1-2. Ano an dapat gibuhon kan saro bago magpabawtismo?

 SA NAKALIHIS na limang taon, labing sarong milyon an nabawtismuhan bilang mga Saksi ni Jehova. Dakul sa sainda an arog kan inot na siglong disipulo na si Timoteo na tinukduan kan katotoohan “puon sa pagkaumboy.” (2 Tim. 3:​14, 15) An iba sa sainda nakanuod manungod ki Jehova kan sinda adulto na, asin an iba man kan gurang na. Dai pa sana ngani nahahaloy, may sarong babayi na nakipag-adal nin Bibliya sa mga Saksi ni Jehova asin nabawtismuhan sa edad na 97!

² Kun saro kang tinutukduan sa Bibliya o kun mga Saksi an magurang mo na nagpadakula saimo, pinag-iisipan mo na daw an pagpabawtismo? Marahayon na pasuhan iyan! Pero bago magpabawtismo, kaipuhan mo ngunang idusay an sadiri mo ki Jehova. Ipapaliwanag kan artikulong ini kun ano an buot sabihon kan pagdusay. Makakatabang man ini saimo na mahiling kun taano ta mayong dahilan na mag-alangan na magdusay dangan magpabawtismo pag andam ka na.

ANO AN PAGDUSAY?

3. Magtao nin mga halimbawa sa Bibliya nin mga nagdusay ki Jehova.

³ Sa Bibliya, an pagdusay nagpaparisa nin sarong bagay na isinuway para sa sagradong katuyuhan. An mga Israelita sarong nasyon na dusay ki Jehova. Pero an nagkapirang indibidwal sa Israel nagdusay ki Jehova sa espesyal na paagi. Halimbawa, si Aaron nagsulot nin “banal na tanda nin pagdusay”—sarong makintab na bulawan na plaka sa atubangan kan saiyang turbante. An bulawan na plakang iyan nagpapahiling na isinuway siya tanganing maglingkod sa sarong espesyal na katungdan—bilang halangkaw na saserdote kan Israel. (Lev. 8:9) An mga Nazareo nagdusay man ki Jehova sa espesyal na paagi. An tataramon na “Nazareo,”  na hali sa Hebreong tataramon na nazirʹ, nangangahulugan na “Saro na Suway,” o “Saro na Dusay.” Sa Katugunan ni Moises, kaipuhan kan mga Nazareo na mamuhay kauyon kan mga pagbuot na partikular na ginibo para sa sainda.​—Bil. 6:​2-8.

4. (a) Sa anong paagi isinuway an mga nagdusay ki Jehova para sa sagradong katuyuhan? (b) Ano an buot sabihon kan “talikdan” an saimong sadiri? (Hilingon man an ritrato.)

⁴ Pag idinusay mo an sadiri mo ki Jehova, pinipili mo na magin disipulo ni Jesu-Cristo asin magin pinakaimportante sa buhay mo an paggibo kan kabutan nin Diyos. Ano an kalabot sa pagdusay bilang Kristiyano? Sinabi ni Jesus: “Kun an siisay man gustong magsunod sa sako, talikdan niya an saiyang sadiri.” (Mat. 16:24) An frase sa Griego na itrinadusir na “talikdan niya an saiyang sadiri” puwede man itradusir na “dapat siyang magsabi nin dai sa saiyang sadiri.” Bilang nagdusay na lingkod ni Jehova, kakaipuhanon mong magsabi nin dai sa ano man na bakong kauyon kan saiyang kabutan. (2 Cor. 5:​14, 15) Kaiba diyan an pagsabi nin dai sa “mga gibo kan laman,” arog kan seksuwal na imoralidad. (Gal. 5:​19-21; 1 Cor. 6:18) An mga pagbabawal daw na iyan makakalimitar sa saimo? Dai, kun namumutan mo si Jehova asin kumbinsido ka na an saiyang mga katugunan para sa ikakarahay mo. (Sal. 119:97; Isa. 48:​17, 18) Arog kaini an pagkasabi diyan kan brother na si Nicholas, “Puwede mong mansayon an mga pamantayan ni Jehova na garo mga rehas sa presuhan na nagpupugol saimo na gibuhon an gusto mo o garo mga rehas sa lauman nin leon na nagpoprotektar saimo sa peligro.”

5. (a) Paano mo idinudusay an saimong sadiri ki Jehova? (b) Ano an pagkakaiba kan pagdusay asin bawtismo? (Hilingon man an ritrato.)

⁵ Paano mo idinudusay an saimong sadiri ki Jehova? Sa pamibi, nangangako ka saiya na siya sana an sasambahon mo asin iinuton mo sa saimong buhay an paggibo kan saiyang kabutan. Dangan, nangangako ka ki Jehova na padagos  mo siyang mamumutan “sa bilog mong puso asin sa bilog mong kalag saka sa bilog mong isip pati sa bilog mong kusog.” (Mar. 12:30) An pagdusay ginigibo sa pribado, ika sana saka si Jehova. Sa kabaliktaran, an bawtismo ginigibo sa publiko; ipinapahiling mo sa mga nagmamasid na nagdusay ka na. An saimong pagdusay sarong sagradong promesa, asin inaasahan ni Jehova na mamumuhay ka kauyon kan saimong pagdusay, arog kan inaasahan mo sa sadiri mo.​—Ecl. 5:​4, 5.

TAANO TA IDUDUSAY MO AN SADIRI MO KI JEHOVA?

6. Ano an nakakapahiro sa saro na idusay an saiyang sadiri ki Jehova?

⁶ An panginot na dahilan kaya idudusay mo an sadiri mo ki Jehova iyo na namumutan mo siya. An pagkamuot mo bako lang dahil sa emosyon. Imbes, nakabasar iyan sa “tamang kaaraman” asin “espirituwal na pakasabot”—mga bagay na nanudan mo manungod ki Jehova na nagpakusog kan pagkamuot mo saiya. (Col. 1:9) An pag-adal mo kan Kasuratan nakakumbinsir saimo (1) na totoo si Jehova, (2) na an Bibliya iyo an ipinasabong niyang Tataramon, asin (3) na ginagamit niya an saiyang organisasyon tanganing utubon an saiyang kabutan.

7. Ano an dapat tang gibuhon bago ta idusay an satong sadiri sa Diyos?

⁷ Dapat na aram kan mga nagdusay ki Jehova an panginot na mga katukduan sa Tataramon nin Diyos asin namumuhay sinda kauyon kan mga pamantayan kaiyan. Ihinihiras ninda sa iba an saindang pagtubod sagkod sa itinutugot kan saindang kamugtakan. (Mat. 28:​19, 20) An pagkamuot ninda ki Jehova mas nagkusog, asin an saindang udok sa pusong pagmawot iyo na itao ki Jehova an eksklusibong debosyon. Arog kaiyan  an ginibo mo, bako? Huling igwa ka kan arog kaiyan na pagkamuot, dai ka nagdusay asin nagpabawtismo para sana mapaugma an nagtutukdo saimo sa Bibliya o an mga magurang mo o dahil ta iyan an ginibo kan mga amigo mo.

8. Paano an pagigin mapagpasalamat makakatabang saimo para makapagdesisyon na magdusay ki Jehova? (Salmo 116:​12-14)

⁸ Kun iisipon mo an gabos na ginibo ni Jehova para saimo, mapapahiro kang magpasalamat asin idusay sa saiya an saimong sadiri. (Basahon an Salmo 116:​12-14.) Sa Bibliya, tama sanang inaapod si Jehova bilang an Paratao nin “lambang marahay na balaog [asin] lambang perpektong regalo.” (Sant. 1:17) An pinakanangungurog sa mga balaog na iyan iyo an atang kan saiyang Aking si Jesus. Isipa na sana! Huli sa pantubos, nagin posible na magkaigwa ka nin dayupot na relasyon ki Jehova. Asin tinawan ka niya nin paglaom na mabuhay nin daing katapusan. (1 Juan 4:​9, 10, 19) An pagdusay mo ki Jehova sarong paagi para maipahiling mo an saimong pagpapahalaga sa pinakadakulang kapahayagan nin pagkamuot kasuarin man, pati na sa iba pang mga bendisyon na itinao ni Jehova sa saimo. (Deu. 16:17; 2 Cor. 5:15) Idinuon an puntong iyan sa leksiyon 46 punto 4, kan librong Mabuhay nin Maugma Sagkod Pa Man!, na diyan may tulong minutong video na Pagtao kan Saimong Regalo sa Diyos.

HANDA KA NA DAW NA MAGDUSAY ASIN MAGPABAWTISMO?

9. Taano ta dai dapat mapiritan an saro na magdusay?

⁹ Tibaad pagmati mo dai ka pa handa na magdusay asin magpabawtismo. Tibaad kaipuhan mo pang gumibo nin mga pagbabago sa buhay mo tanganing magin kauyon iyan kan mga pamantayan ni Jehova, o tibaad kaipuhan mo pa nin panahon para pakusugon an pagtubod mo. (Col. 2:​6, 7) Bakong gabos na tinutukduan sa Bibliya parareho an rikas nin pag-uswag, asin bakong gabos na hoben andam nang magdusay saka magpabawtismo sa pararehong edad. Pag-isipan kun anong mga pag-uswag sa espirituwal an kaipuhan mong gibuhon base sa kun ano an makakaya mo, bako sa pagkumparar kan sadiri mo sa iba.​—Gal. 6:​4, 5.

10. Ano an puwede mong gibuhon pag narealisar mo na dai ka pa handa na magdusay asin magpabawtismo? (Hilingon man an kahon na “ Para sa mga Pinadakula sa Pamilyang Saksi.”)

¹⁰ Dawa pa marealisar mo na dai ka pa handa na idusay an sadiri mo ki Jehova, padagos man giraray na gibuhon iyan na pasuhan. Ipamibi ki Jehova na tabangan kang makagibo nin ano man na kinakaipuhan na mga pagbabago. (Fil. 2:13; 3:16) Makakasigurado ka na dadangugon niya an pamibi mo asin tatabangan ka niya.​—1 Juan 5:14.

KUN TAANO TA NAG-AALANGAN AN NAGKAPIRA NA MAGDUSAY ASIN MAGPABAWTISMO

11. Paano kita tatabangan ni Jehova na magdanay na maimbod sa saiya?

¹¹ May nagkapira na handa nang magdusay saka magpabawtismo pero nag-aalangan pa man giraray. Tibaad naiisip ninda, ‘Paano kun makagibo ako nin magabat na kasalan tapos matiwalag ako?’ Kun iyan an ikinakatakot mo, makakasigurado ka na itatao saimo ni Jehova an gabos na bagay na kaipuhan mo “para makalakaw [ka] nin maninigo para [sa saiya] tanganing lubos siyang mapaugma.” (Col. 1:10) Tatawan ka man niya nin kusog na gibuhon kun ano an tama. Napatunayan na niya iyan ta dakul na siyang natabangan. (1 Cor. 10:13) Iyan an sarong rason kun taano ta medyo dikit lang an natitiwalag sa Kristiyanong kongregasyon. Tinatabangan ni Jehova an saiyang mga lingkod na magdanay na maimbod.

12. Paano ta malilikayan na makagibo nin magabat na kasalan?

¹² An lambang bakong perpektong tawo natetentaran na gumibo nin sala. (Sant. 1:14)  Minsan siring, nasa saimo man kun mapadara ka sa pagtentar. An totoo, ika talaga an may kontrol kun paano ka mamumuhay. May mga nagsasabi na dai ta makokontrol an satong mga pagmati saka ginigibo. Pero bako iyan totoo. Puwede mong manudan na kontrulon an saimong salang mga pagmawot. Asin dawa pag natetentaran ka, puwede mong pilion na dai magpadara diyan. Para magibo iyan, aroaldaw na mamibi. Papagdanayon an marahay na rutina nin personal na pag-adal sa Tataramon nin Diyos. Mag-atender sa Kristiyanong mga pagtiripon. Ihiras sa iba an pagtubod mo. An padagos na paggibo kan mga ini mapakusog kan saimong determinasyon na utubon an saimong pagdusay. Asin dai nuarin man paglingawan na tatabangan ka ni Jehova na magibo iyan.​—Gal. 5:16.

13. Anong marahay na halimbawa an ipinahiling sa sato ni Jose?

¹³ Mas magigin pasil sa saimo na mamuhay kauyon kan saimong pagdusay kun patiinot ka nang nakapagdesisyon kun ano an saimong gigibuhon pag napaatubang ka sa pagtentar. Mababasa ta sa Bibliya an halimbawa kan mga nakagibo kaiyan, dawa bako sindang mga perpekto. Halimbawa, pauruutrong inakit si Jose kan agom ni Potifar. Pero aram na ni Jose kun ano an gigibuhon niya. Sinasabi sa sato kan Bibliya na “nagsayuma siya,” asin sinabi niya: “Paano ko magigibo an grabeng karatan na ini asin magkasala sa Diyos?” (Gen. 39:​8-10) Malinaw na nakapagdesisyon na si Jose kun ano an gigibuhon bago pa man siya purbaran na akiton kan agom ni Potifar. Huli kaiyan, dai na siya nasakitan kan mapaatubang na mismo sa pagtentar.

14. Paano kita makakanuod na magsabi tulos nin dai sa sugot na gumibo nin sala?

¹⁴ Paano mo maaarog an determinasyon ni Jose? Puwede kang magdesisyon na ngunyan kun ano an gigibuhon mo pag napaatubang ka sa pagtentar. Makanuod na magsabi tulos nin dai sa mga bagay na ikinakaungis ni Jehova, asin dai lamang ngani iyan pagparaisipon. (Sal. 97:10; 119:165) Paagi kaiyan, dai ka magduduwa-duwa pag napaatubang ka sa pagtentar. Nakapagdesisyon ka na. Aram mo na kun ano an gigibuhon.

15. Paano maipapahiling kan saro na siya “udok na naghahanap” ki Jehova? (Hebreo 11:6)

¹⁵ Sa sitwasyon mo, posibleng kumbinsido kang nanumpungan mo na an katotoohan asin na gusto mong paglingkudan si Jehova nin bilog na puso pero may nakakapugol pa man giraray saimo na magdusay asin magpabawtismo. Puwede  mong pag-isipan an halimbawa ni Hading David. Puwede kang makimahirak ki Jehova: “Siyasaton mo ako, O Diyos, asin aramon mo an sakong puso. Siyasaton mo ako, asin aramon mo an mga ikinakahadit kan isip ko. Hilinga tabi kun baga igwa sa sako nin ano man na nakakaraot na tendensiya, asin giyahan mo ako sa dalan nin daing kasagkudan.” (Sal. 139:​23, 24) Binebendisyunan ni Jehova an mga “udok na naghahanap sa saiya.” Maipapahiling mo saiya na iyan an gusto mong gibuhon paagi sa paghihinguwang maabot an saimong pasuhan na magdusay asin magpabawtismo.​—Basahon an Hebreo 11:6.

PADAGOS NA RUMANI KI JEHOVA

16-17. Paano irinarani ni Jehova sa saiya an mga pinadakula sa pamilyang Saksi? (Juan 6:44)

¹⁶ Sinabi ni Jesus na an saiyang mga disipulo irinarani sa saiya ni Jehova. (Basahon an Juan 6:44.) Isipa na sana kun gurano iyan kaespesyal asin kun paano iyan nagin totoo sa saimo. May marahay na mga bagay na nahihiling si Jehova sa lambang tawo na irinarani niya sa saiya. Minamansay niya an sarong indibidwal bilang saiyang “espesyal na pagsadiri,” o “pinapahalagahan na rugaring.” (Deu. 7:6; nota sa ibaba) Arog man kaiyan an pagmansay niya saimo.

¹⁷ Minsan siring, tibaad saro kang hoben na nagdakula sa pamilyang Saksi. Tibaad pagmati mo nadadara ka lang kan mga magurang mo. Alagad, sinasabi kan Bibliya: “Rumani kamo sa Diyos, asin marani siya sa saindo.” (Sant. 4:8; 1 Cron. 28:9) Kun magibo ka nin paagi para magin harani ki Jehova, mahiro man siya para magin harani sa saimo. Dai ka minamansay ni Jehova na parte sana nin sarong grupo. Irinarani niya an lambang indibidwal—kaiba na an lambang indibidwal na nagdakula sa pamilyang Saksi. Kun an saro sainda maggibo nin paagi para magin harani ki Jehova, mahiro Siya, arog kan sinambit sa Santiago 4:8.​—Ikumparar an 2 Tesalonica 2:13.

18. Ano an pag-uulayan ta sa sunod na artikulo? (Salmo 40:8)

¹⁸ Pag idinusay mo an sadiri mo ki Jehova asin nagpabawtismo, inaarog mo si Jesus. Gikan sa buot niyang iprinesentar an saiyang sadiri sa saiyang Ama para gibuhon an ano man na hagadon saiya. (Basahon an Salmo 40:8; Heb. 10:7) Sa masunod na artikulo, pag-uulayan ta kun ano an makakatabang saimo tanganing padagos kang maimbod na makapaglingkod ki Jehova pagkatapos kan saimong bawtismo.