1-2. Taano ta maugma an mga lingkod nin Diyos? (Santiago 1:​22-25)

 GUSTO ni Jehova asin kan saiyang namumutan na Aki na magin maugma kita. An kagsurat kan Salmo 119:2 nagsabi: “Maugma an mga nagsusunod sa mga pagirumdom niya, na bilog na pusong naghahanap sa saiya.” Nagtao si Jesus nin urog pang asigurasyon na sinasabi: “Maugma an mga nagdadangog kan tataramon nin Diyos asin nag-uutob kaiyan!”—Luc. 11:28.

² Bilang mga parasamba ni Jehova, maugmang mga tawo kita. Taano? Dakul kita nin dahilan, pero an sarong importanteng dahilan iyo na aroaldaw tang binabasa an Tataramon nin Diyos asin ginigibo ta an satong pinakamakakaya na iaplikar an satong mga nanunudan.​—Basahon an Santiago 1:​22-25.

3. Ano an mga pakinabang pag inaaplikar niyato an mga binabasa ta sa Tataramon nin Diyos?

³ May nagkapirang pakinabang sa sato an ‘pagigin mga parautob niyato kan tataramon.’ An saro iyo na aram niyato na mahalaga iyan tanganing mapaugma ta si Jehova. Pag aram tang ginigibo ta iyan, nagigin maugma man kita. (Ecl. 12:13) Mantang inaaplikar ta an satong mga binabasa sa ipinasabong na Tataramon nin Diyos, nagigin mas marahay an relasyon ta sa satong pamilya asin sa satong mga kapagtubod. Posibleng marhay na napatunayan mo na iyan sa saimong buhay. Dugang pa, nalilikayan niyato an dakul sa mga problemang minaabot sa mga dai nagsusunod sa mga pagbuot ni Jehova. Iyo, uyon nanggad kita ki Hading David. Pagkatapos niyang sambiton sa kanta an manungod sa katugunan, mga pagbuot, asin mga paghukom ni Jehova, nasabi niya: “Sa pag-utob sa mga iyan, igwang dakulang balos.”​—Sal. 19:​7-11.

4. Taano ta bako pirming pasil na magin mga parautob kan Tataramon nin Diyos?

⁴ Bako pirming pasil na magin mga parautob kan Tataramon nin Diyos. Dawa sibot kita, kaipuhan tang magtao nin panahon na basahon asin pag-adalan an Bibliya para masabutan kun ano an gusto  ni Jehova na gibuhon ta. Kaya pag-ulayan niyato an nagkapirang suhestiyon na makakatabang sa sato na aroaldaw na basahon iyan. Pag-uulayan ta man kun ano an makakatabang sa sato na isip-isipon an mga binabasa ta asin aaramon niyato kun paano ta iaaplikar sa satong buhay an mga nanunudan ta.

MAGTAGAMA NIN PANAHON PARA BASAHON AN TATARAMON NIN DIYOS

5. Sa ano ta nagagamit an dakul sa panahon niyato?

⁵ An kadaklan sa mga lingkod ni Jehova sibot-sibot sa aroaldaw. Dakul na oras an ginagamit ta sa pag-asikaso sa manlain-lain na suno sa Kasuratan na mga responsabilidad. Halimbawa, an kadaklan sa sato nagtatrabaho para sustentuhan an satong sadiri saka an satong pamilya. (1 Tim. 5:8) Dakul na Kristiyano an may inaasikasong mga kapamilyang may hilang o may edad na. Saka gabos kita kaipuhan na atamanon an sato mismong salud, asin nangangaipo man iyan nin panahon. Apuwera sa mga responsabilidad na iyan, may mga asignasyon man kita sa kongregasyon. An sarong mahalagang paninimbagan niyato iyo na maigot na makikabtang sa gibuhon na paghuhulit. Sa kadakulan kan mga obligasyon na igwa ka, paano ka magkakaigwa kan panahon na aroaldaw na basahon an Bibliya, hurop-hurupon an mga nababasa mo, asin iaplikar iyan?

6. Paano mo gigibuhon na priyoridad an pagbasa nin Bibliya? (Hilingon man an ritrato.)

⁶ Para sa sato bilang mga Kristiyano, an pagbasa nin Bibliya saro sa “mas importanteng mga bagay,” kaya kaipuhan ta iyan na ipriyoridad. (Fil. 1:10) Manungod sa maugmang tawo, ini an sabi sa pinakainot na salmo: “An ikinakaugma niyang marhay iyo an katugunan ni Jehova, asin an Saiyang katugunan binabasa niya sa maluway na boses, aldaw asin banggi.” (Sal. 1:​1, 2) Malinaw na nangangahulugan iyan na kaipuhan tang magtagama nin panahon para sa siring na pagbasa. Nuarin an pinakamarahay na panahon para basahon an Bibliya? An simbag diyan tibaad magkakalain para sa lambang saro sa sato. Pero an mahalaga iyo na pilion mo an oras na magigibo mong mabasa iyan nin aroaldaw. Sarong brother na an pangaran Victor nagsabi: “Gusto kong nagbabasa nin Bibliya pag aga. Dawa ngani bako akong tuod magmata nin amay, mas dikit an puwedeng makadisturbo sa sako sa mga oras na  iyan. Klaro an isip ko saka mas nakakapagpokus ako.” Arog ka man daw kaiyan? Haputon an sadiri, ‘Nuarin an pinakamarahay na panahon para sa sako na magbasa nin Bibliya?’

HUROP-HURUPON AN SAIMONG BINABASA

7-8. Ano an tibaad makaulang sa sato na lubos na makinabang sa satong binabasa? Iilustrar.

⁷ Pero an totoo, tibaad regular kitang nagbabasa nin kadakul na materyal pero dai ta na man talaga iyan nahuhurop-hurop. Nangyari na daw saimo na may binasa ka dangan uruatyan lingaw ka na sa binasa mo? Gabos kita nakaeksperyensiya na kaiyan. Nakakamundo, puwede man iyan mangyari sa pagbasa ta nin Bibliya. Halimbawa, tibaad ginibo tang pasuhan na magbasa nin nagkapirang kapitulo aroaldaw. Kaumaw-umaw iyan. Dapat kitang magbugtak nin mga pasuhan asin hinguwahon na magibo iyan. (1 Cor. 9:26) Pero an pagbasa nin Bibliya, dawa ngani marahay man na diyan magpuon, kapinunan pa sana iyan. Urog pa an kaipuhan tanganing lubos kitang makinabang sa pagbasa kan Tataramon nin Diyos.

⁸ Pag-isipan an pagkumparar na ini: An tubig, na sa parati nasa pormang uran, mahalagang marhay sa mga pananom. Pero kun sobra-sobra man an uran sa halipot sanang panahon, dai na iyan makakayang supsupon gabos kan daga. Pag nangyari iyan, bako nang kapaki-pakinabang an dagdag pang uran. Kaipuhan kan daga nin panahon para masupsop an tubig tanganing magin kapaki-pakinabang iyan sa mga pananom. Sa kaagid na paagi, dapat tang likayan na maghidali pag nagbabasa nin Bibliya na, sa sobrang rikas, dai na lugod niyato nahuhurop-hurop, natatandaan, asin naiaaplikar an mga nababasa niyato.​—Sant. 1:24.

9. Ano an dapat tang gibuhon kun natuod kitang pinapasadahan sana an pagbasa nin Bibliya?

⁹ Kun minsan nangyari na daw sa saimo na garo mo lang pinapasadahan an pagbasa mo nin Bibliya? Ano an dapat mong gibuhon? Magluway-luway. Hinguwahon na pag-isipan an binabasa mo o an kakabasa mo pa lang. Dai man iyan kaipuhan na magin sobra kakomplikado. Kun arog kaiyan an naiisip mo manungod sa sadol na maghurop-hurop, tibaad puwede mong mansayon an paghurop-hurop bilang pag-isip-isip man sana sa binasa mo. Tibaad puwede mong dagdagan an lawig kan pag-adal mo tanganing  iiba diyan an pag-isip-isip, o paghurop-hurop. Sa ibong na lado, puwede mo man bawasan an binabasa mong mga teksto asin gamiton an natatadang oras para isip-isipon an binasa mo. “Halipot lang an ginigibo kong pagbasa nin Bibliya, mga sarong kapitulo,” an sabi ni Victor na sinambit kasubago. “Dahil nagbabasa ako nin amay kada aga, nagigibo kong hurop-hurupon sa bilog na aldaw su binasa ko.” Ano man na pamamaagi an ginigibo mo, an mahalaga iyo na magbasa ka sa rikas na magpapagin posible na makinabang ka nin lubos sa binabasa mo.​—Sal. 119:97; hilingon an kahon na “ Mga Hapot na Dapat Pag-isipan.”

10. Iilustrar kun paano mo puwedeng iaplikar an saimong mga nanunudan. (1 Tesalonica 5:​17, 18)

¹⁰ Ano man an iskedyul mo sa pagbasa nin Bibliya asin gurano man iyan kalawig, siguraduhon na mag-isip nin mga paagi na maiaaplikar mo an mga nababasa mo. Mantang binabasa mo an sarong porsiyon kan Tataramon nin Diyos, haputon an sadiri, ‘Paano ko maiaaplikar an impormasyon na ini ngunyan o sa maabot?’ Para iilustrar, sabihon ta ngayang kaiba sa babasahon mo an 1 Tesalonica 5:​17, 18. (Basahon.) Pakabasa mo kan duwang bersikulong iyan, puwede kang magpundo nguna asin isip-isipon kun gurano ka kaparating mamibi asin kun gurano iyan kaudok. Puwede mo man na hurop-hurupon an mga bagay na ipinagpapasalamat mo. Tibaad magdesisyon kang pasalamatan si Jehova sa tulong espesipikong bagay. Maski pirang minuto lang nin arog kaiyan na pagpokus nin atensiyon sa binabasa mo, makakatabang na iyan na magin paradangog asin parautob ka kan Tataramon nin Diyos. Isipa na sana kun gurano ka makikinabang kun gigibuhon mo iyan aroaldaw sa kada matapos mong basahon an iba pang mga porsiyon kan Bibliya! Iyo, lalo kang magigin sarong parautob kan Tataramon nin Diyos. Pero, paano kun garo baga dakulon kang kaipuhan na pauswagon?

GUMIBO NIN RASONABLENG MGA PASUHAN

11. Taano ta tibaad mamatian mo kun minsan na garo dai mo kayang gibuhon an gabos na kaipuhan mong pauswagon? Magtao nin halimbawa.

¹¹ Mantang nagbabasa ka nin Bibliya asin nag-iisip nin mga paagi kun paano mo iaaplikar an mga paggiya kaiyan, kun minsan tibaad mamatian mong dai mo iyan kayang gibuhon gabos. Pag-isipan an senaryong ini: Ngunyan ngaya kaiba sa babasahon mo sa Bibliya an manungod sa sadol laban sa pagpahiling nin paboritismo. (Sant. 2:​1-8) Nahiling mong may kaipuhan kang pauswagon sa bagay na ini, kaya nagdesisyon kang gumibo nin mga pagbabago. Mahusay! Dangan kan sunod na aldaw may nabasa kang teksto na nagduduon kan kahalagahan kan pagkontrol sa satong pagtaram. (Sant. 3:​1-12) Narealisar mo na kun minsan palan medyo negatibo an mga itinataram mo. Kaya nagdesisyon kang magigin mas positibo ka na saka nakakapakusog pag nakikipag-ulay sa iba. Kan suminunod na  man na aldaw kaiba sa pagbasa mo nin Bibliya an patanid laban sa pakikiamigo sa kinaban. (Sant. 4:​4-12) Narisa mo na kaipuhan mong magin mas mapamili kun dapit sa mga libangan mo. Kan ikaapat nang aldaw, tibaad mamatian mong garo dai mo kayang gibuhon an gabos na kaipuhan mong pauswagon.

12. Taano ta dai ka dapat madisganar kun sa pagbasa mo nin Bibliya mahiling mong dakul kang kaipuhan na pauswagon? (Hilingon man an nota sa ibaba.)

¹² Kun dakul kang kaipuhan na baguhon o pauswagon, dai madisganar. Ebidensiya iyan na marahay an kamugtakan kan saimong puso. An tawong mapakumbaba asin onesto sa sadiri nagbabasa kan Kasuratan sa katuyuhan na mahiling kun ano an mga kaipuhan niyang pauswagon. a Girumdumon man na an pagsulot kan “bagong personalidad” sarong nagpapadagos na proseso. (Col. 3:10; ikumparar an study note na “nagiging bago.”) Ano an makakatabang saimo na padagos na magin parautob kan Tataramon nin Diyos?

13. Paano ka mapili nin pira sana ngunang pasuhan? (Hilingon man an ritrato.)

¹³ Imbes na sarabay-sabayon na iaplikar an gabos na binabasa mo, pumili nin pira sana ngunang pasuhan. (Tal. 11:2) Purbaran ini: Ilista an gabos na kaipuhan mong pauswagon, dangan pumili nin saro o duwa diyan na iyo nguna an iinuton mo, tapos saka na man su mga nawalat. Sain ka dapat magpuon?

14. Sa anong mga pasuhan ka puwedeng magpuon?

¹⁴ Puwede kang magpuon sa sarong pasuhan na mas pasil sa saimong abuton. O tibaad inuton mo ngunang tawan nin atensiyon an sarong aspekto na para sa saimo pinakakaipuhan mong pauswagon. Pag nakapili ka na nin pasuhan, mag-research sa satong mga publikasyon, tibaad sa Watch Tower Publications Index o sa Giya sa Pag-research Para sa Mga Saksi ni Jehova. Ipamibi an manungod sa pasuhan mo, na hinahagad  ki Jehova na tawan ka kan “pagmawot saka kan kakayahan na gumibo.” (Fil. 2:13) Dangan hinguwahon na iaplikar an mga nanudan mo. Pag naaabot mo na an inot mong pasuhan, posibleng marhay na magigin mas motibado kang umabot nin saro pang pasuhan. Sa katunayan, pag napauswag mo na an sarong aspekto kan Kristiyanong pamumuhay o an sarong Kristiyanong kuwalidad, posible nanggad na magin mas pasil na saimo na gumibo nin iba pang mga pagbabago.

PABAYAAN AN TATARAMON NIN DIYOS NA ‘MAGKAIGWA NIN EPEKTO’ SA SAIMO

15. Taano ta napapalain an mga lingkod ni Jehova kumpara sa dakul na nagbabasa nin Bibliya? (1 Tesalonica 2:13)

¹⁵ May mga nagsasabi na dakul na beses na nindang nabasa an Bibliya. Pero talaga daw na nagtutubod sinda sa mga itinutukdo kan Bibliya? Iinaplikar na daw ninda iyan o tinugutan na magkaigwa nin epekto sa saindang buhay? Nakakamundo huling sa parati, dai. Kabaliktaran nanggad sa sainda an mga lingkod ni Jehova! Arog kan mga Kristiyano kan inot na siglo, inaako ta an Bibliya “sa kun ano talaga iyan, bilang tataramon nin Diyos.” Dugang pa, pinagmamaigutan tang ipahiling na igwa iyan nin epekto sa satong buhay.​—Basahon an 1 Tesalonica 2:13.

16. Ano an makakatabang sa sato na magin mga parautob kan Tataramon?

¹⁶ Bako pirming madali na basahon asin iaplikar an Tataramon nin Diyos. Tibaad masakitan kitang makahanap nin panahon para magbasa. O tibaad makaskason kitang magbasa kaya dai ta na lugod nahuhurop-hurop an satong mga binabasa. O tibaad mamatian tang dai ta kayang gibuhon an gabos na kaipuhan tang pauswagon. Ano man an tibaad nakakaulang sa saimo, may solusyon iyan. Sa tabang ni Jehova, makakayanan mo iyan. Lugod na magin determinado kita na akuon an saiyang tabang asin magin bakong mga paradangog na malilingawon kundi mga parautob kan Tataramon. Sigurado nanggad na mantang urog tang binabasa an Tataramon nin Diyos asin inaaplikar iyan, urog man kitang magigin maugma.​—Sant. 1:25.