1. Ano an pira sa mga regalo na itinao sa sato ni Jesus?

 MAYO nin siisay man na tawong nagin arog kabukas-palad ki Jesus. Kan yaon siya digdi sa daga, naggibo siya nin mga milagro para tabangan an mga tawo. (Luc. 9:​12-17) Itinao niya an pinakanangungurog na regalo paagi sa pagtao kan saiyang buhay para sa sato. (Juan 15:13) Puon kan buhayon siya liwat, padagos kitang tinatabangan ni Jesus. Arog mismo kan ipinanuga niya, nakiulay siya ki Jehova na magbubo nin banal na espiritu para tukduan asin rangahon kita. (Juan 14:​16, 17, nota sa ibaba; 16:13) Asin paagi kan satong mga pagtiripon sa kongregasyon, padagos kitang sinasangkapan ni Jesus para gumibo nin mga disipulo sa bilog na kinaban.​—Mat. 28:​18-20.

2. Sairisay an kaiba sa “mga balaog na tawo” na sinambit sa Efeso 4:​7, 8?

² Pag-isipan an saro pa sa mga regalo o balaog na itinao sa sato ni Jesus. Isinurat ni apostol Pablo na kan nagsakat si Jesus sa langit, “nagtao siya nin mga balaog na tawo.” (Basahon an Efeso 4:​7, 8.) Ipinaliwanag ni Pablo na itinao ni Jesus an mga balaog na ini para suportaran an kongregasyon sa manlain-lain na paagi. (Efe. 1:​22, 23; 4:​11-13) Sa ngunyan, kaiba sa “mga balaog na tawo” na ini an mga ministeryal na lingkod, mga elder sa kongregasyon, asin mga paraataman nin sirkito. a Siyempre, bakong perpekto an mga lalaking ini, kaya napapasala man sinda. (Sant. 3:2) Pero ginagamit sinda kan satong Kagurangnan na si Jesu-Cristo para tabangan kita; sinda an balaog o regalo niya sa sato.

3. Iilustrar kun paano kita gabos puwedeng suportaran an mga ginigibo kan “mga balaog na tawo.”

³ Inasignaran ni Jesus an “mga balaog na tawo” na ini para pakusugon an kongregasyon. (Efe. 4:12) Pero gabos kita puwedeng tumabang sa sainda na maisagibo an mahalagang responsabilidad na ini. Para iilustrar: An nagkapira sa sato direktang nagtatabang sa  pagtugdok nin Kingdom Hall. Pero an iba sinusuportaran an proyekto paagi sa pagtao nin kakanon, transportasyon, asin iba pang mga bagay. Sa kaagid na paagi, kita gabos puwedeng suportaran an mga paghihinguwa kan mga ministeryal na lingkod, mga elder sa kongregasyon, asin mga paraataman nin sirkito paagi sa satong mga sinasabi asin ginigibo. Pag-ulayan ta kun paano kita nakikinabang sa mga pagmamaigot ninda asin kun paano niyato maipapahiling sa sainda saka ki Jesus, na nagtao sa sato kan “mga balaog na tawo” na ini, na inaapresyar ta sinda.

MGA MINISTERYAL NA LINGKOD NA “NAG-AASIKASO SA PAGTABANG SA IBA”

4. Ano an nagkapira sa mga paagi na an mga ministeryal na lingkod “nag-aasikaso sa pagtabang sa iba” kan inot na siglo?

⁴ Kan inot na siglo, may mga tugang na ninombrahan bilang mga ministeryal na lingkod. (1 Tim. 3:8) Garo baga sinda an “nag-aasikaso sa pagtabang sa iba” na sinambit ni Pablo. (1 Cor. 12:28) Minalataw na inaasikaso kan mga ministeryal na lingkod an kinakaipuhan na mga bagay tanganing makapokus an mga magurang sa kongregasyon sa pagtutukdo asin pagpapastor. Halimbawa, posibleng nagtabang an mga ministeryal na lingkod sa paggibo nin mga kopya kan Kasuratan o sa pagbakal kan mga materyales na kaipuhan sa pagkopya.

5. Ano an nagkapirang mahalagang paglilingkod na isinasagibo kan mga ministeryal na lingkod ngunyan?

⁵ Pag-isipan an nagkapirang mahalagang paglilingkod na isinasagibo kan mga ministeryal na lingkod sa saindong kongregasyon. (1 Ped. 4:10) Tibaad asignaran sindang mag-asikaso kan accounts o teritoryo kan kongregasyon, mag-order nin mga literatura para sa kongregasyon, mag-operate kan audio saka video equipment, maglingkod bilang mga attendant, o magtabang sa pagmentenar kan Kingdom Hall. Gabos ini kaipuhan para magin areglado an pagpunsiyonar kan kongregasyon. (1 Cor. 14:40) Dugang pa, may mga ministeryal na lingkod na nagpepresentar nin mga kabtang sa Pagtiripon na Pamumuhay Asin Ministeryo asin nagtatao nin pampublikong mga pahayag. An sarong ministeryal na lingkod tibaad asignaran man na magtabang sa paraataman nin grupo. Kun minsan, iiniiba kan mga elder an kuwalipikadong mga ministeryal na lingkod sa pagsungko sa pagpastor.

6. Ano an nagkapirang dahilan kaya inaapresyar ta an satuyang mahihigos na mga ministeryal na lingkod?

⁶ Paano nakikinabang an kongregasyon sa mga ginigibo kan mga ministeryal na lingkod? “Salamat sa samuyang mga ministeryal na lingkod, lubos kong nae-enjoy an mga pagtiripon,” an sabi ni Beberly, b sarong sister na taga Bolivia. “Huli sa paglilingkod ninda, nakakakanta ako, nakakapagkomento, nakakadangog nin mga pahayag, asin nakakanuod sa mga video saka artwork. Inaasikaso ninda an seguridad saka tinatabangan an mga nakakonektar paagi sa videoconference. Pagkatapos kan pagtiripon, nanginginot sinda sa paglinig, nagtatabang sa accounts, saka sinisiguradong igwa kami kan kaipuhan ming mga literatura. Nagpapasalamat talaga ako sa sainda!” Si Leslie na nakaistar sa Colombia asin elder an agom, nagsabi: “Sa mga ministeryal na lingkod nagdedepende si agom para maasikaso an manlain-lain na asignasyon. Kun mayo sinda, magigin mas sibot pa siyang marhay, kaya nagpapasalamat ako sa entusiyasmo saka sa pagigin andam nindang tumabang.” Daing duda na iyan man an namamatian mo para sa satong mga ministeryal na lingkod.​—1 Tim. 3:13.

7. Paano ta maipapahiling an satong apresasyon sa mga ministeryal na lingkod? (Hilingon man an ritrato.)

⁷ Nakakamati kita nin pasasalamat sa mga ministeryal na lingkod alagad dinadagka kita kan Bibliya: “Ipahiling nindo na mapagpasalamat kamo.” (Col. 3:15) Si Krzysztof, na sarong elder sa Finland, ipinapahiling an saiyang pasasalamat sa arog kaining paagi, “Nagpapadara ako nin kard o text message na igwa nin sarong teksto saka nagsasambit ako nin sarong espesipikong paagi na napakusog ako nin sarong ministeryal na lingkod  o kun taano ta naaapresyar ko an paglilingkod niya.” Si Pascal asin Jael, na nakaistar sa New Caledonia, espesipikong ipinapamibi an mga ministeryal na lingkod. Sinabi ni Pascal, “Kaining mga nakaagi, an samuyang mga kahagadan, pagngayo-ngayo, saka mga pamibi nin pasasalamat parating manungod sa ninombrahan na mga brother na ini sa samong kongregasyon.” Dinadangog ni Jehova an arog kaiyan na mga pamibi, asin nakikinabang an bilog na kongregasyon.​—2 Cor. 1:11.

MGA ELDER SA KONGREGASYON NA “NAGPAPAGAL DIYAN SA SAINDO”

8. Taano ta nasabi ni Pablo na “nagpapagal” an mga magurang sa kongregasyon kan inot na siglo? (1 Tesalonica 5:​12, 13)

⁸ An mga magurang sa kongregasyon kan inot na siglo nagpagal para sa kongregasyon. (Basahon an 1 Tesalonica 5:​12, 13; 1 Tim. 5:17) Sinda an “nanginginot” sa kongregasyon—nagkokondukta nin mga miting saka naggigibo nin mga desisyon bilang grupo nin kamagurangan. “Nagsasadol” sinda sa mga tugang—nagtatao nin espesipiko alagad mamumuton na sadol para protektaran an kongregasyon. (1 Tes. 2:​11, 12; 2 Tim. 4:2) Siyempre, nagmaigot man an mga lalaking ini para sustentuhan an saindang pamilya asin para mapagdanay na makusog sa espirituwal an saindang sadiri.​—1 Tim. 3:​2, 4; Tito 1:​6-9.

9. Ano an nagkapirang responsabilidad kan mga elder ngunyan?

⁹ Dakul man nin ginigibo an mga elder ngunyan. Sinda mga ebanghelisador. (2 Tim. 4:5) Nanginginot sinda nin may kaigutan sa ministeryo sa langtad, inoorganisar an gibuhon na paghuhulit sa teritoryo kan kongregasyon, asin sinasanay kita na magin epektibo sa paghuhulit asin pagtutukdo. Naglilingkod man sinda bilang mahihirakon asin daing pinapalain na mga hukom. Pag an sarong Kristiyano nakakomiter nin magabat na kasalan, pinagmamaigutan kan mga elder na tabangan siyang maibalik an makusog na relasyon niya ki Jehova. Kasabay kaiyan, nag-iingat sinda tanganing mapagdanay na malinig an kongregasyon. (1 Cor. 5:​12, 13; Gal. 6:1) An mga elder panginot nang midbid bilang mga pastor. (1 Ped. 5:​1-3) Nagtatao sinda nin pinag-andaman na marhay na mga pahayag na basado sa Kasuratan, nagmamaigot na mamidbid an gabos sa kongregasyon, asin nagsasagibo nin pagsungko sa pagpastor. May mga elder na nagtatabang man sa pagtugdok asin pagmentenar nin Kingdom Hall, pag-organisar nin kumbensiyon, asin sa mga Hospital Liaison Committee asin sa mga Patient Visitation Group, apuwera pa sa ibang mga asignasyon. Nagpapagal talaga an mga elder para sa sato!

10. Ano an nagkapirang dahilan kaya inaapresyar ta an mahihigos niyatong mga elder?

¹⁰ Ihinula ni Jehova na aatamanon kitang marhay nin mga pastor asin na “dai na [kita] magkakatarakot o magkakakurubhanan.” (Jer. 23:4) Iyan mismo an namatian ni Johanna, na sarong sister sa Finland, kan magkaigwa nin malalang hilang an saiyang ina. Sinabi niya: “Dawa ngani nasasakitan akong sabihon sa iba an namamatian ko, sarong elder na dai ko man kaidto gayong bisto an nagin mapasensiya sako, namibi kaiba ko, asin inasigurar sa sako na namumutan ako ni Jehova. Dai ko na matandaan su eksaktong sinabi niya, pero rumdom kong nawara su namamatian kong pagkapurisaw. Naniniwala ako na isinugo siya ni Jehova tanganing tabangan ako sa mismong oras na kaipuhan ko iyan.” Paano ka tinabangan kan mga elder sa kongregasyon nindo?

11. Paano ta maipapahiling an satong pag-apresyar sa mga elder? (Hilingon man an ritrato.)

¹¹ Gusto ni Jehova na magpahiling kita nin udok sa pusong apresasyon sa mga elder “huli kan saindang trabaho.” (1 Tes. 5:​12, 13) Si Henrietta, na nakaistar man sa Finland, nagsabi: “Gikan sa buot na nagtatabang sa iba an mga elder, pero dai kaiyan buot sabihon na mas dakul sindang oras asin kusog kisa sa iba o na mayo sindang mga problema sa buhay. Minsan sinasabihan ko sinda: ‘Aram mo po, mahusayon ka pong  elder. Gusto ko lang pong maaraman mo iyan.’” Sarong sister sa Türkiye c na an pangaran Sera nagsabi: “Kaipuhan kan mga elder nin gasolina, sabi ngani, tanganing padagos sindang makaabante sa saindang gibuhon. Kaya puwede ta sindang tawan nin kard, imbitaran na magkakan kaiba ta, o ibanan sa ministeryo.” May naiisip ka daw na elder na naaapresyar mong marhay an mga ginigibo para sa kongregasyon? Mag-isip nin mga paagi na maipapahiling mo an saimong pag-apresyar na iyan sa saiya.​—1 Cor. 16:18.

MGA PARAATAMAN NIN SIRKITO NA NAGPAPAKUSOG SA IBA

12. Anong areglo an nakapakusog sa mga kongregasyon kan inot na siglo? (1 Tesalonica 2:​7, 8)

¹² Tinawan ni Jesu-Cristo an kongregasyon nin “mga balaog na lalaki” na naglilingkod sa saro pang paagi. Sa irarom kan saiyang paggiya, isinugo kan kamagurangan sa Jerusalem si Pablo, Bernabe, asin iba pa bilang nagbibiyaheng mga paraataman. (Gibo 11:22) Taano? An dahilan kapareho kun taano ta nagnombra nin mga ministeryal na lingkod asin mga elder: para pakusugon an mga kongregasyon. (Gibo 15:​40, 41) An mga lalaking ini naggibo nin mga pagsasakripisyo asin isinapeligro pa ngani an saindang buhay para tukduan asin pakusugon an iba.​—Basahon an 1 Tesalonica 2:​7, 8.

13. Ano an nagkapirang responsabilidad kan mga paraataman nin sirkito?

¹³ An mga paraataman nin sirkito pirming nagbabalyo nin lugar. An nagkapira nagbibiyahe nin ginatos na kilometro para dalawon an mga kongregasyon. Kada semana, an sarong paraataman nin sirkito nagtatao nin nagkapirang pahayag, nagsusungko sa pagpastor, nagkokondukta nin miting nin mga payunir, miting nin mga elder, asin pagtiripon bago magluwas sa langtad. Nag-aandam siya nin mga pahayag asin nag-oorganisar nin pansirkitong mga asembleya asin nin mga kumbensiyon. Nagtutukdo siya sa mga paadalan para sa mga payunir, nag-oorganisar nin espesyal  na miting kaiba kan mga payunir sa sirkito, asin nag-aasikaso nin iba pang mga bagay na kun minsan apurado na iinasignar sa saiya kan sangang opisina.

14. Ano an nagkapirang dahilan kaya inaapresyar ta an satong mahigos na mga paraataman nin sirkito?

¹⁴ Paano nakikinabang an mga kongregasyon sa mahahalagang gibuhon kan mga paraataman nin sirkito? Manungod sa ginigibong pagdalaw kan nagbibiyaheng mga paraataman, ini an sabi kan sarong brother sa Türkiye: “An lambang pagdalaw ninda nagmomotibar sako na magtao nin mas dakul na panahon sa pagtabang sa mga tugang. Dakul na akong namidbid na mga paraataman nin sirkito, pero mayo lamang ni saro sa sainda an garo baga masakit dulukon o nagpamati sako na sibot sindang marhay.” Si Johanna, na sinambit kasubago, nakapartner sa ministeryo an sarong paraataman nin sirkito, pero mayo sindang nanumpungan maski saro. Sinabi niya, “Pero, dai ko malilingawan an aldaw na idto. An duwa kong tugang na babayi kakabalyo pa sana sa ibang lugar asin pungawon na ako sa sainda. Mamumuton akong pinakusog kan paraataman nin sirkito asin tinabangan ako na mahiling na sa paglilingkod ki Jehova tibaad temporaryo kitang maparayo sa satong mga mahal sa buhay. Pero sa bagong kinaban, magkakaigwa kita nin dai mabilang na pagkakataon na magkairibanan.” Dakul na paraataman nin sirkito an napamahal na man sa mga tugang na pinaglingkudan ninda.​—Gibo 20:37–21:1.

15. (a) Kauyon kan sinasabi sa 3 Juan 5-8, paano ta maipapahiling an apresasyon sa satong mga paraataman nin sirkito? (Hilingon man an ritrato.) (b) Taano ta dapat kitang magpahiling nin konsiderasyon sa agom kan ninombrahan na mga lalaki, asin paano ta iyan magigibo? (Hilingon an kahon na “ Girumdumon an Saindang Agom na Babayi.”)

¹⁵ Dinagka ni apostol Juan si Gayo na magpahiling nin pagkamapag-istimar sa nagdadalaw na mga tugang asin na “asikasuhon . . . sinda sa paaging makakapaugma sa Diyos.” (Basahon an 3 Juan 5-8.) An sarong paagi na magigibo ta  iyan iyo na imbitaran an paraataman nin sirkito na makaibanan ta sa pagkakan. An saro pang paagi iyo an pagsuportar sa mga areglo sa paglilingkod sa langtad sa panahon kan saiyang dalaw. Si Leslie, na sinambit kasubago, ipinapahiling man an saiyang pasasalamat sa iba pang mga paagi. “Ipinapamibi ko na itao ni Jehova an saindang mga pangangaipo,” an sabi niya. “Naggigibo man kami ni agom nin mga surat para sa sainda, na sinasabi na nakatabang na marhay sa samo an saindang mga pagdalaw.” Tandaan, an mga paraataman nin sirkito igwa man nin mga kadipisilan asin napapagal man arog ta. Kun minsan, nagkakahilang sinda, nahahadit, asin pinangluluyahan pa ngani nin buot. Tibaad an saimong mabuot na mga tataramon o sarong simpleng regalo iyo an simbag sa pamibi kan saindong paraataman nin sirkito!—Tal. 12:25.

KAIPUHAN TA NIN “MGA BALAOG NA TAWO”

16. Kauyon kan sinasabi sa Talinhaga 3:​27, ano an mga tibaad ihapot kan mga brother sa saindang sadiri?

¹⁶ Sa manlain-lain na parte kan kinaban, kaipuhan ta nin dakul pang brother na maglilingkod bilang “mga balaog na tawo.” Kun ika sarong bawtisadong brother, kaya mo man sana daw na magtabang? (Basahon an Talinhaga 3:27.) Andam ka daw na makuwalipikar bilang sarong ministeryal na lingkod? Andam ka daw na abuton an pasuhan na paglingkudan an mga tugang bilang sarong elder? d Magigibo mo daw na i-adjust an saimong mga kamugtakan para mag-aplay sa School for Kingdom Evangelizers? An paadalan na iyan aandamon ka para mas lubos ka pang magamit ni Jesus. Kun pagmati mo bako kang kuwalipikado, mamibi ki Jehova. Hagadon saiya na tabangan ka kan saiyang banal na espiritu para mapanggana mong maisagibo an ano man na asignasyon na itinao sa saimo.​—Luc. 11:13; Gibo 20:28.

17. Ano an pinapatunayan kan “mga balaog na tawo” manungod sa satong Hadi, si Jesu-Cristo?

¹⁷ An mga brother na ninombrahan ni Jesus bilang “mga balaog na tawo” patunay na ginigiyahan niya kita sa huring mga aldaw na ini. (Mat. 28:20) Nagpapasalamat nanggad kita na igwa kita nin sarong Hadi na mamumuton, bukas-palad, asin maasikaso na nagtatao sa sato nin kuwalipikadong mga brother para pangatamanan kita sa satong mga pangangaipo. Kaya maghanap nin mga oportunidad na ipahiling an saimong apresasyon sa mahigos na mga lalaking ini. Asin dai nuarin man paglingawan na pasalamatan si Jehova, na iyo an pinakagikanan kan “lambang marahay na balaog asin lambang perpektong regalo.”​—Sant. 1:17.