MINSAN daw namatian mo nang nagsosolo ka sa pag-atubang sa mga problema? Nabubuhay kita sa “delikado asin masakit na mga panahon” na puwedeng makapadisganar sa sato asin makapamating nagsosolo kita. (2 Tim. 3:1) Pero, dai man niyato kaipuhan na solo tang atubangon an mga problema sa buhay. Idinuduon kan Bibliya an kahalagahan kan pagkaigwa nin tunay na mga amigo sa “mga panahon nin kasakitan.”​—Tal. 17:17.

Nakinabang si apostol Pablo sa pakikiamigo niya sa mga kairiba niya sa pagbiyahe. (Col. 4:​7-11) Kan nakapreso si Pablo sa Roma, an mga amigo niya may mga ginibo para sa saiya na mga bagay na kun siya mismo dai niya magigibo. Halimbawa, dinarahan ni Epafrodito si Pablo kan mga bagay na kaipuhan niya hali sa mga tugang sa Filipos. (Fil. 4:18) Ihinatod ni Tiquico sa manlain-lain na kongregasyon an mga surat ni Pablo. (Col. 4:7; hilingon an study note.) Sa tabang kan saiyang mga amigo, naisagibo ni Pablo an saiyang ministeryo dawa nakapreso siya sa harong o sa presuhan kan huri. Paano ka magigin sarong tunay na amigo ngunyan?

Ipinapahiling kan mga halimbawa sa presenteng panahon an kahalagahan kan pagigin tunay na amigo. Pag-isipan an sarong sister na nagin tunay na amigo para ki Elisabet, sarong regular payunir sa Spain. Kan an ina ni Elisabet na-diagnose na may malalang kanser, pinadarahan siya kan sister nin dakul na nakakapakusog na text na basado sa mga teksto sa Bibliya. “An mga text na ini,” an sabi ni Elisabet, “nakapakusog sa sako na atubangon an kada aldaw na dai nakakamating nagsosolo ako.”​—Tal. 18:24.

Mapapakusog niyato an pakikiamigo ta sa mga tugang paagi sa pagsuportar sa sainda sa mga aktibidad kan kongregasyon. Halimbawa, puwede mo daw ipagmaneho an sarong may edad nang tugang pasiring sa mga pagtiripon o kaya sa ministeryo? Kun gigibuhon mo iyan, posibleng marhay na mapapakusog nindo an lambang saro. (Roma 1:12) Alagad, may mga Kristiyano na dai na kayang maghali sa saindang harong. Paano kita magigin tunay na amigo sa sainda?

May mga kapagtubod kita na dai nakakaatender nin in person sa mga pagtiripon huli sa hilang o iba pang mga kamugtakan. Pag-isipan an halimbawa ni David, na na-diagnose na may lymphoma. Pig-chemotherapy siya sa laog nin labing anom na bulan. Sa bilog na panahon na iyan, siya asin an agom niyang si Lidia nag-atender sa mga pagtiripon online.

Anong tabang an inako ninda hali sa saindang mga amigo sa kongregasyon? Pagkatapos kan kada pagtiripon, hinihinguwa kan nagkapira sa mga nasa Kingdom Hall na makipag-ulay ki David asin Lidia paagi sa videoconference. Apuwera diyan, pag nagkomento an mag-agom, nakakaresibi sinda nin nakakapakusog  na mga text message hali sa mga tugang. An resulta? Dai gayong namatian ni David asin Lidia na nagsosolo sinda.

Puwede ta daw iiba sa satuyang ministeryo an mga tugang na dai na kayang maghali sa harong? Paagi sa paggibo nin pirang saradit na pagbabago, maipapahiling tang dai ta nalilingawan an mga tugang na napapaatubang sa siring na nakakalimitar na mga sitwasyon. (Tal. 3:27) Puwede ka daw mag-iskedyul na partneran sinda sa pagpapatotoo paagi sa surat o telepono? An mga dai na kayang maghali sa harong tibaad puwedeng mag-atender sa pagtiripon bago maglingkod sa langtad paagi sa videoconference. Naapresyar ni David asin Lidia an areglong ini. Sinabi ni David, “Nakapakusog na marhay sa samo maski an makaibanan sana an mga kagrupo mi sa paghuhulit para sa halipot na pag-urulay asin pamibi.” Apuwera kaiyan, kun ligtas man saka angay sa kamugtakan, puwede mo daw iareglo na iiba sa pana-panahon an saimong Bible study sa harong kan sarong parahayag na dai na kayang maghali sa harong tanganing diyan isagibo an saindong pag-adal?

Pag naglilingkod kita kaiba an satong mga tugang na dai na kayang maghali sa harong asin nahiling ta mismo an saindang magagayon na kuwalidad, mas napaparani kita sa sainda. Halimbawa, pag nasa ministeryo ka kaiba an siring na mga parahayag asin naoobserbaran mo kun paano ninda mahusay na ginagamit an Tataramon nin Diyos para maabot an puso nin saro, posibleng marhay na lalo ka pang mapaparani sa sainda. Pag sinusuportaran mo sa espirituwal na mga aktibidad an saimong mga kapagtubod, magkakaigwa ka nin bagong mga amigo.​—2 Cor. 6:13.

Naranga si Pablo kan makaibanan niya an amigo niyang si Tito. (2 Cor. 7:​5-7) Ipinapagirumdom sa sato kan salaysay na ini na makakatao kita nin karangahan bako lang paagi sa pagpahayag nin simpatiya sa mga nangangaipo kaiyan kundi paagi sa pagtao nin panahon na makaibanan sinda asin sa paggibo kan satong makakaya na suportaran sinda.​—1 Juan 3:18.

Magayon na halimbawa an satong mga tugang sa Russia sa pagpahiling nin suporta sa lambang saro. Pag-isipan an eksperyensiya ni Sergey asin kan saiyang agom na si Tatyana. Pagkatapos na rekisahon kan mga pulis an saindang harong, dinara sinda kan mga ini para usisaon. Inot na pinaluwas si Tatyana tapos nagpuli siya. Inistorya ni Sergey: “Pagkaabot [mismo ni Tatyana] sa harong, sarong pusuan na sister an nagbisita sa saiya. Dakul pang mga amigo mi an nag-arabot saka nagtabang samo na ibalik sa ayos an apartment mi.”

Sinabi pa ni Sergey: “Kaidto pa gustuhon ko na an Talinhaga 17:​17, na an sabi: ‘An tunay na amigo nagpapahiling nin pagkamuot sa gabos na panahon asin sarong tugang na namumundag sa mga panahon nin kasakitan.’ Nagin lalo nang totoong-totoo sa sako an mga tataramon na iyan sa panahon na ini nin persekusyon na dai ko kayang atubangon kun sa sadiri ko sana. Tinawan ako ni Jehova nin mga amigo na daing takot na duminamay sa sako.” a

Mantang nagpaparadakul an masakit na mga sitwasyon na napapaatubang sa sato, kaipuhan ta nin mga amigo na masasandigan niyato. Kaipuhan ta sinda lalo na sa panahon kan dakulang kasakitan. Kaya gibuhon ta an satong gabos na makakaya na magin sarong tunay na amigo ngunyan!—1 Ped. 4:​7, 8.