1-2. Sa anong mga paagi kita puwedeng makaeksperyensiya nin inhustisya?

 ISINAYSAY ni Jesus sa sarong ilustrasyon an manungod sa sarong babaying balo na padagos na naghahagad nin hustisya sa sarong huwes. Siguradong nasasabutan kan dakul sa mga disipulo ni Jesus an namamatian kan babayi sa ilustrasyon huling kan panahon na iyan parating nagigin biktima nin inhustisya an ordinaryong mga tawo. (Luc. 18:​1-5) Nasasabutan ta man an namamatian kan babayi huling gabos kita nakaeksperyensiya na nin inhustisya minsan sa buhay ta.

² Sa kinaban ta ngunyan, komun na sana an pagpalain-lain, dai pagkapantay-pantay, asin pang-aapi, kaya dai na kita nagngangalas pag trinato kita nin bakong makatanusan. (Ecl. 5:8) Pero an tibaad dai ta inaasahan iyo na kun sarong tugang an gumibo kaiyan sato. Puwede iyan na mangyari. Siyempre, an mga tugang ta bako man na mga parakontra sa katotoohan. Bako lang talaga sindang perpekto. Dakul kitang manunudan sa kun ano an nagin reaksiyon ni Jesus sa mga inhustisyang ginibo kan maraot na mga parakontra. Kun kaya tang magin mapasensiya sa mga parakontra na nagtatratar sato nin bakong makatanusan, lalo nang dapat kitang magin mapasensiya sa satong mga kapagtubod! Ano an namamatian ni Jehova pag tinatratar kita nin bakong makatanusan kan mga kapagtubod o kan mga bakong kapagtubod niyato? Nagmamalasakit daw siya sa sato?

3. Naririsa daw ni Jehova an mga inhustisyang naeeksperyensiyahan ta, asin taano?

³ Nagmamalasakit na marhay sa sato si Jehova asin naririsa niya kun paano kita tinatratar kan iba. “Si Jehova mamumuton sa hustisya.” (Sal. 37:28) Inaasigurar sa sato ni Jesus na ‘papangyarihon ni Jehova na marikas na maitao an hustisya’ sa tamang panahon. (Luc. 18:​7, 8) Asin dai na mahahaloy hahalion Niya an  gabos na danyos na naeksperyensiyahan ta asin an gabos na klase nin inhustisya.​—Sal. 72:​1, 2.

4. Anong tabang an itinatao sa sato ni Jehova ngunyan?

⁴ Mantang hinahalat niyatong mangibabaw an katanusan, tinatabangan kita ni Jehova na matagalan an inhustisya. (2 Ped. 3:13) Tinutukduan niya kita kun paano malilikayan na gumawi nin bakong madunong pag tinatratar kita nin bakong makatanusan. Paagi sa saiyang Aki, tinatawan kita ni Jehova nin perpektong halimbawa kun paano ta aatubangon an inhustisya. Asin tinatawan niya kita nin praktikal na mga sadol na puwede tang iaplikar pag tinatratar kita nin bakong makatanusan.

MAGIN MAINGAT SA REAKSIYON MO SA INHUSTISYA

5. Taano ta dapat kitang magin maingat sa reaksiyon ta sa inhustisya?

⁵ Huli sa inhustisya, tibaad makulgan kitang marhay asin mapurisaw. (Ecl. 7:7) Arog man kaiyan an namatian kan maimbod na mga lingkod, arog ni Job asin Habakuk. (Job 6:​2, 3; Hab. 1:​1-3) Dawa ngani normal sanang makamati kaiyan, kaipuhan tang magin maingat sa reaksiyon ta tanganing dai kita makagawi nin may kamangmangan.

6. Ano an manunudan ta sa halimbawa ni Absalom? (Hilingon man an ritrato.)

⁶ Pag tinatratar kita nin bakong makatanusan, tibaad purbaran tang magbalos asin itanos an mga bagay-bagay. Kun gigibuhon ta iyan, puwede tang mapagrabe an sitwasyon. Pag-isipan an halimbawa ni Absalom na aki ni Hading David. Naanggot siyang marhay kan an tugang niyang si Tamar luguson ni Amnon na tugang ninda sa ama. Uyon sa Katugunan ni Moises, dapat na gadanon si Amnon huli sa ginibo niya. (Lev. 20:17) Normal sana man na maanggot si Absalom, pero bako siyang awtorisado na magtanos kan mga bagay-bagay.​—2 Sam. 13:​20-23, 28, 29.

7. Paano an inhustisya temporaryong nakaapektar sa sarong salmista?

⁷ Pag an mga minagawi nin bakong makatanusan garo baga dai napapadusahan, tibaad isipon na niyato na daing saysay na gibuhon pa an tama. Pag-isipan an sarong salmista. Naobserbaran niya na garo baga nagigin asensado sa buhay an mga maraot na nangmamaltrato sa mga matanos. Sinabi niya: “Sinda an mga maraot, na parelaks-relaks sana pirmi.” (Sal. 73:12) Napurisaw man siyang marhay sa inhustisyang nahiling niya kaya haros nawaran na siya nin kumpiyansa sa mga pakinabang kan paglilingkod ki Jehova, na sinasabi: “Kan hinguwahon kong sabuton ini, nakapurisaw nanggad ini sa sako.” (Sal. 73:​14, 16) Sa katunayan, sinabi niya: “Alagad ako, dikit-dikitan pang malagalag an mga  bitis ko; haros madarinas na ako sa mga paglakad ko.” (Sal. 73:2) Kaagid man kaiyan an nangyari sa brother na aapudon tang Alberto.

8. Ano an nagin epekto sa sarong brother kan inhustisyang naeksperyensiyahan niya?

⁸ Sinahutan si Alberto na naghabon daa siya nin kuwarta sa pondo kan kongregasyon. Bilang resulta, nawara an saiyang mga pribilehiyo saka an respeto sa saiya kan dakul sa kongregasyon na nakaaram sa nangyari. “Naghinanakit ako, naanggot, saka nadisganar,” an sabi niya. Tinugutan niya na makaapektar sa saiyang espirituwalidad an kulog na namatian niya, asin nagin inaktibo pa ngani siya sa laog nin limang taon. Ipinapahiling kan eksperyensiyang ini an puwedeng mangyari kun dai ta kokontrulon an satong kaanggutan huli sa inhustisya.

ARUGON KUN PAANO TINAGALAN NI JESUS AN INHUSTISYA

9. Anong mga inhustisya an tinagalan ni Jesus? (Hilingon man an ritrato.)

⁹ Nagpahiling si Jesus nin perpektong halimbawa kun paano tatagalan an inhustisya. Pag-isipan an bakong makatanusan na pagtratar sa saiya kan mga kapamilya niya asin kan iba pang mga tawo. Sinahutan siya kan saiyang bakong kapagtubod na mga kapamilya na nararaot na daa an isip niya, inakusaran siya kan mga lider nin relihiyon na nakikipagtabangan daa siya  sa mga demonyo, asin pigtuya-tuya siya kan mga suldados na Romano, pinasakitan sa pisikal, asin sa katapos-tapusi ginadan. (Mar. 3:​21, 22; 14:55; 15:​16-20, 35-37) Alagad, tinagalan ni Jesus an gabos na inhustisyang iyan asin an iba pa na dai nagbabalos. Ano an manunudan ta sa halimbawa niya?

10. Paano ni Jesus tinagalan an inhustisya? (1 Pedro 2:​21-23)

¹⁰ Basahon an 1 Pedro 2:​21-23. a Tinawan kita ni Jesus nin perpektong arugan kun paano ta aatubangon an inhustisya. Aram niya kun nuarin magdadanay na silensiyo asin kun nuarin mataram. (Mat. 26:​62-64) Dai siya nagsimbag sa lambang kaputikan na sinasabi manungod sa saiya. (Mat. 11:19) Kan magtaram siya, dai niya ininsulto o hinumaan an mga nagpepersegir sa saiya. Nakapahiling si Jesus nin pagpupugol sa sadiri huling “ipinagkatiwala niya an saiyang sadiri sa Saro na naghuhusgar nin matanos.” Aram ni Jesus na an pagmansay ni Jehova sa mga bagay-bagay iyo an pinakamahalaga. Tiwala siya na reresolberan ni Jehova an mga inhustisya sa tamang panahon.

11. Ano an nagkapirang paagi na makokontrol ta an satong pagtaram? (Hilingon man an mga ritrato.)

¹¹ Maaarog ta si Jesus paagi sa pagkontrol ta sa satong mga sinasabi pag tinatratar kita nin bakong makatanusan. May mga inhustisya na bako man gayong grabe asin puwede ta na lang palampason. O tibaad puwedeng magdanay kitang silensiyo para malikayan na makataram nin sarong bagay na makakapagrabe sa sitwasyon. (Ecl. 3:7; Sant. 1:​19, 20) Sa ibang mga pagkakataon, tibaad kaipuhan niyatong magtaram pag may nahiling kitang saro na tinatrato nin bakong makatanusan o pag kaipuhan tang idepensa an katotoohan. (Gibo 6:​1, 2) Pero  kun mataram kita, dapat tang hinguwahon na magin kalmado asin magalang.​—1 Ped. 3:15. b

12. Paano ta ipagkakatiwala an satong sadiri sa “Saro na naghuhusgar nin matanos”?

¹² Maaarog ta man si Jesus kun ipagkakatiwala ta an satong sadiri sa “Saro na naghuhusgar nin matanos.” Pag sala an nagin paghusgar sa sato kan iba o pag tinatratar kita nin maraot, nagtitiwala kita na aram ni Jehova kun ano an totoo. An pagtitiwalang iyan makakatabang sa sato na tagalan an bakong makatanusan na pagtratar huling aram niyato na pag-abot nin panahon itatanos ni Jehova an mga bagay-bagay. Kun ipapabaya ta ki Jehova an mga bagay-bagay, malilikayan tang magdanay sa satong puso an kaanggutan o paghinanakit. An mga emosyon na iyan puwedeng magin dahilan na magin sobra an satong reaksiyon, mawara an satong kaugmahan, asin na madanyaran an satong relasyon ki Jehova.​—Sal. 37:8.

13. Ano an makakatabang sa sato na padagos na matagalan an inhustisya?

¹³ Siyempre, dai ta perpektong maaarog an halimbawa ni Jesus. Kun minsan, tibaad makagibo o makapagsabi kita nin mga bagay na pagbabasulan ta sa huri. (Sant. 3:2) Asin may mga inhustisya na puwedeng magkawsa sa sato nin nagdadanay na danyos sa emosyon asin sa pisikal na dipisil tagalan. Kun arog kaiyan an sitwasyon mo, makakasigurado ka na aram ni Jehova an inaagihan mo. Asin nasasabutan ni Jesus an namamatian mo huling nag-agi man siya nin mga inhustisya. (Heb. 4:​15, 16) Apuwera sa perpektong halimbawa ni Jesus, tinatawan man kita ni Jehova nin praktikal na mga sadol na nakakatabang sa sato na matagalan an inhustisya. Pag-ulayan ta an duwang bersikulo sa libro nin Roma na makakatabang sa sato.

“TAWAN NIN LUGAR AN DAKULANG KAANGGUTAN”

14. Ano an buot sabihon kan “tawan nin lugar an dakulang kaanggutan”? (Roma 12:19)

¹⁴ Basahon an Roma 12:19. Kan dinadagka ni apostol Pablo an mga Kristiyano na “tawan nin lugar an dakulang kaanggutan,” kiisay na dakulang kaanggutan an pinapanungdan niya? Sigun sa konteksto, ki Jehova. Tinatawan ta nin lugar an dakulang kaanggutan ni Jehova paagi sa pagpabaya na siya an magdesisyon kun nuarin asin kun paano niya ipapaabot an hustisya. Pagkatapos siyang trataron nin bakong makatanusan, an brother na si John nagsabi: “Kinaipuhan kong labanan an tendensiyang hinguwahon na itanos sa sadiri kong paagi an salang ginibo sako. Nakatabang sako an Roma 12:19 na maghalat ki Jehova.”

15. Taano ta pinakamarahay na halaton si Jehova na itanos an sarong problema?

¹⁵ Nakikinabang kita pag hinahalat ta si Jehova na iyo an magtanos kan sarong problema. Kun gigibuhon ta iyan, malilikayan ta an grabeng stress asin pagkadisganar na resulta kan pagpurbar na kita mismo an magresolber sa sarong dipisil na problema. Iinaalok sa sato ni Jehova an saiyang tabang. Garo man sana niya sinasabi, ‘Ipabaya na nindo sako an inhustisya; ako na an bahala.’ Kun nagtutubod kita sa panuga ni Jehova na “ako an mabalos,” magigibo tang palampason na lang an ginibo sato, na nagtitiwalang aasikasuhon niya iyan sa pinakamarahay na paaging posible. Iyan an nakatabang ki John na sinambit kasubago. Sinabi niya, “Kun hahalaton ko si Jehova, mas maaasikaso niya iyan na marhay kisa kun ako.”

“PADAGOS NA DAUGON NIN MARAHAY AN MARAOT”

16-17. Paano makakatabang sa sato an pamibi na “padagos na daugon nin marahay an maraot”? (Roma 12:21)

¹⁶ Basahon an Roma 12:21. Sinadol man ni Pablo an mga Kristiyano na “padagos na daugon  nin marahay an maraot.” Sa Sermon ni Jesus sa Bukid, sinabi niya: “Padagos na kamutan an saindong mga kaiwal asin padagos na ipamibi an mga nagpepersegir sa saindo.” (Mat. 5:44) Iyan mismo an ginibo niya. Posibleng marhay na naiisip niyato an manungod sa pagsakit na tinagalan ni Jesus kan ipako siya sa hariging pasakitan kan Romanong mga suldados. Imahinara na sana an grabeng kulog pati man an kawaran nin dignidad asin inhustisya na tinagalan niya.

¹⁷ Dai si Jesus nagpadaog sa inhustisyang inagihan niya. Imbes na sumpaon an mga suldados na idto, namibi siya: “Ama, patawada sinda, ta dai ninda aram an ginigibo ninda.” (Luc. 23:34) Pag ipinapamibi ta an mga nagtatratar sa sato nin maraot, puwede kaiyan na mabawasan an namamatian tang paghinanakit asin kaanggutan saka puwede pa ngani kaiyan na mabago an paghiling ta sa sainda.

18. Paano an pamibi nakatabang ki Alberto asin ki John na matagalan an inhustisya?

¹⁸ An pamibi nakatabang sa duwang brother na sinambit kasubago sa artikulong ini na matagalan an mga inhustisyang napaatubang sa sainda. Sinabi ni Alberto: “Ipinamibi ko an mga tugang na nagtratar sa sako nin bakong makatanusan. Nagkapirang beses kong hinagad ki Jehova na tabangan akong mahali an kaanggutan na namamatian ko dahil sa nangyari sako.” Nakakaugma ta maimbod na giraray na naglilingkod si Alberto ki Jehova. Sinabi ni John: “Dakul na beses kong ipinamibi an tugang na nakakulog sa sako. Nakatabang iyan sako na dai maanggot saka dai maapektaran kan sakong emosyon an paghiling ko sa saiya. Nakatabang man an mga pamibing idto na magkaigwa ako nin katuninungan nin isip.”

19. Ano an dapat tang gibuhon sagkod na dai pa natatapos an sistemang ini nin mga bagay? (1 Pedro 3:​8, 9)

¹⁹ Dai ta aram kun ano pang mga inhustisya an mapapaatubang sa sato bago magtapos an sistemang ini. Ano man an tibaad mapaatubang sa sato, lugod na nungka kitang magpundo sa pagpamibi ki Jehova para sa tabang. Saka, arugon niyato an ginibo ni Jesus kan tinatratar siya nin maraot asin padagos niyatong iaplikar an mga prinsipyo sa Bibliya. Kun gigibuhon ta iyan, makakasiyerto kita na magkakamit kita nin bendisyon hali ki Jehova.​—Basahon an 1 Pedro 3:​8, 9.