1-2. Taano ta dapat na magin interesado kita sa pagkasaysay manungod ki Samson?

 ANO an nagsasabong sa isip mo pag nadadangog mo an pangaran na Samson? Posibleng marhay na an naiisip mo sarong lalaking may pambihirang kusog. Tama iyan. Pero nakagibo si Samson nin salang desisyon na nagresulta nin grabeng pagsakit. Dawa arog kaiyan, nagpokus si Jehova sa ginibong kaimbudan ni Samson, asin ipinasurat Niya iyan sa Bibliya para makinabang kita.

² Ginamit ni Jehova si Samson na gibuhon an pambihirang mga bagay para tabangan an pinili Niyang banwaan, an Israel. Ginatos na taon pagkagadan ni Samson, pinasabngan ni Jehova si apostol Pablo na iiba an pangaran ni Samson sa listahan nin mga lalaking may pambihirang pagtubod. (Heb. 11:​32-34) Mapapakusog kita kan halimbawa ni Samson. Nagsarig siya ki Jehova dawa sa dipisil na mga kamugtakan. Pag-ulayan ta kun paano kita mapapakusog saka makakanuod nin iba pang praktikal na mga leksiyon sa halimbawa niya.

3. Anong asignasyon an itinao ki Samson?

³ Kan ipinangaki si Samson, an mga Filisteo an namamahala sa nasyon nin Israel asin inaapi ninda ini. (Huk. 13:1) An maringis na pamamahala ninda nagresulta nin grabeng pagsakit sa mga Israelita. Pinili ni Jehova si Samson para ‘manginot sa pagligtas sa Israel sa kamot kan mga Filisteo.’ (Huk. 13:5) Dipisilon nanggad na asignasyon! Para magibo iyan ni Samson, kaipuhan niyang magsarig ki Jehova.

4. Paano ni Jehova tinabangan si Samson para makabutas sa mga Filisteo? (Hukom 15:​14-16)

⁴ Pag-isipan an sarong halimbawa kan pagtitiwala ni Samson ki Jehova asin kan suporta na itinao nin Diyos sa saiya. Sa sarong pagkakataon, sarong hukbong militar kan mga Filisteo an nag-arabot  para dakupon si Samson sa Lehi, na posibleng sa Juda. Nagkatarakot an mga lalaki kan Juda, kaya nagdesisyon sindang itao si Samson sa mga kalaban. Ginapos si Samson kan mga kahimanwa niya gamit an duwang bagong pisi asin dinara siya sa mga Filisteo. (Huk. 15:​9-13) Minsan siring, “tinawan [si Samson] nin kusog kan espiritu ni Jehova” asin tinaranggal niya an mga pisi na nakagarapos sa saiya. Dangan “may nahiling siyang panga nin lalaking asno na bago pa sanang magadan,” kinua niya iyan asin ginamit para gadanon an 1,000 lalaking Filisteo!—Basahon an Hukom 15:​14-16.

5. Sa paggamit ni Samson kan panga nin sarong asno, paano niya ipinahiling na nagtitiwala siya ki Jehova?

⁵ Taano ta panga nin sarong asno an ginamit ni Samson? Bihirang marhay iyan na gamiton bilang armas, o haros dai ngani! Siguradong aram ni Samson na an kapangganahan niya nakadepende ki Jehova, bako sa ano man na armas na gagamiton niya. Iyo, ginamit kan maimbod na lalaking ini kun ano an yaon para magibo an kabutan ni Jehova. Malinaw na binendisyunan si Samson nin dakulang kapangganahan huli sa saiyang pagsarig ki Jehova.

6. Pag ginigibo ta an satong teokratikong mga asignasyon, ano an manunudan ta ki Samson?

⁶ Puwede man kitang pakusugon ni Jehova para magibo ta an satong mga asignasyon, dawa idtong garo baga imposibleng magibo niyato. Puwede kitang tabangan nin Diyos sa paagi na tibaad mapangalas kita. Magtiwala na tatabangan ka ni Jehova, na nagtao nin kusog ki Samson, na magibo an Saiyang kabutan basta nagsasarig ka Saiya para sa tabang.​—Tal. 16:3.

7. Anong halimbawa an nagpapahiling na mahalaga na umasa kita ki Jehova para sa paggiya?

⁷ Dakul na mga tugang niyato na nagtatabang sa teokratikong mga proyekto sa pagtugdok an nagpahiling nin pagtitiwala ki Jehova. Kaidto, sa parati an kadaklan sa idinidisenyo saka itinutugdok kan mga tugang mga bagong Kingdom Hall asin iba pang mga edipisyo. Pero, pag-abot nin panahon, kinaipuhan na gumibo nin mga pagbabago huli sa pag-uswag kan organisasyon ni Jehova. An may paninimbagan na mga brother naghagad nin paggiya ki Jehova asin nagpurbar nin bagong mga pamamaagi, arog kan pagbakal nin mga pasilidad asin pag-renovate kan mga iyan. “Kan primero, bakong pasil para  sa nagkapira na akuon an bagong pamamaaging ini,” an sabi ni Robert, na kan nakaaging mga taon nagtrabaho sa dakul sa satong mga proyekto nin pagtutugdok sa bilog na kinaban. An sabi pa niya: “Ibahon na marhay iyan sa ginigibo mi kaidto sa laog nin dakul na mga taon. Pero andam an mga tugang na gibuhon an bagong pamamaaging ini, asin hiling-hiling na binebendisyunan ni Jehova an mga pagbabagong ini.” Saro sana ining halimbawa kun paano ginigiyahan ni Jehova an saiyang banwaan para mautob an kabutan niya. Sa pana-panahon, marahay na haputon niyato gabos an satong sadiri, ‘Nag-aasa daw ako ki Jehova para sa paggiya niya asin pirming andam na gumibo nin mga pagbabago sa paglilingkod ko sa saiya?’

8. Sa sarong pangyayari kan mapahang marhay si Samson, ano an ginibo niya?

⁸ Tibaad nabasa mo an ibang mga pangyayari na naggibo si Samson nin pambihirang mga bagay. Solo niyang ginadan an sarong leon asin kan huri 30 lalaki an ginaradan niya sa Askelon, na siyudad kan mga Filisteo. (Huk. 14:​5, 6, 19) Aram ni Samson na dai niya lamang magigibo an mga bagay na iyan kun mayo an tabang ni Jehova. Risang-risa iyan sa sarong pangyayari kan napaha siyang marhay pakatapos niyang garadanon an 1,000 Filisteo. Ano an ginibo niya? Imbes na mag-asa sa sadiri niya para makakua nin tubig na maiinom, nag-apod siya ki Jehova para sa tabang.​—Huk. 15:18.

9. Paano sinimbag ni Jehova an paghagad ni Samson nin tabang? (Hukom 15:19)

⁹ Sinimbag ni Jehova an paghagad ni Samson nin tabang paagi sa milagrosong paggibo nin burabod nin tubig. Kan mag-inom diyan si Samson, “buminalik an saiyang kusog asin naulian siya.” (Basahon an Hukom 15:19.) Minalataw na an bagong burabod na ini nin tubig yaon pa man giraray pakalihis nin mga taon kan pinasabngan si propeta Samuel na isurat an libro nin Mga Hukom. An mga Israelita na nakahiling kan nagbubulos na tubig na iyan tibaad napagirumdom na kun magsasarig sinda ki Jehova, tatabangan niya an maimbod na mga parasamba niya sa panahon na kaipuhan ninda nin tabang.

10. Ano an kalabot sa pag-ako ta nin tabang hali ki Jehova? (Hilingon man an ritrato.)

¹⁰ Kaipuhan ta man na umasa ki Jehova para sa tabang ano man na mga talento o kakayahan an tibaad igwa kita o ano man an mga nagibo ta sa paglilingkod sa saiya. Dapat na mapakumbaba niyatong akuon an katotoohan na an tunay na kapangganahan posible sana pag nagsasarig kita ki Jehova. Kun paanong kuminusog si Samson kan ininom niya an tubig na itinao ni Jehova, magigin makusog man kita sa espirituwal pag inaprobetsaran ta an gabos na probisyon na itinatao ni Jehova sa sato.​—Mat. 11:28.

11. Paano ta lubos na aaprobetsaran an tabang ni Jehova? Magtao nin halimbawa.

¹¹ Pag-isipan an halimbawa kan brother na si Aleksey, saro sa mga tugang niyato sa Russia, na nagtatagal nin grabeng persekusyon. Ano an nakatabang saiya para magdanay na makusog sa ibong kan masakit na marhay na mga kamugtakan? Siya saka an saiyang agom igwa nin marahay na espirituwal na rutina. Sinabi niya: “Pighihinguwa kong ipadagos an sakong espirituwal na rutina nin personal na pag-adal asin aroaldaw na pagbasa nin Bibliya. Kada aga, pinag-uulayan mi ni agom an teksto kan aldaw asin magkaibanan kaming namimibi ki Jehova.” Ano an itinutukdo kaini sa sato? Imbes na mag-asa sa sadiri ta, dapat na magsarig kita ki Jehova. Paano? Paagi sa paggibo nin mga bagay na mapakusog kan satong pagtubod, arog kan marahay na rutina nin personal na pag-adal nin Bibliya, asin iba pang teokratikong mga aktibidad. Dangan, abundang bebendisyunan ni Jehova an satong mga paghihinguwa  para paglingkudan siya. Pinakusog niya si Samson, asin siguradong kaya Niya man kitang pakusugon.

12. Anong salang desisyon an ginibo ni Samson, asin taano ta naiiba iyan sa mas nainot niyang mga ginibo?

¹² Arog niyato bakong perpekto si Samson, kaya may mga panahon na nakagibo siya nin salang mga desisyon. May ginibo siyang sarong partikular na desisyon na nagkaigwa nin kapaha-pahamak na resulta. Pakatapos nin halipot na panahon na paglilingkod ni Samson bilang hukom, “namuot siya sa sarong babayi sa Kababan nin Sorek na an pangaran Delaila.” (Huk. 16:4) Bago kaiyan, may nakarelasyon si Samson na sarong babaying Filisteo, pero an relasyon na iyan ‘paagi ni Jehova,’ huling “naghahanap Siya nin pagkakataon na makipaglaban sa mga Filisteo.” Pagkatapos, nagdagos si Samson sa harong nin sarong hostes sa Gaza, na siyudad kan mga Filisteo. Kan pagkakataon na idto, tinawan ni Jehova nin kusog si Samson na darahon an mga pinto kan trangkahan kan siyudad, na nakapaluya kan pandepensa kaiyan. (Huk. 14:​1-4; 16:​1-3) Pero, naiiba an pakikipagrelasyon niya ki Delaila huli ta posibleng marhay na saro ining Israelita.

13. Ano an ginibo ni Delaila ki Samson na nagresulta sa kapahamakan kaini?

¹³ Nag-ako si Delaila nin dakulang kantidad nin kuwarta hali sa mga Filisteo bilang bayad kan pagtraydor niya ki Samson. Sobra daw an tiwala ni Samson ki Delaila—kaya nabuta siya kan pagkamuot niya sa babayi—na dahil diyan dai lamang niya narisa kun ano an motibo ni Delaila? Ano man an dahilan, pauruutrong pigparapirit ni Delaila si Samson na sabihon an pinaghahalian kan kusog kaini, kaya sa bandang huri sinabi man giraray kaini an mga gusto niyang maaraman. Makamumundo, tinugutan ni Samson na makalaog siya sa sitwasyon na nagresulta  sa pagkawara kan saiyang kusog asin temporaryong pagkawara kan pag-uyon ni Jehova.​—Huk. 16:​16-20.

14. Anong mga konsekwensiya an sinapar ni Samson huli sa pagtitiwala niya ki Delaila?

¹⁴ Makulog na mga konsekwensiya an sinapar ni Samson huli sa pagtitiwala niya ki Delaila imbes na ki Jehova. Dinakop kan mga Filisteo si Samson asin binuta ninda siya. Iprineso siya sa Gaza, kun sain an mga tawo duman ipinasupog niya dai pa sana nahahaloy, asin nagin siyang hamak na paragiling nin trigo. Dangan ipinasupog siya kan mga Filisteo kan magtiripon sinda para sa sarong selebrasyon. Nagdulot sinda nin dakul na atang sa palsong diyos nindang si Dagon, huling naniniwala sindang itinao kaini sa sainda si Samson. Ilinuwas ninda si Samson hali sa presuhan asin dinara sa pinagtitiripunan ninda tanganing “may mapagngirisihan” sinda.​—Huk. 16:​21-25.

15. Paano ipinahiling ni Samson na nagsarig giraray siya ki Jehova? (Hukom 16:​28-30) (Hilingon an ritrato sa cover.)

¹⁵ Nakagibo si Samson nin seryosong pagkakasala, pero dai siya suminuko. Naghanap siya nin pagkakataon para mautob an itinao sa saiya nin Diyos na asignasyon na labanan an mga Filisteo. (Basahon an Hukom 16:​28-30.) Nakimahirak si Samson ki Jehova: “Tugutan mo akong makabalos sa mga Filisteo.” Sinimbag kan tunay na Diyos an pakiulay ni Samson asin ibinalik an pambihira kaining kusog. Bilang resulta, mas dakul siyang ginadan na mga Filisteo sa pagkakataon na ini kisa kan mga nakaagi.

16. Ano an manunudan ta sa nagibong sála ni Samson?

¹⁶ Dawa ngani nagsapar si Samson nin makulog na mga konsekwensiya kan nagibo niyang sála, dai siya nagpundo sa paghihinguwang gibuhon an kabutan ni Jehova. Dawa kun makagibo kita nin sála asin kaipuhan na sagwion o mawaran nin pribilehiyo, dai kita dapat sumuko. Tandaan, dai kita sinusukuan ni Jehova. (Sal. 103:​8-10) Sa ibong kan satong nagibong mga sála, puwede pa man giraray kitang magin kapaki-pakinabang para ki Jehova, arog ni Samson.

17-18. Taano ta nakakapakusog sa saimo an halimbawa ni Michael? (Hilingon man an ritrato.)

¹⁷ Pag-isipan an halimbawa kan hoben na brother na si Michael. Sibot siya sa teokratikong mga aktibidad; saro siyang ministeryal na lingkod asin regular payunir. Alagad, makamumundo ta may nagibo siyang sála, na nagresulta sa pagkawara kan mga pribilehiyo niya sa kongregasyon. “Bago kaini,” an sabi niya, “makaskason an dalagan kan paglilingkod ko ki Jehova. Tapos bigla na sana, garo ako buminangga sa pader.  Nungka kong inisip na papabayaan ako ni Jehova, pero inisip-isip ko kun baga magigin arog pa kan dati an relasyon ko sa saiya o kun magigibo ko pa na makapaglingkod nin lubos sa kongregasyon arog kan dati.”

¹⁸ Marahay na sana ta dai suminuko si Michael. Sinabi pa niya: “Nagpokus ako sa kun paano ko maibabalik giraray an marahay na relasyon ko ki Jehova paagi sa regular na pagpamibi sa saiya, pag-adal, asin paghurop-hurop.” Pag-abot nin panahon, nagkaigwa giraray si Michael nin mga pribilehiyo sa kongregasyon. Naglilingkod na siya ngunyan bilang elder asin regular payunir. Sinabi niya: “An suporta asin pampakusog na itinao sa sako, lalo na kan mga elder, nakatabang sako para marealisar na namumutan pa man giraray ako ni Jehova. Makakapaglingkod na giraray ako sa kongregasyon na may malinig na konsiyensiya. Tinukduan ako kan eksperyensiyang ini na papatawadon ni Jehova an si’say man na tunay na nagsusulsol.” Makakapagtiwala kitang gagamiton saka bebendisyunan man kita ni Jehova dawa kun may nagibo kitang mga sála, basta gigibuhon niyato an satong pinakamakakaya para itanos an mga gibo ta asin padagos na magsarig sa saiya.​—Sal. 86:5; Tal. 28:13.

19. Paano nakapakusog saimo an halimbawa ni Samson?

¹⁹ Sa artikulong ini, pinag-ulayan niyato an pira sa interesanteng marhay na mga pangyayari sa buhay ni Samson. Bako siyang perpekto; alagad, dai siya suminuko sa paghihinguwang paglingkudan si Jehova, dawa pagkatapos niyang makagibo nin sála may koneksiyon ki Delaila. Asin dai siya sinukuan ni Jehova. Ginamit giraray nin Diyos si Samson sa pambihirang paagi. Ibinilang pa man giraray siya ni Jehova na sarong lalaking may pambihirang pagtubod, asin iiniba niya siya sa listahan nin mga maimbod na yaon sa Hebreo kapitulo 11. Nakakapakusog nanggad na maaraman na naglilingkod kita sa sarong mamumuton na Ama sa langit na nagmamawot na pakusugon kita, lalo na kun nuarin kita maluya! Kaya arog ni Samson, makimahirak kita ki Jehova: “Girumdumon mo tabi ako, asin tawan mo tabi ako nin kusog.”​—Huk. 16:28.