1. Ano an deskripsiyon kan Bibliya sa tunay na pagkamuot?

 “AN MGA laad [nin pagkamuot] nag-aarab-adab na kalayo, an laad ni Jah. An pagkamuot dai masisigbo nin nagraragasang katubigan, ni maiaanod man iyan nin mga salog.” b (Awit ni Sol. 8:6, 7) Magayunon nanggad na deskripsiyon sa tunay na pagkamuot! An mga tataramon na iyan igwa nin nakakapakusog sa buot na katotoohan para sa mga mag-agom: Puwede kamong magkaigwa nin nagdadanay na pagkamuot sa kada saro.

2. Ano an dapat gibuhon nin sarong mag-agom para masigurado na dai maglipot an saindang pagkamuot?

² Kaipuhan nin paghihinguwa para an sarong mag-agom magkaigwa nin nagdadanay na pagkamuot sagkod na sinda nabubuhay. Para iilustrar, an sarong gatong puwedeng padagos na maglaad—solamente kun gagatungan iyan. Kun papabayaan sana iyan, puwedeng luway-luway na mawara an laad. Sa kaagid na paagi, an pagkamuot sa pag-ultanan nin mag-agom puwedeng magdanay na makusog—solamente kun papakusugon ninda an saindang relasyon. Kun minsan, tibaad mamati nin sarong mag-agom na naglilipot na an saindang pagkamuot, lalo na pag napapagabatan sinda nin mga problema sa pinansiyal, problema sa salud, o kadipisilan sa pagpadakula nin mga aki. Kaya kun igwa ka nin agom, paano mo padagos na mapapalaad “an laad ni Jah” sa saindong pag-aguman? Sa artikulong ini, pag-uulayan ta an tulong paagi para mapagdanay mong makusog an saindong relasyon asin magkaigwa nin maugmang pag-aguman. c

3. Paano an haraning relasyon ki Jehova nakatabang sa sarong mag-agom para mapagdanay na makusog an saindang pagkamuot? (Eclesiastes 4:12) (Hilingon man an ritrato.)

³ Para padagos na mapalaad “an laad ni Jah,” parehong kaipuhan kan mag-agom na maghinguwa para magkaigwa nin haraning relasyon ki Jehova. Paano iyan makakatabang sa saindang pag-aguman? Pag pinapahalagahan kan mag-agom an relasyon ninda sa saindang Ama sa langit, inaaplikar tulos ninda an sadol na ini, kaya nakakatabang iyan sainda na malikayan asin mapangganahan an mga problema na puwedeng magpalipot kan saindang pagkamuot sa kada saro. (Basahon an Eclesiastes 4:12.) An mga tawong makusog an espirituwalidad hinihinguwa man na arugon si Jehova asin pinapatalubo an mga kuwalidad na ipinapahiling niya, arog kan kabuutan, pagigin mapasensiya, asin pagigin mapagpatawad. (Efe. 4:32–5:1) Pag ipinapahiling kan mag-agom an siring na mga kuwalidad, mas madali para sa sainda na pakusugon an saindang pagkamuot. An sarong sister na an pangaran Lena, na labing 25 taon nang may agom, nagsabi, “Mas madali na mamutan asin irespeto an sarong tawo na makusog an espirituwalidad.”

4. Taano ta pinili ni Jehova si Jose asin Maria na magin magurang kan magigin Mesiyas?

⁴ Pag-isipan an sarong halimbawa sa Bibliya. Kan kinaipuhan ni Jehova na pumili nin magigin magurang kan Mesiyas, pinili Niya hali sa dakul na gikan ni David si Jose asin Maria. Taano? Pareho sindang igwa nin personal na relasyon ki Jehova, asin aram ni Jehova na gigibuhon nindang pundasyon sa saindang pag-aguman an saindang pagkamuot sa saiya. Mga mag-agom, ano an manunudan nindo ki Jose asin ki Maria?

5. Ano an manunudan ki Jose kan mga agom na lalaki?

⁵ Sinunod tulos ni Jose an instruksiyon ni Jehova, asin nakatabang iyan saiya na magin sarong marahay na agom na lalaki. Sa kisiyera tulong pagkakataon, nag-ako siya nin mga instruksiyon hali sa Diyos mapadapit sa saiyang pamilya. Sa kada pagkakataon, nagsunod tulos siya, dawa pa mangahulugan iyan nin dakulang mga pagbabago. (Mat. 1:20, 24; 2:13-15, 19-21) Huli sa pagsunod sa paggiya nin Diyos, prinotektaran ni Jose si Maria, sinuportaran, asin itinao an mga pangangaipo kaini. Imahinara na sana kun paanong an mga ginibo ni Jose nagpararom kan pagkamuot asin respeto ni Maria sa agom niya! Mga agom na lalaki, puwede nindong maarog si Jose paagi sa paghihinguwang aramon an sadol na basado sa Bibliya sa kun paano aatamanon an saindong pamilya. d Kun iaaplikar mo an sadol na ini, dawa pa mangahulugan iyan nin paggibo nin mga pagbabago, ipinapahiling mo an pagkamuot mo sa saimong agom asin pinapakusog mo an saindong relasyon. Sarong sister sa Vanuatu na labing 20 taon nang may agom an nagsabi: “Pag hinihinguwa kan agom ko na aramon asin iaplikar an paggiya ni Jehova, mas lalo ko siyang irinerespeto. Pamugtak an buot ko, asin may kumpiyansa sa mga desisyon niya.”

6. Ano an manunudan ki Maria kan mga agom na babayi?

 ⁶ Si Maria igwa nin personal na relasyon ki Jehova; an saiyang pagtubod dai nakadepende ki Jose. Kabisado niya an Kasuratan. (Luc. 1:46) e Nagtatao man siya nin panahon para maghurop-hurop. (Luc. 2:19, 51) Siyertong nagin sarong marahayon na agom si Maria huli sa saiyang espirituwalidad. Sa ngunyan, dakul na agom na babayi an naghihinguwang marhay na arugon si Maria. Halimbawa, sinabi nin sarong sister na an pangaran Emiko: “Kan mayo pa akong agom, may sadiri akong rutina sa espirituwal. Pero kan may agom na ako, huling si agom na an namimibi para samo asin nanginginot sa pagsamba, narisa ko na an pagtubod ko idinidepende ko na sana saiya. Narealisar ko na kaipuhan ko mismong pakusugon an relasyon ko ki Jehova. Kaya ngunyan nagtatagama na ako nin panahon para solo kong makaibanan an Diyos—namimibi, nagbabasa kan Kasuratan, asin naghuhurop-hurop kan saiyang mga kaisipan.” (Gal. 6:5) Mga agom na babayi, mantang padagos nindong pinapakusog an saindong relasyon ki Jehova, an saindong agom lalo pang magkakaigwa nin dahilan para umawon asin mamutan kamo.—Tal. 31:30.

7. Ano an manunudan kan mga mag-agom ki Jose asin Maria kun manungod sa pagsamba na magkaibanan?

⁷ Nagtinabangan man si Jose asin Maria para mapagdanay na makusog an saindang relasyon ki Jehova. Nasasabutan ninda an kahalagahan kan pagsamba ki Jehova na magkaibanan bilang pamilya. (Luc. 2:22-24, 41; 4:16) Puwedeng nagin dipisil iyan gibuhon, lalo na kan nagdadakula na an saindang pamilya, pero nagibo ninda iyan. Marahayon nanggad na halimbawa para sa mga mag-agom ngunyan! Kun igwa kamo nin mga aki, arog ni Jose asin Maria, puwedeng magin masakit an pag-atender sa mga pagtiripon o pag-iskedyul nin panahon para sa pampamilyang pagsamba. Puwedeng magin mas masakit pa ngani na maghanap nin panahon na mag-adal o magpamibi na magkaibanan bilang mag-agom. Alagad, tandaan na pag sinasamba nindo si Jehova na magkaibanan, napaparani kamo sa saiya asin napaparani man kamong mag-agom sa kada saro. Kaya gibuhon na priyoridad an pagsamba.

8. Pag nagkaigwa nin problema an sarong mag-agom, ano an puwede nindang gibuhon para makinabang nin lubos sa pampamilyang pagsamba?

⁸ Paano kun magkaigwa nin problema sa saindong pag-aguman? Puwedeng dai kamo kaiyan ganahan na mag-iribanan para sa pampamilyang pagsamba. Kun iyo, puwedeng magkaigwa nguna kamo nin halipot asin interesanteng mapag-uulayan na pareho nindong gusto. Makakatabang iyan na mapakusog an saindong relasyon asin an saindong pagmawot na gumibo nin espirituwal na mga bagay bilang mag-agom.

9. Taano ta kaipuhan kan mag-agom na magtao nin panahon sa kada saro?

⁹ Mga mag-agom, puwede man nindong mapagdanay na makusog an saindong pagkamuot paagi sa pagtao nin panahon na makaibanan an saindong agom. Kun gigibuhon nindo iyan, posibleng marhay na dai magin harayo an saindong buot sa kada saro. (Gen. 2:24) Mangnuhon kun ano an narisa ni Lilia asin Ruslan dai nahaloy pagkatapos nindang ikasal, labing 15 taon na an nakaagi. Sinabi ni Lilia: “Narisa mi na dikit na sana palan an panahon mi na magkaibanan. Nauubos an oras mi sa trabaho, sa mga gibuhon sa harong, asin kan huri sa samong mga aki. Narealisar mi na kun dai mi tatawan nin panahon an lambang saro bilang mag-agom, puwedeng maparayo an buot mi sa kada saro.”

10. Paano puwedeng iaplikar kan mga mag-agom an prinsipyo na yaon sa Efeso 5:15, 16?

¹⁰ Ano an puwedeng gibuhon kan mga mag-agom para masigurado na matawan ninda nin panahon an kada saro? Tibaad kaipuhan nindong magtagama o mag-iskedyul nin oras para sa saindong agom. (Basahon an Efeso 5:15, 16.) Sarong  brother sa Nigeria na an pangaran Uzondu an nagsabi “Pag naggigibo ako nin iskedyul kan mga gigibuhon ko, iiniiba ko an oras na gagamiton ko para makaibanan ko si agom, asin ginigibo ko iyan na priyoridad.” (Fil. 1:10) Pag-isipan kun paano ni Anastasia, na agom nin sarong paraataman nin sirkito sa Moldova, ginamit sa pinakamarahay an saiyang panahon. Sinabi niya: “Hinihinguwa kong matapos an personal na mga gibuhon ko mantang sibot si agom sa mga responsabilidad niya. Kaya pagkatapos, igwa na kami nin panahon na magkaibanan.” Pero paano kun masakit sa iskedyul nindo na makahanap nin panahon para makaibanan an kada saro?

11. Anong mga aktibidad an ginibo ni Aquila asin Priscila na magkaibanan?

¹¹ Makakanuod an mga mag-agom sa halimbawa ni Aquila asin Priscila, sarong mag-agom na namumutan kan dakul sa inot na mga Kristiyano. (Roma 16:3, 4) Dawa ngani mayo man nin sinasabing dakul na detalye an Bibliya manungod sa saindang pag-aguman, ipinaparisa kaiyan na nagtrabaho sinda, naghulit, asin nagtabang sa iba na magkaibanan. (Gibo 18:2, 3, 24-26) Sa katunayan, pag sinasambit kan Bibliya si Aquila asin Priscila, pirmi sindang sinasambit na magkaibanan.

12. Ano an puwedeng gibuhon nin mag-agom para magkaigwa sinda nin mas dakul na panahon na magkaibanan? (Hilingon man an ritrato.)

¹² Paano maaarog kan mga mag-agom si Aquila asin Priscila? Pag-isipan an dakul na bagay na kaipuhan mong gibuhon asin kan saimong agom. Puwede daw nindong gibuhon an pira sa mga iyan bilang mag-agom imbes na gibuhon iyan nin solo? Halimbawa, si Aquila asin Priscila magkaibanan na naghulit. Regular daw nindong pinaplano na maghulit man na magkaibanan? Magkaibanan man na nagtrabaho si Aquila asin Priscila. An trabaho mo puwedeng iba man sa trabaho kan agom mo, pero puwede daw nindong magkaibanan na gibuhon an mga gibuhon sa harong? (Ecl. 4:9) Pag nagtitinabangan kamo sa paggibo nin sarong gibuhon, mas namamati nindo na magka-team kamo asin may pagkakataon kamo na makapag-ulay. Si Robert asin Linda labing 50 taon nang mag-agom. Sinabi ni Robert: “An totoo, dikit sana an panahon mi para maglibang na magkaibanan. Pero pag naghuhugas ako nin mga plato asin pinupunasan iyan ni agom o pag naghahawan ako sa luwas tapos pigdudumanan niya ako para tumabang, maugmahon ako kaiyan. Sa paggibo mi na magkaibanan, napapakusog an samong pag-ibanan. Padagos man na nagkukusog an samong pagkamuot.”

13. Tanganing magin tunay na harani sa lambang saro, ano an kaipuhan na gibuhon kan mag-agom?

¹³ Alagad tandaan, dai buot sabihon na huling magkaibanan kamo, harani na kamo sa kada saro. Sarong agom na babayi sa Brazil an nagsabi: “Sa ngunyan, huli sa kadakul na pinagkakasibutan, nahiling ko na madalion sanang isipon na nagtatao kami nin panahon sa kada saro dahil lang ta magkaibanan kami sa sarong harong. Nanudan ko na bako sanang pagigin magkaibanan an kaipuhan, kaipuhan man na tawan ko nin atensiyon an pangangaipo kan sakong agom.” Mangnuhon kun paano sinigurado ni Bruno saka kan saiyang agom na si Tays, na matawan nin atensiyon an kada saro. Sinabi ni Bruno: “Pag  magkaibanan kami asin mayong ginigibo, binubutasan mi nguna an samong cellphone asin ini-enjoy an oras na magkaibanan kami.”

14. Kun an mag-agom dai nag-e-enjoy na magkaibanan, ano an puwede nindang gibuhon?

¹⁴ Pero paano kun pareho kamong dai nag-e-enjoy na magkaibanan? Tibaad bakong pareho an pinagkakainteresan nindo, o tibaad naiiritar kamo sa kada saro. Ano an puwede mong gibuhon? Pag-isipan an gatong na sinambit ta kasubago. Dai man tulos iyan maarab-adab. Kaipuhan iyan na luway-luway asin padagos na lagan nin mas darakulang kahoy na panggatong. Sa kaagid na paagi, puwede daw nindong punan na magtagama nin dikit ngunang panahon na magkaibanan kamo kada aldaw? Siguraduhon na an gigibuhon nindo iyo idtong pareho nindong nagugustuhan, bako idtong puwede nindong dai pagkauyunan. (Sant. 3:18) Paagi sa pagpuon sa saradit na bagay, puwede nindong mapakusog giraray an saindong pagkamuot.

15. Taano ta mahalagang marhay an pagpahiling nin respeto para mapagdanay kan mag-agom na makusog an saindang pagkamuot?

¹⁵ An respeto mahalagang marhay sa sarong mag-agom. Garo iyan oksiheno na nagpapangyaring maglaad na marhay an sarong gatong. Kun mayo nin oksiheno, mapapalsok tulos an kalayo. Sa kaagid na paagi, kun mayo nin respeto, maririsa na sana kan mag-agom na naglilipot na an saindang pagkamuot. Sa ibong na lado, an mag-agom na naghihinguwang magpahiling nin respeto sa kada saro hinihinguwa man na magdanay na makusog an saindang pagkamuot. Alagad tandaan na an importante bako kun baga sa pagmati mo nakakapahiling ka nin respeto, kundi kun baga namamatian iyan kan agom mo. Si Penny asin Aret labing 25 taon nang mag-agom. Sinabi ni Penny: “Huling irinerespeto mi an kada saro, mating-mati mi an pagkamuot sa laog kan samong harong. Dai kami nag-aalangan na magsabi kun ano an nasa buot mi huling aram mi na pahahalagahan kan kada saro samo an opinyon mi.” Kaya ano an puwede mong gibuhon para mamati kan saimong agom na talagang irinerespeto mo siya? Pag-isipan an halimbawa ni Abraham asin ni Sara.

16. Ano an manunudan kan mga agom na lalaki sa halimbawa ni Abraham? (1 Pedro 3:7) (Hilingon an ritrato sa cover.)

¹⁶ Trinato ni Abraham nin may respeto si Sara. Kinonsiderar niya an mga opinyon ni Sara asin irinespeto an namamatian niya. Sa sarong pagkakataon, napurisaw na marhay si Sara asin sinabi niya sa agom niya kun gurano siya kadisganado, na binabasol pa ngani si Abraham. Naanggot daw si Abraham asin dai nakapagpugol? Dai. Aram niya na si Sara sarong mapagpasakop asin mapagsuportar na agom. Dinangog ni Abraham si Sara asin hininguwang maresolberan an problema. (Gen. 16:5, 6) Ano an manunudan ta diyan? Mga agom na lalaki, may awtoridad kamo na gumibo nin mga desisyon para sa saindong pamilya. (1 Cor. 11:3) Alagad, pagpahiling nin pagkamuot kun kokonsideraron mo an opinyon kan saimong agom bago magdesisyon, lalo na kun an desisyon may epekto sa saiya. (1 Cor. 13:4, 5) Kun minsan, tibaad mapurisaw an saimong agom asin tibaad kaipuhan niyang sabihon kun ano an nasa buot  niya. Irinerespeto mo daw an namamatian niya paagi sa pagdangog na marhay sa saiya? (Basahon an 1 Pedro 3:7.) Si Angela asin Dmitry ma-30 taon nang mag-agom. Ipinaliwanag ni Angela kun paano ipinapamati sa saiya kan agom niya an pagrespeto sa saiya: “Pirming andam na magdangog sako si Dmitry pag nauuyam ako o pag gusto ko lang na may makaulay. Mapasensiya siya sa sako, dawa pag nagigin emosyonal na marhay ako.”

17. Ano an manunudan kan mga agom na babayi sa halimbawa ni Sara? (1 Pedro 3:5, 6)

¹⁷ Ipinahiling ni Sara na irinerespeto niya si Abraham paagi sa pagsuportar sa saiyang mga desisyon. (Gen. 12:5) Sa sarong pagkakataon, nagdesisyon si Abraham na istimaron an dai inaasahan na mga bisita. Sinabihan niya si Sara na bayaan nguna an ginigibo niya asin magpreparar nin dakul na tinapay. (Gen. 18:6) Huminiro tulos si Sara asin sinuportaran an desisyon ni Abraham. Mga agom na babayi, puwede nindong maarog si Sara paagi sa pagsuportar sa mga desisyon kan saindong agom. Kun gigibuhon nindo iyan, mapapakusog nindo an saindong relasyon bilang mag-agom. (Basahon an 1 Pedro 3:5, 6.) Ipinaliwanag ni Dmitry, na sinambit sa sinundan na parapo, kun paano ipinapamati kan agom niya an pagrespeto sa saiya. Sinabi niya: “Inaapresyar ko an paghihinguwa ni Angela na suportaran an mga desisyon ko dawa pa magkaiba an opinyon mi. Pag bakong marahay an nagin resulta kan desisyon, dai niya ako binabasol.” Madalion nanggad mamutan an saro na irinerespeto ka!

18. Paano makikinabang an mga mag-agom kun hihinguwahon nindang mapagdanay an laad kan saindang pagkamuot?

¹⁸ Sa ngunyan, gusto ni Satanas na sigbuhon an laad nin pagkamuot kan mga mag-agom na Kristiyano. Aram niya na kun mawara kan mag-agom an pagkamuot ninda sa kada saro, puwedeng magpuon na sindang maparayo ki Jehova. Alagad, an tunay na pagkamuot dai nanggad nawawara! Kaya lugod na an pagkamuot sa saindong pag-aguman magin arog kan pagkamuot na sinambit sa Awit ni Solomon. Magin determinado na si Jehova an magin pundasyon kan saindong pag-aguman, magtao nin panahon sa kada saro, asin irespeto an namamatian asin pangangaipo kan lambang saro. Kun gigibuhon nindo iyan, an saindong pag-aguman magtatao nin onra sa Gikanan nin tunay na pagkamuot, si Jehova, asin arog nin sarong gatong na padagos na pinapalaad, an saindong pagkamuot mag-aarab-adab sagkod na kamo nabubuhay.