1. Ano an nakakatabang sa mga lingkod ni Jehova na padagos na magsamba sa saiya sa ibong kan mga problemang inaatubang ninda?

 “DELIKADO asin masakit na mga panahon”—iyan an pagkaladawan kan Bibliya sa panahon na kinabubuhayan ta. (2 Tim. 3:1) Apuwera sa mga kadipisilan na inaatubang kan gabos na tawo sa sistemang ini nin mga bagay, an mga lingkod ni Jehova napapaatubang sa mga pagkontra asin persekusyon. Ano an nakakatabang sa sato na padagos na magsamba ki Jehova sa ibong kan mga problemang ini? An sarong panginot na dahilan iyo na namidbid ta si Jehova bilang “an buhay na Diyos.”​—Jer. 10:10; 2 Tim. 1:12.

2. Sa anong paagi si Jehova iyo an buhay na Diyos?

² Si Jehova sarong tunay na Persona na nagtatabang sa sato pag napapaatubang kita sa mga pagbalo asin naghahanap nin mga oportunidad na tabangan kita. (2 Cron. 16:9; Sal. 23:4) Kun mamansayon ta siya bilang an buhay na Diyos, matatabangan kita kaiyan na mapangganang maatubang an ano man na pagbalo na minaabot sa sato. Pag-ulayan ta kun paano iyan nagin totoo ki Hading David.

3. Ano an buot sabihon ni David kan sabihon niyang “buhay si Jehova”?

³ Midbid ni David si Jehova asin nagsarig siya sa Saiya. Kan piglalapag kan saiyang mga kaiwal, kaiba na diyan si Hading Saul, namibi si David ki Jehova para sa tabang. (Sal. 18:6) Pagkatapos na simbagon nin Diyos an saiyang pamibi asin iligtas siya, sinabi ni David: “Buhay si Jehova!” (Sal. 18:46) Dai lang basta buot sabihon digdi ni David na nag-eeksister an Diyos. Sinambit nin sarong reperensiya na paagi sa mga tataramon na iyan ipinapahayag ni David an saiyang kumpiyansa ki Jehova “bilang buhay na Diyos na pirming minahiro para sa saiyang banwaan.” Iyo, napatunayan ni David base sa mga eksperyensiya niya na buhay an saiyang Diyos, asin an kumbiksiyon na iyan nakapakusog giraray kan saiyang determinasyon na paglingkudan asin umawon si Jehova.​—Sal. 18:​28, 29, 49.

4. Paano kita nakikinabang kun minamansay niyato si Jehova bilang an buhay na Diyos?

 ⁴ An pagigin kumbinsido niyato na si Jehova an buhay na Diyos makakatabang sa sato na paglingkudan siya nin may kaigutan. Magkakaigwa kita kan kusog na makayanan an mga pagbalo asin kan motibasyon na padagos na magmaigot sa paglilingkod sa saiya. Magigin determinado man kitang magdanay na harani ki Jehova.

PAPAKUSUGON KA KAN BUHAY NA DIYOS

5. Ano an makakatabang sa sato na atubangon nin may kumpiyansa an mga pagbalo? (Filipos 4:13)

⁵ Matatagalan ta an ano man na pagbalo, dakula man o sadit, kun gigirumdumon niyato na buhay si Jehova asin na pirmi siyang yaon para tabangan kita. Tutal, ano man na problemang inaatubang ta, kayang-kaya iyan ni Jehova. Siya an Makakamhan sa Gabos, asin tatawan niya kita kan puwersa para makatagal. (Basahon an Filipos 4:13.) Kaya may makusog na dahilan kita na atubangon nin may kumpiyansa an mga pagbalo. Kun tinatabangan ngani kita ni Jehova sa saradit na mga pagbalo, makakasigurado kitang tatabangan niya man kita sa darakulang mga pagbalo.

6. Anong mga pangyayari sa buhay ni David kan siya hoben pa an lalong nakapakusog sa kumpiyansa niya ki Jehova?

⁶ Pag-isipan an duwang pangyayari sa buhay ni David na lalong nakapakusog sa kumpiyansa niya ki Jehova. Kan si David sarong hoben na pastor, sarong oso asin sarong leon an parehong nagtabag o naglalay nin tigsarong karnero kan saiyang ama. Sa duwang pagkakataon na iyan, kusog-buot na linapag ni David an mga hayop na iyan asin ilinigtas an mga karnero. Alagad dai niya inisip na nagibo niya iyan sa sadiri niyang kakayahan. Aram niyang si Jehova an nagtabang sa saiya. (1 Sam. 17:​34-37) Nungkang nalingawan ni David an mga eksperyensiyang iyan. Paagi sa paghurop-hurop sa mga iyan, nagkaigwa siya nin kumpiyansa na an buhay na Diyos papakusugon siya sa maabot.

7. Paano an pagkaigwa nin tamang pagmansay nakatabang ki David na atubangon si Goliat?

⁷ Dangan, posibleng marhay kan siya tin-edyer pa, binisita ni David an kampo kan hukbo kan mga Israelita. Naaraman niyang nagkatarakot an mga suldados dahil an higanteng Filisteo na an pangaran Goliat nagluwas para ‘tuyaon an hukbo nin Israel.’ (1 Sam. 17:​10, 11, nota sa ibaba) Nagkatarakot an mga suldados huling nagpokus sinda sa higante asin sa mga pagtuya kaini sa sainda. (1 Sam. 17:​24, 25) Pero iba an nagin pagmansay ni David sa sitwasyon. Minansay niya iyan bilang pagtuya, bako sanang laban sa hukbo nin Israel kundi laban sa “hukbo kan buhay na Diyos.” (1 Sam. 17:26) Si Jehova an pirming panginot ki David. Tiwala si David na an Diyos na nagtabang sa saiya kan siya saro pang pastor tatabangan siya giraray sa sitwasyon na ini. Huling sigurado siya na tatabangan siya nin Diyos, inatubang ni David si Goliat asin, siyempre, nanggana siya!—1 Sam. 17:​45-51.

8. Paano niyato magigibong padagos na isaisip si Jehova pag napapaatubang kita sa mga pagbalo? (Hilingon man an ritrato.)

⁸ Makakaya ta man na mapangganang atubangon an mga pagbalo kun gigirumdumon o isasaisip niyato na andam an buhay na Diyos na tabangan kita. (Sal. 118:6) Mapapakusog ta an satong kumpiyansa sa katotoohan na iyan paagi sa paghurop-hurop sa mga ginibo niya kaidto. Magbasa nin mga istorya sa Bibliya na nagpapagirumdom sa saimo kun paano ilinigtas ni Jehova an saiyang mga parasamba. (Isa. 37:​17, 33-37) Dangan, maghiling sa satong website na jw.org nin mga report na nagpapahiling kun paano tinabangan ni Jehova an satong mga tugang sa presenteng panahon. Dugang pa, girumdumon an mga pagkakataon na huminiro si Jehova alang-alang sa saimo. Dai maghadit kun mayo kang maisip na pambihirang mga eksperyensiya na nangyari sa saimo, arog kan pagdaog sa sarong  oso o leon. Taano man? Dahil an totoo, kadakul nang ginibo si Jehova para sa saimo! Irinani ka niya sa saiya para magin amigo niya. (Juan 6:44) Dawa ngunyan, huli sana sa saiyang tabang kaya yaon ka pa man giraray sa katotoohan. Taano ta dai hagadon sa saiya na tabangan kang magirumduman an mga pagkakataon na sinimbag niya an saimong mga pamibi, sinuportaran ka sa mismong panahon na kaipuhan mo iyan, o tinabangan ka sa sarong dipisil na sitwasyon? An paghurop-hurop sa siring na mga eksperyensiya makakapakusog kan saimong kumbiksiyon na padagos na mahiro si Jehova para tabangan ka.

9. Paano niyato dapat mansayon an mga pagbalo? (Talinhaga 27:11)

⁹ Kun mamansayon niyato si Jehova bilang sarong buhay na Persona, makakatabang iyan na magkaigwa kita nin tamang pagmansay sa mga pagbalo. Sa anong paagi? Mahihiling na niyato na an mga pagbalong inaagihan ta kabtang nin mas dakulang isyu sa pag-ultanan ni Jehova asin ni Satanas. Hinihingako kan Diyablo na pag mapaatubang kita sa mga kadipisilan, babayaan ta si Jehova. (Job 1:​10, 11; basahon an Talinhaga 27:11.) Alagad pag nagdadanay kitang maimbod ki Jehova sa ibong nin mga pagbalo, ipinapahiling niyato na namumutan ta siya asin pinapatunayan na putikon an Diyablo. Nakakaeksperyensiya ka daw nin panggigipit kan gobyerno, problema sa pinansiyal, negatibong mga reaksiyon pag naghuhulit, o nin iba pang mga pagbalo? Kun iyo, girumdumon na an sitwasyon mo nagtatao sa saimo nin oportunidad na mapaugma an puso ni Jehova. Tandaan man na dai niya nuarin man tutugutan na mapaatubang ka sa sarong pagbalo na dai mo makakaya. (1 Cor. 10:13) Tatawan ka niya kan kusog na makatagal.

BABALUSAN KA KAN BUHAY NA DIYOS

10. Ano an gigibuhon kan buhay na Diyos para sa mga nagsasamba sa saiya?

¹⁰ Si Jehova an Paratao nin Balos sa mga nagsasamba sa saiya. (Heb. 11:6) Tinatawan niya kita ngunyan nin katuninungan asin pagkakontento, asin tatawan niya kita nin buhay na daing katapusan sa maabot. Puwede tang ibugtak ki Jehova an satong paglaom huling kumbinsido  kita na igwa siya kan pagmawot asin kakayahan na balusan kita. Asin an kumbiksiyon na iyan mapahiro sa sato na magdanay na sibot sa satong pagsamba, arog kan ginibo kan maimbod na mga lingkod nin Diyos kan suanoy. Nagin totoo man iyan ki Timoteo kan inot na siglo.​—Heb. 6:​10-12.

11. Ano an nakapahiro ki Timoteo na magmaigot sa kongregasyon? (1 Timoteo 4:10)

¹¹ Basahon an 1 Timoteo 4:10. Ibinugtak ni Timoteo sa buhay na Diyos an saiyang paglaom. Kaya, may marahay siyang dahilan para magmaigot para ki Jehova asin sa iba. Sa anong mga paagi? Dinagka siya ni apostol Pablo na umuswag bilang paratukdo asin tagapagtaram sa publiko. Nagin marahay man na halimbawa si Timoteo sa mga kapagtubod, sa mga hoben asin may edad na. Asin tinawan man siya nin masakit na mga asignasyon, kaiba na an pagtao nin marigon pero mamumuton na sadol sa mga nangangaipo kaiyan. (1 Tim. 4:​11-16; 2 Tim. 4:​1-5) Makakasigurado si Timoteo na dawa kun may mga pagkakataon na dai nahihiling o napapahalagahan kan iba an mga ginigibo niya, babalusan siya ni Jehova.​—Roma 2:​6, 7.

12. Ano an makakamotibar sa mga elder na magdanay na sibot sa saindang gibuhon? (Hilingon man an ritrato.)

¹² Sa ngunyan, makakasigurado man an mga elder na hinihiling asin pinapahalagahan ni Jehova an marahay nindang mga naisasagibo. Apuwera sa pagpapastor, pagtutukdo, asin paghuhulit, dakul na elder an nagtatabang sa mga proyekto nin pagtugdok asin sa pag-ayuda. An iba naglilingkod sa mga Patient Visitation Group o mga Hospital Liaison Committee. An mga elder na naglilingkod sa arog kaiyan na gibuhon minamansay an kongregasyon bako bilang sarong institusyon na gibo nin tawo kundi bilang sarong areglo ni Jehova. Bilang resulta, bilog na kalag nindang isinasagibo an saindang mga asignasyon asin lubos na nagtitiwala na babalusan sinda nin Diyos sa mga ginigibo ninda.​—Col. 3:​23, 24.

13. Ano an namamatian ni Jehova sa satong personal na mga paghihinguwa para paglingkudan siya?

¹³ Bako man gabos puwedeng magin elder.  Pero gabos kita may magigibo para ki Jehova. Pinapahalagahan kan satuyang Diyos pag ginigibo ta an satong pinakamakakaya para paglingkudan siya. Nahihiling niya an satong kontribusyon sa pambilog na kinaban na gibuhon, gurano man iyan kasadit. Nauugma siya pag nagmamaigot kitang labanan an pagkamasusupgon ta asin nagtataas nin kamot para magkomento sa mga pagtiripon, saka naggagaya-gaya siya pag pinapalampas ta an salang nagibo sa sato kan iba asin pag kita nagpapatawad. Dawa kun pagmati mo dakul ka pa kutang gustong gibuhon pero dai mo iyan kayang magibo, magtiwala na pinapahalagahan ni Jehova an mga kaya mong gibuhon. Namumutan ka niya huli kaiyan, asin babalusan ka niya.​—Luc. 21:​1-4.

MAGDANAY NA HARANI SA BUHAY NA DIYOS

14. Paano an pagdanay na harani ki Jehova nakakatabang sa sato na padagos na magin maimbod? (Hilingon man an ritrato.)

¹⁴ Kun totoo para sa sato si Jehova, magigin mas madali sa sato na padagos na magin maimbod sa saiya. Nagin totoo iyan ki Jose. Marigon siyang nagsayuma na magkomiter nin imoralidad. Para sa saiya totoo an Diyos, asin habo niyang mapamundo Siya. (Gen. 39:9) Tanganing magin totoo para sa sato si Jehova, kaipuhan tang mamibi sa saiya asin pag-adalan an saiyang Tataramon. Paagi kaiyan, magkukusog an pakikiamigo niyato sa saiya. Pag igwa kita nin dayupot na pakikiamigo ki Jehova arog ni Jose, dai ta gugustuhon na gumibo nin ano man na makakapamundo sa Saiya.​—Sant. 4:8.

15. Ano an manunudan ta sa nangyari sa mga Israelita kan yaon sinda sa kaawagan? (Hebreo 3:12)

¹⁵ An mga nagpundo na sa paggirumdom o pagsaisip na si Jehova an buhay na Diyos puwedeng madalion sanang maparayo sa saiya. Pag-isipan an nangyari sa mga Israelita kan yaon sinda sa kaawagan. Aram ninda na nag-eeksister si Jehova, pero nagpuon sindang magduda kun baga tatawan niya sinda kan mga pangangaipo ninda. Naghapot pa ngani sinda: “Yaon daw talaga sa sato si Jehova o mayo?” (Exo. 17:​2, 7) Bilang resulta, nagrebelde sinda sa Diyos. Iyo, lilikayan ta nanggad na arugon an pagkamasinuway ninda, na nagseserbing nagpapatanid na halimbawa sa sato.​—Basahon an Hebreo 3:12.

16. Ano an puwedeng makabalo sa satong pagtubod?

 ¹⁶ Pinapadipisil kan kinaban na magdanay kitang harani ki Jehova. Dakul an habo kan ideya na nag-eeksister an Diyos. Sa parati, garo baga nagigin mapanggana sa buhay an mga tawong nagbabaliwala sa mga kahagadan nin Diyos. Pag nahihiling tang nangyayari iyan, puwede iyan na makabalo sa satong pagtubod. Dawa ngani dai ta man pigninigaran na nag-eeksister an Diyos, puwedeng magpuon na kitang magduda kun baga tatabangan niya kita. Arog kaiyan an nangyari sa kagsurat kan Salmo 73. Naobserbaran niya na maugma pa man giraray sa buhay an mga tawong binabaliwala an mga tugon nin Diyos. Huli kaiyan, nagpuon siyang magduda kun baga sulit an paglilingkod sa Diyos.​—Sal. 73:​11-13.

17. Ano an makakatabang sa sato na magdanay na harani ki Jehova?

¹⁷ Ano an nakatabang sa salmista na maitanos an saiyang pagmansay? Hinurop-hurop niya kun ano an mangyayari sa mga nagpundo na sa pagtitiwala ki Jehova. (Sal. 73:​18, 19, 27) Inisip-isip niya man an mga pakinabang kan paglilingkod sa Diyos. (Sal. 73:24) Puwede ta man na hurop-hurupon an mga bendisyon na itinao sa sato ni Jehova. Dangan imahinaron kun ano daw kuta an buhay ta ngunyan kun dai kita naglilingkod ki Jehova. An paggibo kaiyan makakatabang sa sato na magdanay na maimbod asin masabi man an sinabi kan salmista: “Para sa sakuya, an pagrani sa Diyos marahay sa sako.”​—Sal. 73:28.

18. Taano ta maaatubang ta nin may kumpiyansa an mga mangyayari sa maabot?

¹⁸ Makakaya ta an ano man na kadipisilan na napapaatubang sa sato sa huring mga aldaw na ini huling ‘nagpapauripon kita sa buhay asin tunay na Diyos.’ (1 Tes. 1:9) An satong Diyos tunay na Persona na minahiro alang-alang sa mga nagsasamba sa saiya. Kaibanan siya kan mga lingkod niya kaidto, asin kaibanan ta man siya ngunyan. Dai na mahahaloy, mapapaatubang kita sa pinakadakulang kasakitan na mangyayari digdi sa daga. Pero dai kita magsosolo sa pag-atubang diyan. (Isa. 41:10) Lugod na ‘magkusog na marhay an satuyang buot asin masabi niyato: “Si Jehova an sakuyang paratabang; dai ako matatakot.”’—Heb. 13:​5, 6.