1-2. Paano kita nakikinabang sa pagkalalang sa sato na igwa kan kakayahan na makamati nin urog na kaugmahan sa pagtao kisa sa pag-ako?

 KAN lalangon ni Jehova an mga tawo, dinisenyo niya sinda na igwa kan kakayahan na makamati nin urog na kaugmahan sa pagtao kisa sa pag-ako. (Gibo 20:35) Buot sabihon daw kaini dai kita nakakamati nin ano man na kaugmahan sa pag-ako? Dai man. Aram niyato base sa eksperyensiya na nauugma kita pag nakakaresibi kita nin regalo. Pero, mas nakakamati kita nin urog na kaugmahan pag kita an nagtatao. Asin an totoo, para sa kapakinabangan niyato kaya linalang kita ni Jehova sa arog kaining paagi. Taano?

² Paagi sa paglalang sa sato sa arog kaiyan na paagi, tinatawan kita ni Jehova nin oportunidad na madagdagan niyato an satong kaugmahan. Magigibo niyato iyan paagi sa paghanap nin dugang pang mga paagi na magtao. Bako daw na sarong marahayon na aspekto iyan kan pagkalalang sa sato ni Jehova?​—Sal. 139:14.

3. Taano ta masasabi na si Jehova an “maugmang Diyos”?

³ Sinisiyerto sa sato kan Kasuratan na an pagtao nagreresulta sa kaugmahan, kaya bakong makangangalas na an Bibliya ilinaladawan si Jehova bilang an “maugmang Diyos.” (1 Tim. 1:11) Siya an pinakainot asin an pinakanangungurog na Paratao. Huli sa saiya, “igwa kita nin buhay asin naghihiro saka nag-eeksister,” siring kan sinabi ni apostol Pablo. (Gibo 17:28) Iyo, hali ki Jehova “an lambang marahay na balaog asin an lambang perpektong regalo.”​—Sant. 1:17.

4. Ano an makakatabang sa sato na makamati nin urog na kaugmahan?

⁴ Gabos kita posibleng marhay na gustong mas maeksperyensiyahan an kaugmahan na nakukua sa pagtao. Magigibo niyato iyan kun aarugon ta an pagkamatinao ni Jehova. (Efe. 5:1) Mantang pinag-uulayan ta ini, mangnuhon kun ano an puwede tang gibuhon kun namamatian niyatong dai inaapresyar an mga ginigibo niyatong pagtao. An mga pagirumdom na ini makakatabang sato na mapagdanay asin madagdagan pa ngani an kaugmahan na nakukua niyato sa pagtao.

 ARUGON AN PAGKAMATINAO NI JEHOVA

5. Anong materyal na mga bagay an itinatao sa sato ni Jehova?

⁵ Ano an nagkapirang paagi na ipinapahiling ni Jehova an saiyang pagkamatinao? Pag-isipan an pirang halimbawa. Tinatawan kita ni Jehova nin materyal na mga bagay. Tibaad dai man kita pirming igwa kan mga gusto ta, pero salamat ki Jehova, kadaklan sa sato igwa kan mga kaipuhan ta. Halimbawa, pinapagin posible niya na magkaigwa kita nin kakanon, bado, saka istaran. (Sal. 4:8; Mat. 6:​31-33; 1 Tim. 6:​6-8) Itinatao daw ni Jehova an satong materyal na mga pangangaipo dahil sana ta naoobligar siyang gibuhon iyan? Dai nanggad! Taano ta ginigibo iyan ni Jehova para sa sato?

6. Ano an manunudan niyato sa Mateo 6:​25, 26?

⁶ Sa simpleng pagtaram, itinatao sa sato ni Jehova an satong materyal na mga pangangaipo huling namumutan niya kita. Pag-isipan an sinabi ni Jesus na nasa Mateo 6:​25, 26. (Basahon.) Ginamit ni Jesus an mga linalang bilang halimbawa. Manungod sa mga gamgam, sinabi ni Jesus: “Dai sinda nagsasabwag nin banhi o nag-aani o nagtitipon sa mga kamalig.” Minsan siring, mangnuhon an sunod niyang sinabi: “Pinapakakan sinda kan saindong Ama sa langit.” Dangan naghapot si Jesus: “Bako daw na mas mahalaga kamo kisa sainda?” An punto? Para ki Jehova, mas mahalagang marhay an saiyang mga parasamba kisa sa mga linalang niyang hayop. Kun itinatao ngani ni Jehova sa mga hayop an mga pangangaipo kan mga ini, makakasigurado man kita na itatao niya sa sato an mga pangangaipo niyato! Arog sa sarong mapagmakulog na ama, itinatao ni Jehova an mga pangangaipo kan saiyang pamilya huling namumutan niya sinda.​—Sal. 145:16; Mat. 6:32.

7. Ano an sarong paagi na maaarog ta an pagkamatinao ni Jehova? (Hilingon man an ritrato.)

⁷ Arog ni Jehova, puwede man kitang magtao sa iba dahil sa pagkamuot ta sa sainda. Halimbawa, may aram ka daw na kapagtubod na nangangaipo nin kakanon o bado? Puwede kang gamiton ni Jehova na tawan siya nin sarong bagay para tabangan siya. Midbid na marhay an mga lingkod ni Jehova lalo na sa pagigin matinao ninda sa panahon nin kalamidad. Halimbawa, durante kan pandemyang COVID-19, an mga tugang naghiras nin mga kakanon, bado, asin iba pang suplay sa mga nangangaipo kaiyan. Dakul man an nagtao nin darakulang donasyon sa pambilog na kinaban na gibuhon. Nakatabang iyan para magkaigwa nin pondo para sa gibuhon na pag-ayuda sa bilog na kinaban. Isinapuso ninda an mga tataramon na nasa Hebreo 13:16: “Dai nindo paglingawan na gumibo nin marahay asin na maghiras sa iba kan kun ano an igwa kamo, huling nauugmang marhay an Diyos sa siring na mga atang.”

8. Sa anong mga paagi kita nakikinabang sa kusog ni Jehova? (Filipos 2:13)

 ⁸ Si Jehova nagtatao nin kusog. Maugma si Jehova na ihiras sa saiyang maimbod na mga parasamba an saiyang daing limiteng puwersa o kusog. (Basahon an Filipos 2:13.) Minsan daw namibi ka nang tawan ka nin kusog na malabanan an sarong sugot o na matagalan an sarong masakit na pagbalo? O tibaad namibi ka na man na tawan ka lang nin igong kusog para matapos an mga dapat mong gibuhon para sa aldaw. Pag sinimbag an pamibi mo para sa kusog, siguradong mauyon ka ki apostol Pablo, na nagsurat: “Igwa akong kusog na atubangon an gabos na bagay paagi sa saiya na nagtatao sa sako nin puwersa.”​—Fil. 4:13.

9. Paano ta maaarog an pagigin matinao ni Jehova sa paggamit niya kan saiyang puwersa? (Hilingon man an ritrato.)

⁹ Dawa bako kitang perpekto, maaarog niyato an pagigin matinao ni Jehova sa paggamit niya kan saiyang puwersa. Dai man kita literal na makakatao nin kusog, o enerhiya, sa iba. Pero puwede niyatong gamiton an satong kusog para tabangan an iba. Halimbawa, kun may mga tugang kitang may edad na o may hilang, tibaad puwedeng kita na an magsaod para sa sainda o tabangan ta sinda sa mga gibuhon sa harong. Kun itinutugot kan satong kamugtakan, puwede kitang magboluntaryo para tumabang sa paglinig saka pagmentenar kan Kingdom Hall. Kun gagamiton ta an satong kusog sa arog kaiyan na mga paagi, makikinabang an iba pang mga parasamba ni Jehova.

10. Paano ta puwedeng gamiton an puwersa nin mga tataramon para pakusugon an iba?

¹⁰ Dai man paglingawan na an mga tataramon igwa nin puwersa. May naiisip ka daw na saro na mapapakusog pag tinawan nin sinserong komendasyon? May aram ka daw na nangangaipo nin pagranga? Kun igwa, puwede ka daw mag-inisyatiba na maaraman niyang nagmamakulog ka sa saiya? Puwede mo siyang bisitahon nin personal, apudan, o padarahan nin kard, email, o text. Dai man kaipuhan na magayunon na mga tataramon an gamiton mo. An pirang simpleng tataramon na hali sa puso tibaad iyo mismo an kaipuhan kan saimong kapagtubod tanganing padagos pa siyang makapagdanay na maimbod o magin mas positibo an pananaw niya sa saiyang sitwasyon.​—Tal. 12:25; Efe. 4:29.

11. Paano ginagamit ni Jehova an saiyang kadunungan?

¹¹ Si Jehova nagtatao nin kadunungan. Isinurat ni disipulo Santiago: “Kun an siisay man sa saindo kulang sa kadunungan, padagos siyang maghagad sa Diyos, huling siya bukas-palad na nagtatao sa gabos asin dai naghahanap nin sala.” (Sant. 1:5; nota sa ibaba) Arog kan ipinaparisa kan mga tataramon na ini, dai ni Jehova sinasadiri lang an saiyang kadunungan. Bukas-palad niyang ihinihiras iyan sa iba. Mangnuhon man na pag nagtatao si Jehova nin kadunungan, ginigibo niya iyan na “dai nanunuyaw,” o “dai naghahanap nin sala.” Dai niya nuarin man ipinapamati  sa sato na makasupog na admitiron na kaipuhan ta an saiyang paggiya. Sa katunayan, dinadagka niya kita na hagadon iyan sa saiya.​—Tal. 2:​1-6.

12. Anong mga oportunidad an igwa kita para ihiras an satong kadunungan?

¹² Kumusta man kita? Puwede ta man daw arugon si Jehova paagi sa paghiras kan satong kadunungan? (Sal. 32:8) An mga lingkod ni Jehova kadakul nin oportunidad na ihiras sa iba an saindang nanudan. Halimbawa, sa parati sinasanay ta an mga baguhan sa ministeryo. Mapasensiya man na tinatabangan kan mga elder an mga ministeryal na lingkod asin bawtisadong mga brother na manudan kun paano aasikasuhon an saindang mga asignasyon sa kongregasyon. Asin an mga tugang na eksperyensiyado sa pagtugdok asin pagmentenar nagtatabang sa pagsasanay sa mga dai pa gayong eksperyensiyado kun paano gigibuhon an mga trabaho sa teokratikong mga pasilidad.

13. Paano ta maaarog an paagi ni Jehova nin paghiras nin kadunungan pag sinasanay ta an iba?

¹³ Marahay na arugon kan mga nagtatao nin pagsasanay an paagi nin paghiras ni Jehova kan saiyang kadunungan. Girumdumon na bukas-palad na itinatao ni Jehova an saiyang kadunungan. Sa kaagid na paagi, bulaos niyatong ihinihiras an satong kaaraman asin eksperyensiya sa mga sinasanay. Dai ta ipinapanguri an pira sa satong kaaraman dahil natatakot kitang an sinasanay ta iyo na an masalida sa sato pag-abot nin panahon. Habo ta man magkaigwa kan pagmansay na: ‘Sako ngani mayo man nagsanay! Kaya bahala na man siyang makanuod.’ Mayong lugar sa mga lingkod ni Jehova an arog kaiyan na kaisipan. Imbes, maugma niyatong ihinihiras sa mga sinasanay niyato bako lang an satong kaaraman “kundi pati mismo an [satuyang] sadiri.” (1 Tes. 2:8) Naglalaom kita na sinda “magigin lubos man na kuwalipikado na magtukdo sa iba.” (2 Tim. 2:​1, 2) Paagi sa bukas-palad na paghiras niyato kan satong kadunungan, kita asin an iba parehong lalong urog na magigin madunong asin maugma.

KUN GARO BAGA DAI INAAPRESYAR AN SATONG PAGTAO

14. Ano an reaksiyon kan kadaklan sa pagigin matinao ta?

¹⁴ Pag kita matinao, lalo na sa mga tugang, sa parati nagpapahiling sinda nin pasasalamat. Tibaad tawan ninda kita nin kard nin pasasalamat o ipahiling sa ibang paagi an saindang apresasyon. (Col. 3:15) Pag nakakaresibi kita nin mga arog kaiyan, nakakadagdag iyan sa satong kaugmahan.

15. Ano an dapat tang tandaan pag dai nagpapahiling nin apresasyon an iba?

¹⁵ Pero an totoo, tibaad dai pirming magpahiling nin apresasyon an iba. May mga pagkakataon na tibaad tawan ta kan satong panahon, kusog, o materyal na mga bagay an iba pero pagkatapos iniisip ta kun napahalagahan lamang ninda iyan. Kun mangyari iyan, paano ta malilikayan na mawara an satong kaugmahan o magkulog an buot? Tandaan an mga tataramon sa satong temang teksto, sa Gibo 20:35. An kaugmahan niyato sa pagtao dai nakadepende sa reaksiyon kan tinawan niyato. Puwede tang pilion na ikaugma an pagtao dawa kun garo baga dai iyan inaapresyar kan iba. Paano? Pag-isipan an pirang paagi.

16. Sa ano kita dapat magpokus pag kita nagtatao?

¹⁶ Magpokus sa pag-arog ki Jehova. Nagtatao siya nin marahay na mga bagay sa mga tawo—inaapresyar man ninda iyan o dai. (Mat. 5:​43-48) Nanunuga si Jehova na kun kita man matao na “daing linalauman na ano man na ibabalik sa [sato],” an satong balos “magigin dakula.” (Luc. 6:35) Puwedeng kaiba sa “ano man” an sarong ekspresyon nin pasasalamat. Makaresibi man kita kaiyan o dai, pirmi kitang babalusan ni Jehova huli sa marahay na mga ginigibo ta para tabangan an iba asin huli sa satong ‘maugmang pagtao.’—Tal. 19:17; 2 Cor. 9:7.

17. Paano kita magdadanay na nakapokus sa pag-arog ki Jehova pag kita nagtatao? (Lucas 14:​12-14)

¹⁷ Manungod sa pagdanay na nakapokus sa  pag-arog ki Jehova, may makukua kitang mahalagang prinsipyo na nasa Lucas 14:​12-14. (Basahon.) Bako man sala na magin mapag-istimar o magin matinao sa iba pang mga paagi sa mga may kakayahan na gumibo nin kaagid kaiyan sa sato. Pero, paano kun marealisar niyato na an dahilan kaya nagtatao kita sa iba iyo na naglalaom kitang may itatao man sinda sato bilang balos? Marahay na gibuhon ta an sinabi ni Jesus. Puwede tang pahilingan nin pagkamapag-istimar an saro na aram tang mayo nin kakayahan na pahilingan kita kaiyan. Paagi kaiyan, magigin maugma kita huling inaarog ta si Jehova. Makakatabang man sa sato an siring na kaisipan na mapagdanay ta an satong kaugmahan pag dai nagpapahiling nin apresasyon an iba.

18. Ano an makakatabang sa sato na magin makonsiderasyon sa iba?

¹⁸ Likayan na pagdudahan an motibo kan iba. (1 Cor. 13:7) Kun dai nagpapahiling nin apresasyon an iba, haputon an satong sadiri: ‘Bako daw talaga sindang mapagpasalamat, o ’baad nalingawan man lang nindang magpasalamat?’ Tibaad may iba pang mga dahilan kaya dai sinda nakapagpasalamat arog kan inaasahan ta. An nagkapira tibaad nakakamati nin dakulang pasasalamat pero nasasakitan sindang ipahiling iyan. Tibaad nasusupog sinda na mag-ako nin tabang, lalo na kun kaidto sinda an nagtatao nin tabang. Ano man an dahilan, papahiruon kita kan Kristiyanong pagkamuot na magin makonsiderasyon sa satong mga kapagtubod asin padagos na makakua nin kaugmahan sa pagtao.​—Efe. 4:2.

19-20. Taano ta kapaki-pakinabang an pagigin mapasensiya pag nagtatao kita sa iba? (Hilingon man an ritrato.)

¹⁹ Magin mapasensiya. Kun manungod sa pagigin matinao, an madunong na si Hading Solomon nagsurat: “Iapon mo sa katubigan an saimong tinapay, huling pakalihis nin dakul na aldaw makukua mo iyan giraray.” (Ecl. 11:1) Siring kan ipinaparisa kan mga tataramon na iyan, an iba tibaad haloy bago magpahiling nin pasasalamat—“pakalihis nin dakul na aldaw.” Pag-isipan an sarong eksperyensiya na nagduduon kan katotoohan na ini.

²⁰ Dakul na taon na an nakaagi, an agom nin sarong paraataman nin sirkito nagpadara nin sarong udok sa pusong surat sa sarong bagong bawtisadong  sister, na dinadagka ining magdanay na maimbod. Pakalihis nin mga walong taon, nagsimbag an sister paagi sa surat, na sinasabi: “Napag-isip-isip kong kaipuhan kong magsurat saimo asin ipaaram kun gurano ka nakatabang na marhay sako sa naglihis na mga taon dawa ngani dai mo iyan naaaraman.” Sinabi pa niya: “[An surat mo] mamumuton na marhay, pero an tekstong itinao mo iyo an nakataros sa puso ko, asin dai ko lamang iyan nalingawan.” a Pagkatapos na iistorya an nagkapira sa mga kasakitan na inagihan niya, sinabi kan sister: “May mga beses na gusto ko na lang bayaan an gabos, bayaan an katotoohan, bayaan an mga responsabilidad—sumuko na lang. Pero pinapahiro kan tekstong sinabi mo an puso ko, dangan . . . mapadagos na man ako.” Sinabi pa niya: “Mayo nin iba pa sa bilog na walong taon na idto an nagkaigwa nin arog kaiyan kadakulang epekto sa sako.” Imahinara na sana kun gurano kaugma an agom kan paraataman nin sirkito kan maresibi niya an surat na iyan “pakalihis nin dakul na aldaw”! Arog niya, tibaad haloy na panahon an maglihis bago kita makaresibi nin mga ekspresyon nin pasasalamat sa ginibo tang tabang.

21. Taano ta determinado kang padagos na arugon an pagkamatinao ni Jehova?

²¹ Arog kan sinambit, linalang kita ni Jehova na igwa nin sarong espesyal na kakayahan. Dawa ngani ikinakaugma ta an pag-ako, nakakakua kita nin mas urog na kaugmahan pag kita nagtatao. Marahay man sa pagmati pag nakakatabang kita sa satong mga kapagtubod. Asin maugma kita pag ipinapahiling nindang inaapresyar ninda an ginigibo ta. Alagad, magpahiling man sinda nin apresasyon o dai, maugma kita huling ginibo ta kun ano an tama. Nungkang paglingawan na ano man an saimong itinao, “kaya kang tawan ni Jehova nin mas labi pa kaiyan.” (2 Cron. 25:9) An kayang itao ni Jehova pirming mas labi kisa sa kaya tang itao! Asin mayo nang mas dakulang kaugmahan pag mismong si Jehova an magtao sa sato nin balos. Kaya lugod na magin determinado kita na padagos na arugon an satong matinaong Ama sa langit.