An mga brother sa Bethel labing sarong taon nang nagtrabaho para magibo an istasyon nin radyo na WBBR sa Staten Island, New York City. Pagkatapos na linigon an daga, nagtugdok sinda nin sarong dakulang dagusan para sa mga nagtatrabaho saka nin sarong suway na edipisyo para sa mga kagamitan. Kan matapos na iyan, pinunan kan mga brother na bilugon an mga kagamitan na kaipuhan tanganing makabrodkast sa radyo. Pero kinaipuhan nindang masolusyunan an nagkapirang problema.

Nahiling kan mga brother na masakit na iinstalar an panginot na antena para sa istasyon. An antena na 91 metros an laba kaipuhan na ikabit sa pag-ultanan nin duwang posteng kahoy na an kada saro 61 metros an langkaw. Dai nagin mapanggana an inot na pagpurbar. Huli sa pagtitiwala ninda sa tabang ni Jehova, nagin mapanggana man giraray an mga brother. Si Calvin Prosser, na nagtrabaho sa proyekto, nagsabi, “Kun nagin mapanggana an inot ming pagpurbar, pigtapi-tapi mi na kuta an kada saro asin sinabi, ‘Hilinga an nagibo ta!’” Itinao kan mga brother ki Jehova an onra sa saindang kapangganahan, pero may iba pa sindang problema.

Kan panahon na idto, nagpupuon-puon pa sana an pagbrodkast sa radyo, asin masakit makabakal kan kinakaipuhan na mga kagamitan para diyan. Kaya binakal kan mga brother an nahanap nindang 500-watt na gamit nang transmitter sa lugar ninda na simplehon lang an pagkagibo. Imbes na magbakal nin mikropono, ginamit ninda an mikropono na hali sa sarong ordinaryong telepono. Sa sarong banggi kan Pebrero, nagdesisyon an mga brother na testingon an gabos na simpleng kagamitan na ini. Kaipuhan ninda nin programang ibobrodkast, kaya nagkaranta an mga brother nin mga kantang pang-Kahadian. Nagirumduman ni Ernest Lowe an mapangirit na nangyari  kan nagkakanta an mga brother, inapudan sinda ni Judge Rutherford, b na nadangog an pagkanta ninda sa saiyang radyo sa Brooklyn, na mga 25 kilometros an rayo.

“Magpurundo na daw kamo,” an pasubang sabi ni Brother Rutherford. “Garo kamo nagpaparangiyaw na mga ikos!” Medyo nasupog an mga brother kaya pig-off tulos ninda su transmitter, pero tiwala sindang handa na sinda para sa inot nindang pagbrodkast.

Kan Pebrero 24, 1924, durante kan inot na opisyal na pagbrodkast, idinedikar ni Brother Rutherford an istasyon nin radyo para gamiton “sa intereses kan kahadian kan Mesiyas.” Sinabi niya na an katuyuhan kan istasyon iyo na “tabangan an mga tawo na masabutan paagi sa liwanag kan Bibliya, ano man an saindang tinutubod o denominasyon, an kahulugan kan panahon na kinabubuhayan niyato.”

Nagin mapangganang marhay an inot na pagbrodkast na iyan. Sa suminunod na 33 na taon, an WBBR an ginamit kan organisasyon tanganing ibrodkast an mga programa sa radyo kan mga lingkod ni Jehova.

Kan Hulyo 1924, nagtiripon an Mga Estudyante sa Bibliya para sa sarong kumbensiyon sa Columbus, Ohio. Nag-arabot an mga delegado hali sa manlain-lain na parte kan kinaban, asin nadangog ninda an mga pahayag sa mga lengguwaheng Arabic, English, French, German, Greek, Hungarian, Italian, Lithuanian, Polish, Russian, sa mga lengguwaheng Scandinavian, asin Ukrainian. An pirang porsiyon kan programa pigbrodkast sa radyo, asin naggibo nin mga plano tanganing aroaldaw na magpublikar nin mga report an Ohio State Journal manungod sa kumbensiyon.

Kan Huwebes, Hulyo 24, labing 5,000 na nag-atender sa kumbensiyon an nagpartisipar sa sarong aldaw nin paghuhulit. Nakapasakamot sinda nin haros 30,000 na libro asin nakapuon nin rinibong pag-adal sa Bibliya. Inapod kan The Watch Tower an aldaw na ini na “an pinakamaugmang parte kan kumbensiyon.”

An saro pang tampok kan kumbensiyon nangyari kan Biyernes, Hulyo 25, kan basahon ni Brother Rutherford an sarong kapahayagan nin pagkondenar, sarong daing takot na proklamasyon laban sa klero. An kapahayagan nin pagkondenar na iyan nasa istilo na kaagid sa sarong legal na dokumento, asin inaakusaran kaiyan an mga lider nin pulitika, relihiyon, asin komersiyo na “pinapagdanay na ignorante an mga tawo sa mga probisyon nin Diyos na gagamiton para bendisyunan sinda nin buhay.” Dugang pa, sinabi man sa kapahayagan nin pagkondenar na iyan  na an mga tawong ini “sinuportaran an League of Nations asin idineklarar iyan na ‘an pulitikal na kapahayagan kan kahadian nin Diyos digdi sa daga.’” Kaipuhan kan Mga Estudyante sa Bibliya na magin pusuan asin pursigido tanganing maipaabot sa mga tawo an mensaheng ini.

Manungod sa nagin epekto kan kumbensiyon, ini an sinabi kan The Watch Tower: “An sadit na hukbong ini kan Kagurangnan na nagkatiripon sa Kumbensiyon sa Columbus nagpuling napakusog an pagtubod . . . , dai madadaog nin ano man na kapangyarihan o nagkakalayong mga pag-atake na tibaad gibuhon sa sainda kan kaiwal.” Si Leo Claus, na nag-atender sa kumbensiyon, nagsabi: “Pagkatapos kan asembleya, naghali kaming entusiyastiko na idistribwir sa samong teritoryo an kapahayagan nin pagkondenar.”

Kan Oktubre, pinunan kan Mga Estudyante sa Bibliya na magdistribwir nin minilyon na kopya kan tract na Ecclesiastics Indicted, an imprentadong bersiyon kan mensaheng ipinahayag ni Brother Rutherford. Sa sadit na banwa nin Cleveland, Oklahoma, natapos si Frank Johnson na magdistribwir kan mga tract 20 minutos bago an paghapit saiya kan ibang mga parahayag. Dai siya basta puwedeng maghalat sa lugar na madali siyang mahihiling huling pighahanap siya kan mga lalaki sa banwa na naanggot dahil sa ginigibo niyang paghuhulit. Nagdesisyon si Brother Johnson na magtago sa laog nin sarong haraning simbahan. Kan mahiling niyang mayong tawo diyan, nagwalat siya nin mga kopya kan Ecclesiastics Indicted sa Bibliya kan pastor asin sa kada tukawan. Kun gurano siya karikas naglaog, arog man siya kaiyan karikas nagluwas. May oras pa man kaya nagduman siya sa duwa pang simbahan, asin iyo man an ginibo niya diyan.

Tulos-tulos na nagbalik si Frank sa lugar kun sain siya hahapiton. Nagtago siya sa likod nin sarong gasolinahan, asin padagos na nakabantay kun baga yaon na su mga lalaking naghahanap sa saiya. Nag-agi sa may harani niya su awtong sinasakyan kan mga lalaki, pero dai ninda siya nahiling. Pagkahali tulos ninda, nag-arabot an iba pang mga tugang, na naghuhulit sa harani, para hapiton siya dangan naghali na sinda gabos.

“Mantang nagbibiyahe kami pahali sa banwa,” an istorya kan saro sa mga brother, “naagihan mi an tulong simbahan. Igwa nin mga 50 katawong nakatindog sa atubangan kan kada simbahan. May mga nagbabasa kan tract, an iba man itinataas iyan para mahiling kan pastor. Iyo, diit-diitan pang may mangyaring maraot samo! Pero pinasalamatan mi si Jehova na satong Diyos sa itinao niyang proteksiyon saka kaaraman para dai kami madakop kan mga kaiwal na ini kan Kahadian.”

Sa ibang mga nasyon, inaarog kan Mga Estudyante sa Bibliya an kaagid na halimbawa nin pusuan na pagpapatotoo. Sa norteng parte kan France, naghulit si Józef Krett sa nag-imigrar na mga paraminang hali sa Poland. Nakaiskedyul siyang magtao nin pahayag na may temang “The Resurrection of the Dead Soon.” Kan matawan na nin mga imbitasyon an mga residente kan banwa, pinatanidan kan padi duman an mga parasimba na dai diyan mag-atender. Kabaliktaran an nagin epekto kan patanid niya. Labing 5,000 katawo an nag-atender sa pahayag, kaiba na su padi! Inimbitaran ni Brother Krett an padi na idepensa kaini an saiyang mga paniniwala, pero nagsayuma ini. Naipasakamot ni Brother Krett an gabos na literaturang igwa siya, asin sinabi niya na an mga tawong napatotoohan niya napapaha sa Tataramon nin Diyos.​—Amos 8:11.

Sa Aprika, dinara ni Claude Brown an maugmang bareta sa Gold Coast, na inaapod ngunyan na Ghana. An mga pahayag niya saka an mga literaturang idinistribwir niya nakatabang na marikas na maipalakop an katotoohan sa nasyon na iyan. Si John Blankson, na nag-eeskuwela para magin pharmacist, nag-atender  sa saro sa mga pahayag ni Brother Brown. Narealisar niya tulos na nahanap niya na an katotoohan. “Dahil sa katotoohan, nakamati ako nin labi-labing kaugmahan,” an nagigirumduman ni John, “saka ipinakipag-ulay ko iyan sa dakul na tawo sa eskuwelahan mi.”

Sarong aldaw, nagduman si John sa sarong Anglicanong simbahan para kuwestiyunon an padi manungod sa Trinidad, na ngunyan malinaw nang nasasabutan ni John na bako iyan kauyon kan itinutukdo kan Kasuratan. Pinahali siya kan padi, na nagkukurahaw, “Bako kang Kristiyano; kampon ka kan Diyablo! Lumayas ka!”

Pagpuli ni John, nagsurat siya sa padi, na iniimbitaran ini sa sarong pagtiripon sa publiko asin na idepensa an Trinidad. Nagsimbag an padi paagi sa pagpaapod ki John sa opisina kan panginot na maestro kan eskuwelahan, asin hinapot kaini si John kun totoong nagsurat siya sa padi.

“Iyo po, Sir,” simbag ni John.

Sinabihan si John kan maestro na maghagad nin dispensa sa padi paagi sa surat. Kaya nagsurat si John:

“Sir, pinakiulayan po ako kan maestro ko na maghagad nin dispensa saimo paagi sa surat asin handa man po ako na gibuhon iyan basta admitiron mo po na nagtutukdo ka nin palsong mga doktrina.”

Nabigla an maestro, asin naghapot, “Blankson, ini an gusto mong isurat?”

“Iyo po, Sir. Ini sana po gabos an gusto kong isurat.”

“Mapapahali ka kaini sa eskuwelahan. Sa mga sinasabi mo laban sa padi kan relihiyon na suportado kan gobyerno, makakaasa ka pa daw na magdadanay ka sa eskuwelahan na ini na pagsadiri kan gobyerno?”

“Pero, Sir, . . . pag nagtutukdo po kamo samo tapos may mga dai kami nasasabutan, bakong naghahapot man po kami saindo?”

“Iyo, tama.”

“Kaya, Sir, iyan man lang po su nangyari. Tinutukduan niya po kami manungod sa Bibliya tapos naghapot ako saiya. Kun dai niya nasimbag su hapot ko, taano po ta papagibuhon ako nin surat nin paghagad nin dispensa sa saiya?”

Dai pinahali si Blankson sa eskuwelahan. Asin mayo man nin ipinadarang surat nin paghagad nin dispensa.

Manungod sa mga aktibidad kan taon na iyan, an The Watch Tower nagsabi: “Masasabi nanggad niyato, arog ni David: ‘Pinakusog mo ako sa pakikilaban.’ (Salmo 18:​39, An Marahay na Bareta Biblia) Nagin nakakapakusog nanggad sa buot an taon na ini, huling nahiling ta an kamot kan Kagurangnan . . . An saiyang dusay na mga lingkod . . . maugmang nagtatao nin patotoo.”

Sa huring parte kan taon, naggibo nin mga plano an mga brother na pahiwason an pagmiministeryo paagi sa radyo. Kaya pinunan an paggibo nin saro pang istasyon nin radyo harani sa Chicago. An bagong istasyon na ini igwa kan angay na karatulang WORD, na iyo man an pangaran kaiyan. Gamit an transmitter na 5,000 na watt, ipapaabot kan WORD an mensahe kan Kahadian sa ginatos na milya, asin makakaabot pa ngani iyan sagkod sa norte sa Canada.

Kan taon 1925, nagtao si Jehova nin nakakaugma asin interesanteng mga silyab nin espirituwal na liwanag, na nagtaong paglilinaw sa pakasabot kan Mga Estudyante sa Bibliya sa Kapahayagan kapitulo 12. Masisingkog diyan an nagkapira. Pero dakul na iba pa an aakuon an pakasabot na ini sa mga pangyayaring nangyari sa langit asin sa epekto kan pakasabot na iyan sa mga lingkod nin Diyos digdi sa daga.