Tanganing mapaugma si Jehova, dapat na igwa kita nin pagtubod. Minsan siring, sinasabi kan Bibliya na “bakong gabos na tawo igwa nin pagtubod.” (2 Tes. 3:2) An pinapanungdan digdi ni apostol Pablo iyo su mga nagpepersegir sa saiya, na “mga abusado saka mararaot na tawo,” asin gusto niyang makaligtas sa sainda. Pero an sinabi niya manungod sa pagtubod igwa nin mas mahiwas na aplikasyon. May mga tawo na pinipiling baliwalaon an malinaw na patunay na igwa nin Kaglalang—an Diyos. (Roma 1:20) Sinasabi man kan iba na igwa man sinda nin pagtubod huling naniniwala sinda na may sarong bagay o persona na mas makapangyarihan. Pero bako iyan an tunay na pagtubod na kaipuhan para mapaugma si Jehova.

Kaipuhan tang magin kumbinsido na nag-eeksister si Jehova asin na siya an “paratao nin balos” sa mga igwa nin marigon na pagtubod. (Heb. 11:6) An pagtubod sarong aspekto kan bunga kan saiyang banal na espiritu. An pagdulok ki Jehova sa pamibi makakatabang sa saro na mag-ako kan saiyang banal na espiritu. (Luc. 11:​9, 10, 13) An sarong panginot na paagi para mag-ako kan espiritung iyan iyo an pagbasa kan ipinasabong na Tataramon nin Diyos. Dangan, puwede tang isip-isipon an manungod sa mga nababasa ta asin iaplikar an mga nanunudan ta. Paagi kaiyan, an espiritu ni Jehova magkakaigwa nin epekto sa satong buhay, na tinatabangan kitang magkaigwa kan pagtubod na nakakapaugma sa saiya.