1-2. Ano an kalabot sa “marahay na gibuhón” na isinasagibo nin sarong elder?

 KUN haloy-haloy ka nang naglilingkod bilang ministeryal na lingkod, posibleng marhay na pinagmamaigutan mo nang mapauswag an mga kuwalidad na kaipuhan tanganing makuwalipikar bilang elder. Gusto mo daw na gibuhon an “marahay na gibuhón” na isinasagibo kan mga elder?​—1 Tim. 3:1.

² Ano an kalabot sa gibuhon nin sarong elder? Nanginginot siya sa paghuhulit, nagmamaigot sa pagpapastor saka pagtutukdo, asin pinapakusog an kongregasyon paagi sa tataramon asin halimbawa. Kaya may marahay na dahilan na inaapod kan Bibliya an mahigos na mga elder na ini bilang “mga balaog na tawo.”​—Efe. 4:8.

3. Paano makukuwalipikar an sarong brother para makapaglingkod bilang elder? (1 Timoteo 3:​1-7; Tito 1:​5-9)

³ Paano ka makukuwalipikar para makapaglingkod bilang elder? An pagigin kuwalipikado na maglingkod bilang elder bakong kapareho kan pagigin kuwalipikado sa sarong sekular na trabaho. Sa parati sa kinaban na ini, kun igwa ka kan mga kasanayan o kakayahan sa trabaho na hinahanap nin sarong employer, puwede mong makua an trabahong inaalok niya. Sa ibong na lado, kun mawot mong manombrahan bilang elder, urog pa sa mga kakayahan sa paghuhulit asin pagtutukdo an kaipuhan mo. Kaipuhan mong maabot an basado sa Kasuratan na mga kuwalipikasyon para sa mga elder na mahihiling sa 1 Timoteo 3:​1-7 asin Tito 1:​5-9. (Basahon.) Pag-uulayan sa artikulong ini an nagkapira sa mga iyan. Tutukaron ta kun paano an sarong brother (1) magkakaigwa nin marahay na reputasyon sa laog asin sa luwas kan kongregasyon, (2) magigin marahay na halimbawa bilang payo nin pamilya, asin  (3) magigin andam na maglingkod sa kongregasyon.

MAGKAIGWA NIN MARAHAY NA REPUTASYON

4. Ano an buot sabihon kan pagigin “daing katuyawan”?

⁴ Para makuwalipikar bilang elder, dapat na magin kang “daing katuyawan.” Nangangahulugan iyan na dapat na igwa ka nin marahay na reputasyon sa kongregasyon asin mayo nin balidong akusasyon laban sa saimo an siisay man. Dugang pa, dapat na igwa ka nin “marahay na reputasyon sa mga taga luwas.” Tibaad kritikaron kan mga bakong kapagtubod an saimong mga Kristiyanong tinutubod, alagad dapat na mayo sindang balidong dahilan na kuwestiyunon an saimong pagkaonesto o paggawi. (Dan. 6:​4, 5) Haputon an sadiri, ‘Igwa daw ako nin marahay na reputasyon sa laog asin sa luwas kan kongregasyon?’

5. Paano mo maipapahiling na ika “may pagkamuot sa karahayan”?

⁵ Kun ika “may pagkamuot sa karahayan,” hinihinguwa mong hilingon an marahay sa iba asin kinokomendaran sinda sa marahayon nindang mga kuwalidad. Maugma ka man na gumibo nin marahay sa iba, na ginigibo pa ngani an labi sa inaasahan sa saimo. (1 Tes. 2:8; hilingon an study note na “laging gumagawa ng mabuti” sa Tito 1:8.) Taano ta mahalagang marhay sa mga elder an kuwalidad na ini? Huling ginagamit ninda an dakul sa saindang mahalagang marhay na panahon para sa pagpastor sa kongregasyon asin sa pag-asikaso sa saindang mga asignasyon. (1 Ped. 5:​1-3) Pero an kaugmahan na nakukua ninda sa paglilingkod sa iba mas urog nanggad kisa sa ano man na pagsasakripisyo ninda.​—Gibo 20:35.

6. Ano an nagkapirang paagi para magin “mapag-istimar”? (Hebreo 13:​2, 16; hilingon man an ritrato.)

⁶ Ipinapahiling mong “mapag-istimar” ka pag naggigibo ka nin marahay na mga bagay sa iba, pati sa bako mong dayupot na mga amigo. (1 Ped. 4:9) An sarong tawong mapag-istimar ilinadawan sa sarong reperensiya sa arog kaining paagi: “An pinto kan saiyang harong—asin kan saiyang puso—dapat na bukas sa mga estranghero.” Haputon an sadiri, ‘Ano an reputasyon ko kun manungod sa pag-ako sa mga bisita?’ (Basahon an Hebreo 13:​2, 16.) An sarong tawong mapag-istimar ihinihiras kun ano an makakaya niya sa saiyang mga bisita, kaiba na an mga pobre asin an mahigos na mga lingkod, arog kan mga paraataman nin sirkito asin nagdadalaw na mga ispiker.​—Gen. 18:​2-8; Tal. 3:27; Luc. 14:​13, 14; Gibo 16:15; Roma 12:13.

7. Paano ipinapahiling nin sarong elder na siya “bakong mamumuton sa kuwarta”?

⁷ “Bakong mamumuton sa kuwarta.” Nangangahulugan ini na dai ka nakapokus sa materyal  na mga bagay. Ika man mayaman o pobre, iniinot mo an intereses kan Kahadian sa gabos na aspekto kan saimong buhay. (Mat. 6:33) Ginagamit mo an saimong panahon, kusog, asin iba pang mga bagay na igwa ka tanganing sambahon si Jehova, asikasuhon an saimong pamilya, asin maglingkod sa kongregasyon. (Mat. 6:24; 1 Juan 2:​15-17) Haputon an sadiri: ‘Ano an pagmansay ko sa kuwarta? Kontento daw ako sa pagkaigwa kan panginot na mga pangangaipo sa buhay? O nakapokus daw ako sa pagganar nin kuwarta asin sa pagtipon nin urog pang materyal na pagsadiri?’—1 Tim. 6:​6, 17-19.

8. Ano an nagkapirang paagi na ipinapahiling mong ika “balanse sa paggawi” asin “may pagpupugol sa sadiri”?

⁸ Kun ika “balanse sa paggawi” asin “may pagpupugol sa sadiri,” timbang ka sa gabos na aspekto kan saimong buhay. Kaiba digdi an paglikay sa sobra-sobrang pagkakan asin pag-inom, pagigin mabini sa pagbado saka pag-ayos sa sadiri, asin pagigin madunong sa pagpili nin libangan. Dai ka nagpapauripon sa pagsunod sa kun ano an mga uso sa kinaban. (Luc. 21:34; Sant. 4:4) Nagdadanay kang kalmado dawa pag pinoprobokar. ‘Bako kang buratsero’; mayo ka man kan reputasyon na parainom. Haputon an sadiri: ‘An paagi ko daw nin pamumuhay nagpapahiling na balanse ako sa paggawi asin may pagpupugol sa sadiri?’

9. Ano an kalabot sa pagigin “tultol an isip” asin sa pagigin “areglado”?

⁹ Kun ika “tultol an isip,” maingat mong sinisiyasat an mga bagay-bagay basado sa mga prinsipyo sa Bibliya. Pinag-isipan mong marhay an mga prinsipyong ini, asin nakatao iyan sa saimo nin urog na pakasabot. Dai ka basta-basta na sana nagdedesisyon. Imbes, sinisigurado mong aram mo an gabos na kinakaipuhan na impormasyon. (Tal. 18:13) Bilang resulta, nakakagibo ka nin madunong na mga desisyon na nagpapabanaag kan kaisipan ni Jehova. Kun ika “areglado,” organisado ka asin pirming nasa oras. Midbid kang maaasahan saka masinunod sa instruksiyon. An mga kuwalidad na ini makakakontribwir sa pagkaigwa mo nin marahay na reputasyon. Pag-ulayan ta ngunyan kun paano mo maaabot an basado sa Kasuratan na mga kuwalipikasyon sa pagigin marahay na halimbawa bilang payo nin pamilya.

MAGIN MARAHAY NA HALIMBAWA BILANG PAYO NIN PAMILYA

10. Paano an sarong lalaki “nanginginot sa saiyang pamilya sa mahusay na paagi”?

¹⁰ Kun ika sarong agom na lalaki asin gusto mong makuwalipikar bilang elder, igwa nin epekto sa saimong kuwalipikasyon an reputasyon kan saimong pamilya. Kaya kaipuhan na ika “nanginginot sa [saimong] pamilya sa mahusay na paagi.” Kaipuhan na igwa ka kan reputasyon na mamumuton asin responsableng payo nin pamilya. Kaiba digdi an panginginot sa saimong pamilya sa gabos na aspekto kan satong pagsamba. Taano ta mahalagang marhay ini? Nangatanusan si apostol Pablo: “Kun dai aram nin saro kun paano papanginutan an sadiri niyang pamilya, paano niya papangatamanan an kongregasyon nin Diyos?”—1 Tim. 3:5.

11-12. Paano an paggawi kan mga miyembro kan pamilya nin sarong brother puwedeng makaapektar sa saiyang mga kuwalipikasyon? (Hilingon man an ritrato.)

¹¹ Kun ika sarong ama, dapat na an saimong “mga aki masinunod asin disiplinado.” Kaipuhan mong mamumuton sindang tukduan asin sanayon. Siyempre, arog kan gabos na aki, gustong-gusto nindang nagngingiriritan saka nagkakarawat. Pero dahil sa saimong marahay na pagsasanay, magigin sindang masinunod, magalang, asin pormal. Dugang pa, kaipuhan mong gibuhon an saimong pinakamakakaya para tabangan an saimong mga aki na magkaigwa nin marahay na relasyon ki Jehova, mamuhay kauyon kan mga prinsipyo sa Bibliya, asin mag-uswag sagkod na mabawtismuhan sinda.

¹² “Igwa nin mga aking nagtutubod na dai mairereklamo  nin pagigin delingkuwente o pagigin rebelyoso.” Kun an sarong kapagtubod na aki makakomiter nin magabat na kasalan, paano iyan makakaapektar sa ama? Kun napapabayaan kan ama an pagsasanay saka an pagdidisiplina sa saiyang mga aki, posibleng marhay na dai siya makukuwalipikar na maglingkod bilang elder.​—Hilingon an Oktubre 15, 1996 na isyu kan An Torrengbantayan, p. 21, par. 6-7.

MAGLINGKOD SA KONGREGASYON

13. Paano mo maipapahiling na ika “rasonable,” “bakong sadiri sanang kagustuhan an sinusunod”?

¹³ An mga brother na igwang marahay na mga Kristiyanong kuwalidad dakulang tabang sa kongregasyon. An sarong tawong “rasonable” hinihinguwang mapagdanay an katuninungan. Kun gusto mong mamidbid bilang sarong rasonableng tawo, magdangog sa iba asin magin bukas sa opinyon ninda. Halimbawa, pag nasa miting kan mga elder, andam ka daw na suportaran an desisyon kan mayoriya kun mayo man nin nababalgang pagbuot o prinsipyo sa Bibliya? An “bakong sadiri sanang kagustuhan an sinusunod” nangangahulugan na dai mo iniinsistir na gibuhon an mga bagay-bagay sa paaging gusto mo. Inaapresyar mo an kahalagahan kan pagkaigwa nin dakul na parakonseho. (Gen. 13:​8, 9; Tal. 15:22) Ika “bakong parapakiiwal” o “bakong arangguton.” Imbes na magin makulog magtaram o makiargumento, mabuot ka asin mataktika. Bilang sarong mapagpatuninong na tawo, ika an nag-iinot para makipagkatuninungan, dawa sa nakakatensiyon na mga sitwasyon. (Sant. 3:​17, 18) An saimong mabuot na mga tataramon puwedeng makatabang na mabawasan an kaanggutan kan iba, pati na kan mga nagkokontra.​—Huk. 8:​1-3; Tal. 20:3; 25:15; Mat. 5:​23, 24.

14. Ano an buot sabihon kan “bakong bago pa sanang makumbertir” asin “maimbod”?

¹⁴ An sarong brother na kuwalipikado bilang sarong elder “bakong bago pa sanang makumbertir.” Dawa ngani dai man kaipuhan na dakul na taon ka nang bawtisado, kaipuhan mo nin panahon para magin sarong maygurang na Kristiyano. Bago ka manombrahan bilang sarong elder, dapat mong ipahiling na, arog ni Jesus, mapakumbaba ka asin kontentong naghahalat ki Jehova sa ano man na asignasyon. (Mat. 20:23; Fil. 2:​5-8) Maipapahiling mo na “maimbod” ka  paagi sa danay na pagsunod ki Jehova asin sa matanos na mga pamantayan niya asin paagi sa pagsunod sa paggiyang itinatao niya paagi kan saiyang organisasyon.​—1 Tim. 4:15.

15. Dapat daw na an sarong elder sarong mahusayon na tagapagtaram sa publiko? Ipaliwanag.

¹⁵ Malinaw na sinasabi kan Kasuratan na an mga paraataman dapat na “kuwalipikadong magtukdo.” Buot sabihon daw kaini dapat na saro kang mahusayon na tagapagtaram sa publiko? Dai man. Dakul na kuwalipikadong marhay na mga elder, dawa ngani bako man mahusayon na tagapagtaram sa publiko, an epektibo sa pagtutukdo sa ministeryo asin sa pagsungko sa pagpastor. (Hilingon an study note na “kuwalipikadong magturo” sa 1 Timoteo 3:2; ikumparar an 1 Corinto 12:​28, 29 asin Efeso 4:11.) Pero kaipuhan mo man giraray na padagos na hinguwahon na pauswagon an saimong mga kakayahan bilang sarong paratukdo. Paano mo iyan magigibo?

16. Paano ka magigin mas epektibo bilang sarong paratukdo? (Hilingon man an ritrato.)

¹⁶ “Nangangapot nin higot sa mapagkakatiwalaan na mensahe.” Para magin mas epektibo bilang sarong paratukdo, dapat na nakabase sa Tataramon nin Diyos an saimong mga itinutukdo asin itinataong mga konseho. Magin mahigos na paraadal kan Bibliya asin kan satong mga publikasyon. (Tal. 15:28; 16:23; hilingon an study note na “mahigpit na nanghahawakan sa mapananaligang mensahe” sa Tito 1:9.) Mantang nag-aadal ka, tawan na marhay nin atensiyon kun paano iaaplikar sa tamang paagi an Kasuratan. Asin pag nagtutukdo, pagmaigutan na abuton an puso kan mga nagdadangog sa saimo. Mag-uuswag ka bilang paratukdo kun mahagad ka nin mga suhestiyon sa eksperyensiyadong mga elder asin iaaplikar an mga iyan. (1 Tim. 5:17) Kaipuhan kan mga elder na “makapagpakusog” sa saindang mga tugang; alagad may mga pagkakataon na an mga elder dapat na magsadol o “magsaway” pa ngani. Arin man diyan, dapat na pirming magin mabuot an mga elder. Kun ika mabuot asin mamumuton saka kun ibinabase mo an saimong itinutukdo sa Tataramon nin Diyos, magigin epektibo ka huling inaarog mo an Dakulang Paratukdo, si Jesus.​—Mat. 11:​28-30; 2 Tim. 2:24.

PADAGOS NA MAGHINGUWANG UMUSWAG

17. (a) Ano an makakatabang sa mga ministeryal na lingkod na padagos na maghinguwang umuswag? (b) Ano an dapat na isaisip kan mga elder pag nag-eebalwar sinda nin mga brother para nombrahan? (Hilingon an kahon na “ Magin Rasonable Pag Nag-eebalwar.”)

¹⁷ Pagkatapos na repasuhon an mga kuwalipikasyon  para makapaglingkod bilang elder, tibaad mamatian kan nagkapirang ministeryal na lingkod na nungka sindang makukuwalipikar. Pero tandaan na dai inaasahan ni Jehova o kan saiyang organisasyon na perpekto mong maipahiling an mga kuwalidad na iyan. (1 Ped. 2:21) Asin an makapangyarihan na espiritu ni Jehova iyo an nagtatabang sa saimo na maabot an mga kuwalipikasyon na ini. (Fil. 2:13) May partikular daw na kuwalidad na gusto mong pauswagon? Ipamibi iyan ki Jehova. Mag-research manungod diyan, asin maghagad nin suhestiyon sa saro sa mga elder kun paano mo iyan mapapauswag.

18. Dinadagka an gabos na ministeryal na lingkod na gibuhon an ano?

¹⁸ Lugod na an gabos na brother, kaiba an mga naglilingkod na bilang elder, padagos na patalubuon an mga kuwalidad na pinag-ulayan sa artikulong ini. (Fil. 3:16) Ika daw sarong ministeryal na lingkod? Padagos na maghinguwang umuswag! Hagadon ki Jehova na sanayon asin moldehon ka tanganing urog ka pang magamit sa paglilingkod sa saiya asin sa kongregasyon. (Isa. 64:8) Lugod na abundang bendisyunan ni Jehova an saimong mga paghihinguwa na makuwalipikar na maglingkod bilang elder.