1. Paano ta naaraman na gusto ni Jehova na magin harani sa sato?

 INAAGDA kita ni Jehova na rumani sa saiya. (Sant. 4:8) Gusto niya na magin Diyos ta siya, magin Ama ta siya, asin magin Amigo ta siya. Sinisimbag niya an satong mga pamibi asin tinatabangan kita sa masakit na mga panahon. Asin ginagamit niya an saiyang organisasyon para tukduan kita asin proteksiyunan kita. Pero ano an dapat tang gibuhon para magin harani ki Jehova?

2. Paano kita puwedeng rumani ki Jehova?

² Puwede kitang rumani ki Jehova paagi sa pagpamibi sa saiya asin pagbasa kan saiyang Tataramon saka paghurop-hurop kaiyan. Mantang ginigibo ta iyan, napapano kita nin pagkamuot asin pagpapasalamat sa saiya. Napapahiro kita na itao sa saiya an pagsunod asin pag-umaw na maninigo nanggad sa saiya. (Kap. 4:11) Mantang mas namimidbid ta si Jehova, mas magtitiwala man kita sa saiya asin sa organisasyon na itinao niya para tabangan kita.

3. Paano hinihinguwa kan Diyablo na isuway kita ki Jehova, pero ano an makakatabang sa sato para dai ta nuarin man bayaan an satong Diyos asin an saiyang organisasyon? (Salmo 31:13, 14)

³ Minsan siring, hinihinguwa kan Diyablo na isuway kita ki Jehova, lalo na pag napapaatubang kita sa mga kadipisilan. Paano niya iyan ginigibo? Hinihinguwa niya na luway-luway na paluyahon an satong pagtitiwala ki Jehova saka sa saiyang organisasyon. Pero makakaya tang labanan an saiyang mga taktika. Pag an satong pagtubod makusog asin an satong pagtitiwala ki Jehova dai natatanyog, dai ta babayaan an satong Diyos asin an saiyang organisasyon.—Basahon an Salmo 31:13, 14.

4. Ano an pag-uulayan ta sa artikulong ini?

 ⁴ Sa artikulong ini, pag-uulayan ta an tulong kadipisilan na puwedeng hali sa luwas kan kongregasyon; an kada saro kaiyan puwedeng paluyahon an satong pagtitiwala ki Jehova asin sa saiyang organisasyon. Paano an mga kadipisilan na iyan makakapasuway sa sato ki Jehova? Asin ano an magigibo ta para labanan an mga paghihinguwa ni Satanas?

5. Paano puwedeng mapaluya kan mga kasakitan an satong pagtitiwala ki Jehova asin sa saiyang organisasyon?

⁵ Kun minsan, napapaatubang kita sa mga kasakitan—siring kan pagkontra kan satong pamilya o kun mawaran kita nin trabaho. Paano puwedeng mapaluya kan siring na mga kasakitan an satong pagtitiwala sa organisasyon ni Jehova asin maisuway kita sa saiya? Pag huruhalawig nang panahon kitang nag-aagi nin kasakitan, puwedeng mawaran kita nin paglaom asin pangluyahan nin buot. Inaaprobetsaran ni Satanas an siring na mga sitwasyon para papagdudahon kita kun baga namumutan kita ni Jehova. Gusto kan Diyablo na isipon ta na si Jehova o an Saiyang organisasyon an dahilan kan satuyang pagsakit. Arog kaiyan an nangyari sa nagkapirang mga Israelita sa Ehipto. Kan inot, nagtubod sinda na pinili ni Jehova si Moises asin Aaron para iligtas sinda sa pagkauripon. (Exo. 4:29-31) Pero dai nahaloy, kan mas pinasakit ni Faraon an saindang buhay, ibinasol ninda ki Moises asin Aaron an saindang mga problema. Sinabi ninda sa sainda: “Grabe an pagkauyam sa samo ni Faraon saka kan mga lingkod niya dahil sa ginibo nindo. Garo man sana nindo binugtakan nin espada an saindang kamot para gadanon kami.” (Exo. 5:19-21) Binasol ninda an maimbod na mga lingkod nin Diyos. Nakakamundo nanggad! Kun huruhalawig nang panahon na nag-aagi ka nin mga kasakitan, paano mo mapapagdanay na makusog an saimong pagtitiwala ki Jehova asin sa saiyang organisasyon?

6. Ano an manunudan ta ki propeta Habakuk manungod sa kun paano makakayanan an mga kasakitan? (Habakuk 3:17-19)

⁶ Sabihon ki Jehova paagi sa pamibi an gabos na nasa puso mo, asin maghagad sa saiya nin tabang. Si propeta Habakuk napaatubang sa dakul na kasakitan. May pagkakataon na garo baga nagduda siya kun baga nagmamakulog sa saiya si Jehova. Kaya sinabi niya ki Jehova paagi sa pamibi an gabos na namamatian niya. Sinabi niya: “O Jehova, sagkod nuarin ako mahagad nin tabang bago mo ako dangugon? . . . Ano ta pinapabayaan mo lang an pang-aapi?” (Hab. 1:2, 3) Sinimbag ni Jehova an udok sa puso na pamibi kan saiyang maimbod na lingkod. (Hab. 2:2, 3) Pagkatapos na hurop-hurupon an ginibong mga pagliligtas ni Jehova, nagin maugma giraray si Habakuk. Nagin kumbinsido siya na nagmamakulog sa saiya si Jehova asin na tatabangan niya siya na matagalan an ano man na pagbalo. (Basahon an Habakuk 3:17-19.) Ano an leksiyon sa sato? Pag napapaatubang ka sa mga kasakitan, mamibi ki Jehova asin sabihon sa saiya an namamatian mo. Dangan hagadon an saiyang tabang. Pag ginibo mo iyan, makakapagtiwala ka na itatao ni Jehova an kusog na kaipuhan mo para makatagal. Asin pag nahihiling mo an saiyang tabang, mas makusog an saimong pagtubod sa saiya.

7. Sa ano pinurbaran na kumbinsiron si Shirley kan saiyang mga kaparyente, asin ano an nakatabang sa saiya para dai mawara an saiyang pagtubod ki Jehova?

⁷ Papagdanayon an saimong espirituwal na rutina. Pag-isipan kun paano an paggibo kaiyan nakatabang ki Shirley, sarong sister na taga Papua New Guinea, kan mapaatubang siya sa mga kasakitan. b Tios an pamilya ni Shirley asin, kun minsan, nasasakitan sindang magkaigwa nin igong kakanon. Sarong kaparyente an pinurbaran na paluyahon an saiyang pagtitiwala ki Jehova. Sinabi kaini: “Sabi mo, tinatabangan ka kan  banal na espiritu nin Diyos, pero hain man an tabang? Tios pa man giraray baga an pamilya. Sayang lang an panahon mo diyan sa pagparahulit.” Inadmitir ni Shirley: “Naihapot ko sa sadiri ko: ‘Nagmamakulog daw talaga sa samo an Diyos o dai?’ Kaya namibi tulos ako ki Jehova, tapos sinabi ko sa saiya an gabos na nasa isip ko. Dai ako nagpundo sa pagbasa kan Bibliya saka kan satong mga publikasyon, asin padagos ako sa paghuhulit saka pag-atender sa mga pagtiripon.” Dai nahaloy, narealisar niya na inaalalayan ni Jehova an saiyang pamilya. Dai nagutom an saiyang pamilya, asin maugma sinda. Sinabi ni Shirley: “Nahiling ko na sinisimbag ni Jehova an sakuyang mga pamibi.” (1 Tim. 6:6-8) Kun dai mo papabayaan an saimong espirituwal na rutina, dai mo man tutugutan an mga kasakitan o mga pagduda na isuway ka ki Jehova.

8. Ano an puwedeng mangyari sa responsableng mga brother sa organisasyon ni Jehova?

⁸ Paagi sa media asin mga social network, nagpapalakop an satong mga kaiwal nin mga kaputikan o salang impormasyon manungod sa responsableng mga brother sa organisasyon ni Jehova. (Sal. 31:13) May mga tugang na inarestar asin inakusaran na kriminal. An mga Kristiyano kan inot na siglo napaatubang man sa arog kaiyan na sitwasyon kan si apostol Pablo inakusaran asin inarestar nin bakong makatanusan. Ano an nagin reaksiyon ninda?

9. Ano an ginibo kan nagkapirang Kristiyano kan mapreso si Pablo?

⁹ May mga Kristiyano kan inot na siglo na nagpundo sa pagsuportar ki apostol Pablo kan mapreso siya sa Roma. (2 Tim. 1:8, 15) Taano? Ikinasupog daw ninda si Pablo huling an paghiling saiya kan mga tawo sarong kriminal? (2 Tim. 2:8, 9) O natakot daw sinda ta tibaad persegiron man sinda? Ano man an saindang dahilan, isip-isipa kun ano an namatian ni Pablo. Nagtagal siya nin dakul na kasakitan asin isinapeligro pa ngani an saiyang buhay para sa sainda. (Gibo 20:18-21; 2 Cor. 1:8) Lugod na dai nanggad kita magin arog kan mga nagbaya na idto ki Pablo kan panahon na kaipuhan niya nin tabang! Ano an dapat na tandaan ta pag pinepersegir an responsableng mga brother?

10. Ano an dapat tang girumdumon pag pinepersegir an responsableng mga brother, asin taano?

 ¹⁰ Girumdumon kun taano ta pinepersegir kita asin kun siisay an nasa likod kaiyan. Ini an sabi kan 2 Timoteo 3:12: “An gabos na nagmamawot na mamuhay na may debosyon sa Diyos bilang mga parasunod ni Cristo Jesus pepersegiron man.” Kaya dai kita dapat mabigla na pigpupuntirya ni Satanas sa saiyang mga pag-atake an responsableng mga brother. An katuyuhan niya sa mga pag-atakeng iyan iyo na rauton an saindang integridad asin patakuton kita.—1 Ped. 5:8.

11. Ano an manunudan ta sa halimbawa ni Onesiforo? (2 Timoteo 1:16-18)

¹¹ Padagos na suportaran an saimong mga tugang asin may kaimbudan na magdanay kaiba ninda. (Basahon an 2 Timoteo 1:16-18.) Kan mapreso si Pablo, iba an nagin reaksiyon kan sarong Kristiyano kan inot na siglo na an pangaran Onesiforo. “Dai niya [si Pablo] ikinasupog dawa nakakadenahan [ini].” Imbes, hinanap ni Onesiforo si Pablo, asin kan manumpungan niya siya, hininguwa niyang tabangan siya sa praktikal na mga paagi. Sa paggibo kaiyan, isinapeligro ni Onesiforo an saiyang buhay. Ano an leksiyon sa sato? Dai ta dapat pagtugutan an pagkatakot sa tawo na makaulang sa sato sa pagsuportar sa mga tugang niyato na pinepersegir. Imbes, idepensa ta sinda asin tabangan ta sinda. (Tal. 17:17) Kaipuhan ninda an satong pagkamuot asin suporta.

12. Ano an manunudan ta sa satong mga tugang sa Russia?

¹² Pag-isipan kun paano tinabangan kan mga tugang ta sa Russia an namumutan nindang mga kapagtubod na nakapreso. Pag may mga tugang na binibista, dakul na tugang an nagduduruman sa korte para suportaran sinda. Ano an leksiyon sa sato? Pag an responsableng mga brother pinapakaraot, inaarestar, o pinepersegir, dai kita matakot. Ipamibi sinda, pagmakulgan an saindang mga kapamilya, asin maghanap nin iba pang praktikal na mga paagi para maipahiling an saimong suporta.—Gibo 12:5; 2 Cor. 1:10, 11.

13. Paano an pagtuya puwedeng makapaluya kan satong pagtitiwala ki Jehova asin sa saiyang organisasyon?

¹³ Puwedeng tuyaon kita kan satong bakong Saksing mga paryente, katrabaho, o kaeskuwela huli sa satong paghuhulit o huli sa satong pamumuhay uyon sa halangkaw na mga pamantayan ni Jehova sa moral. (1 Ped. 4:4) Puwedeng sabihon ninda: “Okey ka man sako, pero sobra lang kaistrikto kan relihiyon mo saka makaluma.” Tibaad tuyawon kita kan iba huli sa paagi ta nin pagtratar sa mga itiniwalag, na sinasabi: “Pa’no mo man masasabing mamumuton kang tawo?” An mga komentong arog kaiyan puwedeng magin dahilan para magkaigwa kita nin mga pagduda. Tibaad isip-isipon ta: ‘Sobra man daw an hinahagad ni Jehova sa sako? Sobra daw kaistrikto kan saiyang organisasyon?’ Kun napapaatubang ka sa arog kaiyan na sitwasyon, paano ka makakapagdanay na harani ki Jehova asin sa saiyang organisasyon?

14. Ano an dapat na magin reaksiyon ta pag tinutuya kita kan iba huling namumuhay kita uyon sa mga pamantayan ni Jehova? (Salmo 119:50-52)

¹⁴ Magin determinado na sunudon an mga pamantayan ni Jehova. Si Job sarong lalaki na sinunod an mga pamantayan ni Jehova dawa ngani pigtutuya siya huli kaiyan. Pigpurbaran pa ngani kan saro sa mga amigo daa ni Job na kumbinsiron siya na bako man mahalaga sa Diyos kun sinunod ni Job o dai an Saiyang mga pamantayan. (Job 4:17, 18; 22:3) Pero dai nagtubod si Job sa siring na kaputikan. Aram niya na tama an mga pamantayan ni Jehova sa kun ano an tama saka sala, asin determinado siya na sunudon iyan. Dai niya tinugutan an iba na halion sa saiya an saiyang integridad. (Job 27:5, 6) Ano an leksiyon sa sato? Dai pagtugutan an pagtuya na magin dahilan na pagdudahan mo an mga pamantayan ni Jehova. Girumdumon an saimong  mga eksperyensiya. Bako daw na pauruutro mo nang napatunayan na tama an mga pamantayan ni Jehova asin na nakikinabang ka sa pagsunod diyan? Magin determinado na suportaran an organisasyon na nagsusuportar sa mga pamantayan na iyan. Sa siring, ano man na pagtuya sa saimo, dai iyan makakapasuway sa saimo ki Jehova.—Basahon an Salmo 119:50-52.

15. Taano ta pigtuya si Brizit?

¹⁵ Pag-isipan an eksperyensiya ni Brizit, sarong sister na taga India. Tinutuya siya kan saiyang mga kapamilya huli sa saiyang pagtubod. Dai nahaloy pakabawtismuhi sa saiya kan 1997, nawaran nin trabaho an saiyang bakong kapagtubod na agom. Kaya nagdesisyon an agom niya na makiistar sinda, kaiba an saindang mga aking babayi, sa mga magurang kaini na nakaistar sa ibang siyudad. Pero mapapaatubang si Brizit sa mas grabe pang kadipisilan. Huling mayong trabaho an saiyang agom, kaipuhan niyang magtrabaho nin full-time para masustentuhan an saiyang pamilya. Saro pa, an pinakaharaning kongregasyon sa sainda mga 350 kilometros an rayo. Asin nakakamundo, pigkokontra siya kan pamilya kan agom niya huli kan saiyang pagtubod. Nagin grabeng marhay an pagkontra sa saiya kaya kinaipuhan kan pamilya ni Brizit na magbalyo giraray nin istaran. Dangan, dai inaasahan, nagadan an saiyang agom. Dai nahaloy, nagadan sa kanser an saro sa mga aki niyang babayi na 12 anyos pa sana. An mas malala pa, an mga pangyayaring iyan ibinasol ki Brizit kan mga kaparyente niya. Sinabi ninda na kun dai siya nagin saro sa mga Saksi ni Jehova, dai kuta mangyayari an gabos na trahedyang idto. Sa ibong kaiyan, padagos siyang nagtiwala ki Jehova asin nagdanay na harani sa saiyang organisasyon.

16. Paano si Brizit binendisyunan sa saiyang pagdanay na harani ki Jehova asin sa Saiyang organisasyon?

¹⁶ Huling harayuon sa kongregasyon an iniistaran ni Brizit, pinakusog siya nin paraataman nin sirkito na maghulit sa lugar kun sain siya nakaistar asin na magsagibo nin pagtiripon sa saiyang harong. Kan inot, garo masakiton iyan para sa saiya. Pero sinunod niya an sadol na iyan. Sinasabi niya sa iba an maugmang bareta, nagsasagibo nin mga pagtiripon sa saiyang harong, asin nagtatagama nin oras para sa pampamilyang pagsamba kaiba kan saiyang mga aki. Ano an nagin resulta? Nakapuon asin nakapagkondukta  si Brizit nin dakul na pag-adal sa Bibliya, asin dakul sa sainda an nabawtismuhan. Kan 2005, nagpuon siyang maglingkod bilang regular payunir. Binalusan an pagtitiwala niya ki Jehova asin an kaimbudan niya sa Saiyang organisasyon. An saiyang mga aking babayi maimbod na naglilingkod ki Jehova, asin duwa na an kongregasyon ngunyan sa saindang lugar! Kumbinsido si Brizit na tinawan siya ni Jehova kan kusog para makayanan an saiyang mga kasakitan asin matagalan an pagtuya kan saiyang pamilya.

17. Ano an dapat na determinado tang gibuhon?

¹⁷ Gusto kitang patubudon ni Satanas na dai kita tatabangan ni Jehova sa inaagihan tang mga kasakitan asin na an pagdadanay ta sa organisasyon ni Jehova mas magpapasakit sana kan satong buhay. Gusto ni Satanas na makamati kita nin takot pag an responsableng mga brother pinapakaraot, pinepersegir, o pinepreso. Asin paagi sa mga pagtuya, gusto niya na paluyahon an satong pagtitiwala sa mga pamantayan ni Jehova asin sa Saiyang organisasyon. Minsan siring, aram na aram ta an maraot na mga taktika niya asin dai niya kita maloloko. (2 Cor. 2:11) Magin determinado na isikwal an mga kaputikan ni Satanas asin magdanay na maimbod ki Jehova asin sa Saiyang organisasyon. Girumdumon, nungka kang babayaan ni Jehova. (Sal. 28:7) Kun siring, dai pagtugutan an ano man na isuway ka ki Jehova!—Roma 8:35-39.

18. Ano an pag-uulayan ta sa sunod na artikulo?

¹⁸ Sa artikulong ini, pinag-ulayan ta an mga kadipisilan na posibleng mapaatubang sa sato hali sa luwas kan kongregasyon. Pero an satong pagtitiwala ki Jehova asin sa saiyang organisasyon puwede man na mabalo huli sa mga kadipisilan hali sa laog kan kongregasyon. Paano ta mapapangganahan an siring na mga kadipisilan? Pag-uulayan ta iyan sa sunod na artikulo.