1. Ano an buot sabihon kan papagdanayon na tultol an saimong pag-iisip? (2 Timoteo 4:5)

 PAG napapaatubang kita sa mga problema, puwedeng mabalo an satong kaimbudan ki Jehova asin sa saiyang organisasyon. Paano ta mapapangganahan an siring kaiyan na mga kadipisilan? Kaipuhan tang papagdanayon na tultol an satong pag-iisip asin magdanay na mata, na naninindugan nin marigon sa pagtubod. (Basahon an 2 Timoteo 4:5.) Pinapagdanay tang tultol an satong pag-iisip paagi sa pagdanay na kalmado, pag-isip nin malinaw, asin paghinguwang mansayon an mga bagay-bagay arog kan pagmansay ni Jehova diyan. Pag ginigibo ta iyan, an satong kaisipan dai makokontrol kan satong emosyon.

2. Ano an pag-uulayan ta sa artikulong ini?

² Sa sinundan na artikulo, pinag-ulayan ta an tulong kadipisilan na tibaad atubangon ta hali sa luwas kan kongregasyon. Sa artikulong ini, pag-uulayan ta an tulong kadipisilan na hali sa laog kan kongregasyon na puwedeng makabalo kan satong kaimbudan ki Jehova. An mga iyan iyo an (1) pag sa hiling ta ginibuhan kita nin sala nin sarong tugang, (2) pag dinisiplina kita, asin (3) pag nasasakitan kitang sumunod sa mga pagbabago sa organisasyon. Paano ta mapapagdanay na tultol an satong pag-iisip saka magdadanay na maimbod ki Jehova asin sa saiyang organisasyon pag napapaatubang sa arog kaiyan na mga kadipisilan?

3. Ano an tibaad mamatian niyato kun sa hiling ta ginibuhan kita nin sala nin sarong tugang?

³ Nangyari na daw sa saimo na sa hiling mo ginibuhan ka nin sala nin sarong tugang, tibaad nin saro na may pribilehiyo sa kongregasyon? Tibaad mayo man nin intensiyon an tugang na kulugan ka. (Roma 3:23; Sant. 3:2) Pero, nakulgan pa man giraray an buot mo  dahil sa ginibo niya. Tibaad dai ka nakakaturog sa pagparaisip kan ginibo niya. Tibaad naisip mo pa ngani, ‘Kun nagigibo iyan nin tugang, ini daw talaga an organisasyon nin Diyos?’ Iyan mismo an gusto ni Satanas na isipon ta. (2 Cor. 2:11) An arog kaiyan na negatibong kaisipan puwedeng magin dahilan na magpundo na kita sa paglilingkod ki Jehova asin bayaan an saiyang organisasyon. Kaya kun sa hiling ta ginibuhan kita nin sala nin sarong brother o sister, paano ta mapapagdanay na tultol an satong pag-iisip asin malilikayan na madara kan nakakaraot na kaisipan?

4. Paano pinagdanay ni Jose an saiyang tultol na pag-iisip kan ginibuhan siya nin sala, asin ano an manunudan ta sa saiyang halimbawa? (Genesis 50:19-21)

⁴ Dai magkulog an buot. Kan tin-edyer si Jose, ginibuhan siya nin sala kan mga kuya niya. Naungis sinda sa saiya, asin gusto pa ngani siyang gadanon kan iba sa sainda. (Gen. 37:4, 18-22) Sa kahuri-hurihi, ipinabakal ninda siya para magin uripon. Bilang resulta, napaatubang si Jose sa grabeng mga pagsakit na uminabot nin mga 13 taon. Puwede kutang magduda si Jose kun talagang namumutan siya ni Jehova. Asin puwede kutanang isipon niya na pinabayaan siya ni Jehova sa panahon na kaipuhan niya nin tabang. Pero dai nagkulog an buot ni Jose. Imbes, pinagdanay niya an tultol na pag-iisip paagi sa pagdanay na kalmado. Kan magkaigwa siya nin pagkakataon na bumalos sa saiyang mga tugang, dai niya iyan ginibo. Imbes, nagpahiling siya nin pagkamuot asin pinatawad sinda. (Gen. 45:4, 5) Nagibo iyan ni Jose huling nakapag-isip siya nin malinaw. Imbes na magpokus sa saiyang mga problema, nagpokus siya sa kun ano an mas importante—an katuyuhan ni Jehova. (Basahon an Genesis 50:19-21.) Ano an leksiyon? Kun ginibuhan ka nin sala, dai magkulog an buot ki Jehova o mag-isip na pinabayaan ka niya. Imbes, hurop-hurupon kun paano ka niya tinatabangan na tagalan an pagsakit mo. Dugang pa, pag ginibuhan ka nin sala nin iba, pagmaigutan na tahuban nin pagkamuot an pagkabakong perpekto ninda.—1 Ped. 4:8.

5. Paano pinagdanay ni Miqueas an saiyang tultol na pag-iisip kan sa hiling niya ginibuhan siya nin sala?

⁵ Pag-isipan an naeksperyensiyahan nin sarong elder na taga South America na an pangaran Miqueas. b Nagigirumduman niya an nangyari kaidto kan sa hiling niya grabe an ginibo sa saiya kan nagkapirang brother na igwa nin pribilehiyo sa organisasyon. Sinabi niya: “Kaidto ko sana naeksperyensiyahan an arog kaidtong stress. Purisaw ako. Dai ako nakakaturog pag banggi, saka naghihibi ako ta mayo akong maginibo.” Sa ibong kaiyan, pinagdanay ni Miqueas an saiyang tultol na pag-iisip asin nagmaigot na kontrulon an saiyang namamatian. Parati siyang namimibi, na hinahagad ki Jehova na tawan siya kan banal na espiritu asin kan kusog para makatagal. Naghanap man siya nin mga impormasyon sa satong mga publikasyon na makakatabang sa saiya. Ano an leksiyon? Kun sa hiling mo ginibuhan ka nin sala nin sarong brother o sister, magdanay na kalmado asin pagmaigutan na kontrulon an ano man na negatibong namamatian mo. Tibaad dai mo aram an mga pangyayari na posibleng nagin dahilan kaya nakapagtaram o nakagibo nin arog kaiyan an tugang. Kaya mamibi ki Jehova, asin hagadon sa saiya na tabangan kang mansayon an mga bagay-bagay nin siring sa pagmansay kan tugang. Makakatabang iyan para isipon mo na bakong intensiyon kan tugang na gibuhan ka nin sala saka para mapalampas mo an nagibong sala. (Tal. 19:11) Tandaan, aram ni Jehova an sitwasyon mo asin itatao niya an kusog na kaipuhan mo para makatagal.—2 Cron. 16:9; Ecl. 5:8.

6. Taano ta mahalaga na mansayon niyato an disiplina ni Jehova bilang kapahayagan kan saiyang pagkamuot? (Hebreo 12:5, 6, 11)

⁶ An disiplina puwedeng magin makulog. Pero kun mapokus lang kita sa kulog, tibaad dai niyato pahalagahan an disiplina, na iniisip na bako iyan makatanusan o na magabaton man iyan.  Bilang resulta, tibaad mapalampas ta lugod an sarong marahayon na oportunidad—an mansayon an disiplina bilang kapahayagan kan pagkamuot sa sato ni Jehova. (Basahon an Hebreo 12:5, 6, 11.) Asin kun tutugutan tang kontrulon kita kan satong emosyon, tinatawan ta nin oportunidad si Satanas na aprobetsaran an satong namamatian. Gusto niyang isikwal ta an disiplina, asin mas grabe pa, gusto niyang luway-luway na magpundo kita sa paglilingkod ki Jehova asin na bayaan an kongregasyon. Kun dinisiplina ka, paano mo mapapagdanay an saimong tultol na pag-iisip?

7. (a) Arog kan mahihiling sa ritrato, paano ginamit ni Jehova si Pedro pagkatapos na akuon kaini an disiplina? (b) Ano an manunudan mo sa halimbawa ni Pedro?

⁷ Akuon an disiplina, asin gibuhon an kinakaipuhan na mga pagbabago. Bako lang sarong beses na itinanos ni Jesus si Pedro sa atubangan kan ibang mga apostol. (Mar. 8:33; Luc. 22:31-34) Nakakasupog nanggad iyan! Alagad, nagdanay na maimbod si Pedro ki Jesus. Inako niya an disiplina asin nakanuod sa mga sala niya. Bilang resulta, binalusan ni Jehova an kaimbudan ni Pedro asin tinawan siya nin magabat na mga responsabilidad sa laog kan kongregasyon. (Juan 21:15-17; Gibo 10:24-33; 1 Ped. 1:1) Ano an manunudan ta sa halimbawa ni Pedro? Makikinabang kita saka an iba kun dai kita mapokus sa kasusupgan huli sa disiplina, aakuon an pagtatanos, asin gigibuhon an kinakaipuhan na mga pagbabago. Pag gigibuhon ta iyan, magigin mas kapaki-pakinabang kita para ki Jehova asin sa mga tugang niyato.

8-9. Pagkatapos na madisiplina, ano an namatian ni Bernardo kan inot, pero ano an nakatabang sa saiya tanganing itanos an saiyang kaisipan?

⁸ Pag-isipan an nangyari ki Bernardo, sarong brother na taga Mozambique. Hinali siya bilang sarong elder. Ano an namatian ni Bernardo kan inot? Sinabi niya, “Naanggot ako ta dai ko nagustuhan an pagdisiplina sa sako.” Nahahadit siya sa kun ano an magigin paghiling sa saiya kan iba sa kongregasyon. Inadmitir niya, “Kinaipuhan ko nin nagkapirang bulan para magkaigwa kan tamang pagmansay sa sitwasyon asin para magtiwala giraray ki Jehova asin sa saiyang organisasyon.” Ano an nakatabang ki Bernardo para magkaigwa kan tamang pagmansay?

⁹ Itinanos ni Bernardo an saiyang kaisipan. Nagpaliwanag siya: “Kan naglilingkod ako bilang elder, ginagamit ko an Hebreo 12:7 para tabangan an iba na magkaigwa kan tamang pagmansay sa disiplina ni Jehova. Hinapot ko ngunyan an sadiri ko, ‘Siisay an kaipuhan na mag-aplikar kan tekstong ini?’ An gabos na lingkod ni Jehova—kaiba na ako.” Dangan naggibo si Bernardo nin dugang  pang mga lakdang para pakusugon giraray an saiyang pagtitiwala ki Jehova asin sa Saiyang organisasyon. Dinagdagan niya an saiyang oras sa pagbasa nin Bibliya, asin ginibo niya an mas hararom na paghurop-hurop. Maski ngani ikinakahadit niya an manungod sa paghiling sa saiya kan mga tugang, nakiiba siya sa sainda sa ministeryo asin nagkomento sa mga pagtiripon sa kongregasyon. Pag-abot nin panahon, nanombrahan giraray si Bernardo bilang elder. Kun nadisiplina ka arog ni Bernardo, dai magparapokus sa kasusupgan, akuon an sadol, asin gibuhon an kinakaipuhan na mga pagbabago. c (Tal. 8:33; 22:4) Kun gigibuhon mo iyan, makakasigurado ka na babalusan ka ni Jehova huli sa pagdanay mong maimbod sa saiya asin sa saiyang organisasyon.

10. Anong pagbabago sa organisasyon an posibleng nakabalo sa kaimbudan kan nagkapirang lalaking Israelita?

¹⁰ An mga pagbabago sa organisasyon puwedeng makabalo sa satong kaimbudan. Kun dai kita mag-iingat, puwede pa nganing magin dahilan iyan na pumundo na kita sa paglilingkod ki Jehova. Halimbawa, pag-isipan kun paano an pagbabago sa organisasyon sa irarom kan Katugunan ni Moises posibleng nakaapektar sa nagkapirang Israelita. Bago itao an Katugunan, an mga payo nin pamilya an naggigibo kan mga paninimbagan nin saserdote. Naggibo sinda nin mga altar asin nag-atang ki Jehova para sa pamilya ninda. (Gen. 8:20, 21; 12:7; 26:25; 35:1, 6, 7; Job 1:5) Pero kan itinao na an Katugunan, kaipuhan nang butasan kan mga payo nin pamilya an pribilehiyong iyan. Nagnombra si Jehova nin mga saserdote hali sa pamilya ni Aaron tanganing magdulot nin mga atang. Kan punan nang ipautob an pagbabagong iyan sa organisasyon, kun an sarong payo kan pamilya na bakong gikan ni Aaron gigibuhon an ginigibo nin sarong saserdote, gagadanon siya. d (Lev. 17:3-6, 8, 9) Posible daw na an pagbabagong ini saro sa mga dahilan kun taano ta kinuwestiyon ni Kora, Datan, Abiram, asin kan 250 pamayo an awtoridad ni Moises asin Aaron? (Bil. 16:1-3) Dai niyato sigurado. Ano man an dahilan, dai nakapagdanay na maimbod ki Jehova si Kora asin an iba pang kairiba niya. Kun nababalo an saimong kaimbudan dahil sa mga pagbabago sa organisasyon, ano an puwede mong gibuhon?

11. Ano an manunudan ta sa halimbawa kan nagkapirang Levitang Kohatita?

¹¹ Lubos na suportaran an mga pagbabago sa organisasyon. Durante kan saindang pagbaklay sa kaawagan, igwa nin mahalagang marhay na asignasyon an mga Kohatita. Kada minabalyo nin kampo an mga Israelita, pinapasan kan nagkapirang Kohatita an kaban kan tipan asin nasa inutan sinda kan bilog na banwaan. (Bil. 3:29, 31; 10:33; Jos. 3:2-4) Dakulang pribilehiyo nanggad iyan! Minsan siring, nagbago an kamugtakan para sa sainda kan mag-istar na sa Dagang Panuga an mga Israelita. Dai na kaipuhan na iburubalyo an Kaban. Kaya kan panahon na si Solomon na an namamahala bilang hadi, an nagkapira sa mga Kohatita iinasignar na maglingkod bilang mga parakanta, mga bantay sa trangkahan, asin an iba bilang mga nag-aasikaso sa mga bodega. (1 Cron. 6:31-33; 26:1, 24) Mayo nin rekord na nagreklamo o naghagad nin mas prominenteng katungdan an mga Kohatita huli kan dating mahalagang asignasyon ninda. Anong leksiyon an manunudan ta? Bilog na pusong suportaran an mga pagbabago na ginigibo kan organisasyon ni Jehova, kaiba na an ano man na puwedeng may epekto sa saimong asignasyon. Magin maugma sa ano man na asignasyon na itinatao sa saimo. Girumdumon na an  halaga mo bilang indibidwal dai nakadepende sa saimong asignasyon. Para ki Jehova, an saimong pagsunod mas mahalagang marhay kisa sa ano man na asignasyon.—1 Sam. 15:22.

12. Ano an namatian ni Zaina kan ma-reassign siya pakatapos kan paglilingkod niya sa Bethel?

¹² Pag-isipan an halimbawa ni Zaina, sarong sister na taga Middle East, na nagbago an asignasyon asin naiwara an pinakamamahal niyang pribilehiyo. Na-reassign siya sa langtad pakatapos nin labing 23 na taon na paglilingkod sa Bethel. Sinabi niya: “Nakakabigla an pagbago kan asignasyon ko. Pagmati ko mayo akong serbi saka pirmi kong hinahapot an sadiri ko, ‘Ano an nagin pagkukulang ko?’” Nakakamundo, may nagkapirang tugang sa kongregasyon na nakadagdag pa sa kulog na namamatian niya huli sa pagsabi saiya: “Kun pinakaray mo an trabaho mo, dai ka kuta papaluwason sa Bethel kan organisasyon.” Huruhalawig na panahon na pinangluyahan nin buot si Zaina kaya burubanggi siyang naghihibi. Pero sinabi niya: “Dai ko pinagdudahan an organisasyon o an pagkamuot ni Jehova.” Paano napagdanay ni Zaina an saiyang tultol na pag-iisip?

13. Ano an ginibo ni Zaina para mapangganahan an saiyang negatibong pagmati?

¹³ Napangganahan ni Zaina an saiyang negatibong pagmati. Paano? Nagbasa siya nin mga artikulo sa satong mga publikasyon na pigtutukar an manungod sa inaagihan niyang mga kadipisilan. Nakatabang na marhay sa saiya an artikulong “Puede Nindong Mapaglabanan an Panluluya nin Boot!” sa Pebrero 1, 2001, na isyu kan An Torrengbantayan. Ipinaliwanag sa artikulong iyan kun paano an kagsurat kan Bibliya na si Marcos posibleng nasakitan man na labanan an arog kaiyan na pagmati kan magkaigwa siya nin pagbabago nin asignasyon. Ginirumdom ni Zaina, “An halimbawa ni Marcos iyo an nagin garo bulong ko para mapangganahan an pangluluya nin buot.” Nagdanay man na harani si Zaina sa mga amigo niya. Dai niya isinuway an sadiri niya; dai man siya nagpadaog sa pakamati na garo kahirak-hirak siya. Narealisar niya na ginigiyahan kan espiritu ni Jehova an Saiyang organisasyon asin na an mga nanginginot diyan nagmamalasakit na marhay sa saiya. Pero narealisar man niya na dapat gibuhon kan organisasyon nin Diyos kun ano an pinakamarahay para magibo an gibuhon ni Jehova.

14. Sa anong pagbabago sa organisasyon nasakitan si Vlado na sumunod, asin ano nakatabang sa saiya?

¹⁴ Si Vlado, sarong 73 anyos na elder na taga Slovenia, nasakitan kan pagsaruon an kongregasyon niya saka an saro pang kongregasyon asin isinara su ginagamit nindang Kingdom Hall. Sinabi  niya: “Dai ko maintindihan kun taano ta isinara an magayon na Kingdom Hall na idto. Nakulgan an buot ko ta pig-renovate mi pa sana idto. Karpintero ako, asin ako an naggibo kan nagkapirang bagong mga gamit duman. Tapos, dahil sa pagbabagong idto, kinaipuhan an dakul na pagliliwat na bakong pasil gibuhon para samo na mga may edad nang parahayag.” Ano an nakatabang ki Vlado na suportaran an direksiyon kan organisasyon? Sinabi niya: “An pagsunod sa mga pagbabago na ginigibo kan organisasyon ni Jehova pirming nagreresulta nin mga bendisyon. An mga pagbabagong ini nag-aandam sa sato para sa mas dakulang mga pagbabago sa maabot na panahon.” Nasasakitan ka daw sa mga pagbabago na konektado sa pag-merge nin kongregasyon o sa pagbago nin asignasyon? Makakasigurado ka na nasasabutan ni Jehova an namamatian mo. Pag sinusuportaran mo an siring na mga pagbabago asin nagdadanay na maimbod ki Jehova saka sa organisasyon na ginagamit niya, siguradong bebendisyunan ka.—Sal. 18:25.

15. Paano ta mapapagdanay na tultol an satong pag-iisip pag napapaatubang kita sa mga kadipisilan hali sa laog kan kongregasyon?

¹⁵ Mantang mas nagrarani kita sa katapusan kan sistemang ini nin mga bagay, aasahan niyato na magkakaigwa nin mga kadipisilan hali sa laog kan kongregasyon. An mga kadipisilan na iyan puwedeng makabalo sa satong kaimbudan ki Jehova. Kaya dapat niyatong papagdanayon na tultol an satong pag-iisip. Kun sa hiling mo ginibuhan ka nin sala nin sarong tugang, dai pagtugutan na magkulog an buot mo. Kun dinisiplina ka, dai magpokus sa kasusupgan, akuon an sadol, asin gibuhon an kinakaipuhan na mga pagbabago. Asin pag igwa nin mga pagbabago sa organisasyon ni Jehova na apektado ka mismo, bilog na pusong akuon iyan asin sunudon an direksiyon.

16. Paano mo mapapagdanay an saimong pagtitiwala ki Jehova asin sa saiyang organisasyon?

¹⁶ Mapapagdanay mo an saimong pagtitiwala ki Jehova asin sa saiyang organisasyon pag nababalo an saimong kaimbudan. Pero para magibo iyan, kaipuhan na papagdanayon mo na tultol an saimong pag-iisip, an buot sabihon, magdanay na kalmado, mag-isip nin malinaw, asin mansayon an mga bagay-bagay nin siring sa pagmansay ni Jehova. Magin determinado na pag-adalan an manungod sa mga karakter sa Bibliya na mapangganang nakayanan an kaparehong mga problema asin hurop-hurupon an halimbawa ninda. Mamibi ki Jehova para sa tabang. Asin nungkang isuway an sadiri mo sa kongregasyon. Sa siring, ano man an mangyari, dai magigibo ni Satanas na isuway ka ki Jehova asin sa Saiyang organisasyon.—Sant. 4:7.