saiya. Si Jesus igwa nin arog kaiyan na “diyosnon na pagkatakot.” (Heb. 5:7) Dai siya nakamati nin grabeng pagkatakot ki Jehova. (Isa. 11:2, 3) Imbes, nakamati siya nin hararom na pagkamuot para sa saiya asin gusto niyang sunudon siya. (Juan 14:21, 31) Arog ni Jesus, nakakamati man kita nin hararom na paggalang ki Jehova huling mamumuton Siya, madunong, may hustisya, asin makapangyarihan. Aram ta man na namumutan kitang marhay ni Jehova asin interesado siya sa kun ano an reaksiyon ta pag tinutukduan niya kita. Puwede tang makulgan si Jehova, o puwede tang mapaugma an saiyang puso.—Sal. 78:41; Tal. 27:11.

6. Ano an sarong paagi para magkaigwa kita nin pagkatakot sa Diyos? (Salmo 34:11)

⁶ Dai kita namundag na may pagkatakot na ki Jehova; kaipuhan na patalubuon niyato iyan. (Basahon an Salmo 34:11.) An sarong paagi na magigibo ta iyan iyo an pag-adal sa mga linalang. Mantang mas nahihiling ta an kadunungan nin Diyos, an kapangyarihan niya, asin an hararom na pagkamuot niya sa sato na ihinahayag kan “mga bagay na linalang,” mas nagrararom man an satong paggalang asin pagkamuot sa saiya. (Roma 1:20) Sarong sister na an pangaran Adrienne an nagsabi, “Napapangalas ako sa kadunungan ni Jehova na nahihiling sa mga linalang, asin natatabangan ako kaiyan na marealisar na aram niya an pinakamarahay para sako.” Huli sa paghurop-hurop niya manungod digdi, nasabi niya, “Ta’no ta gugustuhon kong gumibo nin ano man na makakaraot kan relasyon ko ki Jehova, an Gikanan kan sakuyang buhay?” Puwede ka daw na magtao nin panahon ngunyan na semana para pag-isipan an sarong bagay na linalang ni Jehova? An paggibo kaiyan mapararom kan saimong paggalang asin pagkamuot ki Jehova.—Sal. 111:2, 3.

7. Paano makakatabang sa sato an pamibi para mapatalubo ta an tamang pagkatakot ki Jehova?

⁷ An saro pang paagi para mapatalubo ta an satong pagkatakot sa Diyos iyo an regular na pagpamibi. Mantang mas namimibi kita, mas nagigin totoo si Jehova para sa sato. Sa lambang pagkakataon na naghahagad kita sa saiya nin kusog para matagalan an sarong pagbalo, naipapagirumdom kaiyan sa sato an saiyang makangangalas na kapangyarihan. Pag pinapasalamatan ta siya sa pagtao kan saiyang Aki, nagigirumduman ta an pagkamuot ni Jehova sa sato. Asin pag nakikimahirak kita ki Jehova para sa saiyang tabang sa sarong problema, naitatadom kaiyan sa satong puso kun gurano siya kadunong. An arog kaiyan na mga pamibi mas nagpapararom kan satong paggalang ki Jehova. Asin mas pinapakusog kaiyan an satong determinasyon na likayan na gumibo nin ano man na makakaraot kan satong pakikiamigo sa saiya.

8. Ano an puwede tang gibuhon para mapagdanay an satong pagkatakot sa Diyos?

⁸ Mapapagdanay ta an satong pagkatakot sa Diyos paagi sa pag-adal kan Bibliya na an katuyuhan iyo na makanuod sa marahay na mga halimbawa asin sa maraot na mga halimbawa na yaon diyan. Pag-ulayan ta an duwang maimbod na lingkod ni Jehova—an katiwala sa palasyo ni Hading Ahab na si Obadias asin an Halangkaw na Saserdoteng si Jehoiada. Dangan hihilingon niyato kun ano an manunudan ta ki Hading Jehoas kan Juda, na kan inot sarong marahay  na hadi pero pag-abot nin panahon binayaan si Jehova.

9. Paano nakatabang ki Obadias an pagkatakot ki Jehova? (1 Hadi 18:3, 12)

⁹ Ipinapamidbid sa sato kan Bibliya si Obadias b paagi sa mga tataramon na ini: “May dakulang pagkatakot ki Jehova si Obadias.” (Basahon an 1 Hadi 18:3, 12.) Paano nakatabang ki Obadias an tamang pagkatakot na ini? An sarong paagi iyo na nagin onesto asin mapagkakatiwalaan siya dahil diyan; huli kaini, ibinugtak siya kan hadi bilang tagapamahala sa palasyo kan hadi. (Ikumparar an Nehemias 7:2.) An diyosnon na pagkatakot ni Obadias nagtao man saiya nin ekstraordinaryong kusog nin buot—sarong kuwalidad na kinaipuhan niya nanggad. Nabuhay siya durante kan pamamahala kan maraot na hading si Ahab, na “mas maraot pa sa paghiling ni Jehova . . . kisa sa gabos [na hadi] na nainot sa saiya.” (1 Ha. 16:30) Siring man, an agom ni Ahab na nagsasamba ki Baal, si Jezebel, nauungis na marhay ki Jehova kaya pinurbaran kaining paraon an tunay na pagsamba sa kahadian sa norte. Ginadan niya pa ngani an dakul sa mga propeta nin Diyos. (1 Ha. 18:4) Daing duda, sinamba ni Obadias si Jehova sa sarong masakit na panahon.

10. Paano si Obadias nagpahiling nin ekstraordinaryong kusog nin buot?

¹⁰ Paano si Obadias nagpahiling nin ekstraordinaryong kusog nin buot? Kan pigpapahanap ni Jezebel an mga propeta kan Diyos para ipagadan sinda, kinua ni Obadias an 100 sa sainda asin itinago sinda na “tig-50 sa kada kuweba, asin padagos [niya] sindang dinarahan nin tinapay saka tubig.” (1 Ha. 18:13, 14) Kun naaraman ni Jezebel an ginibo kan makusog an buot na si Obadias, siguradong ipapagadan niya ini. Siyempre, tawo man si Obadias, asin habo niyang magadan. Pero mas namumutan ni Obadias si Jehova asin idtong mga naglilingkod sa Saiya kisa sa saiyang buhay.

11. Paano inaarog kan mga lingkod ni Jehova sa modernong panahon an halimbawa ni Obadias? (Hilingon man an ritrato.)

¹¹ Dakul sa mga lingkod ni Jehova ngunyan an nakaistar sa mga lugar kun sain ipinagbabawal an satong gibuhon. Nagpapahiling sinda nin maninigong paggalang sa sekular na mga awtoridad,  pero arog ni Obadias, an namumutan na mga tugang na ini itinatao ki Jehova an para sa Saiya—an eksklusibong debosyon. (Mat. 22:21) Ipinapahiling ninda an saindang pagkatakot sa Diyos paagi sa pagsunod sa saiya imbes na sa mga tawo. (Gibo 5:29) Ginigibo ninda ini paagi sa padagos na pagbalangibog kan maugmang bareta asin pagtitiripon nin pasekreto. (Mat. 10:16, 28) Sinisigurado nindang makakakua an saindang mga tugang kan kaipuhan na marhay na espirituwal na kakanon. Pag-isipan an halimbawa ni Henri, na nakaistar sa sarong nasyon sa Africa kun sain ipinagbawal an satong gibuhon sa laog nin pirang panahon. Durante kan pagbabawal, nagboluntaryo si Henri na magdistribwir nin espirituwal na pagkakan sa saiyang mga kapwa Saksi. Isinurat niya: “Masusupgon akong tawo. Kaya kumbinsido ako na an hararom na paggalang ko ki Jehova an nagtao sako nin kusog nin buot na kaipuhan ko.” Naiimahinar mo daw an saimong sadiri na makusog an buot arog ni Henri? Magigibo mo iyan kun papatalubuon mo an tamang pagkatakot sa Diyos.

12. Paano ipinahiling kan Halangkaw na Saserdoteng si Jehoiada asin kan saiyang agom an pambihirang kaimbudan ninda ki Jehova?

¹² An Halangkaw na Saserdoteng si Jehoiada may takot ki Jehova, asin an pagkatakot na iyan nagpahiro sa saiya na magin maimbod asin suportaran an tunay na pagsamba. Nagin risang-risa ini kan an aking babayi ni Jezebel, si Atalia, agawon an trono sa Juda. May dahilan an mga tawo para matakot ki Atalia. Dai siyang hirak asin paslong marhay sa kapangyarihan kaya pinurbaran niyang garadanon an gabos na tagapagmana kan trono kan hadi—an saiya mismong mga makuapo! (2 Cron. 22:10, 11) An saro sa mga makuapong idto—si Jehoas—nakasalbar huling ilinigtas siya kan agom ni Jehoiada na si Jehosabet. Itinago nindang mag-agom an aki asin inataman ini. Paagi kaini nakatabang si Jehoiada asin Jehosabet na maingatan an linya nin mga hadi na gikan ki David. Maimbod si Jehoiada ki Jehova asin dai siya nagtakig sa takot ki Atalia.—Tal. 29:25.

13. Kan siyete anyos na si Jehoas, paano ipinahiling giraray ni Jehoiada an saiyang kaimbudan?

¹³ Kan siyete anyos na si Jehoas, ipinahiling giraray ni Jehoiada an kaimbudan niya ki Jehova. Naggibo siya nin sarong plano. Kun magigin mapanggana iyan, magigin hadi si Jehoas, an lehitimong tagapagmana kan trono ni David. Pero, kun dai magin mapanggana an plano, siguradong gagadanon si Jehoiada. Sa tabang ni Jehova, nagin mapanggana an plano. Si Jehoiada, na suportado kan mga pamayo asin kan mga Levita, ginibong hadi si Jehoas asin ipinagadan si Atalia. (2 Cron. 23:1-5, 11, 12, 15; 24:1) Pagkatapos “naggibo si Jehoiada nin tipan sa pag-ultanan ni Jehova asin kan hadi saka kan banwaan, na padagos sindang magigin banwaan ni Jehova.” (2 Ha. 11:17) “Ipinuwesto man [ni Jehoiada] sa mga trangkahan kan harong ni Jehova an mga bantay sa trangkahan, tanganing mayong makalaog na siisay man na bakong malinig sa ano man na dahilan.”—2 Cron. 23:19.

14. Sa anong mga paagi tinawan nin onra si Jehoiada huli sa pagtao niyang onra ki Jehova?

¹⁴ Bago kaiyan, sinabi ni Jehova: “An mga nagtataong onra sa sako tatawan ko nin onra.” Iyo, binendisyunan niya si Jehoiada. (1 Sam. 2:30) Halimbawa, ipinasurat niya an marahay na mga ginibo kan halangkaw na saserdote para sa pagtukdo sa sato. (Roma 15:4) Asin kan magadan si Jehoiada, tinawan siya nin espesyal na onra na ilubong “sa Siyudad ni David sa kaibanan kan mga hadi, huling guminibo siya nin marahay sa Israel para sa tunay na Diyos asin para sa Saiyang harong.”—2 Cron. 24:15, 16.

15. Ano an manunudan ta sa pagkasaysay manungod ki Jehoiada? (Hilingon man an ritrato.)

¹⁵ An pagkasaysay manungod ki Jehoiada  makakatabang sa sato gabos na patalubuon an pagkatakot sa Diyos. An Kristiyanong mga paraataman puwedeng maarog si Jehoiada paagi sa pagdadanay na alerto asin paagi sa maimbod na pagprotektar sa aripumpon nin Diyos. (Gibo 20:28) An mga may edad na makakanuod ki Jehoiada na pag may takot sinda ki Jehova asin magdadanay na maimbod, puwede Niya sindang gamiton para utubon an Saiyang katuyuhan. Dai niya sinda binabaliwala. An mga hoben puwedeng pag-isipan kun paano ni Jehova trinatar si Jehoiada asin arugon Siya paagi sa pagtratar nin may dignidad asin respeto sa mga may edad na, lalo na duman sa mga may halawig nang rekord nin maimbod na paglilingkod. (Tal. 16:31) Panghuri, makakanuod kita gabos sa mga pamayo asin mga Levita na nagsuportar ki Jehoiada. Lugod na maimbod tang suportaran an “mga nanginginot” paagi sa pagsunod sa sainda.—Heb. 13:17.

16. Ano an nagpapahiling na maluya si Hading Jehoas?

¹⁶ Si Hading Jehoas nakinabang sa marahay na impluwensiya ni Jehoiada. (2 Ha. 12:2) Bilang resulta, minawot kan hoben na hading ini na paugmahon si Jehova. Pero pagkagadan ni Jehoiada, nagdangog si Jehoas sa mga apostatang pamayo. Ano an resulta? Siya asin an saiyang mga nasasakupan “nagpuon [na] maglingkod sa mga sagradong poste asin sa mga idolo.” (2 Cron. 24:4, 17, 18) Dawa nakulgan na marhay si Jehova, “padagos siyang nagsugo para sa sainda nin mga propeta tanganing pabalikon sinda . . . , pero habo nindang magdangog.” Dai man lamang sinda nagdangog dawa sa aki ni Jehoiada na si Zacarias, na bako lang sarong propeta asin saserdote ni Jehova kundi pinsan man ni Jehoas. Sa katunayan, ipinagadan pa ngani ni Hading Jehoas si Zacarias  dawa ilinigtas kan pamilya ni Zacarias an saiyang buhay kaidto.—2 Cron. 22:11; 24:19-22.

17. Ano an nangyari ki Jehoas?

¹⁷ Dai ni Jehoas pinagdanay an tamang pagkatakot ki Jehova, asin bakong marahay an nagin resulta. Sinabi ni Jehova: “An mga naghahamak sa sako hahamakon ko.” (1 Sam. 2:30) Pag-abot nin panahon, sarong sadit na hukbong Siriano an duminaog sa “dakulaon na hukbo” ni Jehoas asin nagkaigwa siya nin “grabeng tama.” Pagkahali kan mga Siriano, inasasinar si Jehoas kan saiya mismong mga lingkod huling ginadan niya si Zacarias. An maraot na hading iyan dai man lamang ibinilang na maninigo na ilubong “sa lubungan kan mga hadi.”—2 Cron. 24:23-25; hilingon an study note na “anak ni Barakias” sa Mateo 23:35.

18. Uyon sa Jeremias 17:7, 8, paano ta malilikayan na magin arog ni Jehoas?

¹⁸ Ano an manunudan ta sa halimbawa ni Jehoas? Garo siya sarong kahoy na hababaw an pagkakagamot asin nakadepende sa suporta nin sarong pantukod. Kan an pantukod—si Jehoiada—mawara asin mag-abot an mga duros kan apostasya, natumba si Jehoas. Mapuwersa kaining iniilustrar na an pagkatakot ta sa Diyos dai dapat na nakadepende sana sa marahay na impluwensiya kan satong mga kapwa Kristiyano, pati kan satong mga kapamilya. Tanganing magdanay na makusog sa espirituwal, dapat na pakusugon ta an sato mismong debosyon asin pagkatakot sa Diyos paagi sa regular na pag-adal, paghurop-hurop, asin pagpamibi.—Basahon an Jeremias 17:7, 8; Col. 2:6, 7.

19. Ano an hinahagad sato ni Jehova?

¹⁹ Bako man talagang dakulon an hinahagad sato ni Jehova. An hinahagad ni Jehova sato mababasa sa Eclesiastes 12:13, na an sabi: “Magkaigwa ka nin pagkatakot sa tunay na Diyos asin utubon mo an saiyang mga tugon, huling iyo ini an bilog na obligasyon nin tawo.” Kun may pagkatakot kita sa Diyos, maaatubang ta an mga pagbalo sa maabot na panahon asin makakatindog kitang marigon arog ni Obadias asin Jehoiada. Mayo nin makakaraot sa satong pakikiamigo ki Jehova.