1. Inaagda ni Jehova an saiyang mga parasamba na gibuhon an ano? (Hilingon man an ritrato.)

 KIISAY kita puwedeng dumulok pag nangangaipo kita nin karangahan asin paggiya? Aram ta an simbag sa hapot na iyan. Makakadulok kita sa Diyos na Jehova paagi sa pamibi. Inaagda niya kita na iyan mismo an gibuhon. Gusto niya na parati kitang mamibi—na “pirming mamibi.” (1 Tes. 5:17) Lubos kitang makakadulok sa saiya sa pamibi asin puwede tang hagadon an paggiya niya sa gabos na aspekto kan satong buhay. (Tal. 3:5, 6) Bilang bukas-palad na Diyos, dai si Jehova nagbubugtak nin limite kun pirang beses kitang mamimibi sa saiya.

2. Ano an pag-uulayan ta sa artikulong ini?

² Pinapahalagahan tang marhay an regalong pamibi. Minsan siring, sa kadakulan kan kaipuhan tang gibuhon, puwedeng masakitan kita na makahanap nin oras para mamibi. Saka tibaad naririsa ta na kaipuhan tang pauswagon an kalidad kan satong mga pamibi. Nagpapasalamat nanggad kita na dakul kitang makukuang pampakusog asin giya hali sa Kasuratan. Sa artikulong ini, pag-uulayan ta kun paano kita makakatagama nin panahon sa pagpamibi paagi sa pagsiyasat sa halimbawa ni Jesus. Pag-uulayan ta man kun paano ta mapapauswag an kalidad kan satong mga pamibi paagi sa pagsambit kan limang importanteng bagay sa satong pamibi.

3. Ano an nanudan ni Jesus kun manungod sa pamibi?

³ Nanudan ni Jesus na pinapahalagahan na marhay ni Jehova an pamibi. Haloy pa bago magdigdi sa daga, nahiling niyang sinimbag kan saiyang Ama an mga pamibi kan maimbod na mga lalaki asin babayi. Halimbawa, yaon si Jesus sa kataid kan saiyang Ama kan simbagon niya an sinserong mga pamibi ni Hana, David, Elias, asin dakul pang iba. (1 Sam. 1:10, 11, 20; 1 Ha. 19:4-6; Sal. 32:5) Iyan nanggad an dahilan kaya tinukduan ni Jesus an  saiyang mga disipulo na parating mamibi asin mamibi na may pagtitiwala!—Mat. 7:7-11.

4. Ano an manunudan ta ki Jesus kun manungod sa pagpamibi?

⁴ Paagi sa saiya mismong mga pamibi ki Jehova, nagpahiling si Jesus nin halimbawa na maaarog kan saiyang mga disipulo. Sa bilog niyang ministeryo, parating namimibi si Jesus. Kaipuhan niyang magtagama nin oras para mamibi huling parati siyang sibot asin napapalibutan nin dakul na tawo. (Mar. 6:31, 45, 46) Nagmamata siya nin amay pagkaaga tanganing magkaigwa siya nin oras na makapagsolo asin mamibi. (Mar. 1:35) Sa saro nganing pagkakataon, magdamlag siyang namibi bago naggibo nin importanteng desisyon. (Luc. 6:12, 13) Asin pauruutrong namibi si Jesus kan banggi bago siya magadan mantang nakapokus sa pagtapos kan pinakamasakit na parte kan saiyang asignasyon digdi sa daga.—Mat. 26:39, 42, 44.

5. Paano ta maaarog si Jesus pag namimibi?

⁵ Itinutukdo sa sato kan halimbawa ni Jesus na gurano man kita kasibot, kaipuhan tang magtagama nin oras para mamibi. Arog ni Jesus, tibaad kaipuhan tang maghanap nin oras para mamibi—magmata nin amay pagkaaga o magpuka nin dikit sa banggi. Kun gigibuhon ta iyan, maipapahiling ta ki Jehova na pinapahalagahan ta an espesyal na regalong ini. Nagigirumduman kan sister na si Lynne an dakula niyang pasasalamat kan primero niyang manudan an manungod sa pribilehiyo na mamibi. Sinabi niya: “Kan maaraman ko na puwede akong makipag-ulay ki Jehova ano man na oras, nakatabang iyan sa sako na mansayon si Jehova bilang dayupot kong amigo asin na pagmaigutan na pauswagon an sakong mga pamibi.” Siguradong dakul sa sato an nakamati man nin arog kaiyan. Kaya pag-ulayan ta an limang bagay na puwede tang sambiton sa satong mga pamibi.

6. Uyon sa Kapahayagan 4:10, 11, maninigo si Jehova na akuon an ano?

⁶ Umawon si Jehova. Sa sarong makangangalas na bisyon, nahiling ni apostol Juan sa langit an 24 kamagurangan na nagsasamba ki Jehova. Inuumaw ninda an Diyos, na sinasabi na maninigo siya na mag-ako “kan kamurawayan asin kan onra saka kan kapangyarihan.” (Basahon an Kapahayagan 4:10, 11.) An maimbod na mga anghel igwa man nin kadakul na dahilan para umawon asin tawan nin onra si Jehova. Yaon sinda sa langit kaiba niya asin namidbid  nindang marhay si Jehova. Nahihiling ninda an saiyang mga kuwalidad paagi sa mga ginigibo niya. Mantang naoobserbaran ninda an mga pamamaagi ni Jehova, nadadagka sinda kaiyan na umawon siya.—Job 38:4-7.

7. Sa anong mga bagay puwede tang umawon si Jehova?

⁷ Gusto ta man na iiba sa satong mga pamibi an pag-umaw ki Jehova, na sinasabi kun ano an nagugustuhan ta asin hinahangaan sa saiya. Mantang binabasa asin pinag-aadalan mo an Bibliya, hinguwahon na mahiling an mga kuwalidad ni Jehova na pinakanagugustuhan mo. (Job 37:23; Roma 11:33) Dangan sabihon ki Jehova kun ano an namamatian mo manungod sa mga kuwalidad na iyan. Puwede ta man na umawon si Jehova huli sa pagtabang niya sa sato asin sa satong bilog na espirituwal na pamilya. Padagos niya kitang inaataman asin pinoprotektaran.—1 Sam. 1:27; 2:1, 2.

8. Ano an pira sa kadakul na dahilan na maipagpapasalamat ta ki Jehova? (1 Tesalonica 5:18)

⁸ Pasalamatan si Jehova. Kadakul kita nin dahilan para pasalamatan si Jehova pag namimibi. (Basahon an 1 Tesalonica 5:18.) Puwede ta siyang pasalamatan sa ano man na marahay na bagay na igwa kita; tutal, hali sa saiya an lambang marahay na balaog. (Sant. 1:17) Halimbawa, puwede tang ipahayag an satong pag-apresyar sa kagayunan kan daga asin sa makangangalas na mga linalang. Puwede ta man sambiton an pasasalamat ta sa satong buhay, sa satong pamilya, sa satong mga amigo, asin sa satong paglaom. Asin gusto tang pasalamatan si Jehova sa pagtugot niya na magkaigwa kita nin haraning relasyon sa saiya.

9. Taano ta kaipuhan tang pauswagon an satong pagigin mapagpasalamat ki Jehova?

⁹ Tibaad kaipuhan tang gumibo nin urog na paghihinguwa para pag-isipan an mga dahilan kun taano ta personal kitang nagpapasalamat ki Jehova. Nabubuhay kita sa bakong mapagpasalamat na kinaban. Sa parati, an mga tawo nakapokus sa kun paano ninda makukua an gusto ninda imbes na kun paano ninda maipapahiling an pasasalamat sa mga bagay na igwa sinda. Kun mapaimpluwensiya kita sa siring na kaisipan, an satong mga pamibi tibaad magin garo lista na sana nin mga kahagadan. Para malikayan iyan, kaipuhan tang padagos na pauswagon asin ipahayag an satong pasasalamat sa gabos na ginigibo ni Jehova para sa sato.—Luc. 6:45.

10. Paano an pagigin mapagpasalamat nakatabang sa sarong sister na makatagal? (Hilingon man an ritrato.)

¹⁰ An pagigin mapagpasalamat makakatabang sa sato na matagalan an mga kasakitan. Pag-isipan an eksperyensiya ni Kyung-sook, na mababasa sa Enero 15, 2015, na isyu kan An Torrengbantayan. Na-diagnose siya na may malalang kanser sa baga. “Grabe an nagin epekto sa sako kan hilang na ini,” an sabi niya. “Pagmati ko nawara sa sako an gabos saka natakot akong marhay.” Ano an nakatabang sa saiya na makatagal? Sinabi niya na kada banggi bago siya magturog, nagduduman siya sa rooftop kan harong ninda asin namimibi nin makusog manungod sa limang bagay na ipinagpapasalamat  niya sa aldaw na iyan. Nakatabang iyan sa saiya na mabawasan an paghadit asin mapahiro na ipahayag an saiyang pagkamuot ki Jehova. Naeksperyensiyahan niya kun paano inaalalayan ni Jehova an saiyang maimbod na mga lingkod pag nag-aagi sinda nin masakit na mga kamugtakan, asin narealisar niya na mas dakul man giraray an mga bendisyon sato kisa sa mga kasakitan. Arog ni Kyung-sook, kadakul kitang dahilan para pasalamatan si Jehova, dawa pa pag may inaagihan kitang kasakitan. An pagpahayag kan satong pasasalamat sa saiya sa pamibi makakatabang sa sato na makatagal asin mapagdanay an satong kaugmahan.

11. Taano ta kaipuhan kan mga disipulo ni Jesus nin kusog nin buot pagkatapos na magbalik siya sa langit?

¹¹ Hagadon ki Jehova na tawan ka nin kusog nin buot sa ministeryo. Bago magbalik sa langit, ipinagirumdom ni Jesus sa saiyang mga disipulo an saindang asignasyon na magpatotoo manungod sa saiya “sa Jerusalem, sa bilog na Judea saka Samaria, asin sagkod sa pinakaharayong parte kan daga.” (Gibo 1:8; Luc. 24:46-48) Dai nahaloy, dinakop kan mga Judiong lider an mga apostol na si Pedro asin Juan asin dinara sinda sa Sanhedrin. Pinagbutan ninda an maimbod na mga lalaking ini na pumundo na sa paghuhulit asin pinatanidan pa ngani sinda. (Gibo 4:18, 21) Ano an nagin reaksiyon ni Pedro asin Juan?

12. Uyon sa Gibo 4:29, 31, ano an ginibo kan mga disipulo?

¹² Bilang simbag sa patanid kan mga Judiong lider nin relihiyon, sinabi ni Pedro asin Juan: “Kun baga tama sa paghiling nin Diyos na magdangog sa saindo imbes na sa Diyos, kamo mismo an maghusgar. Pero para sa samo, dai mi magigibong magpundo sa pagtaram manungod sa mga bagay na samuyang nahiling asin nadangog.” (Gibo 4:19, 20) Kan palibrehon na si Pedro asin Juan, makusog na ipinamibi ki Jehova kan mga disipulo an manungod sa paggibo kan saiyang kabutan. Ipinamibi ninda: “Tabangan mo an saimong mga uripon na padagos na ipahayag an saimong tataramon na daing takot.” Sinimbag ni Jehova an sinserong pamibi na iyan.—Basahon an Gibo 4:29, 31.

13. Ano an manunudan ta sa halimbawa ni Jin-hyuk?

¹³ Puwede tang maarog an mga disipulo paagi sa padagos na paghuhulit dawa pag pinapundo kita kan sekular na mga awtoridad. Pag-isipan an halimbawa kan brother na si Jin-hyuk, na napreso huli sa saiyang neutral na paninindugan. Sa presuhan, inasignar siya na iyo an mag-asikaso sa nagkapirang preso na nakabartolina, pero dai siya puwedeng makipag-ulay sa sainda manungod sa ano man na bagay na mayo man nin koneksiyon sa asignasyon na iyan, kaiba na an Bibliya. Namibi siya na magkaigwa nin kusog nin buot asin magin maingat sa pakikipag-ulay manungod sa katotoohan sa lambang oportunidad. (Gibo 5:29) Sinabi niya: “Sinimbag ni Jehova an mga pamibi ko paagi sa pagtao sako nin kusog nin buot asin kadunungan na makapuon nin limang minutong pag-adal sa Bibliya dawa sa may pinto lang kan selda. Dangan pag banggi, naggigibo ako nin mga surat na itatao ko sa mga preso sa sunod na aldaw.” Makakapagtiwala man kita na tatabangan kita ni Jehova na mautob an satong ministeryo. Arog ni Jin-hyuk, puwede tang ipamibi na tawan kita nin kusog nin buot asin kadunungan.

14. Ano an makakatabang sa sato pag nakakaeksperyensiya kita nin mga problema? (Salmo 37:3, 5)

¹⁴ Hagadon an tabang ni Jehova na makayanan an mga problema. Dakul sa sato an nakakaeksperyensiya nin pisikal o emosyonal na mga kadipisilan, pagkagadan nin sarong mahal sa buhay, sarong masakit na sitwasyon sa pamilya, persekusyon, o iba pang mga problema. Asin lalo pa ngani na nagin dipisil atubangon an mga iyan huli sa pandemya asin mga giyera. Sabihon ki Jehova an gabos na nasa puso mo.  Sabihon sa saiya an manungod sa sitwasyon mo, na garo sinasabi mo iyan sa sarong dayupot na amigo. Magtiwala na “mahiro [si Jehova] para sa saimo.”—Basahon an Salmo 37:3, 5.

15. Paano an pamibi makakatabang sa sato na “magtagal pag nag-aagi nin kasakitan”? Magtao nin halimbawa.

¹⁵ An pagigin matiyaga sa pagpamibi makakatabang sa sato na “magtagal pag nag-aagi nin kasakitan.” (Roma 12:12) Aram ni Jehova an inaagihan kan saiyang mga parasamba—“dinadangog niya an paghagad ninda nin tabang.” (Sal. 145:18, 19) Napatunayan iyan kan 29 anyos na payunir na si Kristie. Dai niya inaasahan na magkakaigwa siya nin grabeng problema sa salud. Huli kaiyan, na-depress siyang marhay. Dangan, naaraman niya na an saiyang ina na-diagnose na may nakakagadan na hilang. Sinabi ni Kristie: “Nagparapamibi ako ki Jehova na tawan niya ako nin kusog na makatagal sa kada aldaw. Hininguwa kong pagdanayon an marahay na rutina sa espirituwal paagi sa pag-atender sa mga pagtiripon asin personal na pag-adal.” Sinabi pa niya: “An pamibi nakatabang sako na matagalan an dipisil na mga sitwasyon. Aram ko na yaon pirmi si Jehova asin an pagsaisip kaiyan nakaranga talagang marhay sa sako. Dawa ngani dai man tulos-tulos mabubulong an hilang ko, sinimbag ni Jehova an mga pamibi ko paagi sa pagtao sako nin panglaog na katuninungan asin kalmadong puso.” Lugod na dai niyato paglingawan na “aram ni Jehova kun paano iligtas sa kasakitan an mga tawong may debosyon sa Diyos.”—2 Ped. 2:9.

16. Taano ta kaipuhan ta an tabang ni Jehova para mapaglabanan an mga sugot?

¹⁶ Hagadon ki Jehova na tabangan kang mapaglabanan an mga sugot. Bilang bakong perpektong mga tawo, kaipuhan ta na padagos na makipaglaban sa sugot na gumibo nin sala. Ginigibo ni Satanas an gabos para magin dipisil na marhay sa sato an pakikipaglaban na iyan. Sa paghihinguwang rauton an satong kaisipan, an saro sa ginagamit ni Satanas iyo an maraot na libangan. Ilinalaog kan siring na mga libangan sa satong isip an maating mga kaisipan—mga kaisipan na nagpapaati sa satong panglaog na pagkatawo  asin puwedeng magin dahilan na makagibo kita nin magabat na kasalan.—Mar. 7:21-23; Sant. 1:14, 15.

17. Paano kita dapat humiro kauyon kan satong pamibi na makalikay sa mga sugot? (Hilingon man an ritrato.)

¹⁷ Kaipuhan ta an tabang ni Jehova kun gusto tang mapaglabanan an mga sugot na gumibo nin sala. Iiniba ni Jesus sa modelong pamibi an pakimahirak na ini: “Dai mo kami pagpabayaan na madaog nin sugot, kundi iligtas mo kami sa saro na maraot.” (Mat. 6:13) Gusto ni Jehova na tabangan kita, pero kaipuhan tang hagadon iyan sa saiya. Dapat man na humiro kita kauyon kan satong mga pamibi. Puwede kitang gumibo nin praktikal na mga lakdang tanganing mabawasan an pagkabantad ta sa salang mga kaisipan asin ideya na popular sa sistema ni Satanas. (Sal. 97:10) Puwede tang panuon an satong isip nin marahay na mga kaisipan paagi sa pagbasa asin pag-adal nin Bibliya. An pag-atender sa mga pagtiripon asin pagpartisipar sa ministeryo makakatabang man na maprotektaran ta an satong kaisipan. Saka nanunuga si Jehova na dai niya tutugutan na mapaatubang kita sa sugot na dai ta makakaya.—1 Cor. 10:12, 13.

18. Mapadapit sa pamibi, ano an kaipuhan ta gabos na gibuhon?

¹⁸ Kaipuhan kan lambang saro sa sato na urog pang mamibi kisa kasuarin man para magdanay na maimbod ki Jehova sa masakit na huring mga aldaw na ini. Magtagama nin oras kada aldaw para sa udok sa pusong pagpamibi. Gusto ni Jehova na ‘sabihon ta sa saiya an laog kan satong puso’ paagi sa pamibi. (Sal. 62:8) Umawon si Jehova asin pasalamatan siya sa gabos na ginigibo niya. Hagadon sa saiya na tabangan kang magin makusog an buot sa ministeryo. Makimahirak sa saiya na tabangan kang makayanan an ano man na problema asin mapaglabanan an ano man na sugot na tibaad napapaatubang sa saimo. Dai pagtugutan an ano man o an siisay man na papunduhon ka sa regular na pamimibi ki Jehova. Minsan siring, paano sinisimbag ni Jehova an satong mga pamibi? Pag-uulayan ta an importanteng hapot na iyan sa sunod na artikulo.