Kapahayagan—An Mamuraway na Kulminasyon Kaiyan Harani Na

Kasumpay kan Kapitulo 24: Sarong Mahamis-Asin-Mapait na Mensahe

An Nabibiklad na Balumbon

15. Ano an isinabi ki Juan kan makosog na tingog hale sa langit asin kan makosog na anghel, asin ano an epekto ki Juan?

¹⁵ Mantang hinahalat ni Juan an pagpatanog kaining ikapitong trumpeta asin an pagtapos sa banal na hilom nin Dios, tinawan sia nin dagdag pang asignasyon: “Asin an tingog na sakong nadangog hale sa langit nakikipag-olay giraray sa sako asin nagsasabi: ‘Lakaw, kuana an nabibiklad na balumbon na yaon sa kamot kan anghel na nagtitindog sa dagat asin sa daga.’ Asin nagduman ako sa anghel asin sinabihan ko sia na itao sa sako an sadit na balumbon. Asin sia nagsabi sa sako: ‘Kuana asin kakana iyan, asin iyan mapapait kan saimong tulak, alagad sa saimong ngoso iyan magigin mahamis siring sa tangguli.’ Asin kinua ko an sadit na balumbon sa kamot kan anghel asin kinakan ko iyan, asin sa sakong ngoso iyan mahamis siring sa tangguli; alagad kan iyan makakan ko na, an sakong tulak nagin mapait. Asin sinda nagsarabi sa sako: ‘Kaipuhan na ika maghula liwat mapadapit sa mga banwaan asin mga nasyon asin mga tataramon patin dakol na hade.’ ”​—Kapahayagan 10:​8-11.

16. (a) Paano si propeta Ezequiel nagkaigwa nin eksperyensia na kaagid ki Juan? (b) Taano ta nagin mahamis ki Juan an sadit na balumbon, alagad taano ta idto mapait na tunawon?

¹⁶ An eksperyensia ni Juan nakaaagid kan ki propeta Ezequiel kaidtong saiyang pagkadistiyero sa daga nin Babilonya. Sia pinagbotan man na kumakan nin balumbon na mahamis sa saiyang ngoso. Alagad kan iyan makapano sa saiyang tulak, ginibo sia kaiyan na may paninimbagan na humula nin mapait na mga bagay para sa rebeldeng harong nin Israel. (Ezequiel 2:​8–​3:15) An nabibiklad na balumbon na itinao kan pinamuraway na si Jesu-Cristo ki Juan banal man na mensahe. Si Juan kaipuhan na maghulit mapadapit sa “mga banwaan asin mga nasyon asin mga tataramon patin dakol na hade.” An pagkakan sa balumbon na ini mahamis para sa saiya huli ta iyan gikan sa Dios. (Ikomparar an Salmo 119:​103; Jeremias 15:​15, 16.) Alagad nanompongan nia na iyan mapait na tunawon ta​—arog kaidto ki Ezequiel—​iyan naghuhula nin maraot na mga bagay para sa rebeldeng mga tawo.​—Salmo 145:20.

17. (a) Sairisay an nagsabi ki Juan na humula “liwat,” asin ano an kahulogan kaini? (b) Noarin nakatalaan na maotob an dramatikong paglaladawan na naheling ni Juan?

¹⁷ An mga nagsabi ki Juan na humula liwat daing duwa-duwa na si Jehova Dios asin si Jesu-Cristo. Si Juan, minsan ngani desterrado sa isla nin Patmos, naghula na manongod sa mga banwaan, nasyon, tataramon, asin hade paagi sa impormasyon na nasusurat na sa libro nin Kapahayagan. An terminong “liwat” nangangahulogan na kaipuhan na isurat asin ipublikar nia an natatada pang impormasyon na nasusurat sa libro nin Kapahayagan. Alagad girumdoma, digdi si Juan aktuwal na nagpapartisipar sa makahulang bisyon. An saiyang isinusurat, sa katotoohan, hula na maootob pakalihis kan 1914, kun an makosog na anghel tumindog na sa daga asin sa dagat. Kun siring, ano an kahulogan kan dramatikong paglaladawan na ini para sa grupong Juan ngonyan?

An Sadit na Balumbon Ngonyan

18. Sa kapinonan kan aldaw kan Kagurangnan, anong interes an ipinaheling kan grupong Juan sa libro nin Kapahayagan?

¹⁸ An naheling ni Juan nanganganinong gayo sa nagin eksperyensia kan grupong Juan sa kapinonan kan aldaw kan Kagurangnan. An pakasabot ninda sa mga katuyohan ni Jehova, pati an koneksion kan pitong dagoldol, bakong kompleto kaidto. Pero, may hararom na interes sinda sa Kapahayagan, asin si Charles Taze Russell nagkomento sa dakol na kabtang kaiyan kaidtong saiyang kapanahonan. Pagkagadan nia kan 1916, an dakol sa mga isinurat nia tinipon asin ipinublikar sa sarong libro na may titulong The Finished Mystery. Alagad, pag-abot nin panahon, an librong ini napatunayan na kulang pa bilang paliwanag sa Kapahayagan. An natatada sa mga tugang ni Cristo kaipuhan na maghalathalat pa, sagkod na pumoon na maotob an mga bisyon, para sa tamang pakasabot sa ipinasabong na rekord na iyan.

19. (a) Paano ginamit ni Jehova Dios an grupong Juan bago pa man lubos na napublikar an tingog kan pitong dagoldol? (b) Kasuarin itinao sa grupong Juan an nabibiklad na sadit na balumbon, asin ano an nagin kahulogan kaini para sa sainda?

¹⁹ Alagad, kapareho ni Juan, ginamit sinda ni Jehova bago pa man lubos na napublikar an tingog kan pitong dagoldol. Sinda maigot na naghulit sa laog nin 40 taon  bago 1914, asin naghingoa sindang magdanay na aktibo kaidtong enot na guerra mundial. Sinda an napatunayan na, kan dumatong an kagurangnan, nanompongan na nagtatao sa mga domestiko nin kakanon sa igong panahon. (Mateo 24:​45-47) Kaya, kan 1919 sinda an tinawan kan nabibiklad na sadit na balumbon​—an boot sabihon, bukas na mensahe na ihuhulit sa katawohan. Kapareho ni Ezequiel sinda may mensahe para sa sarong organisasyon na bakong maimbod​—an Kakristianohan—​na naghihingakong naglilingkod sa Dios, alagad, sa katotoohan, dai. Kapareho ni Juan sinda kaipuhan pang orog na maghulit manongod sa “mga banwaan asin mga nasyon asin mga tataramon patin dakol na hade.”

20. Ano an ilinadawan kan pagkakan ni Juan sa balumbon?

²⁰ An pagkakan ni Juan sa balumbon nagladawan na an asignasyon na ini inako kan mga tugang ni Jesus. Iyan nagin kabtang ninda sagkod na ngonyan sinda kaiba na kan kabtang na ini kan ipinasabong na Tataramon nin Dios, na nagkakakan dian. Alagad an kaipuhan nindang ihulit may laog na mga kapahayagan nin mga paghokom ni Jehova na bakong masiram para sa dakol na tawo. An totoo, kaiba dian an mga damat na ihinula sa Kapahayagan kapitulo 8. Alagad ta mahamis para sa sinserong mga Kristianong ini na maaraman an mga paghokom na iyan asin marealisar na sinda ginagamit liwat ni Jehova sa pagbalangibog kaiyan.​—Salmo 19:​9, 10.

21. (a) Paano an mensahe kan sadit na balumbon nagin mahamis man para sa dakulang kadaklan? (b) Taano an maogmang bareta ta maraot na bareta para sa mga arog-kanding?

²¹ Pag-abot nin panahon, an mensahe kan balumbon na ini nagin mahamis man sa “dakulang kadaklan . . . hale sa gabos na nasyon asin tribo asin banwaan patin tataramon” na nakuang nag-aagagha huli sa makababaldeng mga bagay na naheling nindang ginigibo sa Kakristianohan. (Kapahayagan 7:​9; Ezequiel 9:4) An mga ini man mahigos na nagbabalangibog kan maogmang bareta, na naggagamit nin mahamis, magagayon na tataramon sa paglaladawan kan makangangalas na probisyon ni Jehova para sa arog-karnerong mga Kristiano. (Salmo 37:​11, 29; Colosas 4:6) Alagad sa mga tawong arog-kanding, ini maraot na bareta. Taano? Iyan nangangahulogan na an palakaw na saindang sinasarigan​—asin tibaad nagtao pa ngani sainda nin temporaryong satispaksion​—kaipuhan na mawara. Para sa sainda, an maogmang bareta nangangahulogan nin kapahamakan.​—Mateo 25:​31-34, 41, 46; ikomparar an Deuteronomio 28:​15; 2 Corinto 2:​15, 16.

[Mga Hapot Para sa Pag-adal]