Durante kan taon, naggibo nin nagkapirang mga pagliliwat an organisasyon na nakatabang na mapauswag an pagkasararo sa pagsamba sa tahaw kan Mga Estudyante sa Bibliya. An The Watch Tower nagpuon na magpublikar nin mga komento na nagpapaliwanag kan kasuratan na tinukar ninda sa saindang semanal na Pagtiripon sa Pagpamibi, Pag-umaw, asin Testimonya. Nagprodusir man an Mga Estudyante sa Bibliya nin kalendaryo na may teksto para sa kada semana asin himno na puwedeng kantahon sa panahon nin personal na pag-adal asin pampamilyang pagsamba.

Sa saindang mga pagtiripon, an mga Estudyante sa Bibliya nagtatao nin “mga testimonya,” asin kabilang diyan an eksperyensiya sa paglilingkod sa langtad, ekspresyon nin pasasalamat ki Jehova, pagkanta, o pagpamibi pa ngani. Si Eva Barney, na nabawtismuhan kan 1923 sa edad na 15, nagsabi: “Kun gusto mong magtao nin testimonya, matindog ka tapos masabi ka nin arog kaini, ‘Buot kong pasalamatan an Kagurangnan para sa gabos na karahayan niya sa sako.’” May mga tugang na gustong-gustong magtao nin testimonya. Sinabi pa ni Sister Barney: “An padaba ming may edad nang tugang na si Brother Godwin dakulon an gustong ipagpasalamat sa Kagurangnan. Pero pag nahihiling kan agom ni Brother Godwin na dai na napapamugtak an brother na nanginginot, bubutungon kaini an gayad kan amerikana niya, dangan mapundo na si Brother Godwin saka matukaw.”

Sarong beses kada bulan, an kada klase nagkakaigwa nin espesyal na Pagtiripon sa Pagpamibi, Pag-umaw, asin Testimonya. Sa pagladawan kan pagtiripon na ini, an The Watch Tower na Abril 1, 1923 nagsabi: “An kabanga kan pagtiripon dapat na gamiton sa pagtao nin mga testimonya na konektado sa gibuhon na paglilingkod asin pagpakusog sa mga worker. . . . Naniniwala kami na an pagkasararo na ini sa gibuhon matabang na magin mas dayupot an mga mag-aramigo.”

Si Charles Martin, sarong 19 anyos na class worker (parahayag sa kongregasyon) na taga Vancouver, Canada, nakinabang na marhay sa mga pagtiripon na ini. Nagigirumduman niya: “Digdi ko primerong nanudan kun ano an sasabihon pag naghaharong-harong. Sa parati, may masaysay nin eksperyensiya sa pagharong-harong, kaya nagkakaideya ako manungod sa kun ano an sasabihon asin kun paano sisimbagon an iba-ibang mga pagkontra.”

An “mga aldaw nin paglilingkod” nakakontribwir man sa pagkasararo kan organisasyon. An Abril 1, 1923 na isyu kan The Watch Tower nagpaisi:  “Tanganing magkaigwa nin pagkasararo sa gibuhon . . . , pinili an Martes, Mayo 1, 1923 bilang aldaw nin paglilingkod. Pagkatapos kaiyan, kada inot na Martes kan masurunod na bulan magigin aldaw man nin paglilingkod . . . An lambang miyembro kan kada klase dapat na makikabtang sa gibuhon.”

Maski an hoben na mga Estudyante sa Bibliya nakikabtang man sa gibuhon na ini. Si Hazel Burford, na 16 anyos pa sana kaidto, nagsabi: “An Bulletin igwa nin mga canvass (kaagid kan sampol na mga pakikipag-ulay) na kaipuhan ming tuumon. a Maigot akong nakikabtang sa gabos na aktibidad na ini kaiba ni Lolo.” Minsan siring, nakaeksperyensiya si Sister Burford nin dai inaasahan na pagkontra. Sinabi niya: “Sarong padaba ming may edad nang brother an grabe nanggad an pagkontra sa pakikipag-ulay ko sa mga tawo. Kan panahon na idto, dai nasasabutan kan nagkapira na an gabos na mga Estudyante sa Bibliya, kaiba na an ‘mga hoben na lalaki asin mga hoben na babayi,’ dapat na makikabtang sa pag-umaw sa satong Pinakanangungurog na Kaglalang.” (Sal. 148:​12, 13) Alagad nagpadagos sana si Sister Burford. Kan huri, nag-atender siya sa ikaduwang klase kan Paadalan nin Gilead asin naglingkod bilang misyonera sa Panama. Pag-abot nin panahon, binago kan mga brother na idto an saindang sabuot manungod sa mga hoben na nakikikabtang sa ministeryo.

An mga kumbensiyon nakatabang man na magkasararo an mga tugang. Dakul sa mga kumbensiyon na ini an may areglo nin mga aldaw nin paglilingkod, arog kan ginibo sa Winnipeg, Canada. Kan Marso 31, an kumbensiyon na ini nag-areglo nin inaapod na “Special Bombardment of Winnipeg,” na diyan an gabos na nag-atender inimbitaran na makikabtang. An arog kaining mga aldaw nin paglilingkod nagin garo pundasyon para sa urog pang pagpahiwas. Kan Agosto 5, saro pang kumbensiyon an ginibo sa Winnipeg kun sain kinakarkulong 7,000 katawo an nag-atender. Kan panahon na idto, iyan an pinakadakul na bilang nin mga nag-atender sa sarong kumbensiyon sa Canada.

An pinakamahalagang kumbensiyon kan banwaan ni Jehova kan 1923 ginibo kaidtong Agosto 18-26, sa Los Angeles, California. Sa mga semana bago an kumbensiyon, mahihiling sa mga diyaryo an mga paisi para sa okasyon, asin an mga Estudyante sa Bibliya nagdistribwir nin labing 500,000 na handbill. May  mga banner man na ikinabit sa pampubliko asin pribadong mga behikulo.

Kan Sabado, Agosto 25, nagtao si Brother Rutherford nin pahayag na “Mga Karnero Asin mga Kanding,” na diyan malinaw niyang ipinamidbid an “mga karnero” bilang mga tawong igwang pusong nasa tamang kamugtakan asin may paglaom na mabuhay sa sarong paraisong daga. Iprinesentar niya man an resolusyon na inaapod na “Sarong Patanid.” Kinondenar kan resolusyon na ini an Kakristiyanuhan asin dinagka an mga tawong sadiyosan an puso na lumuwas sa “Dakulang Babilonya.” (Kap. 18:​2, 4) Pagkatapos kaiyan, an maigot na mga Estudyante sa Bibliya sa bilog na kinaban nagkasararo sa pagdistribwir nin minilyon na kopya kan resolusyon na ini.

Sa ultimong aldaw kan kumbensiyon, nadangog kan labing 30,000 na nag-atender an pampublikong diskurso ni Brother Rutherford na may temang “An Gabos na Nasyon Nagmamartsa Pasiring sa Armagedon, Alagad an Minilyon na Nabubuhay Ngunyan Dai Na Nuarin Man Magagadan.” Bilang pag-antisipar sa dakulang bilang nin mga maatender, inarkila kan mga Estudyante sa Bibliya an bagong tugdok na Los Angeles Coliseum. Tanganing madangog kan gabos an diskurso, ginamit kan mga tugang an loudspeaker kan istadyum, na bagong teknolohiya kan panahon na idto. Dakul man an nagdangog kan programa paagi sa radyo.

Kan taon 1923, nagkaigwa nin pambihirang paghiwas kan gibuhon na paghuhulit sa Aprika, Europa, India, asin South America. Sa India, mantang inaataman ni A. J. Joseph an saiyang agom asin anom na aki, nagtabang siya sa pagprodusir nin mga literatura sa lengguwaheng Hindi, Tamil, Telugu, asin Urdu.

Sa Sierra Leone, an mga Estudyante sa Bibliya na si Alfred Joseph asin Leonard Blackman nagsurat sa world headquarters sa Brooklyn, New York, para mag-request nin tabang. Kan Abril 14, 1923, sinimbag an saindang request. Si Alfred nag-istorya, “Sarong matangang banggi, may nag-apod sako sa telepono.” Sarong makusog na boses an nadangog niyang naghapot saiya, “Ika su nagsurat sa Watch Tower Society para mag-request nin mga parahulit?” “Iyo po,” an simbag ni Alfred. “Ako an ipinadara ninda.” Boses idto ni William R. Brown. Kan aldaw na idto, kakaabot pa sana niya hali sa Caribbean, kaiba an saiyang agom na si Antonia saka an hoben pa nindang mga aking babayi na si Louise saka Lucy. Dai na kaipuhan na maghalat nin haloy kan duwang brother para mamidbid nin personal an mga bagong abot.

Sinabi pa ni Alfred: “Kinaagahan mismo, mantang isinasagibo mi ni Leonard an kinatudan ming pag-adal nin Bibliya surusemana, bigla na sanang nahiling mi an sarong halangkaw na lalaki sa may pintuan mi. Iyo na idto si Brother Brown. Maigot siyang marhay para sa katotoohan mala ta gusto niya na tulos magtao  nin pahayag sa sunod na aldaw mismo.” Dai pang sarong bulan, naipasakamot na ni Brother Brown an gabos na literatura na dara niya. Dai nahaloy, 5,000 pang mga libro an naresibi niya, asin pagkatapos kaiyan, kinaipuhan pa niya nin dugang pang mga libro. Alagad dai man namidbid si Brother Brown bilang paratinda nin libro. Sa bilog niyang karera bilang sarong maigot na lingkod ni Jehova, pirmi niyang ibinabasar sa Kasuratan an saiyang mga pahayag, na huli kaiyan inapod siyang Bible Brown.

Miyentras tanto, sadit na marhay an sangang opisina na yaon kaidto sa Barmen, Germany. Nabaretaan man kan mga tugang na an siyudad madali nang salakayon kan kataid na nasyon na France. An mga Estudyante sa Bibliya nakahanap nin pasilidad sa Magdeburg na garo baga tamang-tama para sa ginigibo nindang mga pag-imprenta. Kan Hunyo 19, natapos kan mga tugang an pag-impake kan saindang kasangkapan sa pag-imprenta asin kan iba pang mga gamit dangan naglipat sinda sa bagong Bethel sa Magdeburg. Kan sunod na aldaw mismo pagkatapos na ipaaram sa world headquarters na tapos na an paglipat, ibinareta kan mga diyaryo na nasakop na kan France an siyudad nin Barmen. Para sa mga tugang, an paglipat na idto ebidensiya kan bendisyon asin proteksiyon ni Jehova.

Sa Brazil, si George Young, na nagbiyahe nin hararayo tanganing ipalakop an maugmang bareta, nag-establisar nin sarong bagong sangay asin nagpuon na magpublikar nin The Watch Tower sa lengguwaheng Portuguese. Sa laog sana nin pirang bulan, labing 7,000 na literatura an naipasakamot niya. An pag-abot niya sa Brazil nagtao man nin sarong magayunon na oportunidad ki Sarah Ferguson. Nagbabasa na siya kan The Watch Tower puon pa kan 1899, pero dai pa lamang siya nagkaigwa nin pagkakataon na simbolisaran an saiyang pagdusay paagi sa bawtismo sa tubig. Pakalihis nin pirang bulan, naabot man giraray ni Sister Ferguson asin kan saiyang apat na aki an mahalagang lakdang na ini.

Sa pagtatapos kan taon, an epekto kan paghihinguwa kan mga Estudyante sa Bibliya na magkasararo sa pagsamba sinambit sa The Watch Tower na Disyembre 15, 1923: “Hiling-hiling na an mga klase . . . nasa marahay na espirituwal na kamugtakan . . . Ihagkos niyato an satong pangalasag asin magpadagos na may panibagong kaigutan asin determinasyon para sa masunod na taon, na naggagaya-gaya mantang kita naglilingkod.”

An masunod na taon magigin sarong mahalagang marhay na taon para sa Mga Estudyante sa Bibliya. Pirang bulan nang nagtatrabaho an mga tugang sa Bethel sa sarong lote sa Staten Island, na harani sa saindang headquarters sa Brooklyn. An mga pasilidad na itinugdok sa bagong lokasyon na idto natapos sa pagpupuon kan 1924, asin nakatabang an mga iyan na pagkasararuon an mga tugang asin ipalakop an maugmang bareta sa mga paaging dai lamang posible kaidto.