KAN Miyerkules, Enero 18, 2023, sarong espesyal na paisi an nagluwas sa jw.org, na si Brother Gage Fleegle asin Brother Jeffrey Winder ninombrahan na maglingkod bilang mga miyembro kan Namamahalang Grupo kan Mga Saksi ni Jehova. An mga brother na ini haloy nang maimbod na naglilingkod ki Jehova.

Si Brother Fleegle pinadakula sa katotoohan kan saiyang mga magurang sa sulnupan na parte kan Pennsylvania, U.S.A. Kan hoben pa siya, nagbalyo an saindang pamilya sa sarong sadit na banwa kun sain igwa nin mas dakulang pangangaipo. Dai nahaloy pagkatapos kaiyan, nabawtismuhan siya kan Nobyembre 20, 1988.

Dinadagka pirmi si Brother Fleegle kan saiyang mga magurang na maglaog sa bilog na panahon na paglilingkod. Pirmi nindang pinapadagos sa saindang harong an mga paraataman nin sirkito saka mga Bethelite, asin nahiling ni Brother Fleegle kun gurano kaugma an mga tugang na idto. Dai nahaloy pagkabawtismo saiya, nagpuon siyang magregular payunir—kan Setyembre 1, 1989. Pakalihis nin duwang taon, naabot niya an pasuhan na gusto niyang abuton kaidtong 12 anyos pa sana siya—an maglingkod sa Bethel. Nagpuon siyang maglingkod sa Brooklyn Bethel kan Oktubre 1991.

Sa Bethel, nagtrabaho si Brother Fleegle sa Bindery sa laog nin walong taon, dangan inasignar siya sa Service Department. Kan panahon na idto, naglingkod siya nin pirang taon sa sarong kongregasyon sa lengguwaheng Russian. Kan 2006, pinakasalan niya an agom niyang si Nadia, na naglingkod na man sa Bethel kaiba niya. Inasignar sinda sa teritoryong nagtataram nin Portuguese asin sa laog nin labing sampulong taon, naglingkod sinda sa teritoryong nagtataram nin Kastila. Pakalihis nin dakul na taon sa Service Department, iinasignar si Brother Fleegle na magtrabaho sa Teaching Committee Office asin kan huri, sa Service Committee Office. Kan Marso 2022, ninombrahan siya bilang paratabang  sa Service Committee kan Namamahalang Grupo.

Nagdakula si Brother Winder sa Murrieta, California, U.S.A. Pinadakula siya sa katotoohan kan saiyang mga magurang, asin nabawtismuhan siya kan Marso 29, 1986. Sa suminunod mismong bulan, nag-auxiliary payunir na siya. Nagustuhan niyang marhay iyan kaya nagdesisyon siyang magpadagos. Pakalihis nin pirang bulan na pag-auxiliary payunir, nagpuon siyang magregular payunir kan Oktubre 1, 1986.

Kan hoben pa siya, binisita ni Brother Winder an duwa niyang kuya na naglilingkod sa Bethel kan panahon na idto. Huli sa pagbisitang iyan, nagkaigwa siya nin pagmawot na mag-aplay sa Bethel pagdakula niya. Asin kan Mayo 1990, naimbitaran siyang maglingkod sa pasilidad kan Bethel sa Wallkill.

Sa Bethel, nagtrabaho si Brother Winder sa manlain-lain na departamento, kaiba na an Cleaning Department, Farm Department, asin Bethel Office. Pinakasalan niya an agom niyang si Angela kan 1997 asin puon kaidto sagkod ngunyan, magkaibanan sindang naglilingkod sa Bethel. Nagbalyo sinda sa Warwick kan 2014, asin nag-asistir diyan si Brother Winder sa pagtugdok kan pasilidad kan world headquarters. Kan 2016, nagbalyo sinda sa Watchtower Educational Center sa Patterson, asin nagtrabaho diyan si Brother Winder sa Audio/Video Services. Pakalihis nin apat na taon, nagbalik sinda sa Warwick, asin iinasignar si Brother Winder na magtrabaho sa Personnel Committee Office. Kan Marso 2022, ninombrahan siya bilang paratabang sa Personnel Committee kan Namamahalang Grupo.

Ipinapamibi niyato na lugod abundang bendisyunan ni Jehova an “mga balaog na tawo” na ini mantang padagos sindang mahigos na naglilingkod para sa intereses kan Kahadian.​—Efe. 4:8.