ARTIKULONG PAG-AADALAN 21
KANTA 107 An Diyos Arugan nin Pagkamuot
Kun Paano Makakahanap nin Magigin Agom
“Siisay an makakahanap nin may kakayahan na agom na babayi? An saiyang halaga mas labi pang marhay kisa sa mga korales.”—TAL. 31:10.
POKUS
Mga prinsipyo sa Bibliya na makakatabang kun paano an saro makakahanap nin marahay na magigin agom asin kun paano makakatabang an kongregasyon sa mga daing agom na gustong mag-agom.
1-2. (a) Anong mga bagay an dapat pag-isipan nin sarong daing agom na Kristiyano bago magpuon na makipag-ilusyon? (b) Ano an buot sabihon kan “pag-ilusyunan”? (Hilingon an “Paliwanag Dapit sa Tataramon.”)
GUSTO mo daw na mag-agom? Dawa ngani an pagkaigwa nin agom dai man kaipuhan para magin maugma, dakul na Kristiyanong daing agom, hoben man o may edad na, an nag-iisip na magkaigwa nin agom. Siyempre, bago mag-ilusyon o magpailusyon, dapat na handa ka na sa buhay may agom pag-abot sa pinansiyal, espirituwal, asin emosyonal na paagi. a (1 Cor. 7:36) Kun siring, mas posibleng marhay na magkaigwa ka nin maugmang buhay may agom.
2 Alagad, bako pirming madali na makahanap nin angay na maaagom. (Tal. 31:10) Asin dawa nakahanap ka na nin saro na nagugustuhan mo, tibaad bakong madali na punan an pag-ilusyon. b Sa artikulong ini, pag-uulayan ta kun ano an makakatabang sa mga Kristiyanong daing agom na makahanap nin marahay na maaagom asin magpuon na makipag-ilusyon. Makakanuod man kita kun paano makakatabang an kongregasyon sa mga gustong mag-agom.
PAGHANAP NIN ANGAY NA MAGIGIN AGOM
3. Anong mga bagay an dapat pag-isipan nin sarong daing agom na Kristiyano pag naghahanap nin saro na puwede niyang magin agom?
3 Kun gusto mo na magkaigwa nin agom, marahay na pag-isipan mo kun ano an hinahanap mo sa sarong agom bago magpuon na makipag-ilusyon. Ta kun dai, tibaad mabaliwala mo an saro na angay kuta na magin agom mo o makipag-ilusyon ka sa saro na bako man angay sa saimo. Pero siyempre, dapat na sarong bawtisadong Kristiyano an hahanapon mong magin agom. (1 Cor. 7:39) Pero bakong gabos na bawtisado magigin marahay na agom para saimo. Kaya puwede mong haputon an saimong sadiri: ‘Ano an mga pasuhan ko sa buhay? Anong mahalagang mga kuwalidad an hinahanap ko sa sarong agom? Rasonable daw an mga inaasahan ko?’
4. Ano an iiniiba nin nagkapira sa saindang mga pamibi?
4 Kun gusto mo na magkaigwa nin agom, siyertong ipinamibi mo na an manungod diyan. (Fil. 4:6) Siyempre, dai ni Jehova pinapangakuan an siisay man nin magigin agom. Pero nasasabutan niya kun ano an mga pangangaipo asin namamatian mo, asin matatabangan ka niya sa paghanap nin maaagom. Kaya padagos na sabihon saiya an mga pagmawot asin namamatian mo. (Sal. 62:8) Ipamibi na tabangan kang magin mapasensiya asin magkaigwa nin kadunungan. (Sant. 1:5) Sinabi ni John, c sarong daing agom na brother sa Estados Unidos, kun ano an mga iiniiba niya sa saiyang mga pamibi: “Sinasabi ko ki Jehova an mga kuwalidad na gusto ko sa sarong agom. Ipinapamibi ko na lugod magkaigwa ako nin mga oportunidad na mabisto an saro na puwede kong magin agom. Hinahagad ko man ki Jehova na tabangan akong mapauswag an mga kuwalidad para magin saro akong marahay na agom.” Si Tanya na sarong sister na taga Sri Lanka, nagsabi: “Mantang naghahanap nin saro na puwede kong magin agom, hinahagad ko ki Jehova na tabangan niya akong magdanay na maimbod, positibo, saka maugma.” Dawa dai ka pa nakakahanap nin saro na puwede mong magin agom, nangangako si Jehova na padagos niyang itatao an pisikal asin emosyonal na mga pangangaipo mo.—Sal. 55:22.
5. Sa anong mga pagkakataon puwedeng makabisto an sarong daing agom na Kristiyano nin saro na namumuot ki Jehova? (1 Corinto 15:58) (Hilingon man an ritrato.)
5 Dinadagka kita kan Bibliya na magkaigwa nin “dakul [na] ginigibo sa gibuhon kan Kagurangnan.” (Basahon an 1 Corinto 15:58.) Kun pirmi kang sibot sa paglilingkod ki Jehova asin nakakaibanan an manlain-lain na mga brother asin sister, bako lang nakakapakusog na pag-iribanan an maeeksperyensiyahan mo kundi magkakaigwa ka man nin mga oportunidad na makabisto an iba pang daing agom, na arog mo, nakapokus man sa paglilingkod ki Jehova. Asin mantang ginigibo mo an pinakamakakaya mo para mapaugma si Jehova, mamamatian mo man an tunay na kaugmahan.
Kun pirmi kang sibot sa paglilingkod ki Jehova asin nakakaibanan an manlain-lain na tugang, tibaad may mabisto ka na nag-iisip man na mag-agom (Hilingon an parapo 5)
6. Mantang naghahanap nin magigin agom, ano an dapat tandaan nin sarong daing agom na Kristiyano?
6 Pero mag-ingat, ta tibaad an paghanap mo nin maaagom iyo na an magin pinakaimportante sa buhay mo. (Fil. 1:10) An tunay na kaugmahan nakadepende, bako sa kun baga may agom ka o mayo, kundi sa relasyon mo ki Jehova. (Mat. 5:3) Asin mantang mayo ka pang agom, puwedeng mas magin buwelo ka sa pagpahiwas kan saimong ministeryo. (1 Cor. 7:32, 33) Gamiton sa pinakamarahay na paagi an panahon na iyan. Si Jessica, sarong sister na taga Estados Unidos na nag-agom kan madali na siyang mag-40 anyos, nagsabi: “Pirmi akong sibot kaidto sa ministeryo, asin nakatabang iyan sa sako na magin kontento dawa gusto ko nang mag-agom.”
MAGTAO NIN PANAHON PARA MAG-OBSERBAR
7. Taano ta madunong na obserbaran mo nguna an saro na nagugustuhan mo bago sabihon saiya an namamatian mo? (Talinhaga 13:16)
7 Paano kun sa hiling mo puwede siyang magin marahay na agom? Mapahiling ka daw tulos nin interes sa saiya? Sinasabi kan Bibliya na an sarong madunong na tawo nagkukua nguna nin kaaraman bago humiro. (Basahon an Talinhaga 13:16.) Kaya sarong kadunungan kun mataktika mong oobserbaran nguna siya bago ka magpahiling nin interes. “Puwedeng madaling magkagusto sa sarong tawo, pero puwedeng madali man iyan na mawara,” an sabi ni Aschwin na taga Netherlands. “Kaya kun matao ka nguna nin panahon para obserbaran an saro, dai ka magigin pabigla-bigla sa pag-ilusyon.” Saro pa, mantang inoobserbaran mo siya, tibaad marealisar mo na bako siya an hinahanap mo.
8. Paano puwedeng obserbaran kan saro na daing agom an nagugustuhan niya? (Hilingon man an ritrato.)
8 Paano mo mataktikang oobserbaran an saro? Sa mga pagtiripon kan kongregasyon o sa mga pagtiripon-tipon, tibaad may marisa ka manungod sa saiyang espirituwalidad, personalidad, asin paggawi. Sairisay an mga amigo niya, asin ano an mga ipinapakipag-ulay niya? (Luc. 6:45) Magkapareho daw kamo nin mga pasuhan? Puwede kang maghapot sa mga elder sa kongregasyon niya o sa iba pang maygurang na Kristiyano na nakakabistong marhay sa saiya. (Tal. 20:18) Puwede mong ihapot an manungod sa reputasyon asin mga kuwalidad niya. (Ruth 2:11) Mantang inoobserbaran mo siya, magin maingat ta tibaad dai na siya magin komportable. Irespeto an saiyang pagmati, pribadong buhay, o personal na mga bagay.
Bago magpahiling nin interes, mataktikang obserbaran nguna an saro na nagugustuhan mo (Hilingon an parapo 7-8)
9. Bago mo sabihon sa saro na nagugustuhan mo siya, sa ano ka dapat magin kumbinsido?
9 Sagkod nuarin mo siya oobserbaran bago ka magpahiling nin interes? Kun masabi ka tulos sa saiya, tibaad isipon niya na pabigla-bigla ka. (Tal. 29:20) Sa ibong na lado, kun papahaluyon mo man, tibaad isipon niya na saro kang tawong dai makapagdesisyon, lalo na kun naririsa niya na may gusto ka sa saiya. (Ecl. 11:4) Tandaan, bago mo sabihon sa saiya an namamatian mo, dai mo man kaipuhan na magin kumbinsido na siya na an papakasalan mo. Pero dapat na kumbinsido kang handa ka nang mag-agom asin na puwede siyang magin angay na agom para sa saimo.
10. Ano an dapat mong gibuhon kun marisa mo na may saro na nagkakagusto saimo pero mayo ka man nin gusto sa saiya?
10 Paano kun narisa mo na may nagkakagusto sa saimo? Kun mayo ka nin gusto sa saiya, malinaw na ipahiling iyan paagi sa saimong hiro. Bako nanggad kabuutan kun matao ka sa saiya nin impresyon na may posibilidad na magkaigwa kamo nin relasyon pero an totoo mayo man palan.—1 Cor. 10:24; Efe. 4:25.
11. Sa mga kadagaan na an pag-ilusyunan o pag-aguman iinaareglo kan iba, anong mga bagay an dapat na konsideraron?
11 Sa nagkapirang kadagaan, an mga magurang o iba pang adulto an inaasahan na mapili nin maaagom para sa saindang daing agom na mga kapamilya. Sa ibang kadagaan man, an mga kapamilya o amigo kan saro na daing agom an naghahanap kan puwede kaining magin agom. Dangan naggigibo nin paagi na magkabistuhan sinda para mahiling kun magugustuhan ninda an kada saro. Kun may nagpapatabang saimo sa pag-ilusyon o sa paghanap nin maaagom, pag-isipan an mga gusto asin pangangaipo kan lambang lado. Pag nakahanap ka na nin puwede niyang mapangagom, hinguwahon na marhay na maaraman an personalidad, mga kuwalidad, asin urog sa gabos, an espirituwalidad kaini. An haraning relasyon ki Jehova an urog na mas mahalaga kisa sa kuwarta, edukasyon, o estado sa buhay. Alagad, tandaan, na nasa sainda an pinal na desisyon kun gusto nindang magkaaguman.—Gal. 6:5.
PAG-ILUSYON
12. Kun gusto mong makipag-ilusyon sa saro, paano mo iyan puwedeng sabihon sa saiya?
12 Kun gusto mong makipag-ilusyon sa saro, paano mo iyan puwedeng sabihon sa saiya? d Puwede kang maghanap nin paagi para makaulay mo siya, iyan man sa lugar na may ibang tawo o paagi sa telepono. Malinaw na sabihon sa saiya an saimong intensiyon. (1 Cor. 14:9) Kun kinakaipuhan, tawan siya nin panahon na pag-isipan an magigin simbag niya. (Tal. 15:28) Asin kun dai siya interesadong magkaigwa nin romantikong relasyon sa saimo, irespeto an desisyon niya.
13. Ano an puwede mong gibuhon kun may saro na magsabi saimo na nagkakagusto siya sa saimo? (Colosas 4:6)
13 Paano kun may saro na magsabi sa saimo na nagkakagusto siya sa saimo? Posibleng marhay na kinaipuhan niya nin kusog nin buot para magdulok sa saimo, kaya magin mabuot asin magpahiling nin respeto. (Basahon an Colosas 4:6.) Kun kaipuhan mo nin panahon para pag-isipan kun baga gusto mong makipag-ilusyon sa saiya, sabihon iyan. Minsan siring, hinguwahon na sabihon saiya an simbag mo sa pinakamadaling panahon na posible. (Tal. 13:12) Kun dai ka interesado, mabuot asin malinaw na sabihon iyan sa saiya. Mangnuhon kun paano nagsimbag si Hans, sarong brother na taga Austria, kan may sister na nagdulok sa saiya: “Sinabi ko saiya an simbag ko sa mabuot asin malinaw na paagi. Sinabi ko tulos iyan sa saiya ta habo ko siyang palaumon. Kaya pagkatapos kaiyan, nagin maingat ako sa paagi ko nin pagtratar sa saiya.” Sa ibong na lado, kun gusto mo na makipag-ilusyunan sa saiya, ipakipag-ulay saiya an namamatian mo asin mga inaasahan mapadapit sa saindong pag-ilusyunan. Puwedeng magkalain an saindong mga inaasahan, depende sa saindong kultura o iba pang dahilan.
PAANO MASUSUPORTARAN KAN IBA AN MGA KRISTIYANONG DAING AGOM?
14. Paano ta susuportaran an mga Kristiyanong daing agom paagi sa satong mga tataramon?
14 Paano kita gabos makakasuportar sa mga daing agom na Kristiyano na gustong mag-agom? An sarong paagi iyo an pagigin maingat sa mga sinasabi ta. (Efe. 4:29) Puwede tang ihapot sa satong sadiri: ‘Sinusubahan ko daw sinda nin mga bagay na puwedeng makakulog o maka-pressure sa sainda na mag-agom? Pag nakakahiling ako nin nag-uulay na sarong brother saka sarong sister na parehong daing agom, iniisip ko daw tulos na nagkakagustuhan sinda sa lambang saro?’ (1 Tim. 5:13) Saro pa, dai ta dapat nuarin man ipamati sa mga daing agom na Kristiyano na garo baga may kulang sa buhay ninda huling mayo sindang agom. Si Hans na sinambit kasubago, nagsabi: “May mga tugang na nagsasabing, ‘Taano ta dai ka pa nag-aagom? Nasa edad ka na.’ Huli sa arog kaiyan na mga komento namamati kan mga mayong agom na dai sinda pinapahalagahan asin nakakadagdag sana iyan sa pressure na namamati ninda na mag-agom na.” Mas marahay nanggad na maghanap nin mga oportunidad na komendaran an mga daing agom na Kristiyano!—1 Tes. 5:11.
15. (a) Kauyon kan prinsipyo na mababasa sa Roma 15:2, ano an dapat tang pag-isipan bago tabangan an saro na makahanap nin puwede niyang magin agom? (Hilingon man an ritrato.) (b) Anong mahalagang mga leksiyon an nanudan mo sa video?
15 Paano kun sa hiling ta bagay sa kada saro an sarong brother saka sister? Sinasabi sa sato kan Bibliya na isipon an namamatian kan iba. (Basahon an Roma 15:2.) Dakul na daing agom an habong irinireto sinda, asin dapat tang igalang kun ano an gusto ninda. (2 Tes. 3:11) An iba nauugma na may nagtatabang sa sainda, pero dai ta dapat sinda panginutan kun dai man hinahagad an satong tabang. e (Tal. 3:27) Mas gusto man kan iba an bakong gayong direktang paagi. Si Lydia, sarong daing agom na sister sa Germany, nagsabi: “Puwede mong iiba an brother saka an sister sa sarong dakulang grupo. Gumibo lang nin paagi para magkaigwa sinda nin oportunidad na makapag-ulay, dangan nasa sainda na an desisyon.”
An pagtiripon-tipon bilang sarong dakulang grupo nagtatao nin oportunidad sa mga daing agom na Kristiyano na magkabistuhan (Hilingon an parapo 15)
16. Ano an dapat tandaan kan mga Kristiyanong daing agom?
16 Gabos kita—may agom man o mayo—puwedeng magkaigwa nin maugma asin nakakakontentong buhay! (Sal. 128:1) Kaya kun gusto mong mag-agom pero mayo ka pang nanunumpungan, padagos na magpokus sa paglilingkudan mo ki Jehova. Sarong sister na taga Macao na an pangaran Sin Yi an nagsabi: “Kun ikukumparar sa lawig nin panahon na makakaibanan mo an saimong agom sa Paraiso, an pagigin daing agom haliputon sana. I-enjoy an panahon na iyan, asin gamiton iyan sa pinakamarahay na paagi.” Pero paano kun may nahanap ka na asin nagpuon na kamong mag-ilusyunan? Sa sunod na artikulo, pag-uulayan ta kun paano magigin mapanggana an pag-ilusyunan.
KANTA 137 Maimbod na mga Babayi, mga Tugang na Kristiyana
a Para matabangan ka na mahiling kun baga handa ka na, hilingon sa jw.org/tl an artikulong “Pakikipag-ligawan at Pakikipagkasintahan—Bahagi 1: Handa Na Ba Ako?”
b PALIWANAG DAPIT SA TATARAMON: Sa artikulong ini asin sa masunod, an “pag-ilusyunan” nanunungod sa panahon kun sain an sarong lalaki asin an sarong babayi mas nagkakabinistuhan para mahiling kun baga angay sinda na magin mag-agom. Sa ibang mga nasyon, nanunungod man iyan sa pakikipag-date, urog na pagmidbid sa saro, o pagkaigwa nin romantikong relasyon. An pag-ilusyunan nagpupuon pag an sarong lalaki saka sarong babayi malinaw na sinabi sa kada saro na nagkakaginustuhan sinda asin nagpapadagos iyan sagkod na magdesisyon sinda na magpakasal o tapuson na an saindang relasyon bilang magkailusyon.
c Sinalidahan an nagkapirang pangaran.
d Sa nagkapirang kultura, sa parati an brother an nagdudulok sa sister para magpuon na mag-ilusyon. Minsan siring, mayo man nin maraot kun magdesisyon an sarong sister na siya an magdulok sa brother. (Ruth 3:1-13) Para sa dagdag pang impormasyon, hilingon an artikulong “Ang mga Kabataan ay Nagtatanong . . . Paano Ko Kaya Masasabi sa Kaniya ang Aking Nadarama?” sa Gumising! na Oktubre 22, 2004.
e Hilingon sa jw.org an video na Mapangganang mga Nakikipaglaban Para sa Pagtubod—Mga Kristiyanong Daing Agom.
