Minsan siring, inaasahan sa sato ni Jehova na mapasensiya kitang mahalat sa paghiro niya sa itinalaan niyang panahon. Taano? Asin ano an makakatabang sa sato na magin maugma mantang naghahalat?

TAANO TA INAASAHAN NI JEHOVA NA MAHALAT KITA?

Sinasabi kan Bibliya: “Si Jehova mapasensiyang naghahalat tanganing pahilingan kamo nin pabor, asin matindog siya tanganing pahilingan kamo nin pagkahirak. Huli ta si Jehova sarong Diyos nin hustisya. Maugma an gabos na padagos na naghahalat sa saiya.” (Isa. 30:18) An mga Judiong matagas an payo an panginot nang pinapanungdan kan mga sinabing iyan ni Isaias. (Isa. 30:1) Pero may maimbod man na mga Judio, asin an mga tataramon na iyan nagtao sa sainda nin paglaom. An iyo man sanang mga tataramon nagtatao man nin paglaom sa maimbod na mga lingkod ni Jehova ngunyan.

Kaya dapat na mapasensiya kitang maghalat huling si Jehova mapasensiyang naghahalat. Igwa siya nin itinalaan na panahon kun nuarin niya tatapuson an sistemang ini, asin hinahalat niya an pag-abot kan aldaw asin oras na iyan. (Mat. 24:36) Sa panahon na iyan, magigin malinaw na marhay na bakong totoo an mga sahot kan Diyablo laban ki Jehova asin sa mga naglilingkod sa Saiya. Dangan paparaon ni Jehova si Satanas asin an siisay man na minakampi sa saiya, pero ‘papahilingan niya kita nin pagkahirak.’

Sa ngunyan, puwedeng dai pa halion ni Jehova an mga kasakitan na inaagihan ta, pero sinisigurado niya sa sato na puwede kitang magin maugma mantang naghahalat. Arog kan sinabi ni Isaias, puwede kitang magin maugma mantang padagos na naghahalat o naglalaom na mangyari an sarong bagay na marahay. (Isa. 30:18) a Paano kita magigin maugma? May apat na paagi na makakatabang.

KUN PAANO MAGIGIN MAUGMA MANTANG NAGHAHALAT

Magpokus sa positibong mga bagay. Dakul na karatan an nahiling ni Hading David sa bilog niyang buhay. (Sal. 37:35) Minsan siring, isinurat niya: “Magdanay kang silensiyo sa atubangan ni Jehova asin maghalat nin may pag-antisipar sa saiya. Dai ka maanggot nin huli sa tawo na mapangganang naisasagibo an saiyang mga pakana.” (Sal. 37:7) Isinapuso ni David an sadol na iyan paagi sa pagpokus sa panugang ililigtas siya. Pinahalagahan niya man an  lambang bendisyon na naaako niya hali ki Jehova. (Sal. 40:5) Kun mapokus man kita sa positibong mga bagay sa buhay ta imbes na sa negatibong mga nangyayari sa palibot ta, mas magigin madali sa sato na maghalat ki Jehova.

Magdanay na sibot sa pag-umaw ki Jehova. An kagsurat kan Salmo 71, na minalataw na si David, nagsabi ki Jehova: “Padagos akong mahalat sa saimo; dadagdagan ko pa an pag-umaw sa saimo.” (Sal. 71:14) Paano niya inumaw si Jehova? Iniistorya niya sa iba an manungod ki Jehova asin nagkakanta siya nin mga pag-umaw sa saiya. (Sal. 71:16, 23) Arog ni David, puwede man kitang magin maugma mantang naghahalat ki Jehova. Inuumaw ta siya paagi sa satuyang ministeryo, sa pakikipag-ulay sa iba aroaldaw, asin sa satong mga kanta para sa pagsamba. Sa sunod na magkanta ka nin kantang pang-Kahadian, ano daw kun pag-isipan mong marhay an nakakapakusog na mensahe kaiyan?

Gumibo nin paagi para mapakusog ka kan saimong mga tugang. Kan mag-agi nin mga problema si David, sinabi niya ki Jehova: “Sa atubangan kan mga maimbod sa saimo, maglalaom ako sa saimong pangaran.” (Sal. 52:9) Mapapakusog man kita kan satong maimbod na mga kapwa parasamba, bako lang sa satong mga pagtiripon asin sa ministeryo kundi pati man sa mga pagturutiripon o gatherings.​—Roma 1:11, 12.

Pakusugon an saimong paglaom. Sinasabi kan Salmo 62:5: “Silensiyo akong naghahalat sa Diyos huling hali sa saiya an paglaom ko.” Kaiba sa makusog na pagtubod an pagkaigwa nin makusog na kumpiyansa sa bagay na inaasahan​—na mahalagang marhay para makatagal kita sa sistemang ini lalo na kun an katapusan dai pa mag-abot sa panahon na inaasahan ta. Dapat na magin kumbinsido kita na an mga panuga ni Jehova magkakatotoo gurano man kahaloy na kaipuhan tang halaton an mga iyan. Mapapakusog ta an satong paglaom paagi sa pag-adal kan Tataramon nin Diyos​—sa mga propesiya kaiyan, sa pagkakauruyon kan laog kaiyan, asin sa mga detalyeng ihinayag diyan ni Jehova manungod sa saiya. (Sal. 1:2, 3) Kaipuhan ta man na padagos na “mamibi na may paggiya nin banal na espiritu” tanganing magdanay na harani ki Jehova mantang hinahalat na mautob an saiyang panuga na buhay na daing katapusan.​—Jud. 20, 21.

Arog ni Hading David, magtiwala na binabantayan ni Jehova an mga naghahalat sa Saiya asin na papahilingan Niya sinda nin maimbod na pagkamuot. (Sal. 33:18, 22) Padagos na mapasensiyang maghalat ki Jehova paagi sa pagpokus sa positibong mga bagay sa saimong buhay, paagi sa pag-umaw sa saiya, paagi sa paghinguwang mapakusog ka kan mga kapagtubod, asin paagi sa pagpapadanay na makusog kan saimong mahalagang marhay na paglaom.