AN MUSIKA mahalagang marhay na kabtang kan kultura kan suanoy na Israel. An Bibliya parating nagsasambit nin manungod sa mga tawong nagtutugtog nin mga instrumento asin nagkakanta. Sa katunayan, mga diyes porsiyento kan Kasuratan kompuwesto nin mga kanta, asin an panginot na mga halimbawa kaiyan iyo an libro nin Salmo, Awit ni Solomon, asin Lamentasyon. Kauyon kaiyan, an librong Music in Biblical Life nagsasabi na an Bibliya “malinaw na nagpapahiling nin sarong sosyedad na diyan an musika ginagamit sa dakul na aktibidad sa saindang buhay.”

Musika sa pang-aroaldaw na buhay. An mga Israelita nagtutugtog nin musika para ipahayag an saindang mga namamatian. (Isa. 30:29) An mga babayi nagpapakaling-kaging nin mga tamburin, maugmang nagkakaranta asin nagbabarayle sa mga koronasyon, kapiyestahan, asin kapangganahan sa giyera. (Huk. 11:34; 1 Sam. 18:​6, 7; 1 Ha. 1:​39, 40) An mga Israelita nagkakanta man nin emosyonal na marhay na mga panambitan mantang nagmumundo. (2 Cron. 35:25) Mayong duda, “an mga Hebreo talagang mahiligon sa musika,” an sabi kan McClintock and Strong’s Cyclopedia.

Musika sa palasyo. An mga hadi kan Israel gustong-gustong nagdadangog nin musika. Si Hading Saul ipinaapod si David sa saiyang palasyo para maglingkod bilang musikero. (1 Sam. 16:​18, 23) Si David kan magin hadi na, nag-imbento nin mga instrumento sa musika, nagkomponer nin magagayon na kanta, asin nag-organisar nin orkestra na nagtutugtog sa templo ni Jehova. (2 Cron. 7:6; Amos 6:5) Si Hading Solomon igwa nin mga parakantang lalaki saka babayi sa saiyang palasyo.​—Ecl. 2:8.

Musika sa pagsamba. An pinakamahalaga, ginamit kan mga Israelita an musika para sambahon si Jehova. Sa katunayan, igwa nin 4,000 na musikero sa templo sa Jerusalem. (1 Cron. 23:5) Nagtutugtog sinda nin mga simbal, instrumentong de-kuwerdas, arpa, saka mga trumpeta. (2 Cron. 5:12) Pero bako lang an ekspertong mga musikerong ini an nag-uumaw ki Jehova paagi sa musika. Minalataw na dakul na Israelita an nagkakanta nin mga Kanta Para sa mga Pagtukad sa saindang pagbaklay para sa taunan na mga kapiyestahan sa Jerusalem. (Sal. 120-134) Asin uyon sa mga isinurat kan mga Judio, kinakanta kan mga Israelita an mga Salmong Halel a durante kan pamanggihan kan Paskuwa.

An musika mahalagang marhay pa man giraray sa mga lingkod nin Diyos. (Sant. 5:13) Nagkakanta kita bilang parte kan satong pagsamba. (Efe. 5:19) Paagi sa musika, napaparani kita sa satong mga kapwa Kristiyano. (Col. 3:16) Asin napapakusog kita kaiyan pag nag-aagi kita nin mga kasakitan. (Gibo 16:25) An musika sarong magayon na paagi para ipahiling an satong pagtubod asin pagkamuot ki Jehova.