1. Ano an namatian ni Pedro kan makadakop sinda nin dakulon na sira sa milagrosong paagi?

 MAGDAMLAG na nanira si Pedro pero mayo lamang siyang nadakop. Makangangalas ta sinabi saiya ni Jesus: “Magduman kita sa hararom, tapos iladlad nindo an saindong mga hikot tanganing makadakop kamo.” (Luc. 5:4) Nagduda si Pedro kun baga may madadakop siya na sira, pero ginibo niya an sinabi sa saiya. An ilinadlad na mga hikot nagpuon na magkagirisi huli sa kadakulan kan nadakop na sira. Kan marealisar ni Pedro saka kan mga kairiba niya na sarong milagro an nahiling ninda, “ngalason” sinda. Sinabi ni Pedro: “Rumayo ka sa sako, Kagurangnan, huli ta makasalan akong tawo.” (Luc. 5:​6-9) Minalataw na namatian ni Pedro na bako siyang maninigo dawa an makaibanan sana ni Jesus.

2. Taano ta makakatabang sa sato na pag-adalan an halimbawa ni Pedro?

² Tama si Pedro—saro siyang “makasalan [na] tawo.” Ipinapahiling sa Kasuratan na kun minsan may nasasabi siya saka nagigibo na pagkatapos pinagbabasulan niya. Kun minsan daw pagmati mo arog ka ni Pedro? May piglalabanan ka daw na sarong kaluyahan sa saimong personalidad o sarong makasalan na tendensiya na dai nawawara? Kun iyo, mapapakusog ka pag pig-adalan mo an halimbawa ni Pedro. Taano man? Pag-isipan ini: Madalion sana kutana na dai ipasurat ni Jehova sa Bibliya an mga salang ginibo ni Pedro. Minsan siring, ipinasurat Niya an mga iyan tanganing makanuod kita diyan. (2 Tim. 3:​16, 17) An pakanuod manungod sa lalaking ini na may mga kaluyahan asin pagmati na arog kan sa sato makakatabang sa satuya na maaraman na dai si Jehova naglalaom nin pagkaperpekto sa sato. Gusto niya na dai kita sumuko—na padagos na maghinguwa—sa ibong kan mga kaluyahan ta.

3. Taano ta kaipuhan na dai kita sumuko?

³ Taano ta kaipuhan na dai kita sumuko? May kasabihan sa Ingles, Practice makes perfect. Sa pag-ilustrar: An sarong musikero tibaad mangaipo nin dakul na taon para magin matibay siya sa paggamit  kan saiyang instrumento sa musika. Sa panahon na iyan, tibaad dakul na beses siyang mapasala sa pagtugtog, pero kun padagos siyang nagpapraktis, magigin mahusay siya. Pero, dawa ngani kun magin siyang matibay na musikero, tibaad paminsan-minsan mapapasala siya. Sa ibong kaiyan, dai pa man giraray siya masuko. Padagos pa man giraray siya sa pagpraktis. Sa kaagid na paagi, dawa kun sa pagmati ta napaglabanan ta na an sarong partikular na kaluyahan, tibaad mautro ta pa man giraray iyan. Pero padagos pa man giraray kitang naghihinguwang paglabanan iyan. Gabos kita nakakapagtaram o nakakagibo nin mga bagay na pagkatapos pinagbabasulan ta; alagad, kun dai kita masuko, tatabangan kita ni Jehova na padagos na umuswag. (1 Ped. 5:10) Pag-ulayan ta an halimbawa ni Pedro nin dai pagsuko. An pagkahirak na ipinahiling ni Jesus sa saiya sa ibong kan mga salang ginibo niya puwedeng makapahiro sa sato na padagos na paglingkudan si Jehova.

4. Arog kan mababasa sa Lucas 5:​5-10, paano ilinadawan ni Pedro an saiyang sadiri, pero paano siya inasigurar ni Jesus?

⁴ Dai sinasabi sa Kasuratan kun taano ta ilinadawan ni Pedro an saiyang sadiri bilang “makasalan [na] tawo” o kun anong mga kasalan an nasa isip niya. (Basahon an Lucas 5:​5-10.) Pero tibaad nakagibo siya nin seryosong mga pagkakasala. Narisa ni Jesus an pagkatakot ni Pedro, na posibleng huli ta namati ni Pedro na bako siyang maninigo. Aram man ni Jesus na makakapagdanay na maimbod si Pedro. Kaya mabuot na sinabihan ni Jesus si Pedro na “dai . . . na matakot.” An pagtitiwala ni Jesus ki Pedro nagkaigwa nin nagdadanay na epekto sa buhay kaini. Kan huri, binayaan ni Pedro asin kan tugang niyang si Andres an negosyo nindang paninira asin nagin bilog na panahon na mga parasunod kan Mesiyas, sarong desisyon na nagresulta sa pambihirang mga bendisyon.​—Mar. 1:​16-18.

5. Anong mga bendisyon an inako ni Pedro huling napaglabanan niya an saiyang takot asin huling inako niya an imbitasyon ni Jesus?

⁵ Nagkaigwa si Pedro nin dakul na magagayon na eksperyensiya bilang parasunod ni Cristo. Nahiling niya si Jesus na nagpaumay nin mga may hilang, nagpalayas nin mga demonyo, asin nagbuhay pa ngani nin gadan. b (Mat. 8:​14-17; Mar. 5:​37, 41, 42) Nahiling man ni Pedro an sarong bisyon kan kamurawayan ni Jesus sa maabot na Kahadian, sarong pangyayari na dakulaon an nagin epekto sa saiya. (Mar. 9:​1-8; 2 Ped. 1:​16-18) Iyo, nahiling ni Pedro an mga bagay na dai niya kutana mahihiling kun dai siya nagsunod ki Jesus. Siguradong maugmahon nanggad siya ta dai niya tinugutan an ano man na negatibong sabuot manungod sa saiyang sadiri na magin dahilan para dai niya makamit an mga bendisyon na ini!

6. Napangganahan daw tulos ni Pedro an saiyang mga kaluyahan? Ipaliwanag.

 ⁶ Sa ibong kan mga nahiling asin nadangog ni Pedro, nasakitan pa man giraray siyang paglabanan an saiyang mga kaluyahan. Konsideraron ta an pirang halimbawa. Kan ipinaliwanag ni Jesus kun paano siya magsasakit asin magagadan bilang kautuban kan propesiya sa Bibliya, sinaway siya ni Pedro. (Mar. 8:​31-33) Pauruutrong nagdidiriskusyunan si Pedro saka an iba pang mga apostol kun siisay an pinakaurog sa sainda. (Mar. 9:​33, 34) Kan huring banggi bago magadan si Jesus, nagin pabigla-bigla si Pedro asin tinigbas kaini an talinga kan sarong lalaki. (Juan 18:10) Kan banggi man sanang idto, nadaog nin takot si Pedro asin tulong beses niyang pignigaran na bisto niya an amigo niyang si Jesus. (Mar. 14:​66-72) Dahil diyan naghibi si Pedro sa sobrang kamunduan.​—Mat. 26:75.

7. Anong oportunidad an itinao ki Pedro pagkatapos na buhayon liwat si Jesus?

⁷ Dai ni Jesus sinukuan an pinangluluyahan nin buot na apostol niya. Pagkatapos na buhayon liwat si Jesus, tinawan niya si Pedro nin oportunidad na ipahiling na namumutan pa man giraray siya kaini. Sinabihan ni Jesus si Pedro na mapakumbabang maglingkod bilang pastor kan saiyang mga karnero. (Juan 21:​15-17) Andam si Pedro na gibuhon an ipinapagibo sa saiya. Kaya yaon siya kaidto sa Jerusalem kan aldaw nin Pentecostes asin kabilang siya sa mga inot na linahidan kan banal na espiritu.

8. Anong seryosong pagkakasala an nagibo ni Pedro kan yaon siya sa Antioquia?

⁸ Dawa kan pagkatapos na magin sarong linahidan na Kristiyano si Pedro, kinaipuhan niyang paglabanan an saiyang mga kaluyahan. Kan 36 C.E., yaon si Pedro kan an bakong turing Hentil na si Cornelio lahidan kan banal na espiritu, na malinaw na ebidensiya na “an Diyos mayong pinapalain” asin na puwedeng magin kabtang kan Kristiyanong kongregasyon an mga Hentil. (Gibo 10:​34, 44, 45) Pagkatapos kaiyan, nagkakakan na si Pedro kaiba kan mga Hentil, sarong bagay na dai niya lamang gigibuhon kaidto. (Gal. 2:12) Minsan siring, para sa nagkapirang Kristiyanong Judio dai dapat iribang nagkakakan an mga Judio saka an mga Hentil. Kan an nagkapira na may arog kaiyan na pagmansay mag-abot sa Antioquia, ipinundo ni Pedro an pagkakan kaiba kan saiyang mga tugang na Hentil, na posibleng marhay na huli sa pagkatakot niya na mapaanggot an mga Kristiyanong Judio. Nahiling ni apostol Pablo an pagsagin-sagin na ini asin sinaway niya si Pedro sa atubangan kan gabos na iba pa. (Gal. 2:​13, 14) Sa ibong kan salang ginibo na ini ni Pedro, dai siya suminuko. Ano an nakatabang saiya?

9. Paano ipinapahiling kan Juan 6:​68, 69 an kaimbudan ni Pedro?

⁹ Maimbod si Pedro; dai niya tinugutan an ano man na papunduhon siya sa pagsunod ki Jesus. Sa sarong pagkakataon, ipinahiling niya an saiyang kaimbudan kan sabihon ni Jesus an sarong bagay na dai nasabutan kan mga disipulo kaini. (Basahon an Juan 6:​68, 69.) Dakul an nagpundo sa pagsunod ki Jesus na dai lamang naghalat o naghagad nin paliwanag. Pero bakong arog kaiyan si Pedro. Aram niya na si Jesus sana an igwa kan “mga tataramon nin buhay na daing katapusan.”

10. Paano ipinahiling ni Jesus an pagtitiwala niya ki Pedro? (Hilingon man an ritrato.)

¹⁰ Dai binayaan ni Jesus si Pedro. Sa huring banggi kan buhay ni Jesus digdi sa daga, aram niya na babayaan siya ni Pedro saka kan iba pang mga apostol. Minsan siring, ipinahayag ni Jesus an saiyang pagtitiwala na mabalik si Pedro asin magdadanay ining maimbod. (Luc. 22:​31, 32) Nasabutan ni Jesus na “gustuhon kan espiritu, pero an laman maluya.” (Mar. 14:38) Kaya, dawa pagkatapos na nigaran ni Pedro na bisto niya si Jesus, dai ni Jesus sinukuan an saiyang apostol. Nagpahiling ki Pedro an binuhay na liwat na si Jesus —minalataw na kan si Pedro nagsosolo. (Mar. 16:7; Luc. 24:34; 1 Cor. 15:5) Isip-isipa na sana kun gurano kaiyan napakusog an munduon na marhay na apostol!

11. Paano inasigurar ni Jesus si Pedro na susuportaran ini ni Jehova?

¹¹ Inasigurar ni Jesus si Pedro na susuportaran ini ni Jehova. An binuhay liwat na si Jesus naggibo giraray nin sarong milagro na paagi kaiyan nakadakop nin kadakul na sira si Pedro saka an kapwa mga apostol kaini. (Juan 21:​4-6) Daing duda na an milagrong ini nag-asigurar giraray ki Pedro na pasil sana ki Jehova na itao an materyal na mga bagay na kaipuhan niya. Tibaad nagirumduman kaidto kan apostol an mga tataramon ni Jesus na itatao ni Jehova an mga pangangaipo kan mga padagos na ‘naghahanap nguna kan Kahadian.’ (Mat. 6:33) Kauyon kaiyan, ginibo ni Pedro na priyoridad an ministeryo, bako an negosyong paninira. Kusog-buot siyang nagpatotoo kan aldaw nin Pentecostes 33 C.E., na tinatabangan an rinibo na mag-ako kan maugmang bareta. (Gibo 2:​14, 37-41) Pagkatapos kaiyan, tinabangan niya an mga Samaritano asin an mga Hentil na akuon si Cristo. (Gibo 8:​14-17; 10:​44-48) Siguradong ginamit ni Jehova si Pedro sa pambihirang paagi para darahon an gabos na klase nin tawo palaog sa kongregasyon.

12. Paano makakatabang sa sato an halimbawa ni Pedro kun igwa kitang piglalabanan na dai mahali-haling kaluyahan?

¹² Matatabangan kita ni Jehova na dai sumuko. Tibaad masakit para sa sato na magpadagos, lalo na kun igwa kitang piglalabanan na dai mahali-haling kaluyahan. Kun minsan, tibaad garo baga mas masakit labanan an satong mga kaluyahan kisa sa mga kaluyahan na igwa si Pedro. Pero tatawanan kita ni Jehova nin kusog para dai sumuko. (Sal. 94:​17-19) Halimbawa, sarong brother an namuhay nin homoseksuwal sa laog nin dakul na taon bago nanudan an katotoohan. Lubos niyang binayaan an imoral na mga gibo-gibong iyan. Pero, paminsan-minsan nakakamati pa man giraray siya nin salang mga pagmawot. Ano an nakatabang saiya na dai sumuko? Sinabi niya: “Pinapakusog kita ni Jehova.” Sinabi pa niya: “Sa tabang kan espiritu ni Jehova . . . , nanudan ko na posible na [makapagpadagos] sa dalan nin katotoohan . . . Nagin posible na gamiton ako ni Jehova, asin sa ibong kan sakong pagkabakong perpekto padagos niya akong pinapakusog.”

13. Paano ta maaarog an halimbawa ni Pedro, arog kan mababasa sa Gibo 4:​13, 29, 31? (Hilingon man an ritrato.)

¹³ Arog kan aram ta, bako lang sarong beses na nagpadaog si Pedro sa pagkatakot sa tawo. Pero  paagi sa pagpamibi para sa kusog nin buot, huminiro si Pedro na daing takot. (Basahon an Gibo 4:​13, 29, 31.) Makakaya ta man na daugon an pagkatakot. Pag-isipan an nangyari ki Horst, sarong hoben na brother na nakaistar kaidto sa Nazi Germany. Bako lang sarong beses siyang nagpadaog sa panggigipit sa eskuwelahan asin nagsabi nin “Heil Hitler!” Imbes na sawayon si Horst kan saiyang mga magurang, namibi an mga ini kaiba niya, na hinahagad ki Jehova na tawan siya nin kusog nin buot. Sa tabang kan saiyang mga magurang asin sa pagsarig ki Jehova, kan huri nagkaigwa si Horst nin kusog nin buot na marigon na makapanindugan. Pagkatapos sinabi niya: “Nungka akong binayaan ni Jehova.” c

14. Paano aasiguraron kan mapagmalasakit na mga pastor idtong mga pinangluluyahan nin buot?

¹⁴ Dai kita susukuan ni Jehova saka ni Jesus. Kinaipuhan ni Pedro na gumibo nin importanteng desisyon pagkatapos niyang nigaran si Cristo. Mapundo na daw siya, o magpapadagos siya bilang disipulo ni Cristo? Ipinamibi ni Jesus ki Jehova na dai mawara an pagtubod ni Pedro. Sinabi ni Jesus ki Pedro an manungod sa pamibing iyan asin ipinahayag niya an pagtitiwala niya na magigibong pakusugon ni Pedro an mga tugang kaini. (Luc. 22:​31, 32) Isip-isipa na sana kun gurano naaasigurar giraray si Pedro pag ginigirumdom niya an mga tataramon ni Jesus! Pag kinakaipuhan tang gumibo nin importanteng desisyon sa satong buhay, puwedeng gamiton ni Jehova an mapagmalasakit na mga pastor para magtao nin asigurasyon na kaipuhan ta tanganing magdanay na maimbod. (Efe. 4:​8, 11) Sarong haloy nang elder na an pangaran Paul an naghihinguwang itao an arog kaiyan na pagranga. Sinasabi niya sa mga nag-iisip na sumuko na lang na girumdumon kun paano sinda inot na dinagka ni Jehova sa katotoohan. Dangan, inaasigurar niya sinda na dai sinda susukuan ni Jehova huli sa maimbod na pagkamuot  Niya. Tapos sinabi niya, “Dakul akong nahiling na mga pinangluluyahan nin buot na dai suminuko huli sa tabang ni Jehova.”

15. Paano an mga halimbawa ni Pedro asin ni Horst nagpapahiling kan pagigin totoo kan Mateo 6:33?

¹⁵ Kun paanong itinao ni Jehova an materyal na pangangaipo ni Pedro saka kan iba pang mga apostol, itatao man Niya an materyal na mga pangangaipo ta pag iniinot niyato sa satong buhay an ministeryo. (Mat. 6:33) Pagkatapos kan Giyera Mundiyal II, si Horst, na sinambit sa inutan, pinag-isipan an pagpapayunir. Kaya lang, tios siyang marhay, asin dai siya sigurado kun kaya niyang suportaran an saiyang sadiri tanganing makapagdanay sa bilog na panahon na ministeryo. Ano an gigibuhon niya? Nagdesisyon siyang purbaran si Jehova, kaya bilog na semana siyang nakikabtang sa ministeryo durante kan dalaw kan paraataman nin sirkito. Sa katapusan kan semanang idto, nabigla siya kan an paraataman nin sirkito may iinabot sa saiya na sobre pero dai kaini pigsabi kun kiisay iyan hali. Igwa iyan nin laog na kuwarta na igo para masusteniran siya sa pagpapayunir nin pirang bulan. Minansay ni Horst an regalong ini bilang asigurasyon na itatao ni Jehova an saiyang mga pangangaipo. Ginamit niya an bilog niyang buhay puon kaidto sa pag-inot kan intereses kan Kahadian.​—Mal. 3:10.

16. Taano ta makikinabang kita kun pag-aadalan ta an halimbawa ni Pedro asin an mga isinurat niya?

¹⁶ Siguradong maugmahon nanggad si Pedro ta dai saiya ruminayo si Jesus, arog kan pakiulay niya kan primero! Padagos na sinanay ni Cristo si Pedro na magin maimbod na apostol asin marahayon na halimbawa para sa mga Kristiyano. An mababasa tang rekord manungod sa pagsasanay na iyan igwa nin dakul na mahalagang marhay na leksiyon na kapaki-pakinabang sa sato gabos. Ihiniras ni Pedro an nagkapira sa mga leksiyon na iyan, asin an dakul na iba pa, sa duwang ipinasabong na surat na ipinadara niya sa mga kongregasyon kan inot na siglo. Pag-uulayan sa sunod na artikulo an pirang mga pagirumdom na hali sa mga surat na ini asin kun paano niyato iaaplikar an mga iyan sa ngunyan.