1. Ano an namamatian ni Jehova para sa mga lingkod niya?

 ANO an naririsa ni Jehova pag hinihiling niya an saiyang mga lingkod digdi sa daga? Aram niya pag maugma kita asin pag mamundo kita. (Sal. 37:18) Pag nahihiling niyang naglilingkod kita sa saiya sa abot kan satong makakaya dawa pag nakakamati kita nin makulog na mga emosyon, nauugma siyang marhay sa sato! Urog pa diyan, gustong-gusto niyang tabangan asin rangahon kita.

2. Ano an ginigibo ni Jehova para sa mga nalugadan an puso, asin paano kita makikinabang sa pag-ataman niya?

² Sinasabi kan Salmo 147:3 na “binebendahan [ni Jehova] an mga lugad” kan mga may pusong nalugadan. Ilinaladawan digdi si Jehova na mamumuton na inaataman an mga indibidwal na nalugadan an puso, o emosyon. Ano an dapat niyatong gibuhon para makinabang sa pag-ataman ni Jehova? Pag-isipan an sarong ilustrasyon. An sarong mahusay na doktor dakula an maitatabang tanganing maumayan an sarong tawong nalugadan. Pero tanganing makinabang an tawong nalugadan, dapat niyang sunudon na marhay an mga instruksiyon kan doktor. Sa artikulong ini, aaramon ta sa Tataramon ni Jehova kun ano an sinasabi niya para sa mga nalugadan an puso asin pag-uulayan ta kun paano niyato iaaplikar an saiyang mamumuton na sadol.

INAASIGURAR SA SATO NI JEHOVA NA MAHALAGA KITA

3. Taano ta may mga nakakamati na bako sindang mahalaga?

³ Nabubuhay kita sa kinaban na mayong pagkamuot, asin nakakamundo, naipapamati sa dakul na tawo na bako sindang mahalaga. An sister na si Helen a nagsabi: “Nagdakula ako sa sarong pamilya na mayong pagkamuot. Bayolente an ama ko saka aroaldaw  niyang pigpaparasabi samo na daing kuwenta kami.” Arog ni Helen, tibaad trinatar ka man nin maraot, parating pigkikritika, o ipinamati saimo na mayong magugustong magpadangat sa saimo. Kun iyo, tibaad masakitan kang maniwala na igwa nin tunay na nagmamakulog sa saimo.

4. Uyon sa Salmo 34:​18, ano an sinisiyerto sa sato ni Jehova?

⁴ Dawa kun trinatar ka nin maraot kan iba, makakasiyerto ka na namumutan asin pinapahalagahan ka ni Jehova. “Harani [siya] sa mga nalugadan an puso.” (Basahon an Salmo 34:18.) Kun pagmati mo garo baga ‘runot an saimong espiritu,’ girumdumon na si Jehova may nahiling na marahay na mga bagay sa saimong puso asin irinani ka niya mismo sa saiya. (Juan 6:44) Pirmi siyang andam na tabangan ka huling mahalaga kang marhay sa saiya.

5. Ano an manunudan ta sa pagtratar ni Jesus sa mga tawong minemenos kan iba?

⁵ Makakanuod kita manungod sa mga namamatian ni Jehova paagi sa pagkonsiderar sa halimbawa ni Jesus. Durante kan saiyang ministeryo digdi sa daga, tinawan niyang atensiyon an mga tawong minemenos kan iba, asin trinatar niya sinda nin may pagmalasakit. (Mat. 9:​9-12) Kan an sarong babaying naglalaom na maumayan kan saiyang malalang hilang dutaan an saiyang bado, rinanga siya ni Jesus saka kinomendaran huli sa pagtubod niya. (Mar. 5:​25-34) Perpektong ipinapahiling ni Jesus an personalidad kan saiyang Ama. (Juan 14:9) Kaya makakasiyerto ka na mahalaga ka ki Jehova asin na hinihiling niya an saimong marahay na mga kuwalidad, kaiba na an saimong pagtubod saka pagkamuot sa saiya.

6. Paano malalabanan nin saro an pakamati na bako siyang mahalaga?

⁶ Ano an puwede mong gibuhon kun padagos kang nakakamati nin pagduda sa saimong halaga o kun paminsan-minsan nakakamati ka kaiyan? Magbasa nin mga teksto sa Bibliya na nag-aasigurar sa saimo na mahalaga ka ki Jehova asin hurop-hurupon  iyan. b (Sal. 94:19) Kun dai mo naabot an sarong pasuhan o pinangluluyahan ka nin buot huling bakong arog kadakul kan sa iba an nagigibo mo, dai ikumparar an sadiri mo sa iba asin dai magpokus sa mga dai mo kayang gibuhon. Rasonable si Jehova sa mga inaasahan niya sa sato. (Sal. 103:​13, 14) Kun nakaeksperyensiya ka kaidto nin pang-aabuso, dai pagbasulon an sadiri sa ginibo kan nang-abuso sa saimo. Bako mo idtong kasalan! Tandaan na an papanimbagon ni Jehova iyo an mga naggigibo nin sala, bako an mga biktima. (1 Ped. 3:12) Si Sandra, na nakaeksperyensiya nin pang-aabuso kan siya aki pa, nagsabi, “Pirmi kong ipinapamibi ki Jehova na tabangan niya akong magin balanse an paghiling ko sa sakong sadiri, arog kan paghiling niya sa sako.”

7. Paano ta magagamit sa paglilingkod ki Jehova an mga inagihan ta sa buhay?

⁷ Nungkang magduda na puwede kang gamiton ni Jehova para tabangan an iba. Itinao niya sa saimo an onra na magin kapwa trabahador ka niya sa Kristiyanong ministeryo. (1 Cor. 3:9) An mga inagihan mo sa buhay posibleng marhay na nakatabang saimo na makapahiling nin empatiya sa iba asin na masabutan an tibaad namamatian ninda. Dakula an maitatabang mo sa sainda. Si Helen, na sinambit kasubago, nag-ako nin tabang asin mas nakakatabang na man siya ngunyan sa iba. Sinabi niya: “An arog ko na ‘daing kuwenta’ tinabangan ni Jehova na mamatian na namumutan ako asin kapaki-pakinabang.” Si Helen maugmang naglilingkod bilang regular payunir.

GUSTO NI JEHOVA NA AKUON TA AN SAIYANG PAGPAPATAWAD

8. Anong asigurasyon an yaon sa Isaias 1:18?

⁸ An nagkapira sa mga lingkod ni Jehova napupurisaw na marhay huling pigbabasol pa man giraray ninda an saindang sadiri sa mga nagibo ninda kaidto, bago o dawa pagkatapos sindang mabawtismuhan. Pero marahay na girumdumon niyato na itinao ni Jehova an pantubos dahil sa hararom na pagkamuot niya sa sato. Kaya siguradong gusto niyang akuon ta an saiyang regalo. Inaasigurar sa sato ni Jehova na pagkatapos tang ‘husayon an mga bagay-bagay’ c sa saiya, dai niya na uungkaton an satong mga kasalan. (Basahon an Isaias 1:18.) Mamumuton talaga si Jehova ta linilingawan na niya an satong nagibong mga kasalan! Pero, dai niya linilingawan an marahay na mga bagay na ginibo niyato.​—Sal. 103:​9, 12; Heb. 6:10.

9. Taano ta dapat niyatong gibuhon an satong pinakamakakaya na magpokus sa presente asin sa puturo imbes na sa nakaagi?

⁹ Kun pigpaparabasol mo pa man giraray an saimong sadiri huli sa mga nagibo mo kaidto, gibuhon an pinakamakakaya na magpokus sa presente asin sa puturo imbes na sa nakaagi. Pag-isipan an halimbawa ni apostol Pablo. Pinagbasulan niya na maringis niyang pinersegir kaidto an mga Kristiyano, pero aram niya na pinatawad na siya ni Jehova. (1 Tim. 1:​12-15) Padagos niya daw na pigparaisip-isip an mga kasalan niya kaidto? Malinaw na dai, kun paanong dai niya na pigparaisip pa an mga naginibuhan niya kaidto bilang maigot na parasuportar kan Judaismo. (Fil. 3:​4-8, 13-15) Imbes, padagos na nagin maigot si Pablo sa saiyang ministeryo asin nagpokus sa puturo. Arog ni Pablo, dai mo na mababago an nakaagi. Pero puwede mong matawan nin onra si Jehova sa presente mong mga kamugtakan asin isip-isipon an magayunon na puturo na ipinanuga niya sa saimo.

10. Ano an puwede niyatong gibuhon kun nakagibo kita kaidto nin mga bagay na nakakulog sa iba?

¹⁰ Tibaad napupurisaw ka huli sa mga ginibo mo kaidto na nakakulog sa iba. Ano an makakatabang sa saimo? Gibuhon an pinakamakakaya na husayon an nagibo mong danyos, kaiba na an  sinserong paghagad nin dispensa. (2 Cor. 7:11) Hagadon ki Jehova na tabangan an mga naapektaran kan ginibo mo. Matatabangan ka niya asin an nakulgan mo na padagos na maglingkod sa saiya asin maibalik an saindong katuninungan.

11. Ano an manunudan ta sa halimbawa ni propeta Jonas? (Hilingon man an ritrato.)

¹¹ Makanuod sa nagibong sala, asin magin andam na magpagamit ki Jehova sa ano man na paaging pilion niya. Mangnuhon an halimbawa ni propeta Jonas. Imbes na magpa-Nineve arog kan ipinagbuot sa saiya kan Diyos, nagdulag si Jonas pasiring sa ibong na direksiyon. Dinisiplina ni Jehova si Jonas, asin nakanuod siya sa nagibo niyang sala. (Jon. 1:​1-4, 15-17; 2:​7-10) Dai tinalikdan ni Jehova si Jonas. Tinawan Niya giraray nin oportunidad si Jonas na magpa-Nineve, asin sa pagkakataon na ini nagsunod tulos siya. Dai niya tinugutan an namamatian niyang pagbasol sa salang nagibo niya kaidto na makaulang sa saiya na akuon an asignasyon na ini na hali ki Jehova.​—Jon. 3:​1-3.

RINARANGA KITA NI JEHOVA PAAGI KAN BANAL NA ESPIRITU

12. Paano kita tinatawan ni Jehova nin katuninungan pag nakakaeksperyensiya kita nin nakakatraumang pangyayari o pag nagadanan kita nin mahal sa buhay? (Filipos 4:​6, 7)

¹² Paagi sa saiyang banal na espiritu, rinaranga kita ni Jehova pag nakakaeksperyensiya kita nin nakakatraumang pangyayari o pag nagadanan kita nin mahal sa buhay. Pag-isipan an nangyari ki Ron saka Carol. Nakakamundong marhay, naghugot an saindang aking lalaki. Sinabi ninda: “Nag-agi na man kami nin masakit na mga pagbalo kaidto, pero ini an pinakagrabe. Dakul na banggi kaming dai nakakaturog kaya namimibi kami ki Jehova, asin talagang namati mi an katuninungan na sinambit sa Filipos 4:​6, 7.” (Basahon.) Kun may inaagihan kang sarong nakakapurisaw na marhay na pagbalo, puwede mong sabihon ki Jehova an gabos na nasa puso mo paagi sa pamibi gurano man kaparati asin gurano man kalawig mo gusto. (Sal. 86:3; 88:1) Pauruutrong hagadon ki Jehova an saiyang banal na espiritu. Nungka niyang babaliwalaon an saimong mga pakiulay.​—Luc. 11:​9-13.

13. Paano kita matatabangan kan banal na espiritu na padagos na magsamba ki Jehova nin may kaimbudan? (Efeso 3:16)

¹³ Nag-agi ka daw nin sarong masakiton na pagbalo asin ngunyan nangluluya kang marhay? An banal na espiritu puwede kang tawan kan kusog na kaipuhan mo tanganing padagos kang magsamba ki Jehova nin may kaimbudan. (Basahon an Efeso 3:16.) Pag-isipan an eksperyensiya kan sister na si Flora. Siya saka an saiyang agom naglilingkod kaidto bilang misyonero kan nagin bakong maimbod sa saiya an saiyang agom, kaya nagdiborsiyo sinda. Sinabi niya: “Dahil sa grabeng kulog asin kamunduan na namatian ko, mayo na akong ibang naiisip kundi an ginibo niyang pagtraydor sa sako. Namibi ako ki Jehova na tawan niya ako nin banal na espiritu tanganing makatagal. Tinawan ako ni Jehova kan kaipuhan ko para mas magkaigwa ako nin kusog asin makayanan an sarong bagay na kan primero garo dai ko kaya.” Namati ni Flora na tinabangan siya nin Diyos na lalo pang magtiwala sa Saiya asin na tatabangan Niya siya sa gabos na pagbalong inaagihan niya. Sinabi pa niya: “Nagin totoo sa sako an mga tataramon sa Salmo 119:32: ‘Maigot kong sususugon an dalan kan saimong mga tugon huling lalo mo pang binubuksan an sakuyang puso para diyan.’”

14. Paano ta tutugutan an espiritu nin Diyos na tabangan kita?

¹⁴ Pagkatapos na hagadon ki Jehova an saiyang banal na espiritu, ano an dapat mong gibuhon? Makikabtang sa mga aktibidad na magpapangyari sa espiritu nin Diyos na humiro sa saimo. Kaiba digdi an pag-atender sa mga pagtiripon asin paghuhulit. Panuon an saimong isip kan kaisipan ni Jehova paagi sa pagbasa kan saiyang Tataramon aroaldaw. (Fil. 4:​8, 9) Mantang nagbabasa, mangnuhon an mga karakter sa Bibliya  na nag-agi man nin mga pagbalo asin hurop-hurupon kun paano sinda tinabangan ni Jehova na makatagal. Si Sandra, na sinambit kasubago, nag-agi nin sunod-sunod na grabeng pagbalo. Sinabi niya: “Napapakusog akong marhay kan istorya manungod ki Jose. Dai niya tinugutan an mga pagbalo asin mga inhustisyang inagihan niya na makapaluya kan relasyon niya ki Jehova.”​—Gen. 39:​21-23.

RINARANGA KITA NI JEHOVA PAAGI KAN SATONG MGA KAPAGTUBOD

15. Kiisay kita puwedeng mag-ako nin karangahan, asin paano ninda kita puwedeng matabangan? (Hilingon man an ritrato.)

¹⁵ Pag kita nagsasakit, an satong mga kapagtubod puwedeng magin “dakulang karangahan” sa sato. (Col. 4:11) An satong mga tugang tunay nanggad na sarong buhay na kapahayagan kan pagkamuot sa sato ni Jehova. Puwede kitang maranga kan satong mga kapagtubod paagi sa pagdangog sa sato nin may empatiya, o puwede ninda kitang matabangan paagi sa saindang presensiya. Tibaad maghiras sinda sa sato nin sarong nakakapakusog na teksto o mamibi kaiba kita. d (Roma 15:4) Kun minsan, tibaad ipagirumdom sa sato nin sarong tugang an manungod sa kaisipan ni Jehova na makakatabang sa sato na padagos na magtagal. An satong mga kapagtubod puwede man na magtao sato nin praktikal na tabang, arog kan pagtao nin kakanon pag kita pinangluluyahan o napupurisaw.

16. Ano an tibaad kaipuhan tang gibuhon para mag-ako kan tabang kan iba?

¹⁶ Para mag-ako kan tabang kan iba, tibaad kaipuhan tang hagadon iyan sa sainda. Namumutan kita kan satong mga tugang asin gusto nindang  tabangan kita. (Tal. 17:17) Pero tibaad dai ninda aram kun ano an satong namamatian o kun ano an kaipuhan niyato. (Tal. 14:10) Kun nakakamati ka nin grabeng kapurisawan, magin andam na sabihon sa mga amigong maygurang sa espirituwal an manungod sa mga namamatian mo. Sabihon sa sainda kun ano an makakatabang saimo. Puwede mong pilion na makipag-ulay sa saro o duwang elder na komportable kang istoryahan. Napatunayan nin nagkapirang sister na nakakarangang makipag-ulay sa saro pang maygurang na sister.

17. Anong mga kadipisilan an nakakaulang sa sato na mag-ako nin pampakusog nin buot, asin paano ta iyan makakayanan?

¹⁷ Labanan an tendensiya na isuway an sadiri sa iba. Huli sa namamatian mong makulog na mga emosyon, tibaad habo mo nang makiiba-iba o makiistoryahan sa iba. Kun minsan, tibaad dai ka masabutan kan mga tugang o makataram sinda nin nakakakulog. (Sant. 3:2) Dai iyan pagtugutan na makaulang sa saimo na mag-ako kan pampakusog nin buot na kaipuhan mo. An elder na si Gavin na may depresyon, nagsabi: “Sa parati, an pinakahabo kong gibuhon iyo na makipag-ulay o makiibanan sa mga amigo ko.” Minsan siring, dai nagpadaog si Gavin sa namamatian niya, asin nakinabang siya sa pakikiasosyar sa iba. An sister na si Amy nagsabi: “Huli sa mga naeksperyensiyahan ko kaidto, nasasakitan akong magtiwala sa mga tawo. Pero nanunudan ko nang mamutan asin magtiwala sa mga tugang arog kan ginigibo ni Jehova. Aram ko na nakakapaugma ini ki Jehova, asin nakakapaugma man ini sa sako.”

MARANGA PAAGI SA MGA PANUGA NI JEHOVA

18. Ano an hinahalat-halat tang mangyari, asin ano an puwede ta nang gibuhon ngunyan?

¹⁸ May kumpiyansa kitang makakalaom sa puturo huling aram niyato na sa dai na mahahaloy, lubos nang hahalion ni Jehova an gabos na pisikal asin emosyonal na kulog. (Kap. 21:​3, 4) Sa panahon na iyan, an inagihan tang makulog na mga eksperyensiya “dai na mapapasapuso.” (Isa. 65:17) Arog kan napag-ulayan ta, “binebendahan [ni Jehova] an mga lugad” niyato dawa ngunyan. Lubos na aprobetsaran an mamumuton na mga probisyon ni Jehova na tawan ka nin karangahan asin kaginhawahan. Dai nuarin man magduda na “nagmamakulog siya sa [saimo].”​—1 Ped. 5:7.