1. Ano an nagkapirang bendisyon na inaako ta huli sa pagigin kabtang ta kan organisasyon ni Jehova?

 SARONG bendisyon nanggad sa sato na magin kabtang kan organisasyon ni Jehova sa masakit na mga huring aldaw na ini. Mantang padagos na nagrururo an kamugtakan kan kinaban, tinatawan kita ni Jehova nin nagkakasararong espirituwal na pamilya nin magturugang. (Sal. 133:1) Tinatabangan niya kita na magkaigwa nin maugmang buhay pampamilya. (Efe. 5:33–6:1) Asin tinatawan niya kita nin pakasabot asin kadunungan na kaipuhan ta para magkaigwa nin tunay na katuninungan.

2. Ano an kaipuhan tang gibuhon, asin taano?

² Minsan siring, kaipuhan niyatong maghinguwa tanganing padagos kitang maimbod na makapaglingkod ki Jehova. Taano? Huling kun minsan, tibaad makulgan an buot ta huli sa pagkabakong perpekto kan iba. Tibaad pangluyahan man kita nin buot huli sa sadiri tang mga kaluyahan, lalo na kun pauruutro tang nagigibo an iyo man sanang sala. Kaipuhan tang padagos na maglingkod ki Jehova dawa (1) nakulgan an buot ta kan sarong tugang, (2) nadisganar kita kan satong agom, asin (3) disganado kita sa satong sadiri. Pag-uulayan ta sa artikulong ini an lambang sitwasyon na iyan. Pag-uulayan ta man kun ano an manunudan ta sa maimbod na mga karakter sa Bibliya na napaatubang sa arog kaiyan na sitwasyon.

PADAGOS NA MAGLINGKOD DAWA NAKULGAN AN BUOT MO KAN SARONG TUGANG

3. Anong pagbalo an napapaatubang sa mga lingkod ni Jehova?

³ An pagbalo. May mga kapagtubod kita na igwa nin mga ugali na nakakairitar sa sato. Tibaad may magibo an iba na makakapadisganar sa sato o dai sinda magin mabuot sa sato. An mga nanginginot puwedeng masala. An realidad na iyan puwedeng magin dahilan na magduda an iba kun baga ini an organisasyon nin Diyos. Imbes na padagos na maglingkod sa Diyos nin “may pagkasararo” kaiba kan saindang mga tugang, tibaad magpundo na sindang makiiba-iba sa  nakakulog kan buot ninda o tibaad dai na ngani mag-atender sa mga pagtiripon. (Sof. 3:9) Madunong daw na gibuhon iyan? Pag-isipan kun ano an manunudan ta sa sarong karakter sa Bibliya na nakaeksperyensiya man nin kaparehong mga problema.

4. Anong mga pagbalo an napaatubang ki apostol Pablo?

⁴ An halimbawa sa Bibliya. Aram ni apostol Pablo na an saiyang Kristiyanong mga tugang bakong mga perpekto. Halimbawa, hinusgaran tulos siya kan magpuon na siyang mag-atender sa kongregasyon. (Gibo 9:26) Paghaloy-haloy, linibak siya kan iba para rauton an saiyang reputasyon. (2 Cor. 10:10) Nahiling ni Pablo na an sarong magurang sa kongregasyon nakagibo nin salang desisyon na puwedeng makapasingkog sa iba. (Gal. 2:​11, 12) Asin nadisganar siyang marhay sa ginibo kan saro niyang dayupot na kaiba-iba, si Marcos. (Gibo 15:​37, 38) Puwede kutanang tinugutan ni Pablo an arin man sa mga sitwasyon na iyan na papunduhon siya sa pakikiiba-iba sa nakapadisganar sa saiya. Pero pinagdanay niya an positibong pagmansay sa saiyang mga tugang asin padagos siyang nagin aktibo sa paglilingkod ki Jehova. Ano an nakatabang ki Pablo na makapagpadagos?

5. Ano an nakatabang ki Pablo na padagos na magin dayupot sa saiyang mga tugang? (Colosas 3:​13, 14) (Hilingon man an ritrato.)

⁵ Namumutan ni Pablo an saiyang mga tugang. An pagkamuot ni Pablo sa iba nakatabang saiya na magpokus, bako sa pagkabakong perpekto ninda, kundi sa marahay nindang mga kuwalidad. An pagkamuot nakatabang man ki Pablo na gibuhon an isinurat niya sa Colosas 3:​13, 14. (Basahon.) Pag-isipan kun paano niya iyan inaplikar sa ginibo saiya ni Marcos. Dawa ngani binayaan siya ni Marcos sa inot niyang pagbiyahe bilang misyonero, dai si Pablo nagtanom nin kulog nin buot. Paghaloy-haloy, sa saiyang mamumuton na surat sa kongregasyon sa Colosas, inumaw ni Pablo si Marcos bilang sarong pinapahalagahan na kapwa trabahador, na nagin “dakulang karangahan” sa saiya. (Col. 4:​10, 11) Mantang nakapreso sa Roma, espesipikong ipinakiulay ni Pablo si Marcos na padumanon ini sa saiya para tabangan siya. (2 Tim. 4:11) Malinaw, pinatawad ni Pablo an saiyang mga tugang asin padagos na nakiiba-iba sa sainda. Ano an manunudan ta ki Pablo?

6-7. Paano kita padagos na makakapahiling nin pagkamuot sa satong mga tugang sa ibong kan saindang pagkabakong perpekto? (1 Juan 4:7)

⁶ An leksiyon. Gusto ni Jehova na padagos kitang magpahiling nin pagkamuot sa satong mga tugang. (Basahon an 1 Juan 4:7.) Kun an saro gumawi o makagibo sato nin bakong sa-Kristiyano, magtiwala kita na dai niya man iyan tinutuyo asin naghihinguwa man siyang sunudon an mga prinsipyo sa Bibliya. (Tal. 12:18) Namumutan nin  Diyos an maimbod niyang mga lingkod sa ibong kan mga kaluyahan ninda. Dai niya kita isinisikwal pag nasasala kita; asin dai siya nagdadanay na naghihinanakit. (Sal. 103:9) Mahalagang marhay nanggad na arugon ta an satong mapagpatawad na Ama!—Efe. 4:32–5:1.

⁷ Tandaan man na mantang nagrarani an katapusan, kaipuhan tang magdanay na dayupot sa satong mga tugang. Lauman niyato na mas magrabe pa an persekusyon. Tibaad ngani mapreso kita huli sa satong pagtubod. Pag nangyari iyan, mas kakaipuhanon ta nanggad an satong mga tugang. (Tal. 17:17) Pag-isipan an nangyari ki Josep, a sarong elder sa Espanya. Napreso siya pati an iba pang mga brother huli sa saindang neutralidad. Sinabi niya: “Sa presuhan, dakula an tendensiya na mairitar sa sarong kapagtubod huling iribanan lang kamo sa sarong selda. Kaipuhan ming padagos na pagpasensiyahan asin lubos na patawadon an lambang saro. Nakatabang iyan samo na magdanay na nagkakasararo asin maprotektaran an lambang saro. Napapalibutan kami nin mga preso na bakong lingkod ni Jehova. Sarong beses, nabarian ako asin binendahan an takyag ko kaya dai ako makahirong marhay. Pero an saro sa mga tugang linabahan su mga bado ko asin inasikaso ako sa iba pang praktikal na paagi. Namati ko an sinserong pagpadangat sa panahon na kaipuhan kong marhay iyan.” Igwa nanggad kita nin marahayon na mga dahilan para resolberan na ngunyan an ano man na problema ta sa sarong tugang!

PADAGOS NA MAGLINGKOD DAWA NADISGANAR KA KAN SAIMONG AGOM

8. Anong pagbalo an naeeksperyensiyahan kan mga mag-agom?

⁸ An pagbalo. Gabos na mag-agom nagkakaigwa nin mga problema. Prangkang sinasabi kan Bibliya na an mga may agom magkakaigwa nin “mga kasakitan sa saindang buhay.” (1 Cor. 7:28) Taano? Huling an pag-aguman pag-ibanan nin duwang bakong perpektong tawo, na magkalain an mga karakteristiko, mga gusto, asin dai gusto. An mag-agom tibaad magkalain an kultura o dinakulaan. Pag-abot nin panahon, tibaad may ipahiling sindang mga ugali na dai risa kan dai pa sinda kasal. Arin man sa mga iyan puwedeng pagpunan nin mga problema. Imbes na akuon kan kada saro an sala ninda asin parehong maghinguwang resolberan an problema, tibaad basulon ninda an saindang agom. Tibaad ngani maisip pa ninda na magsuwayan na sana o magdiborsiyo. Pero mareresolberan daw kaiyan an problema? b Makakanuod kita sa sarong karakter sa Bibliya na nagdanay na maimbod sa ibong nin masakit na marhay na pag-aguman.

9. Anong pagbalo an naeksperyensiyahan ni Abigail?

⁹ An halimbawa sa Bibliya. Si Abigail naagom ni Nabal, na maisog saka maraot an ugali sabi kan Bibliya. (1 Sam. 25:3) Siguradong nagin masakit para ki Abigail na makaibanan an arog kaiyan na lalaki. Nagkaigwa daw si Abigail nin pagkakataon na bayaan an saiyang agom? Iyo, kan si David, an magigin hadi kan Israel pag-abot nin panahon, magsalakay para gadanon an agom ni Abigail huli sa pang-iinsulto kaini ki David asin sa saiyang mga tawuhan. (1 Sam. 25:​9-13) Puwede kutanang magdulag si Abigail asin pabayaan si David na gibuhon an plano kaini. Pero dai niya iyan ginibo asin kinumbinsir niya si David na dai paggadanon si Nabal. (1 Sam. 25:​23-27) Taano ta ginibo niya iyan?

10. Ano an posibleng nakamotibar ki Abigail para magdanay sa sarong masakit na pag-aguman?

¹⁰ Namumutan ni Abigail si Jehova asin iginagalang niya an Saiyang mga pamantayan sa pag-aguman. Siguradong aram niya an sinabi nin  Diyos ki Adan asin Eva kan ikasal Niya an inot na mag-agom na ini. (Gen. 2:24) Aram ni Abigail na an pagmansay ni Jehova sa pag-aguman sarong sagradong areglo. Gusto niyang mapaugma an Diyos, asin iyan an nagpahiro saiya na gibuhon an ano man na magigibo niya para iligtas an saiyang pamilya, kaiba na an saiyang agom. Huminiro siya tulos para pugulan si David na gadanon si Nabal. Andam man siyang maghagad nin tawad sa sala na bako man siya an naggibo. Malinaw na namutan ni Jehova an babaying ini na pusuan asin bakong makasadiri. Ano an manunudan kan mga agom na babayi asin agom na lalaki sa halimbawa ni Abigail?

11. (a) Ano an linalauman ni Jehova sa mga may agom? (Efeso 5:33) (b) Ano an nanudan mo sa ginibo ni Carmen para dai maraot an pag-ibanan nindang mag-agom? (Hilingon man an ritrato.)

¹¹ An leksiyon. Gusto ni Jehova na igalang kan mga may agom an areglo nin pag-aguman dawa pa kun masakit pakiibanan an saindang agom. Siguradong nauugma an Diyos pag nahihiling niya an mga may agom na naghihinguwang marhay na resolberan an saindang mga problema asin magpahiling nin bakong makasadiring pagkamuot saka paggalang sa lambang saro. (Basahon an Efeso 5:33.) Pag-isipan an halimbawa ni Carmen. Mga anom na taon pagkatapos siyang ikasal, nagpuon si Carmen na makipag-adal sa mga Saksi ni Jehova asin kan huri, nabawtismuhan. “Dai iyan nagustuhan kan agom ko,” an sabi ni Carmen. “Nag-imon siya ki Jehova. Iniinsulto niya ako saka tinatakot na babayaan niya ako.” Dawa arog kaiyan, nagtiyaga si Carmen sa saindang pag-ibanan. Sa laog nin 50 taon, pinagmaigutan niyang magpahiling nin pagkamuot asin paggalang sa saiyang agom. “Sa paglihis nin panahon, nakanuod akong magin mas mapagmansay asin mabuot sa pakikipag-ulay sa sakong agom. Huling aram ko na an pag-aguman sagrado sa paghiling ni Jehova, ginibo ko an sakong pinakamakakaya na ingatan iyan. Dai ko pinurbaran na bayaan an agom ko huling namumutan ko si Jehova.” c Kun magkaigwa nin problema an saindong pag-aguman, makakapagtiwala ka na susuportaran asin tatabangan ka ni Jehova na padagos na maimbod na makapaglingkod sa saiya.

PADAGOS NA MAGLINGKOD DAWA DISGANADO KA SA SAIMONG SADIRI

12. Anong pagbalo an tibaad maeksperyensiyahan ta pag nakagibo kita nin magabat na kasalan?

¹² An pagbalo. Pag nakagibo kita nin magabat na kasalan, tibaad pangluyahan kitang marhay nin buot. Ilinaladawan mismo kan Bibliya an puwedeng magin epekto kaiyan sa satong pagmati—sarong pusong “nalugadan asin runot.” (Sal. 51:17) Dakul na taon na pinagmaigutan  kan brother na si Robert na makuwalipikar bilang sarong ministeryal na lingkod. Alagad, nakagibo siya nin magabat na kasalan asin pagmati niya trinaydor niya si Jehova. “Kan marealisar ko su ginibo ko, nakonsiyensiya akong marhay,” an sabi niya. “Marauton sa pagmati. Grabe su hibi ko tapos namibi ako ki Jehova. Naisip ko ngani kaidto na siguro dai na ako dadangugon nin Diyos. Ta‘no ta madangog pa siya sako? Napamundo ko siyang marhay.” Pag nakagibo kita nin magabat na kasalan, tibaad pangluyahan kitang marhay nin buot huling tibaad maisip tang binayaan na kita ni Jehova kaya mayo na nin rason na maglingkod pa saiya. (Sal. 38:4) Kun arog kaiyan an namamati mo, pag-isipan an sarong maimbod na karakter sa Bibliya na dai nagpundo sa paglingkod ki Jehova dawa nakagibo siya nin magabat na kasalan.

13. Anong magabat na kasalan an nagibo ni apostol Pedro, asin anong mga sala an nagibo niya bago kaiyan?

¹³ An halimbawa sa Bibliya. Kan banggi bago si Jesus gadanon, pirang beses na napasala si apostol Pedro asin kan huri nakagibo siya nin magabat na kasalan. Inot, nagpahiling si Pedro nin sobrang tiwala sa sadiri, na ipinaghahambog na magdadanay siyang maimbod dawa pa bayaan si Jesus kan ibang mga apostol. (Mar. 14:​27-29) Sunod, kan nasa hardin nin Getsemane, pauruutrong dai nagin mapagbantay si Pedro. (Mar. 14:​32, 37-41) Dangan, binayaan ni Pedro si Jesus sa sururog na grupo. (Mar. 14:50) Asin kan huri, tulong beses na pignigaran ni Pedro na bisto niya si Jesus, asin sinabi pa ngani na sumpaon lugod siya kun nagpuputik siya. (Mar. 14:​66-71) Ano an nagin reaksiyon ni Pedro kan marealisar niya an gabat kan nagibo niyang kasalan? Nangruluya siya sa kamunduan dangan huminibi nin grabe, na posibleng nakokonsiyensiyang marhay. (Mar. 14:72) Imahinara an kulog na namati ni Pedro kan pakalihis nin mga pirang oras, an amigo niyang si Jesus ginadan. Siguradong namati ni Pedro na mayo siyang halaga!

14. Ano an nakatabang ki Pedro tanganing padagos na makapaglingkod ki Jehova? (Hilingon an ritrato.)

¹⁴ Si Pedro padagos na nakapaglingkod ki Jehova huli sa nagkapirang dahilan. Dai niya isinuway an sadiri niya; nagduman siya sa mga tugang niya sa espirituwal asin siguradong rinanga siya kan mga ini. (Luc. 24:33) Dugang pa, nagpahiling ki Pedro an binuhay liwat na si Jesus, na posibleng marhay para pakusugon ini. (Luc. 24:34; 1 Cor. 15:5) Paghaloy-haloy, imbes na sawayon si Pedro huli sa nagibo kaini, sinabi ni Jesus sa saiyang amigo na tatawan niya ini nin mas dakulang mga responsabilidad. (Juan 21:​15-17) Aram ni Pedro na magabat an kasalan niya, pero padagos siyang naghinguwa na gibuhon an tama. Taano? Huling aram niya na namumutan pa man giraray siya kan saiyang Kagurangnan, si Jesus. Asin padagos na sinuportaran si Pedro kan saiyang mga  tugang sa espirituwal. Ano an manunudan ta sa halimbawa ni Pedro?

15. Gusto ni Jehova na magin kumbinsido kita sa ano? (Salmo 86:5; Roma 8:​38, 39) (Hilingon man an ritrato.)

¹⁵ An leksiyon. Gusto ni Jehova na magin kumbinsido kita na namumutan niya kita asin na andam siyang patawadon kita. (Basahon an Salmo 86:5; Roma 8:​38, 39.) Pag nakagibo kita nin kasalan, nakokonsiyensiya kita. Normal iyan asin tama sanang makonsiyensiya. Pero dai niyato pag-isipon na dai na kita namumutan o mapapatawad ni Jehova. Imbes, dapat na maghagad tulos kita nin tabang. Si Robert, na sinambit kasubago, nagsabi: “Nakagibo ako nin kasalan ta nagsarig ako sa sadiri ko na malalabanan ko an sugot.” Narealisar niya na kaipuhan niyang dumulok sa mga elder. Sinabi niya: “Kan ginibo ko iyan, ipinamati tulos ninda sako na namumutan ako ni Jehova. Namati ko man na namumutan ako kan mga elder. Tinabangan ninda akong maniwala na dai ako binayaan ni Jehova.” Puwede man kita na magin kumbinsido na namumutan kitang marhay ni Jehova asin na andam siyang patawadon kita kun pagsusulsulan ta an satong mga kasalan, mahagad nin tabang, asin hihinguwahon na marhay na dai na utruhon iyan. (1 Juan 1:​8, 9) Kun kumbinsido kita sa bagay na iyan, makakatabang iyan sa sato na dai magpundo sa paglilingkod dawa nakagibo kita nin kasalan.

16. Taano ta determinado ka na padagos na maglingkod ki Jehova?

¹⁶ Pinapahalagahan na marhay ni Jehova an paghihinguwa tang paglingkudan siya sa masakit na mga huring aldaw na ini. Sa tabang ni Jehova, makakaya tang padagos na maglingkod sa ibong nin mga pagkadisganar. Puwede tang padagos na kamutan an satong mga tugang asin patawadon sinda dawa nakulgan ninda an buot ta. Maipapahiling ta an rarom kan pagkamuot ta sa Diyos asin an paggalang ta sa saiyang mga areglo paagi sa paggibo kan pinakamakakaya ta na resolberan an mga problema na puwedeng mag-abot sa satong pag-aguman. Asin kun makagibo kita nin kasalan, puwede tang hagadon an tabang ni Jehova, akuon an pagkamuot asin pagpapatawad niya, asin padagos na maglingkod sa saiya. Makakasigurado kita na maako kita nin dakul na bendisyon kun ‘dai kita mapundo sa paggibo nin marahay.’—Gal. 6:9.