1. Anong pagmati an tibaad piglalabanan kan nagkapirang maimbod na mga lingkod ni Jehova?

 NAKAKAPAKUSOG nanggad na maaraman na inuuyunan ni Jehova an saiyang mga lingkod bilang grupo! Sinasabi kan Bibliya: “Nauugma si Jehova sa saiyang banwaan.” (Sal. 149:4) Pero kun minsan, may nagkapira na sa sobrang pagkadisganar tibaad napapaisip, ‘Inuuyunan daw ako ni Jehova bilang indibidwal?’ May nagkapirang maimbod na lingkod ni Jehova kan mga panahon kan Bibliya na nakamati man nin arog kaiyan na mga pagduda.​—1 Sam. 1:​6-10; Job 29:​2, 4; Sal. 51:11.

2. Sairisay an igwa kan pag-uyon ni Jehova?

² Malinaw na sinasabi kan Bibliya na puwedeng makamtan kan bakong perpektong mga tawo an pag-uyon ni Jehova. Paano? Dapat kitang magpahiling nin pagtubod ki Jesu-Cristo asin magpabawtismo. (Juan 3:16) Sa paaging iyan, ipinapahiling ta sa publiko na pinagsulsulan ta na an satong mga kasalan asin nanuga sa Diyos na gigibuhon ta an saiyang kabutan. (Gibo 2:38; 3:19) Nauugma si Jehova pag ginibo ta an mga lakdang na iyan para magkaigwa kita nin haraning relasyon sa saiya. Sagkod na padagos tang ginigibo an satong pinakamakakaya para utubon an satong pagdusay, padagos man kitang uuyunan ni Jehova asin ibibilang na saiyang dayupot na mga amigo.​—Sal. 25:14.

3. Ano an pag-uulayan ta ngunyan?

³ Minsan siring, taano ta pagmati kan iba dai sinda inuuyunan nin Diyos? Paano ni Jehova ipinapahiling na inuuyunan niya kita? Asin paano mapapakusog kan sarong Kristiyano an saiyang pagtitiwala na inuuyunan siya nin Diyos?

 KUN TAANO TA PAGMATI KAN IBA DAI SINDA INUUYUNAN NI JEHOVA

4-5. Dawa ngani pagmati ta mayo kitang halaga, sa ano kita makakasigurado?

⁴ Dakul sa sato an may pinaglalabanan na negatibong pagmati dahil sa hababang paghiling sa sadiri puon kan aki pa. (Sal. 88:15) An brother na si Adrián nagsabi: “Kaidto pa, paghiling ko sa sadiri ko mayo akong halaga. Natatandaan ko kaidtong aki pa ako, namimibi ako na makabalyo man lugod sa Paraiso an bilog ming pamilya, dawa ngani sigurado ako na dai ako maninigo na makaiba sa sainda.” Si Tony, na bakong Kristiyano an pamilyang dinakulaan, nagsabi: “Dai ko lamang nadangog sa mga magurang ko na namumutan ninda ako o na proud sinda sako. Kaya pagmati ko garo pirming kulang an nagigibo ko para mapaugma sinda.”

⁵ Kun may mga panahon na pagmati ta mayo kitang halaga, puwede tang girumdumon na naggibo mismo si Jehova nin paagi para maparani kita sa saiya. (Juan 6:44) Nahihiling niya an marahay tang mga kuwalidad na tibaad dai ta nahihiling sa satong sadiri, saka aram niya an nasa puso ta. (1 Sam. 16:7; 2 Cron. 6:30) Kaya makakapagtiwala kita sa saiya pag sinabi niya na mahalagang marhay kita.​—1 Juan 3:​19, 20.

6. Ano an namatian ni apostol Pablo manungod sa mga kasalan niya kaidto?

⁶ Bago maaraman an katotoohan, an iba sa sato nakagibo nin mga bagay na tibaad sagkod ngunyan nagpaparibok pa man giraray sa satong konsiyensiya. (1 Ped. 4:3) Dawa an maimbod na mga Kristiyano may mga kaluyahan na pinaglalabanan. Kinokondenar ka daw kan saimong puso? Kun iyo, mararanga ka na maaraman na may maimbod na mga lingkod si Jehova na nakamati man kaiyan. Halimbawa, namati ni apostol Pablo na miserable siya kan inisip-isip niya an saiyang mga kaluyahan. (Roma 7:24) Siyempre, pinagsulsulan na ni Pablo an saiyang mga kasalan asin nagpabawtismo. Pero ibinilang niya pa man giraray an saiyang sadiri na “pinakahamak sa mga apostol” asin “panginot” sa mga makasalan.​—1 Cor. 15:9; 1 Tim. 1:15.

7. Ano an dapat tang tandaan manungod sa mga nagibo tang kasalan kaidto?

⁷ Nangangako an satong Ama sa langit na papatawadon niya kita kun masulsol kita. (Sal. 86:5) Kaya kun talagang pinagbabasulan ta an mga kasalan na nagibo ta, makakapagtiwala kita sa sinabi ni Jehova—pinatawad na niya kita.​—Col. 2:13.

8-9. Paano ta malalabanan an pakamati na kulang an nagigibo ta para mapaugma si Jehova?

⁸ Gusto tang sambahon si Jehova nin bilog tang makakaya. Minsan siring, tibaad mamati kan iba na kulang an nagigibo ninda para makamtan an pag-uyon ni Jehova. Sinabi kan sister na si Amanda: “Inisip ko na naitatao ko ki Jehova an sakong pinakamakakaya pag pirming dakul an nagigibo kong paglilingkod. Sa parati, mas dakul an inaasahan ko sa sadiri ko kisa sa kaya kong maitao. Pag ‘dai ko iyan nagibo,’ iniisip ko na disganado si Jehova sako arog kan pagkadisganar ko sa sadiri ko.”

⁹ Paano ta malalabanan an pakamati na kulang an nagigibo ta para mapaugma si Jehova? Girumdumon na si Jehova bakong mapaghanap, o sobra kaistrikto. Dai niya hinahagad sa sato an labi sa rasonableng makakaya ta. Pinapahalagahan niya an ano man na nagigibo ta para sa saiya basta ginigibo ta an satong pinakamakakaya. Siring man, girumdumon an mga halimbawa sa Bibliya kan mga naglingkod ki Jehova nin bilog na kalag. Isipa si Pablo. Maigot siyang naglingkod nin dakul na taon, na nagbibiyahe nin rinibong kilometro asin nagbibilog nin dakul na kongregasyon. Pero kan nalimitaran an saiyang paghuhulit huli sa sitwasyon niya, naiwara niya daw an pag-uyon nin Diyos? Dai. Padagos niyang ginibo an makakaya niya, asin binendisyunan siya ni Jehova. (Gibo 28:​30, 31) Arog ni Pablo, posible man na mabago an kaya tang maitao para ki Jehova. Pero an mahalaga ki Jehova iyo an motibo ta sa paggibo kaiyan. Pag-ulayan ta ngunyan an nagkapirang paagi kun paano ipinapahiling ni Jehova an pag-uyon niya sa sato.

 PAANO IPINAPAHILING NI JEHOVA NA INUUYUNAN NIYA KITA?

10. Paano ta “madadangog” an pagpahayag ni Jehova kan pag-uyon niya sa sato? (Juan 16:27)

¹⁰ Paagi sa Bibliya. Gustong-gusto ni Jehova na ipahiling an saiyang mamumuton na pag-uyon sa mga namumutan niya. Mababasa sa Kasuratan an duwang pagkakataon na sinabi Niya ki Jesus na siya an Saiyang namumutan asin inuuyunan na Aki. (Mat. 3:17; 17:5) Gusto mo man daw madangog si Jehova na sabihon saimong inuuyunan ka niya? Dai si Jehova aktuwal na nakikipag-ulay sa sato, pero nakikipag-ulay siya sa sato paagi sa mga pahina kan saiyang Tataramon. “Madadangog” ta an boses kan pag-uyon ni Jehova pag binabasa ta an mga tataramon ni Jesus sa Mga Ebanghelyo. (Basahon an Juan 16:27.) Si Jesus an perpektong repleksiyon kan mga kuwalidad kan saiyang Ama. Kaya pag nababasa ta an mga sinabi ni Jesus para ipahayag an saiyang pag-uyon sa saiyang bakong perpekto pero maimbod na mga parasunod, puwede tang imahinaron si Jehova na iyo an nagsasabi sa sato kan mga tataramon na iyan.​—Juan 15:​9, 15.

11. Taano ta pag nag-aagi kita nin mga kasakitan dai iyan nangangahulugan na dai na kita inuuyunan ni Jehova? (Santiago 1:12)

¹¹ Paagi sa saiyang mga ginigibo. Gustong-gusto ni Jehova na tabangan kita, arog kan pagtao kan satong materyal na mga pangangaipo. Kun minsan, puwedeng tugutan ni Jehova na mag-agi kita nin mga kasakitan, arog kan nangyari ki Job. (Job 1:​8-11) An mga pagbalo dai nangangahulugan na dai na kita inuuyunan nin Diyos. Imbes, nagtatao iyan sa sato nin oportunidad para patunayan kun gurano kararom kan satong pagkamuot asin pagtitiwala sa Diyos. (Basahon an Santiago 1:12.) Mamamati ta an saiyang mamumuton na pag-ataman asin suporta mantang tinatabangan niya kitang makatagal.

12. Ano an manunudan ta sa eksperyensiya ni Dmitrii?

¹² Pag-isipan an sarong brother sa Asia na si Dmitrii. Nawaran siya nin trabaho asin sa laog nin dakul na bulan mayo siyang makuang panibagong trabaho. Kaya nagdesisyon siyang dagdagan an oras niya sa ministeryo, na nagpapahiling na nagtitiwala siya ki Jehova. Naglihis an mga bulan, pero dai pa man giraray siya nakakakua nin trabaho. Dangan nagkahilang siya sagkod sa punto na dai na siya makabangon sa higdaan. Nagpuon siyang makamati na mayo siyang halaga bilang agom asin ama, asin nagduda siya kun baga inuuyunan pa siya ni Jehova. Dangan sarong banggi, an saiyang aking babayi nag-print sa sarong papel kan mga tataramon na yaon sa Isaias 30:15: “An saindong kusog yaon sa pagdanay  na kalmado asin pagpahiling nin tiwala.” Dinara iyan sa saiya kan aki niya tapos sinabi kaini, “Papa, pag malain po an pagmati mo, puwede mo pong girumdumon an tekstong ini.” Napag-isip-isip ni Dmitrii na, sa tabang ni Jehova, an saiyang pamilya dai nawaran nin igong pagkakan, bado, asin nin istaran. “An kaipuhan kong gibuhon,” an sabi niya, “magdanay na kalmado saka padagos na magtiwala sa sakong Diyos.” Kun nakakaeksperyensiya ka nin kaparehong problema, makakapagtiwala ka na nagmamalasakit sa saimo si Jehova asin tatabangan ka niya na magtagal.

13. Siisay an puwedeng gamiton ni Jehova para ipahayag an pag-uyon niya sa sato, asin paano?

¹³ Paagi sa kapwa mga parasamba. Ginagamit ni Jehova an satong mga tugang para ipahiling an saiyang pag-uyon sa sato. Halimbawa, puwede niyang pahiruon an iba na pakusugon kita sa oras na kaipuhan ta iyan. Naeksperyensiyahan iyan kan sarong sister sa Asia kan magkaigwa siya nin grabeng problema. Nawaran siya nin trabaho asin naghilang nin grabe. Tapos an saiyang agom nakagibo nin magabat na kasalan asin hinali sa pagigin elder. “Dai ko masabutan kun ta‘no ta nangyayari ini samo,” an sabi niya. “Siguro may nagibo akong sala kaya dai na ako inuuyunan ni Jehova.” Nakimahirak siya ki Jehova na asiguraron siya kan saiyang pag-uyon. Paano iyan ginibo ni Jehova? Sinabi kan sister, “Kinaulay ako kan mga elder sa kongregasyon tapos inasigurar ninda ako na namumutan ako ni Jehova.” Dai nahaloy nakiulay giraray siya ki Jehova para sa tabang. “Kan mismong aldaw na iyan, nakaresibi ako nin sarong surat hali sa sarong grupo nin mga tugang sa kongregasyon,” an sabi niya. “Mantang binabasa ko an nakakapakusog nindang mga tataramon, namati ko na dinangog ako ni Jehova.” Iyo, an pag-uyon ni Jehova parati niyang ipinapahayag paagi sa nakakapakusog na mga tataramon hali sa iba.​—Sal. 10:17.

14. Sa ano pang ibang paagi ipinapahiling ni Jehova an saiyang pag-uyon sa sato?

¹⁴ Ipinapahiling man ni Jehova an saiyang  pag-uyon sa sato paagi sa paggamit sa satong mga kapagtubod para tawan kita nin konseho pag kaipuhan ta iyan. Halimbawa, kan inot na siglo, ginamit ni Jehova si apostol Pablo tanganing isurat an 14 ipinasabong na mga surat sa mga kapagtubod. Kaiba sa mga surat na iyan an direkta pero mamumuton na konseho. Taano ta pinasabngan ni Jehova si Pablo na iiba an siring na konseho? Sarong marahay na Ama si Jehova, asin dinidisiplina niya an mga aki niyang “saiyang ikinakaugma.” (Tal. 3:​11, 12) Kaya pag tinawan kita nin base sa Bibliyang konseho, imbes na isipon na dai na kita inuuyunan nin Diyos, puwede tang mansayon iyan bilang patunay kan pag-uyon niya. (Heb. 12:6) Ano pa an ibang patunay na igwa kita kan pag-uyon ni Jehova?

IBA PANG PATUNAY NA INUUYUNAN KITA NI JEHOVA

15. Kiisay ni Jehova itinatao an saiyang banal na espiritu, asin taano ta nakakapakusog iyan sa satong kumpiyansa?

¹⁵ Tinatawan ni Jehova kan saiyang banal na espiritu an mga inuuyunan niya. (Mat. 12:18) Puwede tang ihapot sa satong sadiri, ‘Naipapahiling ko daw an pira sa mga aspekto kan banal na espiritu nin Diyos sa sakuyang buhay?’ Narisa mo daw na mas nagin mapasensiya ka sa iba kisa kaidtong dai mo pa nabibisto si Jehova? Sa katunayan, miyentras na mas nakakanuod kang ipahiling an bunga kan espiritu nin Diyos, mas mamamati mo man na yaon sa saimo an pag-uyon niya!—Hilingon an kahon na “ An Bunga kan Espiritu Iyo an . . . ”

16. Siisay an ginagamit ni Jehova para ihulit an maugmang bareta, asin ano an namamati mo sa bagay na iyan? (1 Tesalonica 2:4)

¹⁶ Nauugma si Jehova na ipagkatiwala an maugmang bareta sa mga tawong inuuyunan niya. (Basahon an 1 Tesalonica 2:4.) Mangnuhon kun paano nakinabang an sister na si Jocelyn sa paghiras sa iba kan maugmang bareta. Sarong aldaw pagmata si Jocelyn, nakamati siya nin pangluluya nin buot. “Pagmati ko mayo akong kusog saka mayong halaga,” an sabi niya. “Pero payunir ako, saka iskedyul ko nin pagluwas kaidto. Kaya namibi ako dangan nag-service.” Kan agang idto nakaulay ni Jocelyn si Mary, sarong mabuot na babayi na nag-ako nin pag-adal sa Bibliya. Mga pirang bulan pakalihis kaiyan, sinabi ni Mary na namimibi siya kaidto sa Diyos na tabangan siya tapos eksakto man na nagtuktok si Jocelyn. Ano an nanudan ni Jocelyn sa eksperyensiyang iyan? Sinabi niya: “Pagmati ko garo ako kaidto sinasabihan ni Jehova, ‘Inuuyunan taka.’” Siyempre, bako man gabos maako kan  mensaheng ihinuhulit ta. Pero makakasigurado kita na nauugma si Jehova pag ginigibo niyato an satong pinakamakakaya na ihulit an maugmang bareta sa iba.

17. Ano an nanudan mo sa sinabi ni Vicky manungod sa pantubos? (Salmo 5:12)

¹⁷ Itinatao ni Jehova an mga pakinabang na dara kan pantubos sa mga inuuyunan niya. (1 Tim. 2:​5, 6) Pero paano kun pagmati ta dai kita inuuyunan ni Jehova, dawa ngani nagtutubod kita sa pantubos asin bawtisado na? Tandaan, dai kita pirming makakapagtiwala sa sadiri tang pagmati pero makakapagtiwala kita ki Jehova. An mga may pagtubod sa pantubos ibinibilang niyang matanos asin nanunuga siya na bebendisyunan niya sinda. (Basahon an Salmo 5:12; Roma 3:26) Nakatabang ki Vicky an paghurop-hurop manungod sa pantubos. Sarong aldaw, mantang pinag-iisipan na marhay an manungod sa pantubos, narealisar niya: “Nagin mapasensiya sako si Jehova sa halawig nang panahon. . . . Pero garo ko man sana sinasabi saiya: ‘Dai ako angay para mamutan mo. Dai kayang tahuban kan sakripisyo kan saimong Aki an mga kasalan ko.’” Paagi sa paghurop-hurop sa regalong pantubos, nagpuon na mamati niya an pagkamuot ni Jehova. Mamamati ta man an pagkamuot ni Jehova asin an pag-uyon niya mantang hinuhurop-hurop ta an manungod sa pantubos.

18. Kun padagos tang mamumutan an satong Ama sa langit, sa ano kita makakapagtiwala?

¹⁸ Dawa ngani pinagmaigutan ta nang iaplikar an sinambit na mga suhestiyon, puwede pa man giraray kitang makamati kun minsan nin pagkadisganar asin magduda kun baga inuuyunan pa kita ni Jehova. Kun mangyari iyan, tandaan na inuuyunan niya an “mga padagos na namumuot sa Saiya.” (Sant. 1:12) Kaya padagos na rumani ki Jehova asin magin mapagrisa sa ipinapahiling niyang pag-uyon sa saimo. Pirming tandaan na si Jehova “bako man . . . harayo sa lambang saro sa sato.”​—Gibo 17:27.