NASASAKITAN ka daw na mapagdanay na regular asin nakakaugma an saimong personal na pag-adal nin Bibliya? Posibleng marhay na gabos kita nakakaeksperyensiya kaiyan paminsan-minsan. Pero pag-isipan an iba pang mga bagay na ginigibo ta nin regular, arog kan pagkarigos. Nangangaipo iyan nin panahon saka paghihinguwa, pero pagkatapos kaiyan narerepreskuhan kitang marhay! An pag-adal nin Bibliya maiaagid man sa sarong nakakarepreskong pagkarigos o “paghugas nin tubig gamit an tataramon.” (Efe. 5:26) Pag-isipan an nagkapirang suhestiyon na makakatabang:

• Gumibo nin iskedyul. An personal na pag-adal nin Bibliya kaiba sa “mas importanteng mga bagay” na dai dapat pagpabayaan nin sarong Kristiyano. (Fil. 1:10) Para matabangan kang masunod an iskedyul mo, ilaag iyan sa lugar kun sain madali mo iyan na mahihiling, halimbawa sa pinto kan kuwarto mo o kan repridyeretor. O mag-set nin alarm sa saimong gadyet na mapagirumdom saimo na madali na an oras kan pag-adal mo.

• Aramon an pinakaangay saimo. Mas madali daw saimo na makakonsentrar kun halawig na pag-adal an gigibuhon mo o kun nagkapirang haralipot na pag-adal? Ika an pinakanakakaaram kan sitwasyon mo. Base diyan, aramon kun ano an pinakaangay saimo na iskedyul. Kun garo habo mo pang mag-adal pag-abot kan iskedyul mo, purbaran na mag-adal nin mga diyes minutos sana. Paagi sa pag-adal nin dawa arog kaiyan kahalipot, mas dakul kang maisasagibo kisa kun dai ka talaga maadal. Asin pag nakapuon ka na, posibleng marhay na mamomotibar kang ipadagos pa an pag-adal.​—Fil. 2:13.

• Patiinot na pilion an pag-aadalan mo. Kun saka ka lang mapili nin tema pag maadal ka na, tibaad dai mo ‘nagagamit sa pinakamarahay an saimong panahon.’ (Efe. 5:16) Puwede mong ilista an mga artikulo o mga tema na gusto mong pag-adalan. Pag may naisip kang hapot, isurat iyan. Asin sa pagtatapos kan kada sesyon mo sa pag-adal, puwede kang magdagdag nin iba pang mga ideya sa lista mo nin mga gusto mong pag-adalan.

• Gumibo nin mga pagbabago pag kaipuhan. Puwede kang gumibo nin mga pagbabago sa iskedyul mo, halimbawa kun gurano kalawig an pag-adal mo o an mga temang pinipili mo. An mahalaga bako kun nuarin o gurano kalawig an pag-adal mo o kun ano an temang pag-aadalan kundi kun gurano karegular an saimong pag-adal.

Talagang nakikinabang kita sa regular na pag-adal. Nagigin mas harani kita ki Jehova, nakakanuod na humiro nin may kadunungan, asin narerepreskuhan kita.​—Jos. 1:8.