1. Anong marahayon na sabuot an ipinapahiling kan mga parasamba ni Jehova sa bilog na kasaysayan?

 PINAPAHALAGAHAN mo daw na marhay an saimong relasyon ki Jehova? Siguradong iyo! Asin dakul pang iba an kapareho mo. Puon kan suanoy na panahon, dakulon nin arog mo na namumutan na marhay si Jehova. (Sal. 104:33, 34) Dakul an naggibo nin mga pagsasakripisyo para sambahon si Jehova. Arog mismo kaiyan an ginibo kan mga Israelita kaidto na inaapod na mga Nazareo. Sairisay sinda, asin ano an manunudan ta sa halimbawa ninda?

2. (a) Sairisay an mga Nazareo? (Bilang 6:1, 2) (b) Taano ta pinili kan nagkapirang Israelita na magin Nazareo?

² An tataramon na “Nazareo” kinua sa Hebreong termino na nangangahulugan na “Saro na Pinili,” “Saro na Suway,” o “Saro na Dusay.” Angay na deskripsiyon nanggad ini sa maigot na mga Israelita na naggibo nin partikular na mga pagsasakripisyo para paglingkudan si Jehova sa espesyal na paagi. Sa Katugunan ni Moises, an sarong lalaki o an sarong babayi puwedeng gumibo nin sarong espesyal na promesa ki Jehova na mamuhay bilang sarong Nazareo sa sarong peryodo nin panahon. a (Basahon an Bilang 6:1, 2.) Kaiba sa promesa, o solemneng panuga na iyan, an pagsunod sa mga susundon na dai aplikado sa ibang mga Israelita. Kaya taano ta pipilion nin sarong Israelita na magin Nazareo? Posibleng marhay na an siring na Israelita pinahiro kan saiyang dakulang pagkamuot ki Jehova asin udok sa pusong pasasalamat sa dakul na bendisyon na itinao Niya.​—Deu. 6:5; 16:17.

3. Ano an pagkakapareho kan mga lingkod nin Diyos ngunyan sa mga Nazareo?

³ An areglo sa pagigin Nazareo natapos kan an Katugunan ni  Moises salidahan kan “katugunan kan Cristo.” (Gal. 6:2; Roma 10:4) Minsan siring, arog kan mga Nazareo, an mga lingkod ni Jehova ngunyan padagos na nagpapahiling nin dakulang pagmawot na paglingkudan siya sa bilog nindang puso, kalag, isip, asin kusog. (Mar. 12:30) Gikan sa buot kitang nanuga na gigibuhon ta iyan kan idusay niyato an satuyang sadiri ki Jehova. Kaiba sa pag-utob sa panugang iyan an paggibo kan kabutan ni Jehova asin mga pagsasakripisyo. Mantang sinisiyasat ta kun paano inutob kan mga Nazareo an saindang panuga, makakanuod kita nin mahalagang mga leksiyon kun paano man niyato mauutob an satong mga panuga. b (Mat. 16:24) Pag-ulayan ta an nagkapirang halimbawa.

MAGIN ANDAM NA GUMIBO NIN MGA PAGSASAKRIPISYO

4. Uyon sa Bilang 6:3, 4, paano nababalo an pagigin mapagsakripisyo kan sarong Nazareo?

⁴ Basahon an Bilang 6:3, 4. An mga Nazareo dapat na dai mag-inom nin ano man na arak asin magkakan nin ano man na hali sa puon nin ubas, arog kan bunga kaiyan asin pasas. An mga tawo sa palibot ninda regular na nag-iinom o nagkakakan kan mga iyan, asin mayo man nin problema ta mayo man nin sala sa mga iyan. Sinasabi kan Bibliya na an arak “nakakapaugma sa puso nin tawo” bilang sarong regalo hali sa Diyos. (Sal. 104:14, 15) Minsan siring, andam an mga Nazareo na isakripisyo an nakakaugmang mga bagay na iyan. c

5. Anong mga pagsasakripisyo an piniling gibuhon ni Madian asin Marcela, asin taano?

⁵ Arog kan mga Nazareo, naggigibo man kita nin mga pagsasakripisyo para mas lubos na sambahon si Jehova. Pag-isipan an halimbawa ni Madian asin Marcela. d Komportable an buhay kan Kristiyanong mag-agom na ini. Igwa nin magayon na trabaho si Madian kaya nakaistar sinda sa sarong magayon na apartment. Minsan siring, gusto ninda na gumibo nin urog pa sa paglilingkod ki Jehova. Para maabot an pasuhan na iyan, nagdesisyon sinda na gumibo nin nagkapirang pagbabago. “Pinunan ming bawasan an samong mga gastos,” an sabi ninda. “Naglipat kami sa mas sadit na apartment saka ipinabakal mi su awto mi.” Si Madian asin Marcela dai naobligar na gibuhon an mga pagsasakripisyong iyan​—pinili ninda iyan huling sa paggibo kaiyan mapapahiwas ninda an saindang ministeryo. Kontento sinda asin maugma sa saindang desisyon.

6. Taano ta an mga Kristiyano ngunyan naggigibo nin mga pagsasakripisyo? (Hilingon man an ritrato.)

 ⁶ An mga Kristiyano man sa ngunyan nauugma na gumibo nin mga pagsasakripisyo para matawan ninda nin mas dakul na panahon an teokratikong mga aktibidad. (1 Cor. 9:3-6) Dai kita inoobligar ni Jehova na gumibo kan mga pagsasakripisyong ini asin mayo man nin sala sa mga bagay na tibaad binutasan ta. Halimbawa, an iba tibaad binutasan an trabaho na gusto ninda, binayaan an saindang harong, o dawa ngani an saindang ataman na hayop. Dakul an nagdesisyon na dai nguna mag-agom o magkaaki. An iba pinili na maglingkod kun sain mas dakula an pangangaipo, dawa ngani kaipuhan nindang mag-istar harayo sa saindang mga mahal sa buhay. Dakul sa sato an andam na gumibo kan siring na mga pagsasakripisyo huling gusto tang itao ki Jehova an satong pinakamarahay. Makakasigurado ka na pinapahalagahan ni Jehova an ano man na pagsasakripisyo, dakula man iyan o sadit, na pinili mong gibuhon tanganing mapaglingkudan siya.​—Heb. 6:10.

MAGIN ANDAM NA MAPALAIN

7. Anong kadipisilan an posibleng napaatubang sa sarong Nazareo huli sa pagdadanay niya sa saiyang promesa? (Bilang 6:5) (Hilingon man an ritrato.)

⁷ Basahon an Bilang 6:5. Nanuga an mga Nazareo na dai ninda papaputulan an saindang buhok. Sarong paagi iyan para ipahiling an saindang lubos na pagpapasakop ki Jehova. Depende sa lawig kan pagigin Nazareo nin sarong Israelita, an saiyang dai napuputulan na buhok puwedeng magin risang-risa. Kun an mga nasa palibot niya nagsusuportar sa saiya, puwedeng magin pasil para saiya na magdanay sa promesa niya bilang Nazareo. Minsan siring, nakakamundo ta may mga panahon sa kasaysayan nin Israel na dai pinahalagahan o sinuportaran an mga Nazareo. Kan panahon ni propeta Amos, an apostatang mga Israelita “pigparatawanan . . . nin arak na maiinom an mga Nazareo.” Posibleng marhay na ginibo ninda iyan tanganing purbaran an mga Nazareo na balgahon an saindang promesa na maglikay sa arak. (Amos 2:12) Siguradong may mga pagkakataon na kinaipuhan nin sarong Nazareo an kusog nin buot tanganing makapanindugan sa saiyang promesa asin mapalain.

8. Ano an nanudan mo sa eksperyensiya ni Benjamin na nakapakusog sa saimo?

⁸ Sa tabang ni Jehova, puwede man kitang magkaigwa nin kusog nin buot na mapalain dawa masusupgon kita. Pag-isipan an halimbawa ni Benjamin, sarong diyes anyos na Saksi sa Norway. An saindang eskuwelahan nagkaigwa nin okasyon bilang pagsuporta sa pakikigiyera kan Ukraine. Pinakanta an mga aki mantang nakasulot nin badong kulor bandera kan Ukraine. Para makalikay sa nasyonalistikong okasyon na iyan, nagtindog si Benjamin huruharayo sa pinangyayarihan kan okasyon. Kaso, nahiling siya kan sarong  maestra asin inapod siya: “Madya, mag-iba ka samo. Hinahalat mi ika!” Kusog-buot na nagdulok si Benjamin sa maestra asin nagsabi: “Neutral po ako Ma’am, dai po ako nagbabali sa mga political demonstration. An totoo po, dakul na mga Saksi ni Jehova an nakapreso ta habo nindang magbali sa giyera.” Inako kan maestra an paliwanag ni Benjamin asin dai na siya pinabali. Pero, pigparahapot siya kan mga kaklase niya kun taano ta dai siya nag-iba sa sainda. Grabe an nerbiyos ni Benjamin na haros mapahibi na; pero, may kusog nin buot na inutro niya sa gabos niyang kaklase su sinabi niya sa saiyang maestra. Pagkatapos kaiyan, sinabi ni Benjamin sa saiyang mga magurang na namati niya na tinabangan siya ni Jehova para makapanindugan sa saiyang pagtubod.

9. Sa anong paagi ta puwedeng mapaugma an puso ni Jehova?

⁹ Huling pinili ta na gibuhon an kabutan ni Jehova, napapalain kita sa mga tawo sa palibot ta. Kaipuhan ta nin kusog nin buot para magpamidbid bilang sarong Saksi ni Jehova sa trabaho o sa eskuwelahan. Asin mantang mas nagrururo an ugali asin paggawi kan mga tawo sa kinaban na ini, posibleng marhay na mas madipisilan kita na mamuhay kauyon kan mga prinsipyo sa Bibliya asin ihiras an maugmang bareta sa iba. (2 Tim. 1:8; 3:13) Minsan siring, pirming tandaan na ‘napapaugma ta an puso’ ni Jehova pag kusog-buot tang hinihinguwa na mapalain sa mga dai naglilingkod sa saiya.​—Tal. 27:11; Mal. 3:18.

PADAGOS NA INUTON SI JEHOVA SA SAIMONG BUHAY

10. Paano puwedeng nabalo an mga Nazareo huli sa pagsunod sa kahagadan na sinambit sa Bilang 6:6, 7?

¹⁰ Basahon an Bilang 6:6, 7. An mga Nazareo dai puwedeng magrani sa sarong gadan na tawo. Tibaad maisip mo na garo bako man ini dakulang sakripisyo. Alagad kan mga panahon kan Bibliya, puwedeng magin masakit para sa sarong Nazareo na sunudon an kahagadan na iyan pag an nagadan sarong dayupot na kapamilya. Pag may gadan, kaugalian kaidto na magrani sa bangkay kan nagadan. (Juan 19:39, 40; Gibo 9:36-40) Alagad dai iyan magigibo nin sarong Nazareo huli sa panuga niya. Dawa sa mga panahon nin grabeng kamunduan sa laog nin pamilya, an mga Nazareo nagpapahiling nin makusog na pagtubod paagi sa pagdadanay sa saindang promesa. Siguradong pinakusog ni Jehova an dedikado niyang mga parasambang ini para makayanan an mga kadipisilan na napaatubang sa sainda.

11. Ano an dapat na determinadong gibuhon nin sarong Kristiyano pag nagdedesisyon may koneksiyon sa saiyang pamilya? (Hilingon man an ritrato.)

¹¹ Bilang mga Kristiyano, sineseryoso ta an  satong pagdusay ki Jehova. May epekto iyan sa satong mga desisyon asin mga ginigibo may koneksiyon sa satong pamilya. Mahigos tang inaasikaso an satong maka-Kasuratan na responsabilidad sa satong pamilya, pero nungka tang ipinapaurog an kagustuhan kan satong mga kapamilya kisa sa hinahagad sato ni Jehova. (Mat. 10:35-37; 1 Tim. 5:8) Kun minsan, tibaad kaipuhanon tang isakripisyo an matuninong na relasyon sa satong mga kapamilya tanganing mapaugma si Jehova.

12. Sa pag-atubang sa masakit na sitwasyon sa saiyang pamilya, ano an ginibo ni Alexandru asin ano an dai niya ginibo?

¹² Pag-isipan an eksperyensiya ni Alexandru asin kan agom niyang si Dorina. Pagkatapos na mag-Bible study nin sarong taon, nagdesisyon si Dorina na magpundo, asin gusto niya na magpundo na man si Alexandru. Pero, kalmado asin mataktikang sinabihan ni Alexandru an saiyang agom na mapadagos siya. Dai iyan nagustuhan ni Dorina asin pinurbaran niyang papunduhon an agom niya sa pag-adal nin Bibliya. Sinabi ni Alexandru na hininguwa niyang intindihon an reaksiyon kan agom niya, pero dai iyan nagin madali. May mga pagkakataon kaidto na pag kinikritika siya ni Dorina asin tinataraman nin makulog, garo gusto na niyang magpundo sa pag-Bible study. Pero padagos pa man giraray na ininot ni Alexandru si Jehova, mantang padagos man na nagpapahiling nin dakulang pagkamuot asin respeto sa saiyang agom. Sa katapos-tapusi, an saiyang marahay na halimbawa nakapahiro sa agom niya na mag-Bible study giraray, asin pag-abot nin panahon, nabawtismuhan si Dorina.​—Hilingon sa jw.org/bcl an video na Alexandru Asin Dorina Văcar: “An Pagkamuot Mapasensiya Asin Mabuot” sa serye na “Binago kan Katotoohan an Saindang Buhay.”

13. Paano ta maipapahiling an satong pagkamuot ki Jehova asin sa satong pamilya?

¹³ Si Jehova an kaggibo kan areglo sa laog kan pamilya, asin gusto niya na magkaigwa kita nin maugmang pamilya. (Efe. 3:14, 15) Kun gusto tang magin tunay na maugma, kaipuhan tang gibuhon an mga bagay-bagay kauyon kan mga pamamaagi ni Jehova. Makakasigurado ka na pinapahalagahan na marhay ni Jehova an saimong mga pagsasakripisyo para sambahon siya mantang inaasikaso mo an saimong pamilya asin nagpapahiling sainda nin pagkamuot saka respeto.​—Roma 12:10.

DAGKAHON AN IBA NA ARUGON AN MGA NAZAREO

14. Sairisay an lalo nang dapat niyatong pakusugon paagi kan satong mga tataramon?

¹⁴ An gabos na nagpipiling sambahon si Jehova ngunyan kaipuhan na gumibo nin mga pagsasakripisyo na motibado nin pagkamuot. Bako iyan madali kun minsan. Paano ta matatabangan an iba na gibuhon iyan? Pakusugon sinda  paagi kan satong mga tataramon. (Job 16:5) Sa saindong kongregasyon, igwa daw nin naghihinguwang pasimplehon an saindang buhay tanganing urog pang makapartisipar sa teokratikong mga aktibidad? May aram ka daw na mga hoben na kusog nin buot na naninindugan sa eskuwelahan dawa nasasakitan sindang gibuhon iyan? May mga Bible study daw o mga kapagtubod na nasasakitan na magdanay na maimbod huli sa pagkontra kan mga kapamilya? Aprobetsaran ta an lambang oportunidad na pakusugon paagi kan satong mga tataramon an namumutan tang kapwa mga parasambang iyan, na sinasabi sa sainda an satong pagpapahalaga sa saindang pagsasakripisyo asin kusog nin buot.​—Filem. 4, 5, 7.

15. Paano tinabangan kan nagkapira an mga nasa bilog na panahon na paglilingkod?

¹⁵ Kun minsan, tibaad puwede kitang makatao nin praktikal na tabang sa satong mga kapwa Kristiyano na nasa bilog na panahon na paglilingkod. (Tal. 19:17; Heb. 13:16) Iyan an udok sa pusong pagmawot kan sarong maimbod asin may edad nang sister na taga Sri Lanka. Naglangkaw an saiyang pensiyon asin gusto niya na tabangan an duwang hoben na payunir na sister para makapagpadagos sinda sa saindang ministeryo sa ibong nin masakit na pagbuhay. Kaya nagdesisyon siya na magtabang sa pagbayad kan saindang bayadan sa telepono bulan-bulan. Marahayon nanggad na halimbawa an ipinahiling kan sister!

16. Ano an manunudan ta sa areglo nin pagigin Nazareo kan suanoy?

¹⁶ Dakul talaga kitang manunudan sa marahay na halimbawa na ipinahiling kan boluntaryong mga Nazareo kan suanoy! Minsan siring, an areglong ini may itinutukdo man sa sato manungod sa satong Ama sa langit, si Jehova. Tiwala siya na igwa kita kan udok sa pusong pagmawot na paugmahon siya asin na andam kitang gumibo nin mga pagsasakripisyo para utubon an satong pagdusay. Tinatawan niya kita nin onra paagi sa pagtao sa sato nin oportunidad na ipahiling na namumutan ta siya. (Tal. 23:15, 16; Mar. 10:28-30; 1 Juan 4:19) Ipinapahiling kan areglo nin pagigin Nazareo na nahihiling asin pinapahalagahan na marhay ni Jehova an mga pagsasakripisyong ginigibo ta para paglingkudan siya. Kaya lugod na magin determinado kita na padagos na paglingkudan si Jehova, na gikan sa buot na itinatao sa saiya an satuyang pinakamakakaya.