1-2. (a) Anong mga hapot an sisimbagon ta? (b) Ano an nagpaparisa na gustong-gusto ni Jehova na tabangan kita?

 MATATABANGAN kita ni Jehova na makayanan an mga kadipisilan sa satuyang buhay asin magin maugma sa paglilingkod sa saiya. Sa anong mga paagi niya kita tinatabangan? Asin paano kita makikinabang nin lubos sa tabang na itinatao ni Jehova? Sisimbagon an mga hapot na iyan sa artikulong ini. Pero, bago ta aramon an simbag diyan, pag-ulayan ta nguna an hapot na konektado diyan: Andam daw talaga si Jehova na tabangan kita?

² An tataramon na ginamit ni apostol Pablo sa saiyang surat sa mga Hebreo makakatabang sa sato na masimbag an hapot na iyan. Isinurat ni Pablo: “Si Jehova an sakuyang paratabang; dai ako matatakot. Ano an magigibo sa sako nin tawo?” (Heb. 13:6) Sinasabi sa mga reperensiya sa Bibliya na an tataramon na “paratabang,” na ginamit sa bersikulong ini, nanunungod sa sarong tawo na nagdadalagan para tabangan an saro na naghahagad nin tabang. Imahinara na si Jehova nagdadalagan para tabangan an saro na nagsasakit. Siguradong mauyon ka na an paglaladawan na ini nagtatampok kan pagigin andam ni Jehova—iyo, gustong-gusto niya—na magin satong Paratabang. Sa tabang ni Jehova, matatagalan ta an mga pagbalo sa sato nin may kaugmahan.

3. Ano an tulong paagi na tinatabangan kita ni Jehova na matagalan an mga pagbalo sa sato nin may kaugmahan?

³ Ano an nagkapirang paagi na tinatabangan kita ni Jehova para matagalan an mga pagbalo nin may kaugmahan? Para simbagon iyan, buksan ta an libro nin Isaias. Taano? Dakul sa mga propesiya na ipinasabong ki Isaias na isurat aplikado sa mga lingkod nin Diyos ngunyan. Dugang pa diyan, parating ilinaladawan ni Isaias si Jehova paagi sa mga tataramon na madali tang masabutan. Kuanon  tang halimbawa an Isaias kapitulo 30. Diyan, paagi sa paggamit ni Isaias nin pananaram na malinaw niyatong mailaladawan sa satuyang isip, ilinadawan niya diyan kun paano kita tinatabangan ni Jehova bilang saiyang banwaan (1) paagi sa paghinanyog na marhay asin pagsimbag sa satong mga pamibi, (2) paagi sa pagtao sa sato nin giya, asin (3) paagi sa pagtao sa sato nin bendisyon ngunyan asin sa maabot na panahon. Pag-ulayan ta an tulong paaging ini na tinatabangan kita ni Jehova.

4. (a) Paano ilinadawan ni Jehova an mga Judio kan panahon ni Isaias, asin ano an itinugot Niyang mangyari pag-abot nin panahon? (b) Anong paglaom an itinao ni Jehova para sa mga maimbod? (Isaias 30:18, 19)

⁴ Sa inot na mga tataramon kan Isaias kapitulo 30, ilinaladawan ni Jehova an mga Judio bilang “sutil na mga aki,” na ‘an kasalan dinadagdagan pa nin kasalan.’ Sinabi niya pa: “Saro sindang rebelyosong banwaan, . . . [na] habong magdangog sa katugunan ni Jehova.” (Isa. 30:1, 9) Huling habo kan banwaan na maghinanyog, ihinula ni Isaias na itutugot ni Jehova na magsapar sinda nin kapahamakan. (Isa. 30:5, 17; Jer. 25:8-11) Asin talagang nangyari iyan. Dinara sindang bihag kan mga Babilonyo. Minsan siring, may mga maimbod na Judio asin may mensahe nin paglaom sa sainda si Isaias. Sinabi niya sa sainda na maabot an panahon papahilingan giraray sinda ni Jehova nin pabor. (Basahon an Isaias 30:18, 19.) Asin iyan mismo an nangyari. Pinatalingkas sinda ni Jehova sa saindang pagkabihag. Pero, dakul na taon pa an nag-agi bago sinda napatalingkas. An mga tataramon na “si Jehova mapasensiyang naghahalat tanganing pahilingan kamo nin pabor” nagpaparisa na huruhalawig na panahon nguna an maagi bago iligtas an mga maimbod. Sa katunayan, 70 taon na nadistiyero an mga Israelita sa Babilonya bago itinugot ni Jehova na magbalik sa Jerusalem an mga natada. (Isa. 10:21; Jer. 29:10) Kan makabalik na sinda sa saindang sadiring daga, an mga luha ninda nin kamunduan huli sa pagigin bihag naribayan nin mga luha nin kaugmahan.

5. Anong asigurasyon an itinatao sa sato kan Isaias 30:19?

⁵ Sa ngunyan, mararanga kita kan mga tataramon na ini: “Siguradong papahilingan ka niya nin pagkahirak pag nadangog niya an paghagad mo nin tabang.” (Isa. 30:19) Inaasigurar kita ni Isaias na madangog na marhay si Jehova pag naghagad kita sa Saiya nin tabang asin sisimbagon tulos an satong mga pagngayo-ngayo. Sinabi pa ni Isaias: “Sisimbagon ka niya tulos pagkadangog niya kaiyan.” Pinapagirumdom kita kan nag-aasigurar na mga tataramon na iyan na an satong Ama andam—iyo, gustong-gusto—na tabangan an mga naghahagad nin tabang sa saiya. An pakaaram manungod diyan, makakatabang sa sato na magtagal nin may kaugmahan.

6. Paano ipinaparisa kan mga tataramon ni Isaias na dinadangog ni Jehova an pamibi kan lambang lingkod niya?

⁶ Ano pa an itinutukdo sa sato kan bersikulong ini manungod sa satong mga pamibi? Si Jehova nagdadangog na marhay sa pamibi kan lambang saro sa sato. Taano ta masasabi ta iyan? Dawa ngani an mensahe kan Isaias kapitulo 30 para sa bilog na banwaan, sa bersikulo 19 naggamit si Jehova nin pronoun na “ka,” na garo baga nakikipag-ulay siya sa sarong indibidwal. Isinurat ni Isaias: “Dai ka na nanggad matangis”; “siguradong papahilingan ka niya nin pagkahirak”; “sisimbagon ka niya.” Bilang sarong mamumuton na Ama, dai sinasabi ni Jehova sa sarong nadidisganar na aki na “Dapat arog ka kakusog kan tugang mo.” Imbes, minamansay niya kita bilang mga indibidwal, asin tinatawan niya nin atensiyon an satuyang mga pamibi.—Sal. 116:1; Isa. 57:15.

7. Paano ipinahiling ni Isaias asin ni Jesus na kaipuhan kitang magin pursigido sa satong pagpamibi?

⁷ Pag nagdudulok kita sa Diyos asin sinasabi sa saiya an ikinakapurisaw niyato, puwedeng an tulos na itao ni Jehova iyo an kusog na kinakaipuhan  ta para makayanan an sitwasyon. Asin kun an pagbalo sa sato dai tulos matapos nin siring sa linalauman ta, tibaad kaipuhan tang pauruutrong hagadon ki Jehova an kusog na kaipuhan para matagalan iyan. Dinadagka niya kita na gibuhon iyan. Ipinaparisa iyan kan mga tataramon na ini ni Isaias: “Dai nindo [si Jehova] pagpahingaluon.” (Isa. 62:7) Ano an buot sabihon kaiyan? Dapat na magin pursigido kita sa pagpamibi ki Jehova, na garo baga dai ta tinutugutan si Jehova na magpahingalo. An mga tataramon ni Isaias nagpapagirumdom sa sato kan ilustrasyon ni Jesus manungod sa pamibi na nasa Lucas 11:8-10, 13. Dinadagka kita diyan ni Jesus na mamibi na may “pursigidong pamimirit” asin na “padagos na maghagad” para sa banal na espiritu. Puwede ta man hagadon ki Jehova na tawan kita nin paggiya na kaipuhan ta para makagibo nin tamang mga desisyon.

8. Kan suanoy na mga panahon, paano nautob an mga tataramon sa Isaias 30:20, 21?

⁸ Basahon an Isaias 30:20, 21. Kan salikupan kan hukbo kan Babilonya an Jerusalem sa laog nin saro may kabangang taon, an kasakitan na naeksperyensiyahan kan banwaan nagin ordinaryo na sana siring sa tinapay asin tubig. Pero sigun sa bersikulo 20 asin 21, nanuga si Jehova sa mga Judio na kun masulsol sinda asin mabago, ililigtas niya sinda. Sa pagsambit ki Jehova bilang an saindang “Pinakanangungurog na Instruktor,” nanuga si Isaias sa banwaan na tutukduan sinda ni Jehova kun paano Siya sasambahon sa paaging inaako Niya. Nautob an mga tataramon na iyan kan an mga Judio patalingkason sa pagigin bihag. Si Jehova nagin Pinakanangungurog na Instruktor nanggad ninda, asin sa saiyang paggiya nagin mapanggana an saiyang banwaan sa pagbalik kan dalisay na pagsamba. Nauugma nanggad kita na si Jehova an satuyang Pinakanangungurog na Instruktor ngunyan.

9. Ano an sarong paagi na inaako ta ngunyan an paggiya ni Jehova?

⁹ Sa mga bersikulong iyan, ilinaladawan kita ni Isaias nin siring sa mga estudyante na tinutukduan ni Jehova sa duwang paagi. Inot, sinabi ni Isaias: “Mahihiling kan mga mata mo an saimong Pinakanangungurog na Instruktor.” Sa ilustrasyon na ini, an Instruktor garo baga nakatindog sa atubangan kan saiyang mga estudyante. Sarong pribilehiyo niyato na makinabang sa saiyang pagtutukdo ngunyan. Paano kita tinutukduan ni Jehova? Ginigibo niya iyan paagi sa saiyang organisasyon. Nagpapasalamat nanggad kita na nag-aako kita nin malinaw na paggiya hali diyan! An instruksiyon na itinatao sa satong mga pagtiripon sa kongregasyon asin mga kumbensiyon saka paagi sa mga publikasyon, mga programa sa JW Broadcasting, asin dakul na iba pa nakakatabang sa sato para makatagal kita nin may kaugmahan sa masakit na mga panahon.

10. Sa anong paagi nakakadangog kita nin “tataramon sa likod [ta]”?

 ¹⁰ Sinambit ni Isaias an ikaduwang paagi kun paano kita tinutukduan ni Jehova. Sinabi niya: “Makakadangog an saimong mga talinga nin tataramon sa likod mo.” Ilinaladawan digdi kan propeta si Jehova bilang sarong mapagmangno na instruktor na naglalakaw sa likudan kan saiyang mga estudyante, na itinutukdo an dalan sa inutan asin nagtatao sa sainda nin giya. Sa ngunyan, nadadangog ta an boses nin Diyos sa likudan ta. Paano? An ipinasabong na mga tataramon nin Diyos na nasa Bibliya, isinurat haloy nang panahon, sarong panahon na garo baga nasa likudan ta na. Kaya pag binabasa niyato an Bibliya, garo man sana nadadangog ta an boses nin Diyos hali sa likod ta.—Isa. 51:4.

11. Para makatagal nin may kaugmahan, anong duwang bagay an kaipuhan tang gibuhon, asin taano?

¹¹ Paano kita nakikinabang nin lubos sa paggiya na itinatao ni Jehova paagi sa saiyang organisasyon asin sa saiyang Tataramon? Mangnuhon na nagsambit si Isaias nin duwang bagay. Inot, “ini an dalan.” Ikaduwa, “digdi kamo maglakaw.” (Isa. 30:21) Bakong igo na maaraman “an dalan.” Kaipuhan man na ‘diyan kita maglakaw.’ Paagi sa Tataramon ni Jehova, na ipinapaliwanag paagi sa saiyang organisasyon, naaaraman ta kun ano an hinahagad sa sato ni Jehova. Nanunudan ta man kun paano iaaplikar an satong nanunudan. Para makatagal nin may kaugmahan sa paglilingkod ki Jehova, kaipuhan ta na gibuhon an duwang bagay na iyan. Kun gigibuhon ta iyan, saka sana kita makakasiyerto na bebendisyunan kita ni Jehova.

12. Uyon sa Isaias 30:23-26, paano binendisyunan ni Jehova an saiyang banwaan?

¹² Basahon an Isaias 30:23-26. Paano nautob an propesiyang iyan sa mga Judio na nagbalik sa daga kan Israel pagkatalingkas ninda bilang mga bihag sa Babilonya? Nag-ako sinda nin abundang bendisyon—sa pisikal asin espirituwal. Binendisyunan ni Jehova an saiyang banwaan nin bastanteng suplay nin pisikal na kakanon. Pero, an mas importante, tinawan niya sinda nin abundang espirituwal na kakanon mantang luway-luway na ibinabalik an dalisay na pagsamba. An espirituwal na mga bendisyon na inako kan banwaan nin Diyos kan panahon na iyan nakakalabing marhay sa ano man na nakamtan na ninda dati. Arog kan ipinaparisa sa bersikulo 26, mas pinaurog nanggad ni Jehova an espirituwal na liwanag. (Isa. 60:2) An mga bendisyon ni Jehova nakatabang sa saiyang mga lingkod na padagos na maglingkod sa saiya nin may kaugmahan asin panglaog na kusog “huli sa marahay na kamugtakan kan puso.”—Isa. 65:14.

13. Paano nautob sa satong panahon an propesiya manungod sa pagbabalik?

¹³ An propesiya daw manungod sa pagbabalik kan dalisay na pagsamba aplikado man sa sato ngunyan? Iyo nanggad! Sa paanong paagi? Puon  1919 C.E., minilyon na tawo an nakatalingkas sa pagkabihag sa Dakulang Babilonya, an pambilog na kinaban na imperyo nin palsong relihiyon. Giniyahan sinda pasiring sa sarong lugar na mas marahay nanggad kisa sa Dagang Panuga para sa Israel. Dinara sinda sa sarong espirituwal na paraiso. (Isa. 51:3; 66:8) Ano an espirituwal na paraisong iyan?

14. Ano an espirituwal na paraiso, asin sairisay an nag-iistar diyan ngunyan? (Hilingon an Paliwanag Dapit sa Tataramon.)

¹⁴ Puon 1919 C.E., ikinakaugma kan mga linahidan an pag-istar sa sarong espirituwal na paraiso. b Sa paglihis nin panahon, an mga may daganon na paglaom, an “ibang mga karnero,” nag-istar man sa espirituwal na daga na ini asin ikinaugma an abundang mga bendisyon ni Jehova.—Juan 10:16; Isa. 25:6; 65:13.

15. Yaon sain an espirituwal na paraiso?

¹⁵ Yaon sain ngunyan an espirituwal na daga, o paraiso? An mga parasamba ni Jehova manunumpungan sa gabos na parte kan daga. Kun siring, an espirituwal na paraiso na iniistaran ninda yaon man sa bilog na kinaban. Kaya ngunyan, sain man kita nakaistar sa daga, puwede kitang magin kabtang kan espirituwal na paraiso basta aktibo tang sinusuportaran an tunay na pagsamba.

16. Paano ta padagos na mahihiling an kagayunan kan espirituwal na paraiso?

¹⁶ Para magdanay sa espirituwal na paraiso, an saro sa mga bagay na dapat tang gibuhon iyo na pagdanayon an satong hararom na pag-apresyar sa pambilog na kinaban na Kristiyanong kongregasyon. Paano ta magigibo iyan? Paagi sa pagpokus sa kagayunan, bako sa mga kaluyahan kan mga nakaistar diyan. (Juan 17:20, 21) Taano ta mahalagang marhay iyan? Pag-isipan an pagkukumparar na ini. Inaasahan ta na makakahiling kita nin manlain-lain na klase nin kahoy sa sarong magayon na parke, o hardin. Sa kaparehong paagi, an espirituwal na Paraiso na yaon sa mga kongregasyon ngunyan igwa nin manlain-lain na indibidwal na maikukumparar sa mga kahoy. (Isa. 44:4; 61:3) Kaipuhan tang siyertuhon na padagos kitang nakapokus sa kagayunan kan  “kadlagan,” bako sa mga depekto na nahihiling ta sa “mga kahoy” na harani sa sato. Dai ta tutugutan an mga kaluyahan niyato o kan iba sa satong kongregasyon na makaulang sa sato para mahiling an kagayunan kan nagkakasararong pambilog na kinaban na Kristiyanong kongregasyon.

17. Ano an magigibo kan lambang saro sa sato para makakontribwir sa pagkasararo kan kongregasyon?

¹⁷ Paano an lambang saro sa sato makakakontribwir sa pagkasararong ini? Paagi sa pagigin parapatuninong. (Mat. 5:9; Roma 12:18) Kada naggigibo kita nin paagi para suportaran an matuninong na relasyon sa iba sa kongregasyon, nakakadagdag kita sa kagayunan kan espirituwal na paraiso. Ginigirumdom ta na irinani ni Jehova sa dalisay na pagsamba an lambang tawo na nasa espirituwal na paraiso. (Juan 6:44) Imahinara kun gurano kaugma si Jehova pag nahihiling niya an mga pagmamaigot ta na pakusugon an katuninungan asin pagkasararo kan mga ibinibilang niya na mahalagang marhay sa saiya—an saiyang mga lingkod!—Isa. 26:3; Hag. 2:7.

18. Ano an dapat na parati tang hurop-hurupon, asin taano?

¹⁸ Paano kita makikinabang nin lubos sa mga bendisyon na inaako ta bilang mga lingkod nin Diyos? Puwede tang hurop-hurupon an mga napapag-adalan ta sa Tataramon nin Diyos asin sa satong mga publikasyon na basado sa Bibliya. An siring na pag-adal asin paghurop-hurop makakatabang sa sato na makultibar an Kristiyanong mga kuwalidad na mapahiro sa sato na ipahiling an “pagkamuot na sa-magturugang” asin an ‘pagigin mapagpadangat sa lambang saro’ sa kongregasyon. (Roma 12:10) Mantang hinuhurop-hurop ta an mga bendisyon sa sato ngunyan, napapakusog ta an satong relasyon ki Jehova. Asin an paghurop-hurop sa mga bendisyon na itinatagama ni Jehova para sa sato, makakatabang sa satuya na magin totoong-totoo sa sato an paglaom na paglingkudan siya nin daing katapusan. An gabos na iyan makakakontribwir sa satong kaugmahan sa paglilingkod ki Jehova ngunyan.

19. (a) Sigun sa Isaias 30:18, sa ano kita makakasigurado? (b) Ano an makakatabang sa sato na magtagal nin may kaugmahan?

¹⁹ “Matindog” si Jehova para sa sato pag tapuson na niya an maraot na kinaban na ini. (Isa. 30:18) Makakapagtiwala kita na si Jehova—“sarong Diyos nin hustisya”—dai tutugutan an kinaban na ini ni Satanas na mas lumawig pa nin sarong aldaw kisa sa hinahagad kan hustisya. (Isa. 25:9) Mapasensiya kitang naghahalat ki Jehova para sa pag-abot kan aldaw na iyan nin kaligtasan. Mantang dai pa iyan nag-aabot, determinado kita na padagos na pahalagahan na marhay an pribilehiyo na pagpamibi, na pag-adalan asin iaplikar an Tataramon nin Diyos, asin na hurop-hurupon an mga bendisyon sa sato. Pag ginigibo ta iyan, tatabangan kita ni Jehova na magtagal nin may kaugmahan sa satong pagsamba sa saiya.