ARTIKULONG PAG-AADALAN 6
KANTA 18 Nagpapasalamat Huli sa Pantubos
An Pagpapatawad ni Jehova—Kun Taano ta Pinapahalagahan Niyato Iyan
“An Diyos namuot na gayo sa kinaban kaya itinao niya an saiyang bugtong na Aki.”—JUAN 3:16.
POKUS
Tanganing pararumon an satong pagpapahalaga sa pagpapatawad ni Jehova sa satong mga kasalan paagi sa pagsabot sa basehan para sa pagpapatawad na iyan.
1-2. Ano an pagkakaagid kan sitwasyon kan katawuhan asin kan sitwasyon kan hoben na lalaking sinambit sa parapo 1?
IMAHINARA an sarong hoben na lalaki na nagdakula sa sarong mayaman na pamilya. Sarong aldaw may nangyaring trahedya; nagadan sa aksidente an saiyang mga magurang. Namundo siyang marhay sa nangyaring iyan. Pero, may saro pang nakakabiglang baretang nag-abot sa hoben na lalaki. Naaraman niyang ginastar palan kan mga magurang niya sa daing kamanungdanan an gabos na kuwarta kan pamilya asin na nagkaigwa sinda nin darakulang utang. Ngunyan isipa na sana na imbes na manahon niya an yaman kan mga magurang niya, an minana niya iyo an mga utang ninda, asin pigsisingil na siya kan mga inutangan ninda. Mayo nanggad siyang kakayahan na mabayadan an mga utang na iyan.
2 May mga pagkakaagid an sitwasyon niyato sa sitwasyon kan hoben na lalaking ini. An satong inot na mga magurang, si Adan asin Eva, perpekto kaidto asin nakaistar sa sarong magayon na paraiso. (Gen. 1:27; 2:7-9) Igwa sinda kaidto kan paglaom na mabuhay nin maugma sagkod pa man. Pero bigla na sanang nagbago an gabos. Naiwara ninda an saindang Paraisong istaran asin an paglaom na mabuhay nin daing katapusan. Ano an maipapamana ninda sa mga magigin aki ninda? Sinasabi sa sato kan Bibliya: “Paagi sa sarong tawo [si Adan] an kasalan luminaog sa kinaban asin an kagadanan luminaog paagi sa kasalan, asin sa siring an kagadanan luminakop sa gabos na tawo huling sinda gabos nagkasala.” (Roma 5:12) An ipinamana sa sato ni Adan iyo an kasalan, na nagresulta sa kagadanan. An minanang kasalan na ini garo sarong dakulaon na utang, na mayo sa siisay man sa sato an makakabayad.—Sal. 49:8.
3. Taano ta maiaagid sa “mga utang” an satong mga kasalan?
3 Iinagid ni Jesus sa “mga utang” an mga kasalan. (Mat. 6:12, nota sa ibaba; Luc. 11:4, nota sa ibaba) Pag kita nagkasala, garo man sana kita nagkautang ki Jehova. Kaipuhan tang bayadan an penalidad kan kasalan. Kun dai babayadan an utang na iyan, makakanselar sana iyan pag kita nagadan.—Roma 6:7, 23.
4. (a) Kun dai nin matabang, ano an mangyayari sa gabos na makasalan na tawo? (Salmo 49:7-9) (b) Sa Bibliya, sa ano nanunungod an tataramon na “kasalan”? (Hilingon an kahon na “ Kasalan.”)
4 Posible daw para sa sato na makua giraray an gabos na naiwara ni Adan asin Eva? Kun sa sadiri ta sana, dai niyato iyan kaya. (Basahon an Salmo 49:7-9.) Kun dai nin matabang, dai man kita magkakaigwa kan paglaom na mabuhay sa maabot na panahon o na buhayon liwat. Sa katunayan, an satong kagadanan magigin arog man sana kan sa mga hayop.—Ecl. 3:19; 2 Ped. 2:12.
5. Paano kita tinabangan kan satong mamumuton na Ama na mabayadan an minana niyatong utang na kasalan? (Hilingon an ritrato.)
5 Manungod sa hoben na lalaking sinambit sa kapinunan, ano daw an mamamatian niya kun may sarong mayaman na tawong alukan siyang bayadan an gabos niyang utang? Siguradong huli sa dakulang pasasalamat kan hoben na lalaki, mapapahiro an puso niya na akuon an bukas-palad na alok na iyan. Sa kaagid na paagi, an satong mamumuton na Ama, si Jehova, tinawan kita nin sarong regalo na nagseserbing bayad sa utang na kasalan na minana ta ki Adan. Arog kaini an pagkapaliwanag kaiyan ni Jesus: “An Diyos namuot na gayo sa kinaban kaya itinao niya an saiyang bugtong na Aki, tanganing an siisay man na nagtutubod sa saiya dai malaglag kundi magkaigwa nin buhay na daing katapusan.” (Juan 3:16) Apuwera kaiyan, pinapagin posible kan regalong ini na magkaigwa kita nin marahay na relasyon ki Jehova.
Ihinulit ni Jesus an maugmang bareta manungod sa pagpapatawad ni Jehova basado sa atang na pantubos. (Juan 3:16) Dangan gikan sa buot niyang itinao an saiyang buhay tanganing maitao an pantubos (Hilingon an parapo 5)
6. Anong mga termino sa Bibliya an pag-uulayan ta sa artikulong ini, asin taano?
6 Paano kita makikinabang sa makangangalas na regalong ini na nagpapagin posible na mapatawad an satong mga kasalan, o “mga utang”? An simbag sa hapot na iyan mahihiling sa paggamit kan Bibliya sa mga terminong pakipag-ulian, pagbayad sa kasalan, pampagian nin buot, pantubos, pagkabalukat, asin pagpahayag na matanos. Sa artikulong ini, pag-uulayan ta an kahulugan kan kada saro sa mga konseptong ini. Mantang hinuhurop-hurop ta an paliwanag manungod sa mga iyan, urog na mararom an satong pagpapahalaga sa basehan kan pagpapatawad ni Jehova.
AN PASUHAN: PAKIPAG-ULIAN
7. (a) Ano pa an naiwara ni Adan asin Eva? (b) Bilang mga gikan ni Adan asin Eva, ano an kaipuhan nanggad niyatong marhay? (Roma 5:10, 11)
7 Apuwera sa naiwara nindang paglaom na mabuhay nin daing katapusan, naiwara man ni Adan asin Eva an saindang mahalagang marhay na relasyon sa saindang Ama, si Jehova. Kan si Adan asin Eva dai pa nagkakasala, parte sinda kan pamilya nin Diyos. (Luc. 3:38) Pero kan suwayon ninda si Jehova, pinahali sinda sa saiyang pamilya. Nangyari iyan bago pa man sinda magpuon na magkaigwa nin mga aki. (Gen. 3:23, 24; 4:1) Kun siring, bilang mga gikan ninda, kaipuhan niyatong makipag-ulian ki Jehova. (Basahon an Roma 5:10, 11.) Sa ibang pagtaram, kaipuhan niyatong magkaigwa nin marahay na relasyon sa saiya. Uyon sa sarong reperensiya, an Griegong terminong ginamit digdi para sa “pakipag-ulian” puwedeng mangahulugan na “magin amigo an sarong kaiwal.” An kahanga-hanga ta si Jehova an nag-inisyatiba na magin posible ini. Paano?
AN AREGLO: PAGBAYAD SA KASALAN
8. Ano an (a) pagbayad sa kasalan? (b) pampagian nin buot?
8 An pagbayad sa kasalan iyo an areglong itinao ni Jehova tanganing maibalik an marahay na relasyon sa pag-ultanan niya asin kan makasalan na mga tawo. Kalabot digdi an pagribay nin sarong bagay sa saro pang bagay, na eksaktong magkatumbas an halaga. Sa paaging ini, an sarong bagay na nawara o naraot puwedeng makua giraray o maribayan. Naggamit an Kristiyanong Griegong Kasuratan nin sarong konektadong termino na may kaagid na kahulugan para sa “pambayad sa kasalan,” an pampagian nin buot. (Roma 3:25) An pampagian nin buot iyo an akto na nagpapagin posible sa saro na makipagkatuninungan sa Diyos asin na magkaigwa nin marahay na relasyon sa Saiya.
9. Anong temporaryong areglo an ginibo ni Jehova tanganing mapatawad an mga kasalan kan mga Israelita?
9 Tanganing magkaigwa an mga Israelita nin marahay na relasyon sa saiya, naggibo si Jehova nin sarong temporaryong areglo para sa kapatawadan kan saindang mga kasalan. Sa Israel, an Aldaw nin Pagbayad sa Kasalan isineselebrar taon-taon. Sa aldaw na iyan, nagdudulot an halangkaw na saserdote nin mga atang na hayop alang-alang sa banwaan. Siyempre, dai lubos na mababayadan kan mga atang na hayop an mga kasalan kan siisay man huling an mga hayop mas hababa kisa sa mga tawo. Pero sagkod na nagdudulot an nagsusulsol na mga Israelita nin mga atang na kahagadan sa sainda ni Jehova, andam siyang patawadon an mga kasalan ninda. (Heb. 10:1-4) Dugang pa, huli sa areglong iyan asin sa regular nindang pagdulot para sa kasalan, nakatadom sa isip kan mga Israelita na seryosong bagay nanggad an manungod sa saindang makasalan na kamugtakan asin na dakula nanggad an pangangaipo ninda para sa sarong permanenteng solusyon.
10. Anong permanenteng areglo an ginibo ni Jehova tanganing mapatawad an mga kasalan?
10 Naggibo si Jehova nin permanenteng areglo para sa kapatawadan nin mga kasalan. Iinareglo niya na an saiyang namumutan na Aki “[idulot] nin saro sanang beses para sa gabos na panahon tanganing darahon an mga kasalan nin dakul.” (Heb. 9:28) Itinao ni Jesus “an saiyang buhay bilang pantubos na karibay nin dakul.” (Mat. 20:28) Ano an pantubos?
AN PAMBAYAD: PANTUBOS
11. (a) Uyon sa Bibliya, ano an pantubos? (b) Ano an kaipuhan tanganing mabayadan an pantubos na ini?
11 Uyon sa Bibliya, an pantubos iyo an halagang ibinabayad tanganing magin posible an pagbayad sa kasalan asin pakipag-ulian. a Sa pagmansay ni Jehova, itinatao kaiyan an basehan tanganing maibalik kun ano an nawara. Sa anong paagi? Girumdumon na naiwara ni Adan asin Eva an saindang perpektong buhay pati na an paglaom na mabuhay nin daing katapusan. Kaya an halaga kan pantubos dapat na katumbas kan halagang nawara. (1 Tim. 2:6) Mababayadan sana iyan nin sarong adultong lalaki na (1) perpekto; (2) may potensiyal na mabuhay nin daing sagkod digdi sa daga; asin na (3) andam na itao, o isakripisyo, an buhay na iyan alang-alang sa sato. Saka sana mariribayan, o mababayadan, kan buhay kan tawong iyan an buhay na naiwara.
12. Taano ta nagibong itao ni Jesus an kinakaipuhan na halagang pantubos?
12 Pag-isipan an tulong dahilan kun taano ta nagibong itao ni Jesus an halagang pantubos na iyan. (1) Perpekto siya—“dai siya nakagibo nin kasalan.” (1 Ped. 2:22) (2) Huli kaiyan, may potensiyal siyang mabuhay nin daing sagkod digdi sa daga. (3) Andam siyang magadan asin itao an buhay na iyan para sa sato. (Heb. 10:9, 10) Bilang sarong perpektong tawo, katumbas ni Jesus an inot na tawong si Adan bago ini nagkasala. (1 Cor. 15:45) Kaya paagi kan kagadanan ni Jesus, nabayadan niya an kasalan ni Adan, an buot sabihon, naribayan an naiwara ni Adan. (Roma 5:19) Sa siring, si Jesus “an [nagin] huring Adan.” Dai na kaipuhan nin saro pang perpektong tawo tanganing bayadan an naiwara ni Adan. Nagadan si Jesus nin “saro sanang beses para sa gabos na panahon.”—Heb. 7:27; 10:12.
13. Ano an pagkakaiba kan areglo nin pagbayad sa kasalan asin kan pantubos?
13 Kun siring, ano an pagkakaiba kan areglo nin pagbayad sa kasalan asin kan pantubos? An areglo nin pagbayad sa kasalan iyo an ginibo nin Diyos tanganing maibalik an marahay na relasyon sa pag-ultanan niya asin kan mga tawo. An pantubos iyo an halagang itinao tanganing mabayadan an kasalan kan katawuhan. An halagang ini irinerepresentar kan mahalagang marhay na dugo na pinabulos ni Jesus alang-alang sa sato.—Efe. 1:7; Heb. 9:14.
AN MGA RESULTA: PAGKABALUKAT ASIN PAGPAHAYAG NA MATANOS
14. Ano an pag-uulayan ta ngunyan, asin taano?
14 Ano an mga resulta kan areglo nin pagbayad sa kasalan? Naggamit an Bibliya nin nagkapirang ekspresyon na nagduduon kan mga pakinabang kan areglong iyan. Bagaman may mga pagkakaagid an kahulugan kan mga tataramon na ini, an kada saro sa mga ini may idinuduon na sarong aspekto kan areglo nin pagbayad sa kasalan na nagbubukas kan dalan para sa kapatawadan ni Jehova. Mantang sinisiyasat niyato an mga tataramon na ini, mahihiling ta man kun ano an epekto kaiyan sa sato bilang indibidwal.
15-16. (a) Sa Bibliya, sa ano nanunungod an tataramon na “pagbalukat”? (b) Ano an epekto kaini sa sato?
15 Sa Bibliya, an pagbalukat nanunungod sa pagpatalingkas, o pag-absuwelto, na resulta kan pagbayad sa halagang pantubos. Manungod diyan, arog kaini an sinabi ni apostol Pedro: “Aram nindo na bakong paagi sa mga bagay na nararaot, bakong paagi sa plata o bulawan, na kamo pinatalingkas [sa literal, “tinubos; binalukat”] hali sa daing kamanungdanan nindong paagi nin pamumuhay na ipinamana sa saindo kan saindong mga apuon. Kundi paagi iyan sa mahalagang marhay na dugo, na siring sa dugo nin sarong kordero na daing kaninan asin malinigon, an dugo ni Cristo.”—1 Ped. 1:18, 19; nota sa ibaba.
16 Huli sa atang na pantubos, puwede kitang mapatalingkas sa maringis na pamamahala nin kasalan asin kagadanan. (Roma 5:21) Iyo, may marahay na dahilan kita na makamati nin dakulang utang na buot ki Jehova asin ki Jesus huli sa pagbalukat sa sato paagi kan mahalagang marhay na dugo, o buhay, ni Jesus.—1 Cor. 15:22.
17-18. (a) Ano an buot sabihon kan pagpahayag na matanos? (b) Ano an epekto kaini sa sato?
17 An pagpahayag na matanos nangangahulugan na an mga akusasyon laban sa sato hinali na asin na an satong rekord pinara, o lininig na. Paagi sa paggibo kaini, dai man binabalga ni Jehova an mga pamantayan niya sa hustisya. Dai niya kita ipinapahayag na matanos base sa sadiri tang paghihinguwa; ni kinokondenar niya man an satong mga kasalan. Pero huli sa satong pagtubod sa areglo nin pagbayad sa kasalan asin sa ibinayad na halagang pantubos, igwa si Jehova nin basehan tanganing kanselaron an satong mga utang.—Roma 3:24; Gal. 2:16.
18 Ano an kahulugan kaini para sa kada saro sa sato? An mga pinili na mamahala kaiba ni Jesus sa langit ipinahayag nang matanos bilang mga aki nin Diyos. (Tito 3:7; 1 Juan 3:1) Pinatawad na an saindang mga kasalan. Pinara na an saindang rekord bilang kriminal, sabi ngani, asin sa siring kuwalipikado sinda para sa Kahadian. (Roma 8:1, 2, 30) An mga igwa kan paglaom na mabuhay digdi sa daga ipinahayag na matanos bilang mga amigo nin Diyos, asin pinatawad an saindang mga kasalan. (Sant. 2:21-23) An dakulang kadaklan, na makakaligtas sa Armagedon, igwa kan paglaom na dai nanggad sinda nuarin man magagadan. (Juan 11:26) “An mga matanos” asin “an mga bakong matanos” na nagtuturog sa kagadanan bubuhayon liwat. (Gibo 24:15; Juan 5:28, 29) Pag-abot nin panahon, an gabos na makinuyog na lingkod ni Jehova sa daga “magkakaigwa kan mamuraway na katalingkasan bilang mga aki nin Diyos.” (Roma 8:21) Makangangalas nanggad na bendisyon an dara kan areglo nin pagbayad sa kasalan—lubos na pakipag-ulian sa satong Ama, si Jehova!
19. Paano nagbago an satong sitwasyon? (Hilingon man an kahon na “ An Kahulugan Kaiyan Para sa Sato.”)
19 Iyo, an sitwasyon ta kaidto arog kan sa hoben na lalaki na sinambit sa kapinunan na naiwara an gabos asin nagmana nin dakulaon na utang na nungka niyang mababayadan. Pero salamat ki Jehova ta tinabangan niya kita. Nagbago an satong sitwasyon huli sa areglo nin pagbayad sa kasalan asin sa pagbayad kan halagang pantubos. An pagtubod ta ki Jesu-Cristo nagpapagin posible na mabalukat kita, o mapatalingkas, sa kasalan asin kagadanan. An satong mga kasalan puwede na man na makanselar, asin an satong rekord bilang kriminal puwede nang mapara. Alagad an pinakamahalaga sa gabos iyo na puwede na kita ngunyan na magkaigwa nin marahay na relasyon sa satong mamumuton na Ama sa langit, si Jehova.
20. Ano an pag-uulayan ta sa sunod na artikulo?
20 Mantang hinuhurop-hurop ta kun ano an ginibo ni Jehova asin ni Jesus para sa sato, napapano an satong puso nin pasasalamat. (2 Cor. 5:15) Kun wara an tabang ninda, wara nanggad kitang paglaom! Pero ano daw talaga an kahulugan kan pagpapatawad ni Jehova sa sato bilang indibidwal? Iyan an pag-uulayan ta sa sunod na artikulo.
KANTA 10 Umawon an Diyos Niyatong si Jehova!
a Sa nagkapirang lengguwahe, ginamit para sa terminong “pantubos” an sarong ekspresyon na literal na nangangahulugan na “an halaga kan buhay,” o “an ibinayad.”
