1. Ano an hinahangaan kan dakul na interesado na nag-aatender sa satong mga pagtiripon? (Hilingon man an ritrato.)

 IMAHINARA an sarong mag-agom na primerong beses na makaatender sa pagtiripon sa sarong Kingdom Hall kan Mga Saksi ni Jehova. Hanga sindang marhay sa mabuot na pag-ako sainda asin sa pagkamuot kan lambang saro sa kongregasyon. Mantang papuli, sinabi kan agom na babayi sa saiyang agom, ‘Ibang-iba talaga an Mga Saksi ni Jehova—nakakaugmang makaibanan sinda.’

2. Taano ta nasingkog an nagkapira?

² An pagkamuot na mahihiling sa tahaw kan Kristiyanong kongregasyon kahanga-hanga nanggad. Pero siyempre, bakong perpekto an Mga Saksi ni Jehova. (1 Juan 1:8) Kaya mantang mas nabibisto ta an mga nasa kongregasyon, mas posible man na mahiling ta an nagkapira sa mga kaluyahan ninda. (Roma 3:23) Nakakamundo, pinabayaan kan nagkapira na masingkog sinda kan pagkabakong perpekto kan iba.

3. Ano an midbidan kan tunay na mga parasunod ni Jesus? (Juan 13:34, 35)

³ Hilingon giraray an temang teksto kan artikulong ini. (Basahon an Juan 13:34, 35.) Ano an midbidan kan tunay na mga parasunod ni Cristo? An pagkamuot; bako an pagigin perpekto. Mangnuhon man na dai sinabi ni Jesus: ‘Paagi kaini, maaaraman nindo na kamo sakuyang mga disipulo.’ Imbes, sinabi niya: “Paagi kaini, maaaraman kan gabos na kamo sakuyang mga disipulo.” Kaya ipinaparisa ni Jesus na an makakamidbid sa saiyang tunay na mga parasunod huli sa saindang bakong makasadiring pagkamuot sa lambang saro bako lang an saiyang mga parasunod kundi pati man an mga nasa luwas kan Kristiyanong kongregasyon.

4. Ano an tibaad ihapot kan iba manungod sa tunay na mga Kristiyano?

 ⁴ An iba na bakong Saksi ni Jehova tibaad maghapot: ‘Paano an pagkamuot nagpapamidbid sa tunay na mga parasunod ni Jesus? Paano ipinahiling ni Jesus an pagkamuot sa saiyang mga apostol? Asin paano posibleng maarog an halimbawa ni Jesus ngunyan?’ Marahay na pag-isipan kan mga Saksi an simbag sa mga hapot na iyan. Makakatabang iyan sa sato na mas lubos pang ipahiling an satong pagkamuot, lalo na sa pag-atubang sa pagkabakong perpekto kan lambang saro.—Efe. 5:2.

5. Ipaliwanag an mga tataramon ni Jesus na nasa Juan 15:12, 13.

⁵ Lininaw ni Jesus na sarong espesyal na klase nin pagkamuot an magpapamidbid sa saiyang mga parasunod. (Basahon an Juan 15:12, 13.) Mangnuhon an tugon sainda ni Jesus: “Kamutan nindo an lambang saro arog kan pagkamuot ko sa saindo.” Ano an buot sabihon kaiyan? Arog kan ipinaliwanag ni Jesus, saro ining mapagsakripisyong pagkamuot—pagkamuot na magpapahiro sa sarong Kristiyano na itao dawa an saiyang buhay para sa saiyang kapagtubod kun kinakaipuhan. b

6. Paano idinuduon kan Tataramon nin Diyos an kahalagahan kan pagkamuot?

⁶ Itinutukdo kan Tataramon nin Diyos na mahalagang marhay an pagkamuot. Para sa dakul na tawo, kaiba sa paborito nindang mga teksto sa Bibliya an minasunod: “An Diyos pagkamuot.” (1 Juan 4:8) “Kamutan mo an saimong kapwa nin siring sa saimong sadiri.” (Mat. 22:39) “An pagkamuot nagtatahob sa dakul na kasalan.” (1 Ped. 4:8) “An pagkamuot dai nuarin man nasusudya.” (1 Cor. 13:8) Malinaw na ipinapahiling kan mga tekstong ini asin kan iba pa na mahalagang marhay na ipahiling an magayunon na kuwalidad na ini.

7. Taano ta nungkang mapagkakasararo ni Satanas an mga tawo sa tunay na pagkamuot?

 ⁷ Dakul na tawo an naghahapot: ‘Paano posibleng maaraman kun arin an tunay na relihiyon? Gabos na relihiyon naghihingako na an katotoohan an itinutukdo ninda, pero iba-iba an tukdo ninda manungod sa Diyos.’ Nagibo ni Satanas na ribungon an mga tawo paagi sa paggibo nin kadakul-dakul na palsong relihiyon. Pero dai siya makakagibo nin pambilog na kinaban na kasararuan nin magturugang na namumutan an lambang saro. Si Jehova sana an makakagibo kaiyan. Rasonable sana iyan ta an tunay na pagkamuot hali ki Jehova. Idto sanang igwa kan saiyang espiritu asin bendisyon an makakapahiling kan tunay na pagkamuot. (1 Juan 4:7) Kaya bako nanggad makangangalas na sinabi ni Jesus na an bakong makasadiring pagkamuot an magigin midbidan kan saiyang tunay na mga parasunod.

8-9. Ano an nagin epekto sa dakul na indibidwal kan pagkamuot na naobserbaran ninda sa Mga Saksi ni Jehova?

⁸ Arog kan ihinula ni Jesus, mamimidbid kan dakul an saiyang tunay na mga parasunod paagi sa tunay na pagkamuot na ipinapahiling ninda sa lambang saro. Halimbawa, nagigirumduman kan brother na si Ian an primerong kumbensiyon na naatenderan niya, na ginibo sa sarong istadyum harani sa harong ninda. Mga pirang bulan bago kaiyan, yaon si Ian sa istadyum na iyan para maghiling nin sarong karawat. Sinabi niya: “Ibang-iba talaga an nahiling ko sa kumbensiyon na ini. Magalang an mga Saksi saka marahay an pagbado, saka pormal an mga aki.” Urog pa diyan, sinabi niya: “Mahihiling mo na kontento sinda saka matuninong—sarong bagay na minamawot ko. Mayo akong magirumduman sa arin man sa mga pahayag kan aldaw na idto, pero dai ko talaga malilingawan an paggawi kan mga Saksi.” c Siyempre, an paggawing iyan resulta kan tunay na pagkamuot niyato sa lambang saro. Huling namumutan ta an satong mga tugang, tinatratar ta sinda na may kabuutan asin respeto.

⁹ Arog man kaiyan an inot na nagin impresyon kan brother na si John kan magpuon siyang mag-atender sa mga pagtiripon kan kongregasyon: “Naghanga ako sa pagigin mainamigo . . . kan gabos na yaon duman—garo sinda mga santo. An saindang tunay na pagkamuot nakakumbinsir sa sako na nakua ko na an tunay na relihiyon.” d An mga iyan asin an dakul na iba pang mga eksperyensiya nagpapahiling na pinapatunayan kan banwaan ni Jehova na sinda tunay na mga Kristiyano.

10. Nuarin lalo nang may oportunidad kita na magpahiling nin Kristiyanong pagkamuot? (Hilingon man an nota sa ibaba.)

¹⁰ Arog kan sinambit sa kapinunan, mayo nin perpekto sa mga kapagtubod ta. Kun minsan, makakataram o makakagibo sinda nin mga bagay na makakakulog kan satong buot. e (Sant. 3:2) Sa siring na mga sitwasyon, lalo nang may oportunidad kita na magpahiling nin Kristiyanong pagkamuot paagi sa kun ano an magigin reaksiyon ta. Sa bagay na iyan, ano an manunudan ta sa halimbawa ni Jesus?—Juan 13:15.

11. Anong bakong marahay na mga ugali an ipinahiling ni Santiago asin Juan? (Hilingon man an ritrato.)

¹¹ Dai si Jesus nag-asa nin pagkaperpekto sa saiyang mga parasunod. Imbes, mamumuton niya sindang tinabangan na itanos an saindang bakong marahay na mga ugali tanganing mapaugma ninda si Jehova. Sa sarong pagkakataon, an duwa sa saiyang mga apostol, si Santiago  asin Juan, sinabihan an saindang ina na pakiulayan si Jesus na tawan sinda nin prominenteng posisyon sa Kahadian. (Mat. 20:20, 21) Ipinapahiling kan ginibong iyan ni Santiago asin Juan an saindang pagigin orgulyoso saka pagigin ambisyoso.—Tal. 16:18.

12. Si Santiago saka si Juan sana daw an nagpahiling nin bakong marahay na mga ugali? Ipaliwanag.

¹² Bako lang si Santiago asin Juan an nagpahiling nin bakong marahay na mga ugali sa pagkakataon na idto. Mangnuhon an nagin reaksiyon kan ibang mga apostol: “Kan maaraman iyan kan sampulong iba pa, nagkaaranggot sinda sa magtugang.” (Mat. 20:24) Maiimahinar ta an malanit na mga tataramon sa pagdiriskutiran ni Santiago, Juan, asin kan iba pang apostol. Tibaad may nagsabi nin arog kaini: ‘Si’say man kamo para maghagad nin prominenteng posisyon sa Kahadian? Bako man lang kamo an nagmaigot kaiba ni Jesus. Parareho man kitang kuwalipikado para sa espesyal na mga pribilehiyo!’ Ano man an inisip o sinabi ninda, tinugutan kan mga apostol na temporaryong maraot kan pangyayaring iyan an saindang pagkamuot sa lambang saro bilang magturugang.

13. Ano an reaksiyon ni Jesus sa mga kaluyahan kan saiyang mga apostol? (Mateo 20:25-28)

¹³ Paano inatubang ni Jesus an sitwasyon na iyan? Dai siya naanggot. Dai siya nagsabi na mahanap na lang siya nin mas marahay na mga apostol, mga lalaking mas mapakumbaba asin pirming mapahiling nin pagkamuot sa lambang  saro. Imbes, mapasensiyang nangatanusan si Jesus sa mga sinserong lalaking ini. (Basahon an Mateo 20:25-28.) Padagos niyang trinatar sinda sa mamumuton na paagi, dawa ngani pauruutrong nagdiriskutiran an mga apostol kun baga siisay sa sainda an nakakalabi sa gabos.—Mar. 9:34; Luc. 22:24.

14. Anong klaseng kapalibutan an dinakulaan kan mga apostol ni Jesus?

¹⁴ Siguradong kinonsiderar ni Jesus an kulturang dinakulaan kan mga apostol. (Juan 2:24, 25) Nagdakula sinda sa kapalibutan kun sain tinatawan kan mga lider nin relihiyon nin dakulang importansiya an pagigin prominente asin an posisyon. (Mat. 23:6; ikumparar an artikulong “An Sinagoga—Kun Saen Naghulit si Jesus Asin an Saiyang mga Disipulo” sa An Torrengbantayan, Abril-Hunyo 2010, p. 16-19.) Apuwera kaiyan, an Judiong mga lider nin relihiyon mga mapagpakangmatanos. f (Luc. 18:9-12) Nasabutan ni Jesus na an siring na kapalibutan puwedeng makaimpluwensiya sa pagmansay kan mga apostol sa sadiri ninda asin sa iba. (Tal. 19:11) Realistiko siya sa inaasahan niya sa saiyang mga disipulo asin bakong sobra an reaksiyon niya pag may nagigibo sindang mga pagkukulang. Aram niya na may marahay sindang puso, kaya mapasensiya niyang tinabangan sinda na mahali an saindang pagigin orgulyoso saka pagigin ambisyoso asin ribayan iyan nin pagkamuot.

15. Ano an manunudan ta sa pangyayaring idto mapadapit ki Santiago asin Juan?

¹⁵ Dakul kitang manunudan sa pangyayaring idto mapadapit ki Santiago asin Juan. Bakong tama na hagadon ninda na magkaigwa nin prominenteng posisyon sa Kahadian. Saka sala man an ginibo kan ibang mga apostol sa pagtugot ninda na maraot an saindang pagkasararo. Minsan siring, nagin mabuot asin mamumuton si Jesus sa gabos niyang 12 apostol. An leksiyon? Bako lang an ginibo kan iba an dapat tang konsideraron kundi pati man an reaksiyon niyato sa saindang mga sala asin kaluyahan. Ano an makakatabang sa sato? Kun nakulgan an buot ta kan sarong kapagtubod, puwede tang ihapot sa satong sadiri: ‘Taano ta ikinakakulog na marhay kan buot ko an ginibo niya? Ihinahayag daw kaiyan an sarong negatibong ugali ko na kaipuhan kong pagmaigutan na baguhon? Posible daw na may inaagihan na problema an tawong nakakulog sako? Dawa ngani sa pagmati ko makatanusan man an pagkulog kan buot ko, puwede daw na magpahiling ako nin bakong makasadiring pagkamuot paagi sa pagpalampas na sana kan sala?’ Mantang mas mamumuton tang tinatrato an iba, mas napapatunayan ta man na tunay kitang mga parasunod ni Jesus.

16. Ano pa an manunudan ta sa halimbawa ni Jesus?

¹⁶ An halimbawa ni Jesus nagtutukdo man sa sato na kaipuhan tang hinguwahon na masabutan an satong mga kapagtubod. (Tal. 20:5) Totoo, nakakabasa si Jesus nin puso. Kita dai. Pero puwede kitang magin mapasensiya sa mga kaluyahan kan satong mga tugang. (Efe. 4:1, 2; 1 Ped. 3:8) Magigin mas madali iyan kun mas bibistuhon ta sinda. Pag-isipan an sarong halimbawa.

17. Paano nakinabang an sarong paraataman nin sirkito kan mas binisto pa niya an sarong kapagtubod?

¹⁷ Nagigirumduman kan sarong paraataman nin sirkito na naglilingkod sa East Africa an sarong brother na sa paghiling niya nakakauyam an personalidad. Ano an ginibo kan paraataman nin sirkito? Sinabi niya: “Imbes na likayan an brother, hininguwa kong mas bistuhon pa siya.” Paagi kaiyan, naaraman kan paraataman nin sirkito  an manungod sa dinakulaan kan brother kaya arog kaidto su nagin personalidad niya. Sinabi pa kan paraataman nin sirkito: “Kan maaraman ko an pagmamaigot kan brother para mahali an impluwensiya saiya kan dinakulaan niya asin kun gurano na kadakula kan ipinagbago niya, naghanga ako saiya. Nagin dayupot kaming mag-amigo.” Siyerto nanggad, kun hihinguwahon tang sabuton an satong mga tugang, mas magigin madali sa sato na magin mamumuton sa sainda.

18. Ano an mga puwede tang ihapot sa satong sadiri kun nakulgan an buot ta nin sarong kapagtubod? (Talinhaga 26:20)

¹⁸ Kun minsan, puwedeng pagmati ta kaipuhan tang dulukon an sarong kapagtubod na nakakulog kan satong buot. Minsan siring, marahay na haputon ta nguna an satong sadiri: ‘Lubos ko daw na nasasabutan an nangyari?’ (Tal. 18:13) ‘Posible daw na dai niya man talaga tuyong kulgan an buot ko?’ (Ecl. 7:20) ‘Nagibo ko na man daw iyan dati?’ (Ecl. 7:21, 22) ‘Kun kakaulayon ko an tugang, posible daw na mas magdakula pa an isyu?’ (Basahon an Talinhaga 26:20.) Kun matao kita nin panahon para pag-isipan an siring na mga hapot, puwede kitang makapagkongklusyon na palampason na sana an nagibong sala huling namumutan ta an satong tugang.

19. Ano an determinado mong gibuhon?

¹⁹ Bilang sarong grupo, pinapatunayan kan mga Saksi ni Jehova na tunay sindang mga disipulo ni Jesus. Pinapatunayan kan kada saro sa sato na tunay kitang mga parasunod ni Jesus pag nagpapahiling kita nin bakong makasadiring pagkamuot sa satong mga tugang sa ibong kan saindang mga kaluyahan. Sa paggibo ta kaiyan, puwede tang matabangan an iba na mamidbid an tunay na relihiyon asin umiba sa sato sa pagsamba ki Jehova, an Diyos nin pagkamuot. Lugod na magin determinado kita na padagos na ipahiling an pagkamuot na nagpapamidbid sa tunay na mga Kristiyano.