1-2. Pagkatapos na mabawtismuhan an saro, anong mga bendisyon an makakamtan niya?

 NAKAKAUGMA nanggad na mabawtismuhan asin magin parte kan pamilya ni Jehova. An mga igwa kan pribilehiyong iyan mauyon sa mga tataramon kan salmistang si David, na nagsabi: “Maugma an saro na pinipili asin irinarani mo [Jehova] tanganing mag-istar sa saimong mga patyo.”​—Sal. 65:4.

² Dai ni Jehova dinadara sa saiyang patyo an kun siisay na sana. Arog kan tinukar sa sinundan na artikulo, pinipili niyang irani idtong mga naghihinguwang patunayan na gusto nindang magkaigwa nin haraning relasyon sa saiya. (Sant. 4:8) Pag idinusay mo an sadiri mo ki Jehova asin nagpabawtismo, nagigin mas harani ka ki Jehova sa espesyal na paagi. Makakasigurado ka na pagkatapos kaiyan, ‘iuula sa saimo ni Jehova an bendisyon sagkod sa mayo na nin kulang.’—Mal. 3:10; Jer. 17:​7, 8.

3. An mga Kristiyanong nagdusay asin bawtisado igwa nin anong seryosong responsabilidad? (Eclesiastes 5:​4, 5)

³ Siyempre, an bawtismo kapinunan pa sana. Pagkatapos kaiyan, gugustuhon mong gibuhon an saimong pinakamakakaya para utubon an saimong promesa kan ika magdusay, dawa pa kun mapaatubang ka sa pagtentar o sa pagbalo. (Basahon an Eclesiastes 5:​4, 5.) Bilang mga disipulo ni Jesus, pagmamaigutan mong sunudon na marhay an halimbawa asin pagbuot ni Jesus. (Mat. 28:​19, 20; 1 Ped. 2:21) An artikulong ini makakatabang sa saimo na magibo iyan.

 ‘PADAGOS NA MAGSUNOD’ KI JESUS SA IBONG NIN MGA PAGBALO ASIN PAGTENTAR

4. Sa anong paagi na an mga disipulo ni Jesus may pinapasan na “hariging pasakitan”? (Lucas 9:23)

⁴ Pagkabawtismo, dai pag-isipon na dai ka na magkakaproblema. Sa katunayan, lininaw ni Jesus na an saiyang mga disipulo mapasan nin “hariging pasakitan.” Asin gigibuhon ninda iyan “aroaldaw.” (Basahon an Lucas 9:23.) An buot sabihon daw ni Jesus pirming magigin masakit an buhay kan saiyang mga parasunod? Bako nanggad. Linilinaw niya lang na apuwera sa mga bendisyon na makakamtan ninda, mapapaatubang sinda sa mga kadipisilan. An iba sa mga kadipisilan na iyan tibaad magin mas grabe pa ngani.​—2 Tim. 3:12.

5. Anong mga bendisyon an ipinanuga ni Jesus sa mga naggigibo nin mga pagsasakripisyo?

⁵ Tibaad nakaeksperyensiya ka na nin pagkontra nin mga kapamilya, o tibaad isinakripisyo mo na magkaigwa nin mas dakul na materyal na mga bagay para inuton an intereses kan Kahadian. (Mat. 6:33) Kun iyo, makakasigurado ka na nahiling ni Jehova an gabos na ginibo mo para sa saiya. (Heb. 6:10) Posibleng marhay na naeksperyensiyahan mo na an pagigin totoo kan sinabi ni Jesus: “Mayong nagbaya nin harong o mga tugang na lalaki o mga tugang na babayi o ina o ama o mga aki o mga uma alang-alang sa sako asin alang-alang sa maugmang bareta an dai maako nin 100 na doble ngunyan sa panahon na ini—mga harong, mga tugang na lalaki, mga tugang na babayi, mga ina, mga aki, asin mga uma, na may kasabay na mga pagpersegir—tapos sa maabot na sistema nin mga bagay, nin buhay na daing katapusan.” (Mar. 10:​29, 30) An mga bendisyon na nakamtan mo nakakalabi nanggad kisa sa ano man na sakripisyong ginibo mo.​—Sal. 37:4.

6. Taano ta kakaipuhanon mong padagos na labanan “an kamawutan kan laman” pagkatapos kan bawtismo?

⁶ Pagkatapos kan bawtismo, padagos mo pa man giraray na lalabanan “an kamawutan kan laman.” (1 Juan 2:16) Kun sabagay, saro ka pa man giraray na makasalan na gikan ni Adan. Kun minsan, tibaad mamati mo an arog kan namati ni apostol Pablo. Isinurat niya: “An persona sa laog ko ikinakaugma nanggad an katugunan nin Diyos, pero nahihiling ko sa sakuyang hawak an saro pang katugunan na nakikipaglaban sa katugunan kan sakong isip asin dinadara ako kaiyan na bihag sa katugunan nin kasalan na yaon sa sakuyang hawak.” (Roma 7:​22, 23) Tibaad madisganar ka huli sa mga tendensiya mo na magkasala. Pero an pagsaisip kan ipinanuga mo ki Jehova kan magdusay ka saiya makakapakusog kan determinasyon mo na labanan an sugot. An totoo, makakatabang ngani iyan saimo para dai ka masakitan pag napaatubang ka sa mga sugot. Paano?

7. Paano an pagigin dusay ki Jehova makakatabang sa saimo na magdanay na maimbod sa saiya?

⁷ Pag nagdusay ka ki Jehova, pinapaindahan mo an saimong sadiri. Nangangahulugan ini na nagsasabi ka nin dai sa saimong mga pagmawot asin ambisyon na makakapamundo ki Jehova. (Mat. 16:24) Kaya pag napaatubang ka sa pagbalo, dai mo na kaipuhan na magduwa-duwa kun ano an dapat mong gibuhon. Isinara mo na an pinto sa gabos na pagpipilian apuwera sa saro—an kaimbudan mo ki Jehova. Padagos kang magigin determinado na paugmahon si Jehova. Sa paggibo kaiyan, magigin arog ka ni Job. Dawa napaatubang sa masakiton na mga pagbalo, determinado niyang sinabi: “Papagdanayon ko an sakuyang integridad!”—Job 27:5.

8. Paano an paghurop-hurop sa pamibi mo kan ika magdusay makakatabang sa saimo na labanan an mga sugot?

⁸ Paagi sa paghurop-hurop sa pamibi mo kan nagdusay ka ki Jehova, mapapakusog ka na labanan an ano man na sugot. Halimbawa, makikipag-flirt ka daw sa agom kan iba? Siyempre dai! Nangako ka ki Jehova na dai ka magibo nin arog kaiyan. Kun dai mo tutugutan na makagamot  an maraot na mga pagmawot, malilikayan mo an makulog na mga konsekwensiya kaiyan. Lilikayan mo an “agihan kan mga tampalasan.”​—Tal. 4:​14, 15.

9. Paano an paghurop-hurop sa pamibi mo kan ika magdusay makakatabang man sa saimo na padagos na inuton an espirituwal na mga aktibidad?

⁹ Paano kun alukan ka nin sarong trabaho na makakaulang sa regular na pag-atender mo sa Kristiyanong mga pagtiripon? Dai ka maduwa-duwa sa magigin desisyon mo. Haloy pa bago an alok na iyan, nagsabi ka na sa sadiri mo nin “dai” sa arog kaiyan na mga alok. Kaya, dai ka na maisip pa kun baga magigibuhan mo pa nin paagi na magin mapanggana an sarong bakong marahay na desisyon. Kun gigirumdumon mo an determinasyon ni Jesus na paugmahon an saiyang Ama, tulos asin determinado mong sasayumahan an ano man na aram mong makakapamundo sa Diyos na pigdusayan mo kan saimong buhay.​—Mat. 4:10; Juan 8:29.

10. Paano ka tatabangan ni Jehova pagkatapos kan saimong bawtismo na ‘padagos na magsunod’ ki Jesus?

¹⁰ An mga pagbalo asin mga sugot matao saimo nin oportunidad para ipahiling na determinado kang ‘padagos na magsunod’ ki Jesus. Sa paggibo kaiyan, makakasigurado ka na tatabangan ka ni Jehova. Sinasabi kan Bibliya: “An Diyos maimbod, asin dai niya tutugutan na mapaatubang kamo sa sugot na dai nindo makakaya, kundi kasabay kan sugot magibo man siya nin maluluwasan tanganing matagalan nindo iyan.”​—1 Cor. 10:13.

KUN PAANO PADAGOS NA SUSUNDAN SI JESUS

11. Ano an saro sa pinakamarahay na paagi para padagos na masundan si Jesus? (Hilingon man an ritrato.)

¹¹ Si Jesus maigot, asin nagdanay siyang harani ki Jehova sa pamibi. (Luc. 6:12) Sa katunayan, an sarong pinakamarahay na paagi tanganing padagos mong masundan si Jesus pagkatapos kan saimong bawtismo iyo an padagos  na paggibo nin mga bagay na urog na makakaparani saimo ki Jehova. Sinasabi kan Bibliya: “Ano man an pag-uswag na nagibo na niyato, ipagpadagos ta an paglakaw nin husay sa dalan na iyan.” (Fil. 3:16) Sa pana-panahon, makakadangog ka nin mga eksperyensiya kan mga tugang na naghinguwa na pahiwason an saindang sagradong paglilingkod. Puwedeng nagklase sinda sa School for Kingdom Evangelizers o nagbalyo kun sain mas dakula an pangangaipo. Kun nasa kamugtakan ka, marahayon kun magin pasuhan mo man iyan. Gustong-gusto kan mga lingkod ni Jehova na pahiwason an saindang ministeryo. (Gibo 16:9) Pero paano kun sa ngunyan dai mo magigibo iyan? Dai pag-isipon na maluya ka kisa sa mga nakakagibo kaiyan. An mahalaga padagos kang nagtatagal. (Mat. 10:22) Tandaan na napapaugma mong marhay si Jehova pag ginigibo mo an pinakamakakaya mo base sa saimong kakayahan asin kamugtakan. Mahalagang paagi iyan tanganing padagos mong masundan si Jesus pagkatapos kan bawtismo.​—Sal. 26:1.

12-13. Ano an puwede mong gibuhon pag nagpupuon nang magluya an kaigutan mo? (1 Corinto 9:​16, 17) (Hilingon man an kahon na “ Magdanay sa Daralaganan.”)

¹² Paano kun marisa mo na an mga pamibi mo nagigin pauruutro na sana o dai ka na nauugma sa saimong ministeryo? Paano kun an pagbasa mo nin Bibliya bako nang kapaki-pakinabang arog kan dati? Kun mangyari iyan pagkatapos kan saimong bawtismo, dai pag-isipon na mayo na saimo an espiritu ni Jehova. Bako kang perpekto, asin an saimong pagmati puwedeng magbago sa pana-panahon. Kun marisa mo na nagluluya na an kaigutan mo, pag-isipan an halimbawa ni apostol Pablo. Dawa pinagmaigutan niyang arugon si Jesus, aram niya na may mga panahon na puwedeng bako siyang gayong motibado. (Basahon an 1 Corinto 9:​16, 17.) Sinabi niya: “Dawa kun ginigibo ko iyan na magabat sa buot, igwa pa man giraray ako nin responsabilidad na  ipinagkatiwala sa sako.” Sa ibang pagtaram, determinado si Pablo na utubon an saiyang ministeryo dawa sa mga pagkakataon na bako siyang gayong motibado.

¹³ Sa kaparehong paagi, dai pagtugutan na diktahan ka kan saimong bakong perpektong pagmati sa desisyon na gigibuhon mo. Magin determinado na gibuhon an tama dawa bako kang motibado na gibuhon iyan. Kun padagos mong gigibuhon an tama, puwedeng magbago man an pagmati mo pag-abot nin panahon. An pagpapadanay nin marahay na espirituwal na rutina matabang sa saimo na padagos na masundan si Jesus pagkatapos kan bawtismo. An padagos mong paggibo kaiyan makakapakusog man sa saimong mga kapagtubod.​—1 Tes. 5:11.

“PADAGOS NA BALUON . . . PADAGOS NA PATUNAYAN”

14. Ano an dapat na regular mong siyasaton, asin taano? (2 Corinto 13:5)

¹⁴ Makakatabang man saimo kun pagkatapos mong mabawtismuhan regular mong sisiyasaton an saimong sadiri. (Basahon an 2 Corinto 13:5.) Sa pana-panahon, ebalwaron an saimong buhay asin mga paggawi para mahiling kun baga namimibi ka aroaldaw, nagbabasa asin nag-aadal kan Bibliya, nag-aatender sa mga pagtiripon, asin nagpapartisipar sa ministeryo. Gumibo nin paagi para magin mas kapaki-pakinabang an mga aspektong ini kan saimong pagsamba. Halimbawa, puwede mong ihapot sa saimong sadiri: ‘Kaya ko daw ipaliwanag sa iba an panginot na mga katukduan? May mga paagi daw para magin mas nakakaugma an sakong ministeryo? Gurano kaespesipiko an mga pamibi ko, asin ipinapahiling daw kaiyan na lubos akong nagtitiwala ki Jehova? Regular daw akong nag-aatender sa Kristiyanong mga pagtiripon? Paano ako mas makakapokus asin mas makakapartisipar sa mga pagtiripon?’

15-16. Ano an nanudan mo sa eksperyensiya kan sarong brother mapadapit sa pagsayuma sa sugot?

¹⁵ Mahalaga man na onesto mong siyasaton an sadiri mo mapadapit sa saimong mga kaluyahan. Masasabutan ta iyan sa nagin eksperyensiya kan brother na si Robert. Inistorya niya: “Kan mga 20 anyos na ako, nagkaigwa ako nin part-time na trabaho. Sarong aldaw pagkatapos nin trabaho, inimbitaran ako kan sarong katrabaho sa saiyang harong. Sinabi niya na mayong ibang tawo sa harong niya saka ‘ma-enjoy’ kaming duwa duman. Inot nagdahilan lang ako na dai ako puwede, pero kan huri sinabi ko na talagang dai, tapos nagpaliwanag ako.” Sinayumahan ni Robert an sugot, asin marahay iyan. Pero kan huri kan binalikan niya an pangyayaring idto, naisip niya na may mas marahay  pa kutana siyang magigibo. Inako niya: “Dai ko desididong sinayumahan tulos an alok na arog kan pagsayuma ni Jose sa agom ni Potifar. (Gen. 39:​7-9) Sa katunayan, nabigla ako ta nagin dipisil para sako na magsayuma. Huli sa pangyayaring idto, nahiling ko na kaipuhan ko palan na pakusugon an pakikiamigo ko ki Jehova.”

¹⁶ Puwede kang makinabang kun sisiyasaton mo an saimong sadiri arog kan ginibo ni Robert. Dawa nagibo mong malabanan an sarong sugot, haputon an sadiri, ‘Gurano kahaloy bago ko nasabing dai?’ Kun mahiling mo na may kaipuhan ka pang pauswagon, dai madisganar. Marahay ngani na naaraman mo na an kaluyahan na iyan. Ipamibi iyan, asin gumibo nin mga paagi para pakusugon an saimong determinasyon na mamuhay kauyon kan mga pamantayan ni Jehova sa moral.​—Sal. 139:​23, 24.

17. Paano imbuwelto an pangaran ni Jehova sa nagin eksperyensiya ni Robert?

¹⁷ May manunudan pa kita sa eksperyensiya ni Robert. Sinabi pa niya: “Pagkatapos na sayumahan an alok kan katrabaho ko, sinabi niya sako, ‘Pasado ka!’ Hinapot ko siya kun ano an buot niyang sabihon. Ipinaliwanag niya na may saro siyang amigo, na dating Saksi, na nagsabi sa saiya na gabos na hoben na Saksi igwa nin dobleng pamumuhay asin kun may pagkakataon, makompromiso an mga ini. Kaya sinabihan niya an amigo niyang idto na tetestingon niya daa ako. Ugmahon ako na natawan ko nin onra si Jehova.”

18. Ano an determinado mong gibuhon pagkatapos kan saimong bawtismo? (Hilingon man an kahon na “ Sarong Serye na Ikakaugma Mo.”)

¹⁸ Pag idinusay mo an saimong sadiri ki Jehova asin nagpabawtismo, ipinapahiling mo na gusto mong pabanalon an pangaran niya ano man an mangyari. Asin makakasigurado ka na aram ni Jehova an mga pagbalo asin mga sugot na tinatagalan mo. Bebendisyunan niya an mga paghihinguwa mo na magdanay na maimbod. Magtiwala na paagi sa saiyang banal na espiritu, tatawan ka niya nin kusog na magibo iyan. (Luc. 11:​11-13) Sa tabang ni Jehova, makakaya mong padagos na magsunod ki Jesus pagkatapos mong magpabawtismo.