Nangyari na daw saimo na nasakitan kang girumdumon an pinag-adalan mo pa sana? Nangyayari iyan sa sato gabos paminsan-minsan. Ano an makakatabang? An pagrepaso sa panginot na mga punto.

Mantang nag-aadal ka, magpundo nin dikit paminsan-minsan para isip-isipon an mahahalagang ideya. Mangnuhon kun paano tinabangan ni apostol Pablo an mga nagbabasa kan surat niya na magibo iyan. Sinabi niya: “Ngunyan ini an panginot na punto.” (Heb. 8:1) Paagi sa mga tataramon na iyan, tinabangan niya sinda na masundan an saiyang lohika asin masabutan kun paano konektado sa saiyang tema an lambang punto.

Puwede ka man magtao nin panahon, tibaad mga sampulong minuto sa katapusan kan saimong pag-adal, para hurop-hurupon an panginot na mga punto kan pinag-adalan mo. Kun dai mo iyan magirumduman, hilingon an mga subtema o topic sentence—na sa parati iyo an inot na sentence kan lambang parapo—tanganing matabangan kang magirumduman iyan. Kun may bago kang nanudan, hinguwahon na ipaliwanag iyan sa sadiri mong mga tataramon. An pagrepaso sa panginot na mga punto makakatabang bako lang para mas pasil mong magirumduman an mga iyan kundi para mahiling mo man nin mas malinaw kun paano mo maiaaplikar sa saimong buhay an saimong pinag-adalan.