1. Iilustrar kun taano ta dapat tang sunudon si Jehova bilang satong Giya.

 IMAHINARON na nalagalag ka sa sarong kadlagan. May mga nakatagong peligro sa palibot mo: mga layas na hayop, mga insektong nagdadara nin hilang, nakakahilong mga tinanom, asin magapong mga agihan. Siguradong magpapasalamat ka kun igwa ka nin sarong eksperyensiyadong giya na nakakaaram kun hain an mga peligro asin kun paano mo malilikayan an mga iyan! An kinaban na ini garo kadlagan. Pano iyan nin mga peligro na puwedeng makaraot sa satong espirituwal na salud. Pero igwa kita nin perpektong Giya​—si Jehova. Ginigiyahan niya kita parayo sa peligro asin pasiring sa satong destinasyon​—sa buhay na daing katapusan sa bagong kinaban.

2. Paano kita ginigiyahan ni Jehova?

² Paano kita ginigiyahan ni Jehova? Panginot na, paagi sa saiyang nasusurat na Tataramon, an Bibliya. Pero naggagamit man siya nin mga tawo bilang saiyang mga representante. Halimbawa, ginagamit niya an “maimbod asin mapagmansay na uripon” para magtao nin espirituwal na kakanon na nakakatabang sato na makagibo nin madunong na mga desisyon. (Mat. 24:45) Naggagamit man si Jehova nin iba pang kuwalipikadong mga lalaki para giyahan kita. Halimbawa, an mga paraataman nin sirkito asin mga elder sa kongregasyon nagtatao nin pampakusog saka mga instruksiyon na puwedeng makatabang sato na makayanan an masakit na mga panahon. Nagpapasalamat nanggad kita sa maaasahan na giya sa delikadong huring mga aldaw na ini! Tinatabangan kita kaiyan na mapagdanay an pag-uyon ni Jehova asin padagos na maglakaw sa dalan pasiring sa buhay.

3. Ano an pag-uulayan ta sa artikulong ini?

³ Minsan siring, tibaad masakitan kita kun minsan na magsunod  sa paggiya ni Jehova, lalo na pag an nagtatao kaiyan bakong perpektong mga lalaki. Taano? An sadol na itinatao sato tibaad iba sa gusto o dai ta gusto. O tibaad pagmati ta bakong praktikal an paggiyang itinatao sa sato kaya iniisip ta na bako iyan hali ki Jehova. Sa arog kaiyan na mga pagkakataon, lalo nang kaipuhan tang magtiwala na si Jehova an saro na naggigiya sa saiyang banwaan asin na an pagsunod sa paggiya niya nagbubunga nin mga bendisyon. Tanganing matabangan kita na mapakusog an satong kumpiyansa, pag-uulayan sa artikulong ini (1) kun paano ni Jehova giniyahan an saiyang banwaan kan mga panahon kan Bibliya, (2) kun paano niya kita ginigiyahan ngunyan, asin (3) kun paano kita makikinabang kun padagos tang susunudon an saiyang paggiya.

KUN PAANO NI JEHOVA GINIYAHAN AN NASYON NIN ISRAEL

4-5. Paano ipinahiling ni Jehova na ginagamit niya si Moises para giyahan an Israel? (Hilingon an ritrato sa cover.)

⁴ Ninombrahan ni Jehova si Moises na panginutan an mga Israelita paluwas sa Ehipto. Asin tinawan Niya an mga Israelita nin nahihiling na patunay na ginigiyahan Niya sinda paagi ki Moises. Halimbawa, nagtao si Jehova nin hariging panganuron pag aldaw asin nin hariging kalayo pag banggi. (Exo. 13:21) Sinundan ni Moises an harigi, na naggiya saiya saka sa mga Israelita pasiring sa Dagat na Pula. Nataranta an mga tawo ta paghuna ninda nalaum na sinda sa pag-ultanan kan dagat asin kan nagdadangadang na hukbo nin Ehipto. Inisip ninda na napasala si Moises sa pagdara sainda sa Dagat na Pula. Pero dai. Tuyong giniyahan ni Jehova an saiyang banwaan pasiring duman paagi ki Moises. (Exo. 14:2) Dangan ilinigtas sinda nin Diyos sa makangangalas na marhay na paagi.​—Exo. 14:26-28.

⁵ Sa laog nin 40 taon pagkatapos kaiyan, padagos na sinundan ni Moises an hariging panganuron para giyahan an banwaan nin Diyos sa kaawagan. a May pagkakataon na pinapapundo iyan ni Jehova sa itaas kan tolda ni Moises, asin hiling-hiling iyan kan bilog na Israel. (Exo. 33:7, 9, 10) Hali sa hariging panganuron, nakikipag-ulay si Jehova ki Moises, tapos sinasabi man ni Moises sa banwaan an instruksiyon ni Jehova. (Sal. 99:7) Hiling-hiling kan mga Israelita an mga patunay na ginagamit ni Jehova si Moises para giyahan sinda.

6. Ano an nagin reaksiyon kan mga Israelita sa paggiya ni Jehova? (Bilang 14:2, 10, 11)

⁶ Nakakamundo, binaliwala kan kadaklan sa mga Israelita an malinaw na patunay na ginagamit ni Jehova si Moises bilang Saiyang representante. (Basahon an Bilang 14:2, 10, 11.) Pauruutro nindang dai minidbid an papel ni Moises. Bilang resulta, dai tinugutan an henerasyon na iyan kan mga Israelita na makalaog sa Dagang Panuga.​—Bil. 14:30.

7. Magtao nin halimbawa kan mga nagsunod sa paggiya ni Jehova. (Bilang 14:24) (Hilingon man an ritrato.)

⁷ Minsan siring, may mga Israelita man na nagsunod sa paggiya ni Jehova. Halimbawa, sinabi ni Jehova: “Si Caleb . . . padagos siyang nagsunod sa sako nin bilog na puso.” (Basahon an Bilang 14:24.) Binalusan nin Diyos si Caleb, asin tinugutan pa ngani siya na pumili kan gusto niyang daga sa Canaan. (Jos. 14:12-14) An sunod na henerasyon kan mga Israelita nagpahiling man nin marahay na halimbawa nin pagsunod sa paggiya ni Jehova. Kan salidahan ni Josue si Moises bilang ninombrahan na lider kan mga Israelita, “iginalang ninda siyang marhay sa bilog niyang buhay.” (Jos. 4:14) Bilang resulta, binendisyunan sinda ni Jehova paagi sa pagdara sainda sa daga na ipinanuga niya.​—Jos. 21:43, 44.

8. Ipaliwanag kun paano ni Jehova giniyahan an saiyang banwaan kan panahon kan mga hadi. (Hilingon man an ritrato.)

 ⁸ Pakalihis nin mga taon, nagnombra si Jehova nin mga hukom para giyahan an saiyang banwaan. Dangan, kan panahon kan mga hadi, nagnombra si Jehova nin mga propeta para giyahan an saiyang banwaan. An maimbod na mga hadi nagdangog sa sadol kan mga propeta. Halimbawa, mapakumbabang inako ni Hading David an pagtatanos kan propetang si Natan. (2 Sam. 12:7, 13; 1 Cron. 17:3, 4) Sinunod ni Hading Jehosafat an paggiya ni propeta Jahaziel asin dinagka an banwaan kan Juda na ‘magtubod sa mga propeta’ nin Diyos. (2 Cron. 20:14, 15, 20) Kan nasa masakit na kamugtakan, nagdulok si Hading Hezekias ki propeta Isaias. (Isa. 37:1-6) Pag sinusunod kan mga hadi an paggiya ni Jehova, binebendisyunan sinda asin protektado an banwaan. (2 Cron. 20:29, 30; 32:22) Dapat malinaw kutanang nahiling kan gabos na ginagamit ni Jehova an saiyang mga propeta para giyahan an saiyang banwaan. Alagad, isinikwal kan kadaklan sa mga hadi asin mga Israelita an mga propeta ni Jehova.​—Jer. 35:12-15.

KUN PAANO NI JEHOVA GINIYAHAN AN INOT NA MGA KRISTIYANO

9. Siisay an ginamit ni Jehova para giyahan an mga Kristiyano kan inot na siglo? (Hilingon man an ritrato.)

⁹ Binilog ni Jehova an Kristiyanong kongregasyon kan inot na siglo C.E. Paano niya giniyahan an mga Kristiyano kaidto? Ninombrahan niya si Jesus bilang payo kan kongregasyon. (Efe. 5:23) Pero dai ni Jesus direktang iniinstruksiyunan an lambang disipulo. Ginamit niya an mga apostol asin an kamagurangan sa Jerusalem para manginot. (Gibo 15:1, 2) An mga elder man pignombrahan para manginot sa mga kongregasyon.​—1 Tes. 5:12; Tito 1:5.

10. (a) Paano naghimati an kadaklan sa inot na siglong mga Kristiyano sa paggiya na naresibi ninda? (Gibo 15:30, 31) (b) Taano ta dai minidbid kan nagkapira kan mga panahon kan Bibliya an mga representante ni Jehova? (Hilingon an kahon na “ Kun Taano ta binaliwala kan Nagkapira an Malinaw na Ebidensiya.”)

¹⁰ Paano inako kan inot na siglong mga Kristiyano an paggiyang iyan? Maugmang sinunod kan kadaklan an instruksiyon na naresibi ninda. Sa katunayan, “nag-urugma sinda dahil sa nakakapakusog na mga tataramon” na itinao sainda. (Basahon an Gibo 15:30, 31.) Sa ngunyan, paano man ni Jehova ginigiyahan an saiyang banwaan?

 KUN PAANO KITA GINIGIYAHAN NI JEHOVA NGUNYAN

11. Magtao nin halimbawa na nagpapahiling kun paano giniyahan ni Jehova an mga nanginginot sa presenteng panahon.

¹¹ Padagos na ginigiyahan ni Jehova an saiyang banwaan ngunyan. Ginigibo niya iyan paagi sa saiyang Tataramon asin sa saiyang Aki, an payo kan kongregasyon. May nahihiling daw kitang patunay na si Jehova padagos na naggagamit nin mga tawong representante? Igwa. Halimbawa, pag-isipan an mga nangyari pagkatapos kan mga taon nin 1870. Nasabutan ni Charles Taze Russell saka kan mga kairiba niya na an taon 1914 magigin sarong mahalagang taon may koneksiyon sa pag-establisar kan Kahadian nin Diyos. (Dan. 4:25, 26) Nakaabot sinda sa kongklusyon na iyan huling pinag-adalan ninda an mga propesiya sa Bibliya. Giniyahan daw ni Jehova an pagsiyasat ninda sa Bibliya? Malinaw na iyo. Pinatunayan kan mga pangyayari sa kinaban kan 1914 na nagpuon nang mamahala an Kahadian nin Diyos. Puminutok an Giyera Mundiyal I, na sinundan nin mga epidemya, linog, asin kakulangan nin kakanon. (Luc. 21:10, 11) Siyertong ginamit ni Jehova an sinserong mga Kristiyanong idto para tabangan an saiyang banwaan.

12-13. Anong mga areglo an ginibo para mas pahiwason an gibuhon na paghuhulit asin pagtutukdo kan Giyera Mundiyal II?

¹² Pag-isipan man an nangyari kan Giyera Mundiyal II. Pagkatapos na pag-adalan an Kapahayagan 17:8, nasabutan kan mga brother na may katungdan sa world headquarters na an giyera masagkod, bako sa Armagedon, kundi sa sarong peryodo nin relatibong katuninungan na mabukas nin mga oportunidad para sa mas mahiwas na paghuhulit. Kaya dawa ngani garo baga bakong praktikal kan panahon na iyan, pinunan an Watchtower Bible College (School) of Gilead para sanayon an mga misyonero na maghulit asin magtukdo sa manlain-lain na lugar sa bilog na daga. Nagpadara nin mga misyonero dawa may giyera. Apuwera kaiyan, inorganisar kan maimbod na uripon an Course in Theocratic Ministry b tanganing sanayon an gabos sa kongregasyon na magin mahusay na mga parahulit asin paratukdo. Sa mga paaging iyan inandam an mga lingkod nin Diyos para sa maabot na gibuhon.

¹³ Malinaw, talagang giniyahan ni Jehova an  saiyang banwaan sa masakit na panahon na idto. Puon kan Giyera Mundiyal II, an banwaan ni Jehova sa dakul na kadagaan talingkas na nakapaghulit. Sa katunayan, uminuswag an gibuhon.

14. Taano ta makakapagtiwala kita sa mga instruksiyon na itinatao kan organisasyon ni Jehova asin kan ninombrahan na mga elder? (Kapahayagan 2:1) (Hilingon man an ritrato.)

¹⁴ Sa ngunyan an mga miyembro kan Namamahalang Grupo padagos na nagpapagiya ki Cristo. Gusto ninda na an itinatao nindang mga instruksiyon sa mga tugang nagpapahiling kan pagmansay ni Jehova sa mga bagay-bagay. Dangan, ipinapaabot man kan mga paraataman nin sirkito saka kan mga elder an mga paggiyang iyan sa mga kongregasyon. c An ninombrahan na mga elder nasa “tuong kamot” ni Cristo. (Basahon an Kapahayagan 2:1.) Siyempre, an mga elder na ini bakong mga perpekto asin napapasala. May beses na napasala man si Moises saka si Josue, siring man an mga apostol. (Bil. 20:12; Jos. 9:14, 15; Roma 3:23) Minsan siring, ginigiyahan na marhay ni Cristo an maimbod na uripon asin an ninombrahan na mga elder, asin padagos niya iyan na gigibuhon “sa gabos na aldaw sagkod sa pagtatapos kan sistema nin mga bagay.” (Mat. 28:20) Kaya igwa nanggad kita nin dahilan na magtiwala sa paggiyang itinatao niya paagi sa mga ninombrahan na manginot sa sato.

NAKIKINABANG KITA PAG SINUSUNOD TA AN PAGGIYA NI JEHOVA

15-16. Ano an nanudan mo sa mga eksperyensiya kan mga nagsunod sa paggiya ni Jehova?

¹⁵ Pag padagos tang sinusunod an paggiya ni Jehova, nagkakamit kita nin mga bendisyon dawa ngunyan pa sana. Halimbawa, sinunod ni Andy asin ni Robyn an sadol na papagdanayon na simple an saindang buhay. (Mat. 6:22) Bilang resulta, nakapagboluntaryo sinda sa mga proyekto nin pagtugdok kan organisasyon. Sinabi ni Robyn: “Kun minsan, an iniistaran mi saditon sana, na sa parati mayong kusina. Saka kinaipuhan kong ipabakal an dakul sa mga gamit ko sa photography, an haloy nang kinahihiligan ko. Napahibi pa ngani ako kaiyan. Pero arog kan agom ni Abraham na si Sara, determinado ako na maghiling, bako sa binayaan ko na, kundi sa inutan.” (Heb. 11:15) Paano nakinabang an mag-agom na ini sa saindang eksperyensiya? Sinabi ni Robyn: “Kontentong marhay kami ta aram mi na itinatao mi ki Jehova an gabos na igwa kami. Pag yaon kami sa teokratikong mga asignasyon, garo natatanaw mi diyan kun ano an magigin buhay sa bagong kinaban.” Idinagdag pa ni Andy: “Kontento  kami na itinatao mi an gabos ming panahon saka kusog para suportaran an Kahadian.”

¹⁶ Paano pa kita nakikinabang pag padagos tang sinusunod an paggiya ni Jehova? Pakagradwar sa high school, isinapuso ni Marcia an pagdagka saiya na magpayunir. (Mat. 6:33; Roma 12:11) Sinabi niya: “May alok sako na magin iskolar nin apat na taon sa sarong unibersidad. Pero gusto kong mag-abot nin espirituwal na mga pasuhan. Kaya nagdesisyon ako na maglaog sa technical training school para makanuod nin sarong kasanayan na makakasuportar sa ministeryo ko. Saro iyan sa pinakamarahay na desisyon na ginibo ko. Nag-e-enjoy ako ngunyan sa pagpapayunir, saka dahil sadiri ko an oras ko sa trabaho, nakakapaglingkod ako bilang commuter volunteer sa Bethel asin sa dakul pang ibang espesyal na pribilehiyo.”

17. Ano pang mga bendisyon an makakamtan ta pag padagos tang susunudon an paggiya ni Jehova? (Isaias 48:17, 18)

¹⁷ Kun minsan, nakakaresibi kita nin konseho na nakakatabang sa sato na malikayan an mga bagay na arog kan materyalismo asin mga gibo na puwedeng magin dahilan na mabalga ta an mga katugunan nin Diyos. Asin dawa sa mga bagay na iyan, nakikinabang kita pag sinusunod ta an paggiya ni Jehova. Napapagdanay ta an malinig na konsiyensiya asin nalilikayan ta an dakul na problema. (1 Tim. 6:9, 10) Bilang resulta, bilog na puso tang nasasamba si Jehova, asin nagtatao iyan sa sato nin urog na kaugmahan, katuninungan, asin pagkakontento.​—Basahon an Isaias 48:17, 18.

18. Taano ta determinado ka na sunudon an paggiya ni Jehova?

¹⁸ Siguradong padagos na magamit si Jehova nin mga tawong representante para giyahan kita sa panahon nin dakulang kasakitan sagkod sa Sangribong Taon na Paghadi. (Sal. 45:16) Padagos ta daw na susunudon an giyang iyan dawa pa kun iba iyan sa gusto ta? Magigin madali sa sato an pagsunod kun sa ngunyan pa sana, nagsusunod na kita sa paggiya ni Jehova. Kun siring, pirmi tang sunudon an paggiya ni Jehova, pati na an mga giyang itinatao kan mga ninombrahan niya na mangataman sa sato. (Isa. 32:1, 2; Heb. 13:17) Mantang ginigibo iyan, lubos kitang makakapagtiwala na an satong Giya, si Jehova, magiya sa sato parayo sa espirituwal na peligro asin pasiring sa satong destinasyon​—sa buhay na daing katapusan sa bagong kinaban.